കെ. കെ എന്ന പാട്ടുകാരനെ, കുന്നത്ത് കൃഷ്ണകുമാര്‍ എന്ന മനുഷ്യനെ രണ്ടുമൂന്നു തവണ നേരില്‍ കണ്ടിട്ടുണ്ട്. കൈകൊടുത്ത് സംസാരിച്ചിട്ടുണ്ട്. മറ്റു പാട്ടുകാരില്‍നിന്ന് മാറ്റവും പൗരുഷവുമുള്ള അദ്ദേഹത്തിന്റെ ശബ്ദത്തേയും ആലാപന രീതിയേയും പറ്റി അദ്ദേഹത്തോട് തന്നെ നേരിട്ട് പറഞ്ഞ് സന്തോഷിച്ചിട്ടുണ്ട്.   

ഇരുപതാം വയസ്സില്‍ പൊതുവേദികളില്‍ പാടിത്തുടങ്ങിയ ഉടനെ പേരെടുത്ത പാട്ടുകാരനാണ് കെ. കെ. സ്റ്റുഡിയോകളില്‍ പാടാന്‍ തുടങ്ങിയപ്പോള്‍, അത് സിനിമാപ്പാട്ടാണെങ്കിലും സ്വകാര്യ ആല്‍ബത്തിലെ പാട്ടാണെങ്കിലും ആഴമുള്ള ആത്മാര്‍ത്ഥതയോടെയാണ് പാടിയത്. പ്രശസ്തമായ എത്രയോ പാട്ടുകള്‍ ഹിന്ദിയില്‍. തമിഴിലും ഒട്ടേറെ ഹിറ്റുകള്‍. എ.ആര്‍. റഹ്‌മാന്റെ സ്ട്രോബെറി കണ്ണേ, ഹാരിസ് ജയരാജിന്റ ഉയിരിന്‍ ഉയിരേ, വിദ്യാസാഗറിന്റെ പൂവുക്കെല്ലാം ചിറകു മുളൈത്തത് തുടങ്ങിയ മധുര മെലഡികള്‍. കല്ലൂരി സാലൈ (കാതല്‍ ദേശം),  അണ്ടങ്കക്കാക്ക  കൊണ്ടക്കാരി (അന്യന്‍), അപ്പടി പോട് പോട് പോട് (കില്ലി) പോലെയുള്ള പല അടിപൊളിപ്പാട്ടുകള്‍. 

പത്തു ഭാഷകളില്‍ പാടിയിട്ടുണ്ടെങ്കിലും മാതൃഭാഷയായ മലയാളത്തില്‍ ആരും ശ്രദ്ധിക്കാത്ത ഒന്നോ രണ്ടോ പാട്ടുകളേ അദ്ദേഹത്തിന് കിട്ടിയുള്ളു. മൂന്നാം തലമുറ മലയാളിയായി ഡല്‍ഹിയില്‍ ജനിച്ചുവളര്‍ന്ന അദ്ദേഹത്തിന് മലയാളം നന്നായി സംസാരിക്കാനറിയില്ലാത്തത് ഇതിന് കാരണമാകാന്‍ തരമില്ല. മലയാളം ഒരക്ഷരം അറിയില്ലാത്ത എത്രയോ പേര്‍ ഇവിടെ നൂറുകണക്കിന് പാട്ടുകള്‍ പാടിയിരിക്കുന്നു!  

ALSO READ

ഇരിപ്പിടം പോലുമില്ലാതെ മാധ്യമ വിദ്യാർഥികൾ, തിരുവനന്തപുരം പ്രസ്​ ക്ലബ്​ ഒരു മാധ്യമ ഇൻസ്​റ്റിറ്റ്യൂട്ടിനെ തകർക്കുന്ന വിധം

