കാർബൺ സെൽ;
ചൈനയുടെ ഉത്തരവും
ഉത്തരമില്ലാത്ത കേരളവും

ഒക്ടോബർ 15-ന് ചൈനയുടെ പരിസ്ഥിതി മന്ത്രാലയം (M.E.E) രണ്ട് കത്തുകളിലായി 11 കരട് കാർബൺ കണക്കെടുപ്പ് ചട്ടങ്ങൾ പുറത്തിറക്കി. ഹോട്ടലുകളിലെ പഴയ പാചക എണ്ണയിൽ നിന്നുള്ള ബയോ ഡീസൽ, സോഡിയം- അയോൺ, വനേഡിയം ഫ്ലോ ബാറ്ററി സംഭരണനിലയങ്ങൾ, പമ്പ്ഡ് സ്റ്റോറേജ് ജലവൈദ്യുതി, ഭക്ഷണ മാലിന്യ ബയോ ഗ്യാസ്, ഖനി വാഹനങ്ങളുടെ വൈദ്യുതീകരണം, വൈക്കോലും മരാവശിഷ്ടവും ഉപയോഗിച്ചുള്ള മെഥനോൾ എന്നിവയാണ് വിഷയങ്ങൾ. ഒക്ടോബർ 23 വരെയായിരുന്നു അഭിപ്രായം അറിയിക്കാനുള്ള സമയം.

ഇവ C.C.E.R (ചൈന സർട്ടിഫൈഡ് എമിഷൻ റിഡക്ഷൻ) എന്ന കാർബൺ ക്രെഡിറ്റ് പദ്ധതിയുടെ ഭാഗമാണ്. ഗുണനിലവാര സംശയങ്ങളെ തുടർന്ന് 2017-ൽ ചൈന ഈ പദ്ധതി നിർത്തിവെച്ചു. കർശന നിബന്ധനകളോടെ 2024 ജനുവരിയിൽ പുനരാരംഭിച്ചു. പേരിൽ ‘സ്വമേധയാ’ ആണെങ്കിലും C.C.E.R-ന് യഥാർഥ ആവശ്യക്കാരുണ്ട്. നിർബന്ധിത കാർബൺ വിപണിയിലുള്ള ഊർജ, ഉരുക്ക്, സിമന്റ് കമ്പനികൾക്ക് തങ്ങളുടെ ബാധ്യതയുടെ ഒരു ഭാഗം ഈ ക്രെഡിറ്റുകൾ കൊണ്ട് നികത്താം. അതുകൊണ്ടാണ് ഏതൊക്കെ പദ്ധതികൾക്ക് ക്രെഡിറ്റ് കിട്ടുമെന്ന് നിശ്ചയിക്കുന്ന മെത്തഡോളജികൾ സാമ്പത്തികമായും നിയമപരമായും പ്രധാനമാകുന്നത്.

ഒരു ടൺ ‘ഒഴിവാക്കിയ’ കാർബൺ ആരും കാണുന്നില്ല. അത് എപ്പോഴും ഒരു താരതമ്യമാണ്. പദ്ധതി ഇല്ലായിരുന്നെങ്കിൽ എന്ത് സംഭവിക്കുമായിരുന്നു എന്നതാണ് ‘ബേസ്‌ലൈൻ’. കാർബൺ വരുമാനമില്ലെങ്കിലും പദ്ധതി നടക്കുമായിരുന്നോ എന്ന ചോദ്യമാണ് ‘അഡിഷണാലിറ്റി’ (അധികത്വം). നടക്കുമായിരുന്നെങ്കിൽ ക്രെഡിറ്റ് നൽകുന്നത് അന്തരീക്ഷത്തിന് ഒരു ഗുണവും ചെയ്യാത്ത പണമാണ്. എന്ത്, എത്ര തവണ, ഏത് ഉപകരണം കൊണ്ട് അളക്കണം എന്നത് ‘മോണിറ്ററിങ്’. ഒരേ ടൺ രണ്ടുപേർ അവകാശപ്പെടാതിരിക്കാനുള്ള നിബന്ധനയാണ് ‘ഡബിൾ കൗണ്ടിങ്’ വിലക്ക്. ഈ ചോദ്യങ്ങൾക്കെല്ലാം ഉത്തരം നൽകുന്ന നിയമരേഖയാണ് മെത്തഡോളജി. കാർബൺ ക്രെഡിറ്റ് ഒരു കറൻസിയാണെങ്കിൽ, അത് അച്ചടിക്കാനുള്ള ചട്ടമാണ് മെത്തഡോളജി.

