സൂപ്പര്‍ഹീറോ അമേരിക്കന്‍ കോമിക്സ് വ്യവസായം പൊലിപ്പിച്ചെടുത്ത ഒരു സങ്കല്പമാണ്. ആയിരത്താണ്ട് കൊല്ലങ്ങളുടെ ശ്രമഫലമായി ഇന്ത്യന്‍ ബ്രാഹ്‌മണ്യം സ്വരൂപിച്ചെടുത്തതിനേക്കാള്‍ കൂടുതല്‍ സൂപ്പര്‍ഹീറോകള്‍ ഇന്ന് ലോകരക്ഷകരായുണ്ട്. ഓരോ സിനിമാക്കമ്പനികള്‍ക്കും അതാത് പാരലല്‍ യൂണിവേഴ്സുകള്‍ പോലുമുണ്ട്.

മതാത്മകമായ രക്ഷകസങ്കല്പങ്ങള്‍ ക്ഷീണിതമാവുകയും ലോകമെമ്പാടുമുള്ള ചൂഷിതജനതകള്‍ അവരുടെ ചരിത്രപരമായ പങ്ക് നിര്‍വഹിക്കാന്‍ സംഘടിതമായി ഉയര്‍ത്തെഴുന്നേല്‍ക്കയും ചെയ്ത കാലത്താണ് അമേരിക്കന്‍ സൂപ്പര്‍ഹീറോകളും രംഗപ്രവേശം ചെയ്യുന്നത്. നീഷേയും ഓര്‍ബിന്ദോയും അങ്ങനെ പലരും പലതരം അതീതമാനവസങ്കല്പങ്ങള്‍ കൊണ്ട് വരുന്നതും അഡോള്‍ഫ് ഹിറ്റ്ലര്‍ സ്വയമൊരു സൂപ്പര്‍ഹീറോയായ് അവരോധിച്ച് കൊണ്ട് ഒരു നാസി പാരലല്‍ യൂണിവേഴ്സ് സ്ഥാപിച്ചെടുക്കുന്നതും ഏതാണ്ട് അതേ കാലത്താണ്.

ALSO READ

മിന്നല്‍ മുരളി; സൂപ്പര്‍ വില്ലനെ നേരിട്ട 'സൂപ്പര്‍ ഹീറോ'

പക്ഷേ അമേരിക്കന്‍ സൂപ്പര്‍ഹീറോസ് ഒരു സയന്‍സ് ഫിക്ഷന്‍ സബ് ഴോനറായിരുന്നു. അന്യഗ്രഹത്തില്‍ നിന്നും ലാബറട്ടറികളില്‍ നിന്നുമാണ് സൂപ്പര്‍ഹീറോകള്‍ പിറവി കൊണ്ടിരുന്നത്. ജനിറ്റിക്സ് ഒരു വലിയ സംഭവവികാസമായി തീര്‍ന്നതോടെ മ്യൂട്ടന്റുകളും സൂപ്പര്‍ഹീറോകളായി. അതെ സമയം സോവിയറ്റ് യൂണിയന്‍ ചേരിയില്‍ നിന്നും പുറത്ത് വന്ന് കൊണ്ടിരുന്ന സയന്‍സ് ഫിക്ഷനുകളില്‍ സൂപ്പര്‍ഹീറോകളുണ്ടായിരുന്നില്ല. അവര്‍ അവരുടെ കമ്യൂണിസ്റ്റ് ഉട്ടോപ്യയയെ തന്നെയാണ് സയന്‍സ് ഫിക്ഷനുകളിലും കേന്ദ്രസ്ഥാനത്ത് വെച്ചിരുന്നത്.

സൂപ്പര്‍ഹീറോകള്‍ സംഘടിതമായ ജനമുന്നേറ്റങ്ങളെ റദ്ദാക്കുന്നവരാണ്. അത്തരം മൂര്‍ത്തമായൊരു രാഷ്ട്രീയ യാഥാര്‍ത്ഥ്യത്തെ ബൈപ്പാസ് ചെയ്യേണ്ടത് അമേരിക്കന്‍ എക്കണോമിയുടെയും താല്പര്യമായിരുന്നു. അത് കൊണ്ട് തന്നെ അമേരിക്കന്‍ ബാല്യകൗമാരങ്ങളിലേക്ക് കോമിക്ക് ബുക്കുകള്‍ സിനിമകള്‍ ടോയികള്‍ മലവെള്ളം പോലെ കുത്തിയൊഴുകി, ഒഴുകുന്നു.

ഇന്ത്യയില്‍ സ്വകാര്യവല്‍ക്കരണ നയങ്ങള്‍ നടപ്പിലാക്കി തുടങ്ങിയ/ ബാബറി മസ്ജിദ് തകര്‍ത്തെറിയപ്പെട്ട തൊണ്ണൂറുകളില്‍ പുരാണ സീരിയലുകള്‍ക്കും ക്രിക്കറ്റിനുമൊപ്പം ശക്തിമാനെന്നൊരു സൂപ്പര്‍ഹീറോ സീരിയലും വൈകിയുണരുന്ന കുട്ടികള്‍ക്ക് കൂടി കാണാന്‍ കഴിയും വിധം ഞായറാഴ്ചപ്പുലര്‍ച്ചകളില്‍ സര്‍ക്കാര്‍ വക ടിവി ചാനലിലൂടെ പ്രസരണം ചെയ്തിരുന്നു. ഇന്ത്യയിലെ അവശിഷ്ട സോഷ്യലിസ്റ്റ് സങ്കല്പങ്ങള്‍ അവരുടെ ഏക്കാലത്തെയും വലിയ സമരങ്ങള്‍ നടത്തുകയും സഫ്ദര്‍ ഹശ്മിയും കൂത്തുപറമ്പും അടക്കം സംഭവിക്കയും ചെയ്യുന്നതിനൊപ്പമാണിതൊക്കെയും ഏറെക്കുറെ സൗജന്യമായി തന്നെ വിതരണം ചെയ്യപ്പെട്ടിരുന്നതും. ശക്തിമാന്‍ പഞ്ചഭൂതങ്ങളില്‍ നിന്നും മഹര്‍ഷിമാരാല്‍ സൃഷ്ടിക്കപ്പെട്ട ഒരു ഭാരതീയ സൂപ്പര്‍ഹീറോയായിരുന്നു.

