മലയാളം പേരിൽ
കേരളത്തിന്റെ സ്വന്തം കാണി മരഞണ്ട്

ഇന്ത്യയിലെ ആദ്യത്തെ മരഞണ്ട്

ഞണ്ടുകളെ ശുദ്ധജലാശയങ്ങളിലും (അരുവികൾ, തടാകങ്ങൾ, പുഴകൾ), ചതുപ്പുകളിലും, കടലിലും ഒക്കെയാണ് സാധാരണ കണ്ടുവരുന്നത്. എന്നാൽ മരത്തിൽ മാത്രം ജീവിക്കുന്ന ഒരു ഞണ്ടിനെ ഇന്ത്യയിൽ ആദ്യമായി കണ്ടെത്തിയത് പശ്ചിമഘട്ടത്തിൽ അഗസ്ത്യമലയിൽ നിന്നുമാണ്. കേരളത്തിലെ കാടുകളിൽ മാത്രം കാണപ്പെടുന്ന ഒരു തദ്ദേശ ഇനമാണ് കാണി മരഞണ്ട്.

കണ്ടെത്തിയ വഴി

ശുദ്ധജലമത്സ്യങ്ങളിലും ഞണ്ടുകളിലും ഗവേഷണം നടത്തുന്ന സ്മൃതിരാജും ഞാനും അഗസ്ത്യമലയിൽ നടത്തിയ യാത്രകളിലൊന്നിലാണ് ഞങ്ങൾക്ക് വഴികാട്ടികളായിരുന്ന കാണിക്കാർ (കാണി ആദിവാസി സുഹൃത്തുക്കളായ രാജനും മല്ലനും), വെള്ളത്തിൽ മാത്രമല്ല ഒരിനം ഞണ്ട് മരപ്പൊത്തിലും ഉണ്ട് എന്ന് ഞങ്ങളോട് പറയുന്നത്. മരപ്പൊത്തിൽ കഴിയുന്ന ഞണ്ടിനെത്തേടിയായി പിന്നീടുള്ള യാത്രകൾ. ഒരു ദിവസം കോട്ടൂർ വനമേഖലയിൽ ആദിവാസി ഊരുകൾക്കുസമീപം ഒരു മരത്തിലെ വലിയ പൊത്തിലെ വെള്ളത്തിൽ നിന്നാണ് രാജനും മല്ലനും ഒരു ഞണ്ടിനെ പിടിച്ച് ഞങ്ങൾക്ക് കൈമാറുന്നത്.

കണ്ടപ്പോൾ തന്നെ ഒരുകാര്യം വ്യക്തമായി, ഇതുപോലെ ഒന്ന് ആരും കണ്ടെത്തി ശാസ്ത്രീയമായി വിവരിക്കുകയും പ്രസിദ്ധീകരിക്കുകയും ചെയ്തിട്ടില്ല. സ്ഥിരീകരിക്കാനായി നിരവധി ചിത്രങ്ങളെടുത്ത് ഞണ്ടുകളുടെ വർഗ്ഗീകരണ ശാസ്ത്രത്തിൽ ആഗോള പ്രശസ്തനായ സിംഗപ്പൂർ സർവകലാശാലയിലെ പ്രൊഫസറും എന്റെ സുഹൃത്തും പ്രസ്തുത വിഷയത്തിൽ എന്റെ ഗുരുവും കൂടിയായ പീറ്റർ ഉങ്ങിന് അയച്ചു. അതിയായ സന്തോഷത്തിലായി പീറ്ററും. അതിനു കാരണവുമുണ്ട്. പൂർണമായും മരത്തിൽ ജീവിക്കുന്ന മരഞണ്ടുകൾ ഇതിനു മുമ്പ് ശ്രീലങ്കയിലും ബോർണിയോയിലും മഡഗാസ്കറിലും നിന്നു മാത്രമേ കണ്ടെത്തിയിട്ടുള്ളൂ, പീറ്റർ അതിൽ പങ്കാളിയും ആയിരുന്നു.

