കാൻസർ എന്ന വാക്ക് കേൾക്കുമ്പോൾ തന്നെ ആളുകൾ ഏറ്റവും ഭയപ്പെടുന്ന ഒന്നാണ് വേദന. കാൻസറിന്റെ വേദന ഒഴിവാക്കാനാവാത്തതാണെന്നും പ്രത്യേകിച്ച് ഒന്നും ചെയ്യാൻ കഴിയില്ലെന്നും പലരും വിശ്വസിക്കുന്നു. എന്നാൽ ഇത് ശരിയല്ല. ഏകദേശം 90 ശതമാനത്തോളം രോഗികളിലും വേദന സംഹാരികൾ കൊണ്ടുതന്നെ വേദന നിയന്ത്രിക്കാം.
ഇന്ത്യയിലും കേരളത്തിലും കാൻസറിന്റെ വ്യാപ്തി
ഇന്ത്യയിൽ കാൻസർ വളർന്നുവരുന്ന പൊതുജനാരോഗ്യ വെല്ലുവിളിയാണ്:
കാൻസർ ബാധിതരുടെ എണ്ണത്തിൽ ഇന്ത്യ നിലവിൽ ആഗോളതലത്തിൽ മൂന്നാം സ്ഥാനത്താണ്, ഓരോ വർഷവും ഏകദേശം 15 ലക്ഷം പുതിയ കേസുകൾ റിപ്പോർട്ട് ചെയ്യപ്പെടുന്നു.
പുകയില, മദ്യം, മോശമായ ഭക്ഷണക്രമം, ഉദാസീനമായ ജീവിതശൈലി തുടങ്ങിയ ഘട കങ്ങളാണ് പ്രധാന കാരണങ്ങൾ.
ഇന്ത്യയിലെ ഏറ്റവും ഉയർന്ന കാൻസർ നിരക്കുള്ള സംസ്ഥാനങ്ങളിൽ ഒന്നാണ് കേരളം. സംസ്ഥാനത്ത് ഓരോ വർഷവും ഏകദേശം 80,000– 90,000 പുതിയ കേസുകൾ റിപ്പോർട്ട് ചെയ്യപ്പെടുന്നു. ഇതിന്റെ പ്രധാന കാരണം മികച്ച കണ്ടെത്തൽ രീതികൾ ഉപയോഗിക്കുന്നതിനാൽ കൂടുതൽ കാൻസർ രോഗികളെ കണ്ടെത്താൻ സാധിക്കുന്നു എന്ന വസ്തുതയാണ്.
അന്താരാഷ്ട്ര സംഘടനകളുടെ പഠനപ്രകാരം വേദനാചികിത്സ ഒരു അടിസ്ഥാന മനുഷ്യാവകാശമാണെന്ന് വേൾഡ് മെഡിക്കൽ അസോസിയേഷൻ (WMA) പറയുന്നു.
മോർഫിൻ പോലുള്ള ശക്തമായ വേദനാമരുന്നുകൾ ആവശ്യ (essential medicines) മരുന്നുകളുടെ പട്ടികയിൽ ഉൾപ്പെടുത്തിയിട്ടുണ്ട്.
ഐക്യരാഷ്ട്രസഭ ആരോഗ്യത്തിനുള്ള അവകാശം ഒരു അടിസ്ഥാന മനുഷ്യാവകാശമായി അംഗീകരിക്കുന്നു - ഇതിൽ അവശ്യമരുന്നുകളുടെ ലഭ്യതയും ഉൾപ്പെടുന്നു. സുരക്ഷിതവും ഫലപ്രദവുമായ വേദന -ചികിത്സ നിലവിലുണ്ടെങ്കിൽ മനുഷ്യർക്ക് അത് നിഷേധിക്കരുത്. പല രോഗികളും ഇപ്പോഴും വേദന ഉണ്ടായിട്ടും മരുന്ന് കഴിക്കാൻ വിസമ്മതിക്കുന്നത് താഴെ പറയുന്ന കാരണങ്ങൾ കൊണ്ടാണ്.
മോർഫിൻ പോലുള്ള ശക്തമായ വേദനസംഹാരികളെക്കുറിച്ചുള്ള ഭയം.
അവബോധത്തിന്റെ അഭാവം.
ഗ്രാമപ്രദേശങ്ങളിൽ പാലിയേറ്റീവ് പരിചരണം ലഭ്യമാകാനുള്ള പ്രയാസം.
മോർഫിൻ പോലുള്ള ഒപ്പിയോയിഡ് മരുന്നുകളെ കുറിച്ചുള്ള സമൂഹത്തിലുള്ള തെറ്റിദ്ധാരണകൾ.
പാലിയേറ്റീവ് കെയർ ഒരു മാതൃക
സാമൂഹികാടിസ്ഥാനത്തിലുള്ള പാലിയേറ്റീവ് കെയർ പ്രസ്ഥാനം കരുപ്പിടിപ്പിച്ചതിന് കേരളം അന്താരാഷ്ട്രതലത്തിൽ അംഗീകരിക്കപ്പെട്ടിരിക്കുന്നു.