കേരളവും ഈ കറൻസിക്ക് പിന്നാലെയാണ്. ജൂൺ 19-ലെ പുതുക്കിയ ബജറ്റ് 2050-ഓടെ കാർബൺ ന്യൂട്രൽ കേരളം എന്ന ലക്ഷ്യം പ്രഖ്യാപിച്ചു. ഒക്ടോബർ ഏഴിന് കൃഷിമന്ത്രി ടി. സിദ്ദിഖ്, കർഷകർക്ക് കാർബൺ ക്രെഡിറ്റ് നേടിക്കൊടുക്കാൻ ലോകബാങ്ക് പിന്തുണയോടെ കൃഷിവകുപ്പിന് കീഴിൽ ‘കാർബൺ സെൽ’ പ്രഖ്യാപിച്ചു. കാർബൺ വിപണിയിൽ നിന്ന് പണം കണ്ടെത്താനുള്ള ഈ ശ്രമം ശരിയായ ദിശയിലാണ്. എന്നാൽ ചൈന ആദ്യം ചട്ടമെഴുതി, കേരളം ആദ്യം സ്ഥാപനം പ്രഖ്യാപിച്ചു.

ഇന്ത്യയിൽ ഇതുവരെ അംഗീകരിച്ചിട്ടുള്ളത് ഒമ്പത് മെത്തഡോളജികളാണ്. പഴയ പാചകഎണ്ണയിൽ നിന്നുള്ള ബയോ ഡീസലിനും വികേന്ദ്രീകൃത ഭക്ഷണ മാലിന്യ ബയോ ഗ്യാസിനും ഊർജസംഭരണത്തിനും അതിൽ ചട്ടമില്ല. ജലഗതാഗതവും ബയോഗ്യാസും ഉൾപ്പെടുന്ന ചില മേഖലകൾ ഇപ്പോഴും കരട് ഘട്ടത്തിലാണ്. ചൈനയുടെ കരടുകളിൽ കേരളത്തിന് കടമെടുക്കാവുന്ന നാല് ഉപകരണങ്ങളുണ്ട്: ട്രേസബിലിറ്റി, നിയമത്തിന് മുകളിലുള്ള കണക്ക്, സമയാധിഷ്ഠിത എമിഷൻ ഫാക്ടർ, തെളിവോടെയുള്ള കൂട്ട അഡിഷണാലിറ്റി. ഓരോന്നിനുമുള്ള ശാസ്ത്രീയ പഴുതുകൾ അടച്ചാൽ മാത്രമേ അവ ഉപകാരപ്പെടൂ.

