ചോദിച്ചത്​ പത്തുവർഷത്തെ എന്റെ മുഴുവൻ ചരിത്രം, ഇപ്പോള്‍ ഇ.ഡിയാണ് വെട്ടില്‍

​ഇ.ഡിയുടെ വാരിവലിച്ചുള്ള ഈ അന്വേഷണം ഡല്‍ഹിയില്‍ ഇരിക്കുന്ന ആരെയോ ബോധിപ്പിക്കാന്‍ വേണ്ടി മാത്രമാണെന്ന് മുന്‍ ധനകാര്യമന്ത്രി ഡോ. തോമസ് ഐസക്ക്. ഫെമ നിയമ ലംഘനത്തിന് താന്‍ എങ്ങനെ ഉത്തരവാദിയാകുമെന്നും, ഇതിന്റെ പേരില്‍ പത്ത് വര്‍ഷം മുമ്പുള്ള വ്യക്തിഗത വിവരങ്ങള്‍ എന്തിന് പരിശോദിക്കണമെന്നുമാണ് കോടതിയില്‍ ചോദിച്ചത് - തോമസ് ഐസക്ക് പറഞ്ഞു. ഫെമ നിയമ ലംഘനം അന്വേഷിക്കേണ്ടത് ആര്‍ബിഐ ആണ്, ഇ.ഡിയല്ല. യഥാര്‍ഥത്തില്‍ ഇപ്പോള്‍ ഇ.ഡിയാണ് വെട്ടിലായിരിക്കുന്നതെന്നും അദ്ദേഹം പറഞ്ഞു. ട്രൂകോപ്പി തിങ്ക് അസോസിയേറ്റ് എഡിറ്റര്‍ ടി.എം. ഹര്‍ഷനുമായുള്ള അഭിമുഖത്തിനിടെയായിരുന്നു തോമസ് ഐസക്കിന്റെ പ്രതികരണം. 

""എന്താണ് ഇദ്ദേഹത്തിന്റെ പേരിലുള്ള കുറ്റം എന്ന കോടതിയുടെ ചോദ്യത്തിന്, ഏതെങ്കിലും ഒരു കേസില്‍ പ്രതിചേര്‍ക്കുകയോ കുറ്റക്കാരനാണെന്നു പറയുകയോ ചെയ്തിട്ടില്ല എന്നായിരുന്നു ഇ.ഡിയുടെ മറുപടി. അങ്ങനെയെങ്കില്‍ ഈ ഘട്ടത്തില്‍  ഇത്രയേറെ വ്യക്തിഗത വിവരങ്ങള്‍ അന്വേഷിക്കണ്ട കാര്യമെന്ത് എന്ന് കോടതി ചോദിച്ചു.

പത്ത് വര്‍ഷത്തെ തന്റെ മുഴുവന്‍ ചരിത്രമാണ് ഇ.ഡി ചോദിച്ചത്, ഭാര്യയും മക്കളുമടക്കമുള്ളവരുടെ സാമ്പത്തിക വിവരങ്ങള്‍, സ്ഥാപക ജംഗമ വസ്തുക്കള്‍, ക്ലോസ് ചെയ്ത അക്കൗണ്ടിന്റെ വിവരങ്ങള്‍, താന്‍ ഡയറക്ടര്‍ ആയിരുന്ന കമ്പനികളുടെ മുഴുവന്‍ അക്കൗണ്ടുകള്‍. ഇതൊക്കെ ഇഡിക്ക് എന്തിനാണ് ?. നമ്മളെ ഹരാസ് ചെയ്യുക എന്നതായിരുന്നു അവരുടെ ലക്ഷ്യം ഒപ്പം തങ്ങള്‍ എന്തെങ്കിലുമൊക്കെ ചെയ്യുന്നുണ്ട് എന്ന് ഡല്‍ഹിയില്‍ ബോധിപ്പിക്കുക കൂടി വേണമായിരുന്നു.'' തോമസ് ഐസക് പറഞ്ഞു.

ALSO READ

ഗവർണറുടെ സ്വയംസേവ , രാഹുലിന്റെ പദയാത്ര, കോൺഗ്രസിന്റെ മൃദു ഹിന്ദുത്വ

ഇ.ഡി ഫെമ ലംഘനത്തിനാണ് കേസ് ചര്‍ജ്ജ് ചെയ്തിരിക്കുന്നത്. ഫെമ ലംഘനമാണ് വിഷയമെങ്കില്‍ അത് പറയേണ്ട അതോറിറ്റി ആര്‍ബിഐ ആണ്. അതു കൊണ്ടാണിപ്പോള്‍ കോടതി ആര്‍.ബി.ഐയെ വിളിപ്പിച്ചത്. ഇഡി വിളിച്ചാല്‍  ചെല്ലില്ല എന്ന വാശിയല്ല തന്റെ പ്രതികരണത്തിനു പിന്നിലെ കാരണമെന്നും തോമസ് ഐസക് വ്യക്തമാക്കി. നോട്ടീസ് അയച്ചു, ഹാജരാവണം എന്ന് താന്‍ അറിയുന്നത് പത്രവാര്‍ത്തകളിലൂടെയാണ്. അന്വേഷണ ഏജന്‍സി നോട്ടീസ് കൊടുക്കേണ്ടത് പത്രത്തിനല്ലല്ലോ. അങ്ങനെയല്ലല്ലോ പ്രതിയോടോ, സമന്‍സ് അയക്കുന്ന ആളോടോ കാര്യം പറയേണ്ടത്. അതാണ് രൂക്ഷമായി പ്രതികരിക്കാന്‍ കാരണമെന്നും ഐസക്ക് പറഞ്ഞു. 

""ഒരു പൗരന്‍ എന്ന നിലയില്‍ എനിക്ക് ഭരണഘടന തരുന്ന അവകാശം ഉണ്ട്, അത് സ്വകാര്യതയുടെ അവകാശമാണ്. കേസില്ലാന്നൊരു വാദം പറയുകയും എല്ലാ വിവരങ്ങളും വേണമെന്ന് പറയുകയും ചെയ്തത് എന്ത് അടിസ്ഥാനത്തിലായിരുന്നു. എന്നെ പാഠം പഠിപ്പിക്കാനാണേല്‍ അത് നടക്കില്ല, അതു കൊണ്ടാണ് കോടതിയില്‍ പോയത്. അതല്ലായിരുന്നുവെങ്കില്‍ അന്വേഷണ ഏജന്‍സി വിളിപ്പിച്ചാല്‍ പോകണം എന്നു തന്നെയാണ് എന്റെ അഭിപ്രായം. പോകാന്‍ ഞാന്‍ തയ്യാറുമാണ്.'' തോമസ് ഐസക് ട്രൂകോപ്പിയോട് പറഞ്ഞു.