അനിവാര്യമായ കിരീടം മെസ്സി നേടുക തന്നെ ചെയ്​തു

എന്തുകൊണ്ടാണ് അര്‍ജന്റീനക്കും ലയണല്‍ മെസ്സിക്കും കോപ്പ അമേരിക്ക കിരീടം അനിവാര്യമായിരുന്നത്? മെസ്സിയുടെ കാലഘട്ടത്തിലെ ഏറ്റവും മികച്ച കളിക്കാരന്‍ മെസ്സി തന്നെയാണ്. അതുകൊണ്ടുതന്നെ സ്വന്തം രാജ്യത്തിനുവേണ്ടി ഒരു കിരീടം നേടുക എന്നത് അദ്ദേഹത്തിന്റെ കളിജീവിതത്തിന്റെ അനിവാര്യതയായിരുന്നു. ഇത് അദ്ദേഹത്തിന് ഒരേസമയം ദുര്‍വിധിയും വിധിയുമായി.

കോപ്പ അമേരിക്ക ഫൈനല്‍ അതുകൊണ്ടുതന്നെ അദ്ദേഹത്തിന് വലിയ സമ്മര്‍ദം കൂടിയായിരുന്നു. അതേസമയം, മറുവശത്ത് ബ്രസീലിന്റെ നെയ്മറിന് ഒരു കിരീടഭാരമില്ലാതെ കളിക്കാന്‍ കഴിഞ്ഞു. ഫൈനലില്‍ മെസ്സി തന്ത്രപരമായി പിന്‍വലിഞ്ഞ് കളിച്ചത് അദ്ദേഹത്തിന് ഗുണപരമായി, ഒരര്‍ഥത്തില്‍. അസിസ്റ്റ് ചെയ്യുന്നതിലാണ് അദ്ദേഹം ജാഗ്രത കാട്ടിയത്. അതേസമയം, മുന്നേറ്റ നിരക്കാരന്‍ എന്ന നിലയ്ക്ക് അദ്ദേഹത്തിന് കിട്ടിയ ചാന്‍സ് ഉപയോഗിക്കാന്‍ കഴിഞ്ഞില്ല എന്നത് യാഥാര്‍ഥ്യമാണ്. മെസ്സി അത് പാഴാക്കി. അദ്ദേഹം ആ ഗോള്‍ നേടിയിരുന്നുവെങ്കില്‍ ആ യശസ്സ് കൂടിയേനേ. മുമ്പില്‍ വന്ന തുറന്ന അവസരം ഗോളാക്കാന്‍ കഴിയാതെ പോയി. അതേസമയം, എയ്ഞ്ചല്‍ ഡി മരിയയെ മുന്നില്‍നിര്‍ത്തി കളിപ്പിച്ചത് ടീമിന് ഗുണകരമാകുകയും ചെയ്തു.

ബ്രസീല്‍ ടീമിന് കളിച്ചുവളരാന്‍ ഇനിയും സമയമുണ്ട്. മെസ്സിയുടെ വിജയം അര്‍ജന്റീനക്ക് അടുത്ത ലോകകപ്പില്‍ വലിയ സാധ്യതകള്‍ തുറന്നിടുകയാണ്- പ്രമുഖ സ്‌പോര്‍ട്‌സ് ലേഖകനും മാധ്യമപ്രവര്‍ത്തകനുമായ എം.പി. സുരേന്ദ്രന്‍ ഇന്ന് രാവിലെ നടന്ന കോപ്പ അമേരിക്ക ഫൈനലിലെ അര്‍ജന്റീനയുടെ കിരീടനേട്ടം വിലയിരുത്തുന്നു.