പ്ലസ് വൺ സീറ്റ് പ്രതിസന്ധി:
മലപ്പുറത്ത് 120, കാസർകോട് 18
താൽക്കാലിക ബാച്ചുകൾ

കാസർകോട്, മലപ്പുറം ജില്ലകളിൽ പ്ലസ് വണ്ണിന് താൽക്കാലിക ബാച്ചുകൾ അനുവദിച്ചു.

മലപ്പുറം ജില്ലയിൽ 120, കാസർകോട് 18 വീതം ബാച്ചുകൾ.

മലപ്പുറത്ത് 24 സർക്കാർ സ്‌കൂളുകളിൽ 120 ബാച്ചും കാസർകോട്ട് 18 സർക്കാർ സ്‌കൂളുകളിലായി 18 ബാച്ചുമാണ് അനുവദിച്ചത്.

മലപ്പുറത്ത് പുതുതായി അനുവദിക്കപ്പെട്ടതിൽ സയൻസ് ബാച്ചില്ല. കൊമേഴ്‌സിന് 61, ഹുമാനിറ്റീസിന് 59 ബാച്ചുകൾ വീതം.

കാസർകോട്ട് ഒരു സയൻസ് ബാച്ചും 13 കൊമേഴ്‌സ് ബാച്ചും നാല് ഹ്യൂമാനിറ്റീസ് ബാച്ചും.

താൽക്കാലിക ബാച്ചുകൾ അനുവദിച്ചതിൽ സർക്കാറിന് 14.90 കോടി രൂപയുടെ അധിക ബാധ്യതയെന്ന് വിദ്യാഭ്യാസ മന്ത്രി.

നിയമസഭയിൽ ചട്ടം 300 പ്രകാരം നടത്തിയ പ്രസ്താവനയിലാണ് വിദ്യാഭ്യാസ മന്ത്രി വി. ശിവൻകുട്ടി താൽക്കാലിക ബാച്ച് അനുവദിച്ചതായി അറിയിച്ചത്.

മലപ്പുറത്ത് പ്ലസ് വൺ സീറ്റ് ക്ഷാമമുണ്ടെന്നും അധിക സീറ്റ് വേണമെന്നും സംസ്ഥാന വിദ്യാഭ്യാസ വകുപ്പ് നിയമിച്ച കമ്മിറ്റി ശുപാർശ ചെയ്തിരുന്നു. മലപ്പുറം ആർഡിഡി, വിദ്യാഭ്യാസ ജോയിന്റ് ഡയറക്ടർ എന്നിവരുടെ നേതൃത്വത്തിലുള്ള സമിതിയാണ് റിപ്പോർട്ട് സമർപ്പിച്ചത്.

താൽക്കാലിക ബാച്ച് പ്രശ്‌നപരിഹാരമല്ലെന്ന് പി.കെ. കുഞ്ഞാലിക്കുട്ടി. പാലക്കാട്, കോഴിക്കോട് ജില്ലകളിൽ സീറ്റ് ക്ഷാമം തുടരുന്നുവെന്നും കുഞ്ഞാലിക്കുട്ടി.

ആദ്യ സപ്ലിമെന്ററി അലോട്ട്‌മെന്റ് അനുസരിച്ചുള്ള പ്രവേശനം ജൂലൈ എട്ടിന് തുടങ്ങി. 30,245 പേർ ആദ്യ അലോട്ട്‌മെന്റിൽ പ്രവേശനം നേടി. മലബാർ ജില്ലകളിൽ 18,223 വിദ്യാർഥികൾ ഇപ്പോഴും പുറത്താണ് എന്നാണ് കണക്ക്.

മലപ്പുറം 9993, പാലക്കാട്ട് 4434, കോഴിക്കോട്ട് 2307, കണ്ണൂർ 646, കാസർകോഡ് 843 സീറ്റു വീതമാണ് കുറവുള്ളത്.

വിദ്യാഭ്യാസ മന്ത്രി നിയമസഭയിൽ നടത്തിയ പ്രസ്താവനയിൽ നിന്ന്:

2023-24 അധ്യയന വർഷം സംസ്ഥാനത്ത് 4,25,671 വിദ്യാർത്ഥികൾ എസ്.എസ്.എൽ.സി പാസായി ഉപരിപഠനത്തിന് യോഗ്യത നേടി.

പ്ലസ് വൺ പഠനത്തിനായി 4,33,471 സീറ്റുകൾ ലഭ്യം.

സർക്കാർ,എയ്ഡഡ് മേഖലയിൽ 3,78,580 സീറ്റ്.

സീറ്റ് ക്ഷാമം ഉണ്ടാകാതിരിക്കാൻ മലബാർ മേഖലയിൽ എല്ലാ സർക്കാർ സ്‌കൂളുകളിലും 30% മാർജിനൽ സീറ്റ് വർദ്ധനയും എല്ലാ എയ്ഡഡ് സ്‌കൂളുകൾക്കും 20 % മാർജിനൽ സീറ്റ് വർദ്ധനയും ആവശ്യപ്പെടുന്ന എയ്ഡഡ് സ്‌കൂളുകൾക്ക് അധികമായി 10 % മാർജിനൽ സീറ്റ് വർദ്ധനയും അനുവദിച്ച് ഉത്തരവ് പുറപ്പെടുവിച്ചു.