ഒരു ദലിത് സ്ത്രീയുടെ ശരീരസമരങ്ങള്‍
നല്ല ശരീരം എന്ന സമൂഹത്തിന്റെ സൗന്ദര്യശാസ്ത്ര കള്ളികളില്‍ പെടാത്തതിനാല്‍ ചെറുപ്പത്തില്‍, മാനസികവും ശാരീരികവുമായ വളര്‍ച്ചയുടെയും വികാസത്തിന്റെയും ഘട്ടത്തില്‍ ദിവസേന അധിക്ഷേപങ്ങള്‍ നേരിടേണ്ടി വന്നിട്ടുണ്ട്. ആ ദുരനുഭവങ്ങള്‍ സ്വന്തം ശരീരത്തെക്കുറിച്ചുള്ള എന്റെ അഭിപ്രായ രൂപീകരണത്തെ വളരെയധികം സ്വാധീനിച്ചിട്ടുമുണ്ട്- അലീന എഴുതുന്നു
നല്ല ശരീരം എന്ന സമൂഹത്തിന്റെ സൗന്ദര്യശാസ്ത്ര കള്ളികളില്‍ പെടാത്തതിനാല്‍ ചെറുപ്പത്തില്‍, മാനസികവും ശാരീരികവുമായ വളര്‍ച്ചയുടെയും വികാസത്തിന്റെയും ഘട്ടത്തില്‍ ദിവസേന അധിക്ഷേപങ്ങള്‍ നേരിടേണ്ടി വന്നിട്ടുണ്ട്. ആ ദുരനുഭവങ്ങള്‍ സ്വന്തം ശരീരത്തെക്കുറിച്ചുള്ള എന്റെ അഭിപ്രായ രൂപീകരണത്തെ വളരെയധികം സ്വാധീനിച്ചിട്ടുമുണ്ട്. എന്നെപ്പോലെ കറുത്ത നിറമുള്ള ഒരാളെയും സൗന്ദര്യത്തിന്റെയോ ആത്മവിശ്വാസത്തിന്റെയോ പ്രതീകമായി ദൃശ്യമാധ്യമങ്ങളില്‍ ഒരിടത്തും ഞാന്‍ കണ്ടിട്ടുണ്ടായിരുന്നില്ല. പകരം കറുപ്പുമായി ദുഷ്ടതയെയും പൈശാചികതയെയും ബന്ധിപ്പിക്കുന്ന പ്രതീകങ്ങളായിരുന്നു എല്ലായിടത്തും- ട്രൂ കോപ്പി വെബ്‌സീനില്‍ അലീന എഴുതുന്നു.
എന്നെപ്പോലത്തെ സ്ത്രീകള്‍ മോഷ്ടിക്കുന്നവരോ, കുഞ്ഞുങ്ങളെ തട്ടിക്കൊണ്ടു പോകുന്നവരോ, കുടുംബ നാഥന്മാരായ സല്പുരുഷന്മാരെ വശീകരിക്കാന്‍ വൃഥാ ശ്രമിക്കുന്ന അമിത ലൈംഗികാവേശമുള്ള ശൂര്‍പ്പണഖമാരായോ മാത്രം സ്ഥിരമായി കണ്ട് ഞാന്‍ ലജ്ജിച്ചു. ഇതിന്റെയെല്ലാം ഫലമായി ഉണ്ടായ ആത്മവിശ്വാസക്കുറവ് വളരെ വൈകിയാണ് പരിഹരിക്കപ്പെട്ടതും. ഈ നിറം കൊണ്ടും ശരീരപ്രകൃതി കൊണ്ടും പല അവസരങ്ങളും നഷ്ടമായിട്ടുണ്ട്. ഇപ്പോഴും ഇന്ത്യന്‍ കോസ്മെറ്റിക് മാര്‍ക്കറ്റില്‍ എന്റെ നിറത്തിനു ചേരുന്ന പ്രോഡക്റ്റുകള്‍ വളരെ കുറവാണ്. ഇന്ത്യന്‍ നിറമായി എന്റെ നിറത്തെ കോര്‍പ്പറേറ്റുകള്‍ പൊതുവെ പരിഗണിക്കാറില്ല. കളറിസത്തെ എതിര്‍ത്തു നില കൊള്ളുന്നതിനെക്കാള്‍ അതിന് വളം വെച്ചു കൊടുക്കുന്നതാണ് ഇന്ത്യന്‍ സാഹചര്യത്തില്‍ ലാഭകരം എന്ന് അവര്‍ മനസിലാക്കുന്നു.