ഇഷ്യൂ ചെയ്യാൻ അധികാരമില്ല,
നിർദേശിക്കാൻ വഴിയുണ്ട്

ഇന്ത്യയിലെ കാർബൺ ക്രെഡിറ്റ് ചട്ടക്കൂട് കേന്ദ്രത്തിന്റേതാണ്. 2022-ൽ ഭേദഗതി ചെയ്ത ഊർജ സംരക്ഷണനിയമം, 2001-ലെ വകുപ്പ് 14(w) പ്രകാരമാണ് കാർബൺ ക്രെഡിറ്റ് ട്രേഡിങ് സ്കീം- 2023 വന്നത്. അതിലെ ‘ഓഫ്‌സെറ്റ് മെക്കാനിസം’ നിർബന്ധിത ബാധ്യതയില്ലാത്ത പദ്ധതികൾക്ക് ക്രെഡിറ്റ് നൽകുന്ന ഭാഗമാണ്. ചൈനയുടെ C.C.E.R-ന്റെ ഇന്ത്യൻ പതിപ്പ് എന്നു പറയാം. 2025 മാർച്ച് 27-ന് പ്രാബല്യത്തിൽ വന്ന ഇതിന്റെ നടപടിക്രമത്തിലെ ബി 4.4.1 പ്രകാരം മെത്തഡോളജികൾ അംഗീകരിക്കുന്നത് കേന്ദ്രതല സമിതിയാണ് (N.S.C- I.C.M). അതിനാൽ കേരളത്തിന് സ്വന്തമായി ക്രെഡിറ്റ് ഇഷ്യൂ ചെയ്യാനാവില്ല. എന്നാൽ ബാധ്യതയില്ലാത്ത ഏത് സ്ഥാപനത്തിനും പുതിയ മെത്തഡോളജി നിർദേശിക്കാം.

അതിനാൽ കാർബൺ സെല്ലിന്റെ ആദ്യ ജോലി ചട്ടമെഴുത്താവണം. ചൈനയിൽ ഓരോ കരടിനുമൊപ്പം ഒരു ‘വിശദീകരണ കുറിപ്പ്’ ഉണ്ട്. സാങ്കേതിക പശ്ചാത്തലം, ലാഭക്കണക്ക്, പ്രതീക്ഷിക്കുന്ന കുറവ് എന്നിവ അതിലുണ്ടാകും. ഈ കരടുകൾ പെട്ടെന്ന് ഉണ്ടായതുമല്ല. പമ്പ്ഡ് സ്റ്റോറേജിന്റെ കാർബൺ കുറവ് കണക്കാക്കാനുള്ള രീതി 2024-ൽ തന്നെ ഹെബൈ അക്കാദമി ഓഫ് സയൻസസിന്റെ ജേണലിൽ ചൈനീസ് ഗവേഷകർ പ്രസിദ്ധീകരിച്ചിരുന്നു. ഫുജിയാനിലെ ഒരു പദ്ധതിയിൽ അത് പരീക്ഷിച്ചപ്പോൾ വർഷം 97,407 ടൺ കുറവാണ് കണക്കാക്കിയത്. ഗവേഷണം ആദ്യം, ചട്ടം പിന്നാലെ എന്ന ആ ക്രമമാണ് കേരളം പഠിക്കേണ്ടത്. കേരള കാർഷിക സർവകലാശാലയും ഐ.ഐ.ടി. പാലക്കാടും ഉൾപ്പെടുന്ന സംസ്ഥാനത്തിന്റെ ഗവേഷണശേഷി ഈ ജോലിക്ക് ഉപയോഗിക്കാം.

പഴയ എണ്ണ:
ട്രേസബിലിറ്റി കടലാസുപണിയല്ല,
വിശ്വാസ്യതയാണ്

പലതവണ ചൂടാക്കിയ എണ്ണ ഭക്ഷണത്തിലേക്ക് തിരികെയെത്തുന്നത് ആരോഗ്യപ്രശ്നമാണ്. FSSAI, പാചക എണ്ണയിലെ ‘ടോട്ടൽ പോളാർ കോമ്പൗണ്ട്സി’ന് (ചൂടാക്കുമ്പോൾ രൂപപ്പെടുന്ന വിഘടന സംയുക്തങ്ങൾ) 25% പരിധി വെച്ചിട്ടുണ്ട്. ഉപയോഗിച്ച എണ്ണ ബയോ ഡീസലാക്കാൻ ‘റൂകോ’ (റീപർപ്പസ് യൂസ്ഡ് കുക്കിങ് ഓയിൽ) പദ്ധതിയുമുണ്ട്.