കേരള സർവകലാശാലയുമായി ഗവേഷണത്തിന് ഒരു ധാരണാപത്രത്തിൽ ഒപ്പിട്ട് ഇന്ത്യയിലേക്കുള്ള യാത്ര തുടങ്ങാനുള്ള തയ്യാറെടുപ്പിലുമായിരുന്നു പീറ്റർ അപ്പോൾ. ഇന്ത്യയിലെത്തിയ പീറ്ററും ഞങ്ങളും ചേർന്ന് പുതുതായി കണ്ടെത്തിയ മരഞണ്ടിനെ ശാസ്ത്രീയമായി വർഗീകരിക്കുകയും വിവരിക്കുകയും പ്രസിദ്ധീകരിക്കുകയും ചെയ്തു (ജേർണൽ ഓഫ് ക്രസ്റ്റേഷ്യൻ ബയോളജി; Journal of Crustacean Biology, 37(2), 157–167, 2017. doi:10.1093/jcbiol/rux012). ഇന്ത്യയിൽ നിന്ന് കണ്ടെത്തുന്ന ആദ്യത്തെ മരഞണ്ടും കൂടിയാണ് കാണി മരഞണ്ട്.

ആ മലയാളം പേരിനുപിന്നിൽ

ജീവികളുടെ ശാസ്ത്രീയ നാമകരണത്തിന് രണ്ട് പദങ്ങൾ ഉൾപ്പെടുന്ന പേരു നൽകുന്ന രീതിയാണ് നിലവിലുള്ളത് (binomial nomenclature). ഇതിൽ ആദ്യ വാക്ക് ജനുസ്സിനെയും (genus) രണ്ടാമത്തെ വാക്ക് സ്പീഷീസിനെയും (species) പ്രതിനിധീകരിക്കുന്നു.

പുതിയ മരഞ്ഞണ്ടിന്റെ ജനുസ്സിന് മരഞണ്ടിനെ കണ്ടെത്താൻ സഹായിച്ച കാണിക്കാരുടെ ഓർമ്മക്കായി ‘കാണി’ എന്നും സ്പീഷീസിന് മലയാളം പേരായ ‘മരഞ്ഞണ്ട്’ എന്നുമാണ് നാമകരണം ചെയ്തിരിക്കുന്നത്. അങ്ങനെ ശാസ്ത്രനാമം പൂർണമായും മലയാളത്തിലുള്ള ഏക ജീവിയായി മരഞ്ഞണ്ട്. (ശാസ്ത്രനാമം: Kaani maranjandu Kumar, Raj & Ng, 2017; ഇതിൽ അവസാനം നൽകുന്നത് കണ്ടെത്തി വിവരിച്ച വ്യക്തികളുടെ പേരാണ്).

ജന്തുക്കളുടെ ശാസ്ത്രീയനാമങ്ങളുടെ ശരിയായ ഉപയോഗത്തെക്കുറിച്ചുള്ള വിവരങ്ങൾ സൃഷ്ടിക്കുകയും പ്രചരിപ്പിക്കുകയും ചെയ്യുന്നത് ഇന്റർനാഷണൽ കമീഷൻ ഓൺ സുവോളജിക്കൽ നോമൻക്ലേച്ചർ (ICZN) എന്ന സംഘടനയാണ്. ജന്തുക്കളുടെ പേരിടുന്നതിനും നാമകരണ പ്രശ്നങ്ങൾ പരിഹരിക്കുന്നതിനുമുള്ള ഒരു കൂട്ടം നിയമങ്ങൾ - ജന്തുനാമകരണത്തിന്റെ അന്താരാഷ്ട്ര നിയമാവലി (International Code of Zoological Nomenclature) നിർമ്മിക്കുന്നതിനുള്ള ഉത്തരവാദിത്തം ICZN-നാണ്. ജന്തുക്കളുടെ സാധാരണ നാമങ്ങളും (common names) പ്രാദേശിക നാമങ്ങളും ഏറെ വ്യത്യസ്തമായിരുക്കുന്നതിനാൽ ശാസ്ത്രീയ നാമങ്ങൾ ആഗോളതലത്തിൽ ജീവികളെ ഒറ്റപേരിൽ അറിയപ്പെടാൻ സഹായിക്കുന്നുവെന്ന് മാത്രമല്ല, ഏതുഭാഷയിലും ശാസ്ത്രനാമത്തിന് വ്യത്യാസം സംഭവിക്കാത്തതിനാൽ ഇവയെ കണ്ടെത്താനും രേഖപ്പെടുത്താനും (പ്രത്യേകിച്ച് കമ്പ്യൂട്ടർ വിവരശേഖരങ്ങളിലും സെർച്ച് എഞ്ചിനുകളിലും) കൂടുതൽ ഫലപ്രദമാവുകയും ചെയ്യുന്നു.