എന്ത് വസ്ത്രം ധരിക്കണം എന്നതില്‍ തുടങ്ങി ജീവന്‍ നിലനിര്‍ത്താന്‍ എന്ത് ചികിത്സ തേടണം എന്നതില്‍ വരെ ഒരു വ്യക്തിയെക്കാള്‍ അയാളുടെ ശരീരത്തില്‍ അധികാരം കയ്യാളുന്നത് സമൂഹമാണ്. ഈ സമൂഹത്തിന് ചാലകശക്തിയാകുന്നത് പിതൃമേധാവിത്വ - മുതലാളിത്ത-ചാതുര്‍വര്‍ണ്യ വ്യവസ്ഥ പ്രകാരമുള്ള അടിച്ചമര്‍ത്തല്‍ പ്രക്രിയകളാണ്. വിവാഹബന്ധങ്ങള്‍, കുടുംബം, മതം എന്നിങ്ങനെയുള്ള സ്ഥാപനങ്ങള്‍ വഴിയാണ് ഈ ശക്തികള്‍ നേരിട്ടും അല്ലാതെയും അവരുടെ അധികാരം നിലനിര്‍ത്തുകയും അനുഷ്ഠിക്കുകയും ചെയ്യുന്നത്. സമൂഹത്തിലെ ഓരോ അംഗവും അറിഞ്ഞോ അറിയാതെയോ ഈ പ്രക്രിയയില്‍ ദിനംപ്രതി ഭാഗഭാക്കാകുന്നു. ഒരു കുടുംബത്തിലെ രക്തബന്ധമുള്ള അംഗങ്ങള്‍ തമ്മില്‍ നിലനില്‍ക്കുന്ന അധികാര അസന്തുലിതാവസ്ഥയുടെ പ്രകടനങ്ങളായ നിയന്ത്രണങ്ങള്‍ മുതല്‍ സോഷ്യല്‍ മീഡിയയിലെ അവഹേളനപരമായ അഭിപ്രായ പ്രദര്‍ശനങ്ങള്‍ വരെ നീണ്ടുനില്‍ക്കുന്നതാണ് ഈ പ്രക്രിയ. ഈ അധികാരവ്യവസ്ഥകളുടെ മര്‍ദ്ദകശക്തി വ്യക്തികളുടെ ലിംഗപദവി, ജാതി, നിറം, വര്‍ഗ്ഗം, ലൈംഗികത്വം എന്നിവയനുസരിച്ച് ഏറിയും കുറഞ്ഞുമിരിക്കും. എന്തുതന്നെയായാലും ആത്യന്തികമായി ഇവയെല്ലാം ലക്ഷ്യം വെക്കുന്നത് ശരീരങ്ങളുടെ നിയന്ത്രണത്തെയും തത്ഫലമായി സമൂഹത്തിന്റെ നിലനില്‍പ്പിനെയുമാണ്. പല തലങ്ങളിലായി പ്രതിഷ്ഠിക്കപ്പെട്ടിരിക്കുന്ന ശരീരങ്ങള്‍ അവയില്‍ നിന്നും പ്രതീക്ഷിക്കപ്പെടുന്നതുപോലെ പെരുമാറിയാല്‍ മാത്രമേ സമൂഹത്തിന് നമ്മളിന്ന് കാണുന്നതുപോലെ സ്ഥിതി ചെയ്യാന്‍ കഴിയൂ. പല അടുക്കുകളിലായി അടിച്ചമര്‍ത്തല്‍ നേരിടുന്ന എന്റേതുപോലെയുള്ള ഒരു ശരീരത്തിന് ഈ വ്യവസ്ഥകളുടെ നടുവില്‍ സ്വയം പരമാധികാരം പ്രയോഗിക്കാന്‍ നേരിടേണ്ടി വരുന്ന പ്രതിബന്ധങ്ങള്‍ സ്വാഭാവികമായും കഠിനമായിരിക്കും. അതിനെ പൂര്‍ണ്ണ അര്‍ത്ഥത്തില്‍ മനസ്സിലാക്കിയും ഉള്‍ക്കൊണ്ടുമാണ് സ്വന്തം ശരീരത്തെയും അതിന്റെ അസ്തിത്വത്തെയും ഒരു സമരമായി ഞാന്‍ കാണുന്നത്.
