കുറുക്കനെ
ഉടലോടെ കാണാനാണ്
ഏറെ പണിപ്പെട്ട്
കുറുക്കൻമല കയറിയത്
കുറുക്കന്മാരുടെ
താവളമായിരുന്നത്രേ പണ്ടവിടം
മരുന്നിനുപോലും
കുറുക്കഗന്ധമുണ്ടാവില്ലെന്നാണ്
നെറുകെയെത്തും വരെ
തീർച്ചപ്പെടുത്തിയത്.
കുറുക്ക മഹാസമുദ്രം
അമ്പരപ്പിച്ചുകളഞ്ഞു
ഒരിക്കൽ പോലും സൂത്രക്കണ്ണോടെ
പതിയിരുന്നിട്ടില്ല;
ഒരു മുന്തിരിക്കും ഉയർന്നുചാടിയിട്ടില്ല.
എന്തിന്
ഒരു നായ്ക്കുറുക്കനിൽ പോലും
യാത്ര ചെയ്തിട്ടുമില്ല.
എന്നിട്ടും
എത്ര വേഗമാണവർ
കൂട്ടത്തിൽ കൂട്ടിയത്
അന്നുമുതലാണ്
കൂവാൻ തുടങ്ങിയത്
മനുഷ്യനുണ്ടാക്കിയ
കുറുക്കൻ കഥകളുടെ പൊള്ളത്തരങ്ങൾ
മനസ്സിലായത്
അവരിലൊരാളായപ്പോഴാണ്
പിന്നെയൊരിക്കലും
മലയിറങ്ങിയിട്ടില്ല.