പക്ഷേ ഈ വിപണിക്ക് വിശ്വാസ്യതാപ്രശ്നമുണ്ട്. 2024 മെയിൽ ഫ്രാൻസ്, ജർമനി, നെതർലൻഡ്സ് എന്നീ രാജ്യങ്ങൾ യൂറോപ്യൻ യൂണിയനോട് ഒരാവശ്യമുന്നയിച്ചു: ജൈവ ഇന്ധന ഇറക്കുമതിയുടെ ഉത്പാദനകേന്ദ്രങ്ങളിൽ കർശന പരിശോധന വേണം. ചൈനയിൽനിന്ന് ‘പുനരുപയോഗ എണ്ണ’ എന്ന പേരിൽ വന്നത് വിലകുറഞ്ഞ പുതിയ സസ്യ എണ്ണയാണെന്ന് യൂറോപ്യൻ ബയോ ഡീസൽ വ്യവസായം സംശയിച്ചിരുന്നു. ഈ പശ്ചാത്തലത്തിൽ വേണം ചൈനയുടെ ഹൈഡ്രോ കാർബൺ ബയോ ഡീസൽ കരട് വായിക്കാൻ. ലൈസൻസുള്ള മാലിന്യ ശേഖരണക്കാരിൽ നിന്നുള്ള എണ്ണയ്ക്ക് മാത്രമേ ക്രെഡിറ്റുള്ളൂ. ഇറക്കുമതി ചെയ്ത എണ്ണയിൽ നിന്നുള്ള ഉത്പാദനത്തിന് ക്രെഡിറ്റില്ല. ഇ-വേ ബില്ലുകളും വാഹനങ്ങളുടെ ഉപഗ്രഹ നാവിഗേഷൻ രേഖകളും റിയാക്ടറിന് മുമ്പിലെ ‘കോറിയോലിസ്’ ഫ്ലോമീറ്റർ (പിണ്ഡം നേരിട്ട് അളക്കുന്ന ഉപകരണം) റീഡിങ്ങുകളുമായി ഒത്തുനോക്കണം. രേഖകൾ പത്ത് വർഷം സൂക്ഷിക്കണം.

കേരളത്തിന് ഒരു ‘U.C.O ബയോ ഡീസൽ’ മെത്തഡോളജി നിർദേശിക്കാം. റൂകോ രജിസ്ട്രേഷനുള്ള ശേഖരണക്കാർ GPS രേഖകളോടെ ശേഖരിക്കുന്ന എണ്ണയ്ക്ക് മാത്രം ക്രെഡിറ്റ് നൽകാം. എണ്ണ കൈമാറുന്ന ഹോട്ടലിന് കാർബൺ വരുമാനത്തിന്റെ ഒരു വിഹിതവും നൽകാം. അങ്ങനെ ഭക്ഷ്യസുരക്ഷാനിയമം പാലിക്കുന്നത് ലാഭകരമാകും. പഴയ എണ്ണ രഹസ്യമായി വിൽക്കുന്നതിനേക്കാൾ രേഖയിൽ കൈമാറുന്നതിനാകും വില.

മാലിന്യം:
നിയമം നിർബന്ധമാക്കിയതിന്
ക്രെഡിറ്റുണ്ടോ?

കൂട്ടിയിട്ട ഭക്ഷണമാലിന്യം ഓക്സിജനില്ലാതെ അഴുകുമ്പോൾ മീഥെയ്ൻ ഉണ്ടാകുന്നു. 2023 മാർച്ചിലെ ബ്രഹ്മപുരം തീപിടിത്തം ആ മാലിന്യക്കൂനകളുടെ അപകടം കാണിച്ചുതന്നു. ബയോഗ്യാസ് പ്ലാന്റിൽ അതേ മീഥെയ്ൻ ഇന്ധനമാകും, എൽ.പി.ജി.ക്ക് പകരമാകും. ഇവിടെ രണ്ട് പ്രശ്നങ്ങളുണ്ട്.

