എ.വി. കുഞ്ഞമ്പു അസ്ഥിവാരമിട്ട
പയ്യന്നൂര്‍ കോട്ട

എ.വി. കുഞ്ഞമ്പു അസ്ഥിവാരമിട്ട പയ്യന്നൂര്‍ കോട്ട

22 Feb 2021, 03:23 PM

Election Desk

ഉപ്പുസത്യാഗ്രഹം അടക്കം ദേശീയ പ്രസ്ഥാനത്തിന്റെ വേരോട്ടമുള്ള ദേശം, സി.പി.എമ്മിന്റെ ചോദ്യം ചെയ്യപ്പെടാത്ത കോട്ട. 2016ല്‍ സി.പി.എമ്മിലെ സി. കൃഷ്ണന്‍ 40,263 വോട്ടിനാണ് കോണ്‍ഗ്രസിലെ സാജിത് മൗവ്വലിനെ തോല്‍പ്പിച്ചത്. 2011 മുതല്‍ സി. കൃഷ്ണനാണ് ജയം. 2006 മുതല്‍ 2011 വരെ പി.കെ. ശ്രീമതിയായിരുന്നു മണ്ഡലത്തിന്റെ പ്രതിനിധി.

payyannur — എ. വി. കുഞ്ഞമ്പു / വര: ദേവപ്രകാശ്

പ്രമുഖ സി.പി.എം നേതാക്കളുടെ ഇഷ്ട മണ്ഡലം കൂടിയാണിത്. തിരുവിതാംകൂറില്‍ കമ്യൂണിസ്റ്റ് പാര്‍ട്ടി കെട്ടിപ്പടുക്കാന്‍ നേതൃപരമായ പങ്ക് വഹിക്കുകയും കരിവെള്ളൂര്‍ സമരത്തിന് നേതൃത്വം നല്‍കുകയും ചെയ്ത എ.വി. കുഞ്ഞമ്പു 1970ല്‍ പയ്യന്നൂരില്‍നിന്ന് തെരഞ്ഞെടുക്കപ്പെടുമ്പോള്‍, അദ്ദേഹം കണ്ണൂര്‍ ജയിലിലായിരുന്നു. പാര്‍ട്ടി കോണ്‍ഗ്രസ് കഴിഞ്ഞ് കണ്ണൂരില്‍ തിരിച്ചെത്തിയ കുഞ്ഞമ്പുവിനെ ചൈനാ ചാരനെന്ന് മുദ്രകുത്തിയാണ് പൊലീസ് അറസ്റ്റുചെയ്തത്. അദ്ദേഹത്തിന്റെ ഛായാചിത്രവുമായിട്ടായിരുന്നു പ്രചാരണം. 77 വരെ കുഞ്ഞമ്പു എം.എല്‍.എയായി. തുടര്‍ന്ന് എന്‍. സുബ്രഹ്‌മണ്യ ഷേണായി (1977, 1980), എം.വി. രാഘവന്‍ (1982), സി.പി. നാരായണന്‍ (1987, 1991), പിണറായി വിജയന്‍ (1996) തുടങ്ങിയ നേതാക്കള്‍ മല്‍സരിച്ച് ജയിച്ചു. എം.വി. രാഘവന്‍ സി.പി.എമ്മിനുവേണ്ടി അവസാനമായി മല്‍സരിച്ചും പയ്യന്നൂരിലാണ്, 1982ല്‍. കോണ്‍ഗ്രസിലെ ടി. വി. ഭരതനെയാണ് പരാജയപ്പെടുത്തിയത്.

രണ്ടുതവണയായി തുടരുന്ന സി. കൃഷ്ണന്‍ ട്രേഡ് യൂണിയന്‍ പ്രവര്‍ത്തനത്തിലേക്ക് മാറുകയാണ്. പകരം പുതുമുഖത്തെ പരീക്ഷിക്കാനാണ് സി.പി.എം നീക്കം. ഏരിയ സെക്രട്ടറി ടി.ഐ. മധുസൂദനനാണ് സാധ്യത. പാര്‍ട്ടി ജില്ലാ കമ്മിറ്റിക്കും മധുസൂദനനെയാണ് പ്രിയം. ഉറച്ച സീറ്റായതിനാല്‍, അവസാന നിമിഷം പ്രമുഖ നേതാക്കളില്‍ ആരെങ്കിലും പയ്യന്നൂരില്‍ എത്താനും സാധ്യതയുണ്ട്. പി. ജയരാജനുവേണ്ടി അണികള്‍ മുമ്പ് കാമ്പയിന്‍ നടത്തിയിരുന്നു. അത് ഇപ്പോള്‍ സജീവമല്ല.

എ.ഐ.സി.സി നിയോഗിച്ച ഏജന്‍സികള്‍ ജയസാധ്യതയുള്ളതായി കണ്ടെത്തിയിരിക്കുന്നത് എം. പ്രദീപ്കുമാറിനെയാണ്.

തദ്ദേശ തെരഞ്ഞെടുപ്പില്‍ പയ്യന്നൂര്‍ നഗരസഭയില്‍ 44ല്‍ 35 സീറ്റും നേടിയാണ് എല്‍.ഡി.എഫ് ഭരണത്തുടര്‍ച്ചയുണ്ടാക്കിയത്. യു.ഡി.എഫിന് എട്ടുസീറ്റുമാത്രം. പയ്യന്നൂര്‍ നഗരസഭയും പെരിങ്ങോം- വയക്കര, കാങ്കേല്‍- ആലപ്പടമ്പ്, കരിവെള്ളൂര്‍, പെരളം, രാമന്തളി, എരമം- കുറ്റൂര്‍, ചെറുപുഴ പഞ്ചായത്തുകളും അടങ്ങിയ മണ്ഡലം.