ശാന്തേ സൗമ്യേ ശാലീനേ ശ്രീലോലേ വീടിന്‍ സൗഭാഗ്യം നീയേ നീയേ എന്ന പാട്ടില്‍ തുടങ്ങി മൂത്തോര് ചൊല്ലണ കേട്ടിട്ട് മണ്ടകുനിച്ച് കൊടുത്തില്ലേ എന്ന പാട്ടിലേക്കെത്തുന്ന സിനിമയാണ് ജയ ജയ ജയ ജയഹേ. ഒരു പാട്രിയാര്‍ക്കി ഫാമിലിയുടെ കാരിക്കേച്ചര്‍. ഗ്രേറ്റ് ഇന്ത്യന്‍ കിച്ചണ്‍ നമ്മള്‍ കണ്ടിട്ടുണ്ട്, ഥപ്പഡും കെട്ട്യോളാണെന്റെ മാലാഖയും കണ്ടിട്ടുണ്ട്. പക്ഷേ ജയ ജയ ജയ ജയഹേ കൂറേക്കൂടി ഫണ്‍ ആണ്. ആദ്യാവസാനം തമാശ ചോര്‍ന്ന് പോവാത്ത ഒരു ഫാമിലി ഡ്രാമ.

കൊല്ലം ജില്ലയില്‍ കശുവണ്ടി ഫാക്ടറിയുമായി ബന്ധപ്പെട്ട് ജീവിക്കുന്ന ഒരു സാധാരണ കുടുംബത്തിലാണ് ജയ ജനിക്കുന്നത്. വളരെ "സാധാരണമായി' തന്നെ ജയ വളരുന്നു. ആണുങ്ങളെ പോലെ വളരാതിരിക്കാന്‍ കാത് കുത്തിക്കൊടുക്കുന്നു, മരം കേറ്റാന്‍ വിടാതെ അച്ചടക്കത്തോടെ വളര്‍ത്തുന്നു. എല്ലാം സാധാരണം തന്നെ. പക്ഷേ ജയയ്ക്ക് ഇവയൊക്കെ സാധാരണയായി തോന്നുന്നില്ല. ജയയ്‌ക്കൊപ്പം പ്രേക്ഷകരെക്കൂടി ഈ അസാധാരണത്വം ഫീല്‍ ചെയ്യിക്കാനാവുന്നുണ്ട് എന്നിടത്ത് ജയ ജയ ജയ ജയഹേ വിജയിക്കുന്നു.

ഒരു പെണ്‍കുട്ടി ജനിച്ചത് മുതല്‍ ജീവിതത്തില്‍ ഉടനീളം നേരിടുന്ന വിവേചനങ്ങള്‍  എടുത്ത് കാണിക്കാന്‍ സിനിമ ശ്രമിക്കുന്നുണ്ട്. ജീവിതത്തിന്റെ ഓരോ ഘട്ടം കഴിയുമ്പോഴും ദുരിതം കഴിഞ്ഞു എന്ന് ജയ കരുതുന്നു. കല്ല്യാണം കഴിഞ്ഞ് കാറില്‍ കയറി വരന്റെ വീട്ടിലേക്ക് പുറപ്പട്ടതിന് ശേഷം സ്വന്തം വീട്ടിലേക്ക് തിരിഞ്ഞുനോക്കി ജയയുടെ മുഖത്ത് അപൂര്‍വമായി വരാറുള്ള പുഞ്ചിരി വിടരുന്നുണ്ട്. എന്നാല്‍ വരന്റെ വീട്ടിലേക്ക് കാലെടുത്തുവച്ചപ്പൊ തന്നെ ആ പുഞ്ചിരി മാറുന്നുണ്ട്. ദുരിതജീവിതം ജയയെ പിന്തുടരുകയാണ്.

ALSO READ

മലയാളത്തിലെ ഏറ്റവും മികച്ച സൈക്കൊ ത്രില്ലർ നരസിംഹമാണ്

പറയാനുദ്ദേശിച്ച ആശയം പ്രേക്ഷകരിലെത്തിക്കാനായതും നന്നായി വര്‍ക്ക് ഔട്ട് ആയ തമാശയുമാണ് ഈ ചിത്രത്തിന്റെ ടേക്ക് എവേ. ചിത്രത്തിലുടനീളം ഒരു സ്‌കിറ്റ്/കാരിക്കേച്ചര്‍ രീതിയാണ് കഥ പറയാനുപയോഗിച്ചിരിക്കുന്നത്. ഇത് സിനിമയിലെ തമാശകള്‍ക്ക് ഒരു ലിഫ്റ്റ് നല്‍കുന്നുണ്ടെങ്കിലും ചിലയിടത്ത് ഇത് കണക്ട് ആവാതെ പോവുന്നുണ്ട്. വിഷയങ്ങള്‍ ലൗഡ് ആയിട്ടാണ് ചിത്രത്തില്‍ അവതരിപ്പിച്ചിട്ടുള്ളത്. ആദ്യം സറ്റിലായിട്ട് തന്നെ കാര്യങ്ങള്‍ കാണിക്കും, തൊട്ടടുത്ത സീനുകളില്‍ അതിന്റെ ലൗഡ് ആയ വിശദീകരണവും. ഇത് ഒരു രസമില്ലാത്ത പരിപാടിയാണ്.