ആദ്യത്തേത് നിയമപരമാണ്. ഏപ്രിൽ ഒന്നിന് പ്രാബല്യത്തിൽ വന്ന ഖരമാലിന്യ പരിപാലന ചട്ടങ്ങൾ (2026), ഉറവിടത്തിൽ നാല് തരമായി വേർതിരിക്കൽ നിർബന്ധമാക്കുന്നു. ഓഫ്‌സെറ്റ് നടപടിക്രമത്തിലെ ബി 3.7.1 നിയമപരമായി നിർബന്ധിതമായ പദ്ധതികളെ അയോഗ്യമാക്കുന്നു. ബി 4.7.2 പ്രകാരം, നിയമത്തിന് മുകളിലുള്ള ‘റെഗുലേറ്ററി സർപ്ലസ്’ തെളിയിക്കുകയും വേണം. തദ്ദേശ സ്ഥാപനങ്ങൾ ചെയ്യാൻ ബാധ്യസ്ഥമായ പ്രവൃത്തിക്ക് ക്രെഡിറ്റ് കിട്ടില്ലെങ്കിൽ, നിയമം ആവശ്യപ്പെടുന്നതിന് അപ്പുറമുള്ള മീഥെയ്ൻ പിടിച്ചെടുക്കലിന്റെ ചെലവ് ആര് വഹിക്കും?

ചൈനയുടെ ഉത്തരം: ബയോഡീസൽ മിശ്രണം നിർബന്ധമായിടത്ത്, ആ അനുപാതത്തിന് മുകളിലുള്ള അളവിന് മാത്രം ക്രെഡിറ്റ്. മുഴുവൻ പദ്ധതിയെയും പുറത്താക്കുന്നതിനുപകരം ഒരു സൂത്രവാക്യത്തിലൂടെ നിർബന്ധിത ഭാഗം കിഴിക്കുന്നു. കേരളത്തിന്റെ വികേന്ദ്രീകൃത ബയോഗ്യാസിനും ഇതേ ഘടന വേണം. ചട്ടം ആവശ്യപ്പെടുന്ന കുറഞ്ഞ സംസ്കരണ നിലവാരം ബേസ്‌ലൈനായി എടുക്കാം. അതിനപ്പുറം പിടിച്ചെടുത്ത് ഉപയോഗിക്കുന്ന മീഥെയ്ന് മാത്രം ക്രെഡിറ്റ് നൽകാം.

രണ്ടാമത്തേത് ശാസ്ത്രീയമാണ്. ബയോഗ്യാസ് പ്ലാന്റുകൾ തന്നെ മീഥെയ്ൻ ചോർത്തുന്നു. ഇംപീരിയൽ കോളേജ് ലണ്ടനിലെ സെമ്ര ബക്കലോഗ്ലുവും സംഘവും 2022-ൽ ‘വൺ എർത്ത്’ ജേണലിൽ പ്രസിദ്ധീകരിച്ച പഠനം ബയോഗ്യാസ്-ബയോമീഥെയ്ൻ ശൃംഖലകളിൽ നിന്നുള്ള ആഗോള മീഥെയ്ൻ ചോർച്ച കണക്കാക്കി; വർഷം 18.5 ദശലക്ഷം ടൺ. അന്താരാഷ്ട്ര ഊർജ ഏജൻസിയുടെ മുൻ കണക്കായ 9.1 ദശലക്ഷം ടണ്ണിന്റെ ഇരട്ടിയിലധികം. ചോർച്ചയ്ക്ക് ഒരു സ്ഥിര ശതമാനം ഊഹിക്കുന്ന മെത്തഡോളജി ക്രെഡിറ്റ് പെരുപ്പിക്കും. അതിനാൽ കേരളത്തിന്റെ നിർദേശത്തിൽ ആനുകാലിക ചോർച്ചാ പരിശോധന നിർബന്ധമാക്കണം. അളന്ന ചോർച്ച ക്രെഡിറ്റിൽ നിന്ന് കിഴിക്കുകയും വേണം.

