ലക്ഷദ്വീപ് ജനതയേയും അവരുടെ സംസ്‌കാരത്തേയും ബാധിക്കുന്ന അഡ്മിനിസ്‌ട്രേഷന്റെ നടപടികള്‍ക്കെതിരെ കാമറാമാനും എഴുത്തുകാരനുമായ വേണു. ലക്ഷദ്വീപിലെ അഡ്​മിനിസ്​ട്രേറ്റർ ഭരണത്തിനെതിരെ പ്രതികരിച്ചതിനെ തുടര്‍ന്ന് സംഘ്പരിവാര്‍ അനുകൂലികളില്‍ നിന്ന്​ സൈബര്‍ ആക്രമണം നേരിടേണ്ടി വന്ന പൃഥ്വിരാജിനും വേണു ഐക്യദാര്‍ഢ്യം പ്രഖ്യാപിച്ചു. കലാകാരന്മാരുടെ അഭിപ്രായ രൂപീകരണ ശക്തി നല്ല മാറ്റങ്ങള്‍ക്കായി ഉപയോഗിക്കാനുള്ള ബാധ്യത അവര്‍ക്കുണ്ടെന്നും വേണു തന്റെ ഫേസ്ബുക്ക് പോസ്റ്റില്‍ പറയുന്നു.

ഫേസ്ബുക്ക് പോസ്റ്റിന്റെ പൂര്‍ണരൂപം: ""കലാകാരന്‍മാരുടെ ശബ്ദങ്ങള്‍ക്ക് അഭിപ്രായ രൂപികരണ ശക്തിയുണ്ട്. തെറ്റായ നീക്കങ്ങള്‍ വിളിച്ച് പറയാന്‍ ബാധ്യതയുള്ളവര്‍  അത് ചെയ്യാതിരിക്കുന്നതാണ് തെറ്റ്. പൃഥ്വിരാജ് ചെയ്തത് ചെയ്യാനുള്ള ആര്‍ജവം എല്ലാവരും കാണിക്കണം. ഒരു ജനതയേയും അവരുടെ സംസ്‌ക്കാരത്തേയും  ഇല്ലാതാക്കാന്‍ പാടില്ല.
ലക്ഷദ്വീപിനോടൊപ്പം.
പൃഥ്വിരാജിനോടൊപ്പം''

നേരത്തെ, ലക്ഷദ്വീപിലെ ""പരിഷ്‌കാരങ്ങള്‍'' വിചിത്രമാണെന്ന് പ്രതികരിച്ചതിനു പിന്നാലെ, പൃഥ്വിരാജിന്റെ പിതൃത്വം ചോദ്യം ചെയ്ത് സംഘ്പരിവാര്‍ അനുകൂല മാധ്യമമായ ജനം ടി.വി. ഓണ്‍ലൈനില്‍ വന്ന ലേഖനം പരക്കെ വിമര്‍ശിക്കപ്പെട്ടിരുന്നു.

പൃഥ്വിരാജിനെ കൂടാതെ സലിം കുമാര്‍, ഗായിക സിതാര, ഗ്രേസ് ആന്റണി, ഹരിശ്രീ അശോകന്‍, വിനയ് ഫോര്‍ട്ട്, ഗീതു മോഹന്‍ദാസ്, നിഖില വിമല്‍, സണ്ണി വെയ്ന്‍, ഷൈന്‍ നിഗം, അയ്ഷ സുല്‍ത്താന, സകരിയ, ശഹബാസ് അമന്‍, മണികണ്ഠന്‍, ടൊവിനോ തോമസ്, അനീഷ് ജി. മേനോന്‍, ഹര്‍ഷാദ്, മുഹ്‌സിന്‍ പരാരി, റിമ കല്ലിങ്കല്‍ എന്നിവരും ലക്ഷദ്വീപിന്​ ഐക്യദാര്‍ഢ്യം പ്രഖ്യാപിച്ച് രംഗത്തെത്തിയിട്ടുണ്ട്.