ഇത്തരം ദുഷിച്ച യാഥാര്‍ത്ഥ്യങ്ങളുടെ നടുവിലും എന്റെ ശരീരം എനിക്ക് വിലപ്പെട്ടതാണ്. എന്റെ പൂര്‍വ്വികരുടെ സവിശേഷതകളാണ് തലമുറകളായി ജീനുകളിലൂടെ കൈമാറ്റം ചെയ്യപ്പെട്ട് എനിക്ക് കിട്ടിയിരിക്കുന്നത്. ഇന്ത്യയെ ജീവന്‍ പോലും വെടിഞ്ഞ് ഈ രീതിയില്‍ പണിതുയര്‍ത്തിയവരുടെ കണ്ണ്, മൂക്ക്, പല്ല്, മുടി, നിറം. എന്റെ കറുത്ത മുതുമുത്തശ്ശിമാരുടെ ബലിഷ്ഠമായ ചുമലുകളാണ് ഈ നാട്ടിലെ ഭാരമുള്ള കഥകളെയൊക്കെ താങ്ങി നിര്‍ത്തിയത്. അവരുടെ ശക്തിയുടെ പാരമ്പര്യം കുടികൊള്ളുന്ന എന്റെ ശരീരത്തില്‍ ഞാന്‍ ആത്യന്തികമായ ആത്മീയതയുടെ ആനന്ദം അനുഭവിക്കുന്നു
കീഴ്ജാതിക്കാരായ സ്ത്രീകളെ ഖാപ് പഞ്ചായത്തുകള്‍ നഗ്നരാക്കി നടത്തുന്നതും അവരുടെ ശരീരത്തിനുമേല്‍ കര്‍തൃത്വം നടത്തുന്നതുമായ ആധുനിക ഇന്ത്യയിലാണ് കീഴ്ജാതിക്കാരിയായ ഞാന്‍ എന്റെ ശരീരത്തിന്റെ അസ്തിത്വത്തെ സാധൂകരിക്കാനുള്ള ശ്രമങ്ങളില്‍ ഏര്‍പ്പെടുന്നത്. കീഴാള സ്ത്രീയെ ഏറ്റവും സമീപ കാലത്തുള്ള നോവലുകളിലും സിനിമകളിലും പോലും അമിത ലൈംഗികാവേശമുള്ള ശരീരങ്ങളാക്കി പ്രതിഷ്ഠിക്കുന്നു. അങ്ങനെ അവളുടെ ശരീരത്തിനു നേരേ ഉണ്ടാവുന്ന അതിക്രമങ്ങള്‍ നീതീകരിക്കപ്പെടുന്നു. ഇതിനെ പ്രതിരോധിക്കാന്‍ ദലിത് സ്ത്രീകള്‍ ‘കുലസ്ത്രീകള്‍' ആയി അഭിനയിക്കണം എന്ന അഭിപ്രായമുള്ളവരുണ്ട്. എന്നാല്‍ അത് ശരിയായ ഒരു നടപടി ആണെന്ന് എനിക്ക് തോന്നിയിട്ടില്ല. കാരണം എത്ര കുലസ്ത്രീ ആയി അഭിനയിച്ചാലും നമ്മളുടെ കുലം ഇന്നതാണ് എന്ന് സമൂഹം അറിയുന്നിടത്തോളം കാലം അവരുടെ മാനദണ്ഡം അനുസരിച്ചുള്ള ഒരു കുലസ്ത്രീ ആകാന്‍ നമുക്ക് കഴിയുകയില്ല.
എം. കുഞ്ഞാമൻ
Jan 26, 2023
10 Minutes Read
കമൽ കെ.എം.
Jan 25, 2023
3 Minutes Read
സൈനുൽ ആബിദ്
Jan 13, 2023
3 Minutes Read
ഇ.എ. സലീം
Jan 12, 2023
9 Minutes Watch
എം.സുല്ഫത്ത്
Jan 12, 2023
10 Minutes Read