വൈകുന്നേരം ആറു മണിയുടെ
കാർബൺ

സോളാർ ഉത്പാദനം നിലയ്ക്കുന്ന സന്ധ്യാസമയത്താണ് കേരളത്തിന്റെ വൈദ്യുതി ആവശ്യം ഏറ്റവും ഉയരുന്നത്. ഒരു യൂണിറ്റിന്റെ കാർബൺ അത് ഉത്പാദിപ്പിക്കപ്പെട്ട സമയത്തെ ആശ്രയിച്ചിരിക്കുന്നു. ഉച്ചയ്ക്ക് സോളാറിൽ നിന്നുള്ള യൂണിറ്റും രാത്രി കൽക്കരി നിലയത്തിൽ നിന്നുള്ള യൂണിറ്റും തുല്യമല്ല. വർഷത്തെ ശരാശരി എമിഷൻ ഫാക്ടർ ഉപയോഗിച്ചാൽ ബാറ്ററിയുടെ ഗുണം കാണാതാകും. ചാർജ് ചെയ്യുമ്പോഴും തിരികെ നൽകുമ്പോഴുമുള്ള നഷ്ടം മാത്രം കണക്കിൽ വരും.

ചൈനയുടെ സോഡിയം- അയോൺ, വനേഡിയം ഫ്ലോ ബാറ്ററി കരടുകൾ ഇവിടെയാണ് മുന്നിൽ. ചാർജിങ്ങും ഡിസ്ചാർജിങ്ങും അതത് മണിക്കൂറിലെ എമിഷൻ ഫാക്ടർ കൊണ്ടാണ് കണക്കാക്കുന്നത്. 0.5S ക്ലാസ് മീറ്ററുകൾ മണിക്കൂർ തോറും ഡേറ്റ രേഖപ്പെടുത്തണം. ഡേറ്റ ഓരോ സെക്കൻഡിലും ദേശീയ പ്ലാറ്റ്‌ഫോമിലെത്തണം. ഒരു വർഷത്തെ കുറവ് നെഗറ്റീവ് ആയാൽ അത് അടുത്ത കണക്കിലേക്ക് പോകും. മൊത്തം കണക്ക് നെഗറ്റീവ് ആണെങ്കിൽ രജിസ്ട്രേഷൻ തന്നെയില്ല.

പക്ഷേ ഇവിടെ ഒരു ശാസ്ത്രീയ കെണിയുണ്ട്. റോച്ചസ്റ്റർ ഇൻസ്റ്റിറ്റ്യൂട്ട് ഓഫ് ടെക്നോളജിയിലെ എറിക് ഹിറ്റിംഗറും കാർണഗി മെലൺ സർവകലാശാലയിലെ ഇനേസ് അസവേദോയും 2015-ൽ യു.എസ്. ഗ്രിഡിൽ നടത്തിയ പഠനം ഒരു കാര്യം കണ്ടെത്തി. വിപണി വിലയ്ക്കനുസരിച്ച് പ്രവർത്തിക്കുന്ന സംഭരണം വിലകുറഞ്ഞ രാത്രി സമയത്ത് കൽക്കരി വൈദ്യുതി കൊണ്ട് ചാർജ് ചെയ്യുന്നു. പകരം വെക്കുന്നതോ, പീക്ക് സമയത്തെ താരതമ്യേന ശുദ്ധമായ ഗ്യാസ് വൈദ്യുതിയെ. ഫലം: സംഭരണം നഷ്ടമില്ലാതെ പ്രവർത്തിച്ചാൽ പോലും മൊത്തം മലിനീകരണം കൂടും. ബാറ്ററി ശുദ്ധമാണോ എന്ന് തീരുമാനിക്കുന്നത് ഗ്രിഡിന്റെ ഘടനയാണ്.

