‘‘പാര്‍ലമെന്റില്‍ ഇത്രയും കാലം പ്രതിപക്ഷം വിമര്‍ശനാത്മകമായി പ്രയോഗിച്ചുകൊണ്ടിരുന്ന 65 വാക്കുകള്‍ക്ക് ചരിത്രത്തിലാദ്യമായിട്ടാണ് വിലക്കേര്‍പ്പെടുത്തിയിട്ടുള്ളത്. ഇത്തരം വാക്കുകളെ ഈ സര്‍ക്കാര്‍ ഭയപ്പെടുകയാണ് എന്നാണ് ഇതിനര്‍ഥം. പാര്‍ലമെന്റിനെ ഏകാധിപത്യപരമായ രീതിയില്‍ വരുതിയിലാക്കാനും പ്രതിപക്ഷ ശബ്ദങ്ങളെ നിഷ്‌കരുണം അടിച്ചമര്‍ത്താനുമുള്ള നീക്കത്തിന്റെ ഒടുവിലത്തെ ഉദാഹരണമാണ് 65 വാക്കുകളുടെ നിരോധനം. സഭക്കകത്ത് പ്രതിപക്ഷം മാത്രമല്ല, ഭരണപക്ഷ എം.പിമാരും സ്വഭാവികമായി ഉപയോഗിക്കുന്ന വാക്കുകളാണിവ. സര്‍ക്കാറിനെ പ്രതിക്കൂട്ടിലാക്കുന്ന പദങ്ങളോടുള്ള അസഹിഷ്ണുത വളരെ കൃത്യമായി ഈ നടപടിയില്‍ ദൃശ്യമാണ്.’’- കോഴിക്കോട്ടുനിന്നുള്ള ലോക്​സഭാ അംഗവും കോൺഗ്രസ്​ നേതാവുമായ എം.കെ. രാഘവൻ ട്രൂ കോപ്പി വെബ്​സീനുമായി സംസാരിക്കുന്നു.

‘‘ഇത്തരം ഏകാധിപത്യ നടപടികള്‍ നേരിടാന്‍ ആദ്യം വേണ്ടത്, എല്ലാ പ്രതിപക്ഷ പ്രസ്ഥാനങ്ങളും യോജിക്കുകയാണ്. പ്രതിപക്ഷ ഐക്യമില്ലായ്മയാണ് ഇതിന് വളംവക്കുന്നത്. പ്രതിപക്ഷഐക്യമുണ്ടായിരുന്നുവെങ്കില്‍ ഇതിന് സര്‍ക്കാറിന് ധൈര്യമുണ്ടാകുമായിരുന്നില്ല. വോട്ടിന്റെ ശതമാനം നോക്കിയാല്‍ കേവലം 34 ശതമാനത്തില്‍ താഴെ മാത്രമാണ് ഭരണകക്ഷിയുടെ വോട്ടുവിഹിതം എന്നാലോചിക്കണം. ബാക്കി പ്രതിപക്ഷത്തിന് 60 ശതമാനത്തിനുമേലെയുണ്ട്. സ്വഭാവികമായും പ്രതിപക്ഷ ഐക്യമില്ലായ്മ തന്നെയാണ് ഇത്തരം സ്വേച്ഛാധിപത്യ നടപടികള്‍ക്ക് ഇടം നല്‍കുന്നത്.’’

‘‘കോണ്‍ഗ്രസ് നേതൃത്വം വളരെ ഗൗരവമായി ഈ പ്രശ്‌നം കാണുന്നുണ്ട്. കോണ്‍ഗ്രസിന് ഒരിക്കലും വര്‍ഗീയത പറയാന്‍ കഴിയില്ല,  വിഭാഗീയതയില്‍ നിന്ന് രാഷ്ട്രീയ നേട്ടം കൊയ്യുന്ന ബി.ജെ.പിക്ക് കഴിയും. ഇക്കാര്യം തിരിച്ചറിഞ്ഞ് ജനകീയ ബദല്‍ നയം രൂപപ്പെടുത്തിയെടുക്കാനാണ് ഉദയ്​പുർ ചിന്തന്‍ ശിബിരിലുള്‍പ്പെടെ പാര്‍ട്ടി ശ്രമിച്ചത്. നേതൃത്വപരമായി തന്നെ, യോജിക്കാവുന്ന എല്ലാവരുമായി സംസാരിക്കാന്‍ തയ്യാറാവണം. എല്ലാ സംസ്ഥാനങ്ങളിലും അടിത്തറയുള്ള രാഷ്ട്രീയ സംവിധാനമാണ് ഇന്ത്യന്‍ നാഷണല്‍ കോണ്‍ഗ്രസ്; ബി.ജെ.പി വിരുദ്ധ പ്രാദേശിക രാഷ്ട്രീയ കക്ഷികളെ ഒപ്പം ചേര്‍ത്ത് ബി.ജെ.പിയെ നേരിടുവാന്‍ സാധിക്കും. അതിന് ചില വിട്ടുവീഴ്ചകള്‍ ചെയ്യേണ്ടിവരും. രാജ്യത്തിന്റെ വിശാല താത്പര്യം മുന്‍നിര്‍ത്തി പാര്‍ട്ടി അതിന് തയ്യാറാവുകയാണ്. കന്യാകുമാരി മുതല്‍ കാശ്മീര്‍ വരെ രാഹുല്‍ഗാന്ധി നയിക്കുന്ന ഭാരത് ജോഡാ യാത്ര രാജ്യത്ത് പുതിയ മുന്നേറ്റത്തിനുള്ള കാഹളമാകും’’

രണ്ട്​ ചോദ്യങ്ങൾ
എം.കെ. രാഘവന്‍ / മനില സി. മോഹന്‍
ചരിത്ര ദൗത്യം കോണ്‍ഗ്രസ് ഏറ്റെടുക്കും
ട്രൂ കോപ്പി വെബ്​സീൻ പാക്കറ്റ്​ 86
വായിക്കാം