യാതൊരു ബഹളങ്ങളുമില്ലാത്ത, ജാടയോ നാട്യങ്ങളോ ഇല്ലാത്ത സൗമ്യനായ മനുഷ്യനായിരുന്നു കെ കെ.  ഉള്ളതുകൊണ്ടും കിട്ടിയതുകൊണ്ടും തൃപ്തി അടയുന്ന മനോഭാവം. വിളിച്ചു കൂവലില്ല. സ്വയം മാര്‍ക്കെറ്റിങ് ഇല്ല. പാടാന്‍ വിളിച്ചാല്‍ ആത്മാര്‍ത്ഥമായി പാടിക്കൊടുക്കും. ആരോഗ്യമുള്ള ശരീരപ്രകൃതിയും രൂപഭാവങ്ങളും. ഒരേ ആണ്ടില്‍ ജനിച്ചവരാണ് ഞങ്ങള്‍ രണ്ടുപേരും. എന്നെക്കാള്‍ രണ്ടുമാസം ഇളയ ആള്‍. പക്ഷേ എന്നെപ്പോലെ മടിയനായിരുന്നില്ല എന്നുറപ്പ്. ഭക്ഷണപ്രിയനാണെങ്കിലും ആരോഗ്യം നിലനിര്‍ത്തുന്നതില്‍ നന്നായി ശ്രദ്ധിച്ചിരുന്നു. വ്യായാമം മുടക്കിയില്ല. അങ്ങനെയുള്ള കെ. കെ പെട്ടെന്നുണ്ടായ ഹൃദയ സ്തംഭനത്തില്‍ മരിച്ചുപോയി എന്ന് എങ്ങനെ വിശ്വസിക്കാനാണ്?

ശനി, ഞായര്‍ ദിവസങ്ങളില്‍ പോലും സംഗീത പരിപാടികള്‍ക്ക് ആളെക്കിട്ടാത്ത ഈ കാലത്ത് കെ കെയുടെ പാട്ടു കേള്‍ക്കാന്‍ തിങ്കളാഴ്ച വൈകിട്ടും ചൊവ്വാഴ്ച വൈകിട്ടും കല്‍ക്കത്തയിലെ ആ അരങ്ങില്‍ ആള്‍ക്കൂട്ടം നിറഞ്ഞൊഴുകി. ഗേറ്റ് തകര്‍ത്തും മതില്‍ ചാടിക്കടന്നും പോലും യുവാക്കള്‍ ഇടിച്ച് കയറി. അവര്‍ ആര്‍ത്തുല്ലസിച്ച് ആടിപ്പാടി പാട്ടു കേട്ടു. തൊണ്ണൂറുകളുടെ പ്രേമഗായകന്‍ എന്നറിയപ്പെട്ട കെ കെ ഇക്കാലത്തും എത്രമാത്രം ജനപ്രിയനായിരുന്നു എന്ന് തെളിയിച്ച സംഗീത സന്ധ്യകള്‍.

ചൊവ്വാഴ്ചത്തെ പരിപാടിയില്‍ പാടിത്തീര്‍ന്ന് നിമിഷങ്ങള്‍ക്കകമാണ് കെ കെ കുഴഞ്ഞുവീണുമരിച്ചത്. ഒരു പാട്ടുകാരന്  ഈ ലോകം വിട്ടുപോകാന്‍ ഇതിലും നല്ല വഴി വേറെ എന്തുണ്ട്?  
കെ കെയുടെ പ്രശസ്തമായ "പ്യാര്‍ കേ പല്‍' കേള്‍ക്കൂ...
നാളെ നമ്മള്‍ ഉണ്ടെങ്കിലും ഇല്ലെങ്കിലും 
ഈ നിമിഷങ്ങള്‍ക്ക് മരണമില്ല 
പ്രണയത്തിന്റെ ഈ നിമിഷങ്ങള്‍ക്ക് 
വരൂ.. ഇപ്പോള്‍ എന്റെ ഒപ്പം നടക്കൂ
നാളെ വീണ്ടും നാം കണ്ടുമുട്ടിയാല്‍ 
അത് നമ്മുടെ ഭാഗ്യംകൊണ്ട് മാത്രമായിരിക്കും
ഓര്‍ക്കുക...
ഈ നിമിഷങ്ങള്‍ക്ക് മരണമില്ല 
നാളെ നമ്മള്‍ ഉണ്ടെങ്കിലും ഇല്ലെങ്കിലും....