ചൈനയുടെ കരട് ശരാശരിക്ക് പകരം സമയാധിഷ്ഠിത ഫാക്ടർ ഉപയോഗിക്കുന്നു, അത് നല്ലതാണ്. എന്നാൽ ഓരോ മണിക്കൂറിലും ഗ്രിഡിൽ കൂടുന്നതോ കുറയുന്നതോ ആയ നിലയത്തിന്റെ ‘മാർജിനൽ’ എമിഷൻ ഫാക്ടറാണ് യഥാർഥ ഫലം കാണിക്കുക. അതിനാൽ കേരളം നിർദേശിക്കുന്ന ബാറ്ററി, പമ്പ്ഡ് സ്റ്റോറേജ് മെത്തഡോളജിയിൽ രണ്ട് കാര്യങ്ങൾ വേണം. സ്റ്റേറ്റ് ലോഡ് ഡെസ്പാച്ച് സെന്റർ (S.L.D.C) മണിക്കൂർ തോറുമുള്ള മാർജിനൽ ഫാക്ടർ പ്രസിദ്ധീകരിക്കുകയും സാക്ഷ്യപ്പെടുത്തുകയും വേണം. ചൈനയുടെ നെഗറ്റീവ് ക്യാരി- ഫോർവേഡ് വ്യവസ്ഥ അതേപടി സ്വീകരിക്കുകയും വേണം. ഉത്തരേന്ത്യൻ കൽക്കരി വൈദ്യുതി കൊണ്ട് രാത്രി ചാർജ് ചെയ്യുന്ന ബാറ്ററിക്ക് ക്രെഡിറ്റ് പോകരുത്.

കായലിലെ ബോട്ടിന് ഒരു മെത്തഡോളജി

ഇനി കേരളത്തിന്റെ കായലിന് യോജിക്കുന്ന ഒന്ന്. 2023 ഏപ്രിൽ 25-ന് തുടങ്ങിയ കൊച്ചി വാട്ടർ മെട്രോ ബാറ്ററി- ഇലക്ട്രിക് ഹൈബ്രിഡ് ബോട്ടുകളാണ് ഉപയോഗിക്കുന്നത്. സംസ്ഥാന ജലഗതാഗത വകുപ്പിന്റെ ഫെറികളിൽ ഭൂരിഭാഗവും ഇപ്പോഴും ഡീസലിലാണ്. ചൈന ഖനിവാഹനങ്ങളുടെ വൈദ്യുതീകരണത്തിന് പ്രത്യേക കരട് തയ്യാറാക്കി. ഗതാഗത വൈദ്യുതീകരണത്തെ ഒരു സ്വതന്ത്ര വിഭാഗമായി കാണാമെന്നാണ് അതിന്റെ അർഥം. ബി.ഇ.ഇ.യും ഈ വർഷം കപ്പൽ, പൊതുഗതാഗത മേഖലകളിലെ കരട് മെത്തഡോളജികൾക്ക് അഭിപ്രായം തേടിയിരുന്നു. ഉൾനാടൻ ജലഗതാഗത വൈദ്യുതീകരണം അതിൽ വ്യക്തമായി ഉൾപ്പെടുത്താൻ കേരളം ആവശ്യപ്പെടണം.