ബേസില്‍ ജോസഫ് നെഗറ്റീവ് ഷേഡുള്ള കഥാപാത്രം ചെയ്യുന്നു എന്നത് കൗതുകമുണ്ടാക്കുന്ന കാര്യമാണ്. "കലിപ്പനായ', "കേശവമ്മാവന്‍' സ്വഭാവമുള്ള രാജേഷ് ആയി ബേസില്‍ ജോസഫിന്റെ വ്യത്യസ്തമായ കഥാപാത്രമാണ് ചിത്രത്തിലുള്ളത്. ചിത്രത്തിന്റെ കോമഡി മൂഡ് നിലനിര്‍ത്തി കൊണ്ടുപോവുന്നതില്‍ ബേസില്‍ ജോസഫ് നിര്‍ണായക പങ്കുവഹിക്കുന്നു.

വിവിധ പ്രായങ്ങളിലും വിവിധ ഭാവങ്ങളിലുമാണ് ജയയുടെ കഥാപാത്രം. എല്ലാത്തിലേക്കും അനായാസം ഒഴുകിക്കയറാന്‍ ദര്‍ശന രാജേന്ദ്രന് സാധിച്ചിട്ടുണ്ട്.

സുധീര്‍ പറവൂര്‍, അസീസ് നെടുമങ്ങാട് എന്നിവരാണ് കോമഡിയില്‍ തിളങ്ങിയ മറ്റുരണ്ടുപേര്. ഇരുവരും സംഘികളായ അമ്മാവന്മാരുടെ കഥാപാത്രങ്ങളാണ് അവതരിപ്പിക്കുന്നത് എന്നത് കൂടുതല്‍ തമാശയുണ്ടാക്കുന്നു. സിനിമയുടെ മൊത്തം സ്വഭാവം തന്നെ ഒരു സ്‌കിറ്റിന്റേതായതിനാല്‍ ഇരുവരുടേയും പ്രകടനം സിനിമയോട് ചേര്‍ന്ന് നില്‍ക്കുന്നുണ്ട്.

അജു വര്‍ഗീസ്, മഞ്ചു പിള്ള, നോബി മാര്‍ക്കോസ്, ശരത് സഭ തുടങ്ങിയവരുടെ കഥാപാത്രങ്ങളും രസമുള്ളതായി.

ചിത്രത്തിന് പുതുതായി ഒന്നും മുന്നോട്ട് വെക്കാനില്ല എന്നത് ഒരു പ്രശ്‌നമാണ്. വിവിധ സിനിമകളിലായി പറയുന്നതും, സോഷ്യല്‍ മീഡിയയിലും റീലുകളിലും നിരന്തരമായി വരുന്നതുമായ കാര്യങ്ങള്‍ ഒന്നിച്ചെടുത്ത് പറയുന്ന അനുഭവമാണ് ജയ ജയ ജയ ജയഹേ. ഒരു മിതത്വം പാലിക്കാന്‍, ഒരു മീറ്റര്‍ സെറ്റ് ചെയ്യാന്‍ തിരക്കഥാകൃത്തിനോ സംവിധായകനോ കഴിഞ്ഞിട്ടില്ല. സൈജു കുറുപ്പ് നായകനായ അന്താക്ഷരിക്ക് ശേഷം വിപിന്‍ദാസ് സംവിധാനം ചെയ്ത ചിത്രമാണ് ജയ ജയ ജയ ജയഹേ. വിപിന്‍ദാസും നാഷിദ് മുഹമ്മദ് ഫമിയുമാണ് തിരക്കഥ.

ALSO READ

അഞ്ചാംപാതിര, റോഷാക്ക്, അതിരന്‍; സൈക്കോകള്‍ സൈക്കോകള്‍ തന്നെയാണ്...

മൂന്ന് പാട്ടുകളുണ്ട് ചിത്രത്തില്‍. മൂന്നും ചിത്രത്തിലെ സാഹചര്യങ്ങളോട് ചേര്‍ന്ന് നില്‍ക്കുന്ന പാട്ടുകളാണ്. സിനിമയില്‍ നിന്ന് മാറ്റി ഒരു ആല്‍ബം പോലെ കേള്‍ക്കാനാവില്ലെങ്കിലും സിനിമയ്ക്ക് അകത്ത് മികച്ച രീതിയില്‍ പാട്ടുകള്‍ വര്‍ക്ക് ഔട്ട് ചെയ്യുന്നുണ്ട്. അങ്കിത് മേനോനാണ് സംഗീത സംവിധാനം.