അന്താരാഷ്ട്ര നിയമാവലിയിൽ ജന്തുക്കൾക്ക് പേരുനൽകുന്നതിന് ചില നിഷ്കർഷകളുണ്ട്. ഏറെ സങ്കീർണമായ നിയമാവലിയിലെ ചില വ്യവസ്ഥകൾ ചുരുക്കിപ്പറയാം.

നിയമത്തിലെ 11.2, 11.3 അംശങ്ങൾ ലാറ്റിൻ അക്ഷരമാലയുടെ നിർബന്ധിത ഉപയോഗവും, ശാസ്ത്രനാമം ലാറ്റിൻ, ഗ്രീക്ക് അല്ലെങ്കിൽ മറ്റേതെങ്കിലും ഭാഷയിൽ നിന്നോ ഉരുത്തിരിഞ്ഞതോ ആവണം എന്ന് നിഷ്കർഷിക്കുന്നു. ഉദാഹരണത്തിന്, കേരളത്തിൽ ഏറ്റവും പ്രശസ്തമായ മാവേലി തവളയുടെ കാര്യമെടുക്കാം. Nasikabatrachus sahyadrensis Biju & Bossuyt- 2003 എന്നതാണ് ഇതിന്റെ ശാസ്ത്രനാമം. ഇതിൽ ജനുസ്സിന്റെ പേര് 'നാസികാബട്രാക്കസ്' എന്നും സ്പീഷീസിന്റെ പേര് 'സഹ്യാദ്രൻസിസ്' എന്നുമാണ്. പൂർണമായും നിയമം പാലിച്ചാണ് നാമകരണം. മറ്റു തവളകളിൽ നിന്ന് വ്യത്യസ്തമായി നീണ്ട മൂക്കുള്ള തവള ആയതിനാൽ മൂക്കിന്റെ സംസ്കൃതനാമം 'നാസിക'യും

തവളക്ക് ഗ്രീക്ക് ഭാഷയിൽ പറയുന്ന 'ബട്രാക്കസ്' (batrachos) എന്ന പേരും ചേർത്ത് ലാറ്റിനീകരിച്ചാണ് 'നാസികാബട്രാക്കസ്' എന്ന പേര് തിരഞ്ഞെടുത്തിരിക്കുന്നത്. സഹ്യാദ്രിയിൽ നിന്ന് കണ്ടെത്തിയതിനാൽ ലാറ്റിനീകരിച്ച പേരായ 'സഹ്യാദ്രൻസിസ്' എന്ന നാമം സ്പീഷീഷിനും നൽകി. പുതുതായി കണ്ടെത്തുന്ന ജീവിയുടെ പേരിടീൽ കർമത്തിന്റെ പൂർണസ്വാതന്ത്യം കണ്ടെത്തുന്നവർക്കാണ്, അത് നിയമവിധേയമായിരിക്കണമെന്ന് മാത്രം. ചില ജീവികൾക്ക് വ്യക്തികളുടെ പേര് നൽകുന്ന രീതിയും നിലവിലുണ്ട്. സുവർണാദേവിയും പീറ്ററും ചേർന്ന് കാസർഗോട്ടുനിന്ന് പുതുതായി കണ്ടെത്തിയ കണ്ടൽ ഞണ്ടിന് എന്റെ പേരാണ് നൽകിയിരിക്കുന്നത്, ലെപ്റ്റർമാ ബിജു (Leptarma biju).