ഇത്തരം ചെറിയ പൊതു പദ്ധതികൾക്ക് തടസ്സം അഡിഷണാലിറ്റി തെളിയിക്കലാണ്. ബി 4.7.1 പ്രകാരം ഓരോ പദ്ധതിയും കാർബൺ ക്രെഡിറ്റില്ലാതെ നടക്കില്ലായിരുന്നു എന്ന് സ്വന്തമായി തെളിയിക്കണം. ചൈന ഇവിടെ ഒരു കുറുക്കുവഴി സ്വീകരിച്ചു. യോഗ്യതാവ്യവസ്ഥ പാലിക്കുന്ന പദ്ധതികളെ ആറ് കരടുകളും അഡിഷണാലിറ്റി തെളിയിക്കുന്നതിൽ നിന്ന് ഒഴിവാക്കുന്നു. പകരം വിഭാഗത്തിന് മുഴുവനുമായുള്ള കണക്ക് പരസ്യമാക്കുന്നു. എസ്റ്റർ ബയോഡീസൽ പദ്ധതികളുടെ ആന്തരിക ലാഭനിരക്ക് (I.R.R) മൈനസ് 2 ശതമാനമാണ്, മാനദണ്ഡം 15 ശതമാനവും.

ഈ കുറുക്കുവഴിയുടെ അപകടം ഇന്ത്യക്കുതന്നെ അനുഭവമുണ്ട്. 2025-ൽ ‘അമേരിക്കൻ ഇക്കണോമിക് ജേണൽ: അപ്ലൈഡ്’ പ്രസിദ്ധീകരിച്ച പഠനത്തിൽ റാഫേൽ കലെലും സംഘവും, ആയിരത്തിലധികം ഇന്ത്യൻ കാറ്റാടി നിലയങ്ങളുടെ ഡേറ്റ പരിശോധിച്ചു. ക്ലീൻ ഡെവലപ്മെന്റ് മെക്കാനിസത്തിൽ അംഗീകരിച്ച ഓഫ്‌സെറ്റുകളിൽ കുറഞ്ഞത് 52 ശതമാനവും ക്രെഡിറ്റില്ലാതെയും നിർമിക്കപ്പെടുമായിരുന്ന പദ്ധതികൾക്കാണ് പോയതെന്ന് അവർ കണ്ടെത്തി. ആ ക്രെഡിറ്റുകൾ വാങ്ങിയ മലിനീകരണ കമ്പനികളിലൂടെ ആഗോള മലിനീകരണം കൂടുകയും ചെയ്തു. ചെലവ് കുറയുന്നതോടെ അഡിഷണൽ എന്ന് കരുതിയ വിഭാഗം ഇന്നത്തെ സാധാരണ ബിസിനസ് ആകുന്നു. അതിനാൽ കേരളം നിർദേശിക്കേണ്ടത് ഒരു ‘ഡൈനാമിക് പോസിറ്റീവ് ലിസ്റ്റ്’ ആണ്. I.R.R മാനദണ്ഡത്തിന് താഴെയാണോ എന്ന് നിശ്ചിത ഇടവേളകളിൽ പുനഃപരിശോധിക്കണം. മാനദണ്ഡം കടന്നാൽ പുതിയ പദ്ധതികൾക്ക് ഓട്ടോമാറ്റിക് അഡിഷണാലിറ്റി അവസാനിക്കണം. വാട്ടർ മെട്രോയുടെയും ഫെറികളുടെയും ചെലവ്-വരുമാന കണക്ക് പ്രസിദ്ധീകരിക്കുന്നത് അതിന്റെ ആദ്യപടിയാകും.

ലോകബാങ്കിന്റെ പിന്തുണ കാർബൺ സെല്ലിന് പണം നൽകും. പക്ഷേ ആ സെൽ വിൽക്കുന്ന ഓരോ ടണ്ണിനും വാങ്ങുന്നയാൾ വില നൽകുന്നത് ഒരു ചോദ്യത്തിനുള്ള ഉത്തരം കണ്ടാണ്: ആ ടൺ ആര്, എങ്ങനെ എണ്ണി? ഒക്ടോബർ 15-ന് ചൈന ആ ചോദ്യത്തിന് 11 കരട് ഉത്തരങ്ങൾ മേശപ്പുറത്ത് വെച്ചു. കേരളം ഒരെണ്ണമെങ്കിലും വെക്കണം.