ALSO READ

മുഖ്യധാരാ മാധ്യമങ്ങൾ അവഗണിച്ച ഒരു വർഗ സമരത്തെക്കുറിച്ച്​

ഈ പറഞ്ഞ അമേരിക്കന്‍ ഭാരതീയ സൂപ്പര്‍ഹീറോകള്‍ക്കൊപ്പം വായിച്ചാലും വായിച്ചാലും തീരാത്ത പുസ്തകവും യുറീക്കയും മായാവിയും മാജിക് മാലുവും തളിരും ശാസ്ത്രകൗതുകവും ഒക്കെ കൂടിയാണ് കേരളത്തിലോടിക്കൊണ്ടിരുന്നത്. കേരളത്തിന് സ്വന്തമായൊരു സൂപ്പര്‍ഹീറോയുടെ കാര്യവും ഇല്ലായിരുന്നു. വിനോദവ്യവസായത്തിന്റെ സവിശേഷമായ മൂലധനശക്തിയില്ലാതെ തന്നെ മുത്തപ്പനും മുഹമ്മദ് നബിയും ഗുരുവായൂരപ്പനും ഇഎംഎസും കരുണാകരനും വര്‍ഗീസും സെന്റ് ജോര്‍ജ് പുണ്യാളനുമൊക്കെ സൂപ്പര്‍ഹീറോ പദവിയുള്ള ഒരു സമ്മിശ്രഭാവനാലോകവും ഇവിടെ സജീവമായി നിലകൊണ്ടിരുന്നു. അത് തന്നെയായിരുന്നു ഇവിടുത്തെ മുഖ്യധാരയും. അത് ബ്രേക്ക് ചെയ്യാന്‍ അമേരിക്കന്‍ സൂപ്പര്‍ഹീറോകള്‍ക്ക് കൂടി കഴിഞ്ഞിരുന്നില്ല.

ഒരുപക്ഷേ കേരളമടക്കമുള്ള അവശിഷ്ട ഇടത് പക്ഷ ലോകങ്ങള്‍ അവരുടെ അവസാന റൗണ്ട് ജനകീയ സമരങ്ങള്‍ നടത്തിപ്പോരുമ്പോള്‍ ഇത്തരം സിനിമകള്‍ പൊതുസംവാദങ്ങളും മാദ്ധ്യമയിടങ്ങളും തീര്‍ത്തും കൊള്ളയടിച്ച് കൊണ്ട് പോവുക തന്നെ ചെയ്യും. ലോകമെമ്പാടുമുള്ള ചൂഷിതജനതകള്‍ അവരുടെ ചരിത്രപരമായ പങ്ക് നിര്‍വഹിക്കാന്‍ സംഘടിതമായി ഉയര്‍ത്തെഴുന്നേറ്റ കാലത്താണ് അമേരിക്കയില്‍ സൂപ്പര്‍ഹീറോകളും രംഗപ്രവേശം ചെയ്യുന്നത്. അവര്‍ക്കന്നത് ഫാസിസത്തിനും കമ്യൂണിസത്തിനും ഒത്ത ഒരു ലിബറല്‍ മറുമരുന്നായാവും പ്രവര്‍ത്തിച്ചിട്ടുണ്ടാവുക. ഇവിടെയിനി എന്തൊക്കെ തരം സൂപ്പര്‍ഹീറോകളാണ് വന്ന് ചാടുക, അവരുടെ ലോകരക്ഷ പോളിസികള്‍ എങ്ങനെയൊക്കെയാണ് എന്ന് കണ്ടറിയേണ്ടതാണ്.

എന്തായാലും അതിമാനുഷിക സിനിമകള്‍ക്കെതിരെ ചറപറാ എഴുതിയിരുന്നവര്‍ പോലും മലയാളത്തിലെ ആദ്യത്തെ സൂപ്പര്‍ഹീറോയെ കണ്ട് ത്രില്ലടിച്ചിരിക്കയാണ്. പ്രളയവും കൊറോണയും തീ പാറി തീപ്പൊരി ചിന്തിയ കുറെ തിരഞ്ഞെടുപ്പുകളും കഴിഞ്ഞ മനുഷ്യര്‍ക്ക് ഇതുമൊരു ആശ്വാസമായിരിക്കണം. നിയോ ലിബറലിസത്തിന്റെ മതമാണ് വ്യാവസായികതലത്തില്‍ ഉത്പാദിപ്പിക്കപ്പെടുന്ന വിനോദം. എന്തെങ്കിലുമൊക്കെ തരം കുറെ മയക്കങ്ങള്‍ കൂടിയില്ലാതെ ഹൃദയമില്ലാത്തൊരീ ലോകത്ത് മനുഷ്യരെങ്ങനെ കഴിഞ്ഞ് കൂടും.