പാരമ്പര്യവാദികൾ ലാറ്റിനീകരിച്ച പദങ്ങൾ തന്നെ ശാസ്ത്രനാമത്തിൽ വരണം എന്ന് ശഠിക്കുന്നവരാണ്. എന്നാൽ നിയമത്തിലെ ആർട്ടിക്കിൾ 26, ശാസ്ത്രീയ നാമങ്ങളിൽ ഗ്രീക്ക് അല്ലെങ്കിൽ ലാറ്റിൻ അനുമാനം ആവാം എന്ന് പറയുന്നുണ്ട്. ഇതനുസരിച്ച് നാം മലയാള പദങ്ങൾ അല്ലെങ്കിൽ മറ്റേതെങ്കിലും ഭാഷാപദങ്ങൾ ശാസ്ത്രനാമത്തിന് പരിഗണിച്ചാലും രചയിതാവ് മറ്റെന്തെങ്കിലും പ്രസ്താവിക്കുന്നില്ലെങ്കിൽ പ്രസ്തുത പേരോ ആ ഘടകമോ നിയമത്തിലെ പ്രസക്തമായ ഭാഷയിലെ (ഗ്രീക്ക് അല്ലെങ്കിൽ ലാറ്റിൻ) ഒരു പദമായി കണക്കാക്കും. നിയമത്തിലെ പ്രസ്തുത നിബന്ധന അനുസരിച്ചാണ് ‘കാണി മരഞണ്ട്’ എന്ന പേരുതന്നെ നൽകാൻ തീരുമാനിച്ചത്. ശാസ്ത്രനാമം ശാസ്ത്രമുള്ള കാലമത്രയും നിലനിൽക്കും, ഒപ്പം അങ്ങനെ നൽകിയ മലയാളം പേരും.

ഘടന, സവിശേഷത

കുറുകെ അണ്ഡാകൃതിയിലുള്ള പുറന്തോടും വളരെ നീണ്ട കാലുകളുമാണ് കാണി മരഞണ്ടിനെ മറ്റു ഞണ്ടുകളിൽനിന്ന് വ്യത്യസ്തമാക്കുന്നത്. നീണ്ട കാലുകളും ആദ്യ കാലിലെ അഗ്രഭാഗം വളഞ്ഞ ഉറച്ചമുള്ളുകളും അനായാസമായി മരം കയറാൻ ഇവയ്ക്ക് സഹായകമാകുന്നു. ശരീരത്തിന് നീലകലർന്ന കറുപ്പുനിറമാണ്. അടിവശത്തും പാർശ്വങ്ങളിലും ഓറഞ്ചുകലർന്ന മഞ്ഞനിറവുമുണ്ട്. മരപ്പൊത്തുകളിലെ വെള്ളത്തിൽ കഴിയുന്ന ഇവ അപൂർവമായേ പുറത്തിറങ്ങൂ, അതും പ്രധാനമായി രാത്രികളിൽ. ഇവ പ്രജനനം നടത്തുന്നതും മരപ്പൊത്തുകളിലാണ്. താന്നി, മരുത്, വയണ, ഏഴിലംപാല തുടങ്ങിയ മരങ്ങളിലെ പൊത്തുകളിലാണ് സാധാരണയായി ഇവയെ കാണുന്നത്.

വലിയ മരപ്പൊത്തിൽ ഒന്നിലധികം ഞണ്ടുകൾ ചിലപ്പോൾ ഒരുമിച്ചു താമസിക്കും. അവ താമസിക്കുന്ന പൊത്തിൽനിന്ന് പുറത്തേക്കുകളയുന്ന പൊടിയും വിസർജ്യവസ്തുക്കളും വെള്ളത്തിൽ നിന്ന് വരുന്ന കുമിളകളും നോക്കിയാണ് മരഞ്ഞണ്ടിന്റെ സാന്നിധ്യം കാണിക്കാർ തിരിച്ചറിയുന്നത്. കാണിക്കാർ ചർമ്മരോഗങ്ങൾ മാറ്റാൻ എണ്ണ കാച്ചാൻ മരഞണ്ടുകളെ ഉപയോഗിക്കാറുണ്ട്. മൂങ്ങ, കീരി തുടങ്ങിയവയാണ് മരഞ്ഞണ്ടിന്റെ പ്രധാന ശത്രുക്കൾ. ഇലകൾ, വിത്തുകൾ, ഒച്ച്‌, പ്രാണികൾ തുടങ്ങിയവയാണ് മരഞ്ഞണ്ടിന്റെ ആഹാരം.

