‘‘ഞങ്ങളൊക്കെ എന്തിനാണ്​ പാര്‍ലമെന്റില്‍ പോകുന്നത്? വെറുതെ അവിടെ പോയി, അവിടെ പറയുന്നതും കേട്ട്, ദിവസവും 2000 രൂപ അലവന്‍സും വാങ്ങി, സൗജന്യമായി കിട്ടുന്ന വിമാന- ട്രെയിന്‍ ടിക്കറ്റും വാങ്ങി, ജനങ്ങളുടെ നികുതിപ്പണം പാഴാക്കാനല്ല ഞങ്ങള്‍ പാര്‍ലമെന്റില്‍ പോകുന്നത്. ആ പ്രിവിലേജ് എന്‍ജോയ് ചെയ്യാനാണോ? അല്ല, ഞങ്ങളെപ്പോലെയുള്ള ആളുകള്‍ക്ക് അത് പറ്റില്ല. ജനങ്ങളുടെ വിഷയങ്ങള്‍ അവതരിപ്പിക്കാന്‍ അവസരം തരണം. വളരെ ഗുരുതരമായ ഈ ദുരന്തത്തില്‍ നിന്ന് ഇന്ത്യ കരകയറിയില്ലെങ്കില്‍ നമ്മുടെ രാജ്യം മറ്റൊരു ശ്രീലങ്കയായി മാറുമോയെന്ന് നാം പേടിക്കേണ്ടതുണ്ട്.

രൂപയുടെ മൂല്യം ദിവസവും ഇടിഞ്ഞുകൊണ്ടിരിക്കുകയാണ്. വിലക്കയറ്റം രൂക്ഷമാകുന്നു. തൊഴിലില്ലായ്മ വര്‍ധിക്കുന്നു. എല്ലാ മേഖലകളിലും നമ്മള്‍ താഴോട്ട് പോകുകയാണ്. ഇതുതന്നെയാണ് ശ്രീലങ്കയിലുണ്ടായത്. വന്നുവന്ന് ഒരു ഘട്ടം കഴിഞ്ഞപ്പോള്‍ ശ്രീലങ്കയിലെ സ്ഥിതി കണ്ടില്ലേ. അങ്ങനെ ഇന്ത്യ ഒരു ശ്രീലങ്കയാവാന്‍ അനുവദിച്ചുകൂടാ. രാഷ്ട്രീയ തര്‍ക്കങ്ങള്‍ വേറെ. രാജ്യവും ജനങ്ങളും എന്നുപറയുന്നത് ജീവന്റെ ജീവനാണ്. ആ കാര്യമാണ് ഇന്ന് സമൂഹത്തില്‍ ചര്‍ച്ച ചെയ്യപ്പെടേണ്ടത്’- ജനകീയ പ്രശ്​നങ്ങളുന്നയിച്ചതിന്​ ലോക്​സഭയിൽനിന്ന്​ സസ്​പെൻറ്​ ചെയ്യപ്പെട്ട ടി.എൻ. പ്രതാപൻ എം.പി ട്രൂ കോപ്പി വെബ്​സീനുമായി സംസാരിക്കുന്നു.

‘‘ഞങ്ങളോട് ഡല്‍ഹിയിലെ ഓട്ടോറിക്ഷക്കാര്‍ സംസാരിക്കുന്നുണ്ട്, ഞങ്ങള്‍ കയറുന്ന തട്ടുകടയിലെ ആളുകള്‍ സംസാരിക്കുന്നുണ്ട്. എം.പിമാരാണെന്ന് പറയുമ്പോള്‍ അവരെല്ലാം ഞങ്ങളോട് രൂക്ഷമായി പ്രതികരിക്കുകയാണ്, ബി.ജെ.പിക്ക് വോട്ട് ചെയ്ത ആളുകള്‍ വരെ. അവര്‍ക്ക് മനസ്സിലായി, രാജ്യത്തെ ജനങ്ങളുടെ അവസ്ഥ ഇതാണെന്ന്. ബി.ജെ.പി.യെയും കേന്ദ്ര സര്‍ക്കാരിനെയും അനുകൂലിക്കുന്ന ചില സ്പോണ്‍സേഡ് മാധ്യമങ്ങളുണ്ട്. ആ സ്പോണ്‍സേഡ് മാധ്യമങ്ങളൊഴികെയുള്ള ഓണ്‍ലൈന്‍ മാധ്യമങ്ങളായാലും അല്ലെങ്കില്‍ നേര് ചൂണ്ടിക്കാണിക്കുന്ന മാധ്യമങ്ങളുള്‍പ്പെടെ, ജനങ്ങളടക്കം ഈ തിന്മ ചോദ്യംചെയ്യുന്നുണ്ട്.’’

‘‘ഇന്ത്യയുടെ ആദ്യ പ്രധാനമന്ത്രി ജവാഹര്‍ലാല്‍ നെഹ്റു പാര്‍ലമെന്റില്‍ പ്രതിപക്ഷ നേതാവായിരുന്ന കമ്യൂണിസ്റ്റ് പാര്‍ട്ടി നേതാവ് എ.കെ.ജി.യെ കേട്ടിരുന്നത് എത്ര മനോഹരമായിട്ടായിരുന്നു. പാര്‍ലമെന്റില്‍ അന്ന് പ്രതിപക്ഷത്തിന്റെ എണ്ണം  പരിമിതമാണ്, കമ്യൂണിസ്റ്റുകാരുടെ എണ്ണവും. പക്ഷെ എ.കെ.ജി. പ്രതിപക്ഷനേതാവായി. എ.കെ.ജി. വന്നവിടെ ഇരിക്കും. പ്രധാനമന്ത്രിയും വന്നിരിക്കും.  പ്രതിപക്ഷത്തിന്റെ അഭിപ്രായം കേള്‍ക്കും. അന്നത്തെ പാര്‍ലമെന്റിന്റെ പ്രവര്‍ത്തനചരിത്രം വായിക്കുമ്പോള്‍ നാം രോമാഞ്ചം കൊള്ളും, ഇന്ത്യന്‍ ജനാധിപത്യത്തെക്കുറിച്ച് അഭിമാനം കൊള്ളും. എ.കെ.ജി.യുടെ ഇംഗ്ലീഷ് പരിമിതമാണ്. പക്ഷെ അതിനോട് നെഹ്റു കാതുകൂര്‍പ്പിച്ചിരിക്കും. അതിനോട് പ്രതികരിക്കും. എണ്ണം നോക്കിയിട്ടായിരുന്നില്ല പ്രതിപക്ഷത്തെ അന്ന് പാര്‍ലമെന്റില്‍ മാനിച്ചിരുന്നത്. ഇതായിരുന്നു കീഴ്​വഴക്കം’’- ടി.എൻ. പ്രതാപൻ പറഞ്ഞു. 

ടി.എന്‍. പ്രതാപന്‍ / ഷഫീഖ് താമരശ്ശേരി
‘വീ വാണ്ട് ഡിസ്‌കഷന്‍, ചര്‍ച്ച കരോ',
പാര്‍ലമെന്റില്‍ ഈ വാചകങ്ങളും വിലക്കപ്പെട്ടിരിക്കുന്നു
ട്രൂ കോപ്പി വെബ്​സീൻ പാക്കറ്റ്​ 88ൽ വായിക്കാം