പാരിസ്ഥിതിക സൂചകങ്ങൾ

നിറയെ വെള്ളമുള്ള മരപ്പൊത്തുകളിൽ മാത്രമാണ് മരഞണ്ടുകൾ താമസിക്കുന്നത്. വേനൽക്കാലത്ത് വെള്ളമില്ലാത്ത പൊത്തുകളിൽ നിന്ന് മരങ്ങളിൽ ഉയരത്തിലുള്ള പൊത്തുകളിലേക്ക് ഇവ കയറിപ്പോകും. അപൂർവ്വമായ മരഞ്ഞണ്ടുകളുടെ സാന്നിധ്യം പശ്ചിമഘട്ടത്തിൽ വനമേഖലയിലും അതിനോട് ചേർന്നുനിൽക്കുന്ന പ്രദേശങ്ങളിലേയും വലിയ മരങ്ങളെ സംരക്ഷിക്കേണ്ടതിന്റെ ആവശ്യം വ്യക്തമാക്കുന്നു. മരപ്പൊത്തിലെ വെള്ളത്തിൽ മാത്രം ജീവിക്കാൻ കഴിയുന്ന മരഞ്ഞണ്ടുകളെ കാടിന്റെ ആരോഗ്യത്തിന്റെ പ്രതീകങ്ങളായും കാണാൻ കഴിയും.

തുടർപഠനങ്ങൾ

ആദ്യം അഗസ്ത്യമലയിലെ കാടുകളിൽ മാത്രമാണ് കണ്ടതെങ്കിലും പിന്നീട് പഠനം ഏറ്റെടുത്ത എന്റെ ഗവേഷണ വിദ്യാർഥിനി സൗമ്യ, മരഞണ്ടിന്റെ സാന്നിദ്ധ്യം കേരളത്തിൽ ഒട്ടാകെ ഉണ്ടാകാം എന്ന് സാക്ഷ്യപ്പെടുത്തുന്നു. പല സുഹൃത്തുക്കളും കേരളത്തിലെ വിവിധ വനമേഖലകളിൽ നിന്ന് അയച്ചുതരുന്ന ചിത്രങ്ങളും ഇത് ശരിവയ്ക്കുന്നു. പാലക്കാട് ചുരത്തിന് വടക്ക് വയനാട്ടിലും കോഴിക്കോടുമൊക്കെ ഇവയെ കണ്ടെത്തിയിട്ടുണ്ട്. ഇവയുടെ ജീവശാസ്ത്രവും സ്വഭാവരീതികളും ഇപ്പോൾ കൂടുതൽ പഠനവിധേയമാക്കുന്നു. മരപ്പൊത്തിൽ പെൺഞണ്ടുകളുടെ ഉദരത്തിൽ തന്നെ വിരിയുന്ന കുഞ്ഞുങ്ങൾ അമ്മയോടൊപ്പം വെള്ളത്തിൽ മുതുകിലേറി നടക്കുന്നതും തുടർപഠനങ്ങളിൽ കണ്ടിട്ടുണ്ട്.

സൗമ്യ നടത്തിക്കൊണ്ടിരിക്കുന്ന ജീനോം പഠനങ്ങൾ ഇവയുടെ പരിണാമശാസ്ത്രത്തെപറ്റി രസകരമായ കൂടുതൽ വിവരങ്ങൾ വരുംനാളുകളിൽ ലഭ്യമാക്കുമെന്ന് പ്രതീക്ഷിക്കാം. ഒപ്പം, അധികം പഠനവിധേയമാക്കിയിട്ടില്ലാത്ത പശ്ചിമഘട്ടത്തിലെ ശുദ്ധജലജൈവവൈവിധ്യം, പ്രത്യേകിച്ചും അധികം അറിയപ്പെടാത്ത ജീവികളായ ഞണ്ടുകൾ, മറ്റ് ചെറിയ അകശേരുകികൾ എന്നിവയുടെ വൈവിധ്യം, കൂടുതൽ വ്യക്തമായി രേഖപ്പെടുത്തേണ്ട ആവശ്യവും ഇത്തരം പഠനങ്ങൾ വ്യക്തമാക്കുന്നു.

▮

ശുദ്ധജല ഞണ്ടുകളും
പാരിസ്ഥിതിക സേവനങ്ങളും

ശുദ്ധജല ആവാസവ്യവസ്ഥയിൽ ശുദ്ധജല ഞണ്ടുകൾ പാരിസ്ഥിതിക സന്തുലിതാവസ്ഥയ്ക്കും ജല പരിസ്ഥിതികളുടെ ആരോഗ്യത്തിനും ഗണ്യമായ സംഭാവന നൽകുന്നു.