ഇന്ത്യയിലെ ഏറ്റവും വലിയ പാലിയേറ്റീവ് കെയർ സേവന ശൃംഖലകളിലൊന്നാണ് സംസ്ഥാനത്തിനുള്ളത്.
ഗാർഹിക പരിചരണത്തിൽ (homecare) കമ്മ്യൂണിറ്റി വളണ്ടിയർമാർ സജീവമായി പങ്കെടുക്കുന്നു.
വേദനാപരിഹാരവും ജീവിതാവസാന പരിചരണവും മെച്ചപ്പെടുത്തുന്നതിനുള്ള പൊതു ജനാരോഗ്യമാതൃകയായി കേരളത്തിന്റെ സമീപനം ആഗോളതലത്തിൽ അംഗീകരിക്കപ്പെട്ടിട്ടുണ്ട്.
ഈ പുരോഗതികളൊക്കെ ഉണ്ടായിട്ടും, ഓരോ രോഗിക്കും പ്രയോജനം ലഭിക്കുന്നുണ്ടെന്ന് ഉറപ്പാക്കാൻ തുടർച്ചയായ അവബോധം, പരിശീലനം, അവശ്യ മരുന്നുകളുടെ ലഭ്യത എന്നിവ പ്രധാനമാണ്.
എല്ലാ കാൻസർ രോഗികൾക്കും വേദനയുണ്ടോ?
കാൻസർ ബാധിച്ച എല്ലാവർക്കും വേദന ഉണ്ടാവണമെന്ന് നിർബന്ധമില്ല.
രോഗനിർണയ സമയത്ത് ഏകദേശം 3 രോഗികളിൽ ഒരാൾക്ക് (30-50%) വേദന ഉണ്ടായേക്കാം.
ചികിത്സയ്ക്കിടെ, ചിലർക്ക് വേദന ഉണ്ടായേക്കാം.
മൂർദ്ധന്യാവസ്ഥയിൽ, ശരിയായ ചികിത്സ നൽകിയില്ലെങ്കിൽ പല രോഗികൾക്കും (70- 80%) വേദന അനുഭവപ്പെടുന്നു.
വേദന ശാരീരിക സുഖത്തെ മാത്രമല്ല, ഉറക്കം, മാനസികാവസ്ഥ, വിശപ്പ്, ബന്ധങ്ങൾ, ആത്മീ യക്ഷേമം എന്നിവയെയും ബാധിക്കുന്നു. കൂടാതെ പരിചരണക്കാരുടെ ഭാരവും വർദ്ധിക്കുന്നു. അതി നാൽ ഫലപ്രദമായ വേദനയിൽ നിന്നുള്ള ആശ്വാസം ഗുണനിലവാരമുള്ള കാൻസർ പരിചരണത്തിന്റെ അവിഭാജ്യ ഘടകമാണ്
കാൻസർ വേദനയുടെ കാരണങ്ങൾ:
കാൻസർ വേദന ഒന്നിലധികം കാരണങ്ങൾ കൊണ്ട് ഉണ്ടാകാം:
1. ട്യൂമർ സംബന്ധമായ വേദന:
കാൻസർ അസ്ഥിയിലേക്കു വ്യാപിക്കുമ്പോൾ. (സ്തനം, പ്രോസ്റ്റേറ്റ്, ശ്വാസകോശ അർബുദങ്ങളിൽ സാധാരണമാണ്).
നാഡീസമ്മർദ്ദം.
തലയോട്ടിക്കുള്ളിലെ മർദ്ദം ഉയരുമ്പോൾ.
2. ചികിത്സയുമായി ബന്ധപ്പെട്ട വേദന
ശസ്ത്രക്രിയയ്ക്കു ശേഷമുള്ള വേദന.
കീമോതെറാപ്പി മൂലമുണ്ടാകുന്ന ന്യൂറോപ്പതി.
റേഡിയേഷൻ, മ്യൂക്കോസൈറ്റിസ് (റേഡിയേഷൻ മൂലം വായിലുണ്ടാകുന്ന പ്രത്യേക വീക്കത്തെയോ വൃണത്തെയോ സൂചിപ്പിക്കുന്നു).
3. കാൻസർ ഇതര വേദന:
കാൻസർ രോഗികൾക്ക് അസുഖസംബന്ധമല്ലാത്ത മറ്റു ചില കാരണങ്ങൾ കൊണ്ടും വേദന വന്നേക്കാം (ഉദാഹരണംആർത്രൈറ്റിസ്, ഡയബറ്റിക് ന്യൂറോപ്പതി).
കാൻസർ വേദന പലപ്പോഴും ബഹുമുഖമാണ്, ശാരീരികവും മാനസികവും സാമൂഹികവും ആത്മീയവുമായ ഘടകങ്ങൾ ഇതിൽ ഉൾപ്പെടുന്നു.
കാൻസർ വേദനയുടെ തരങ്ങൾ:
വേദനയുടെ തരം മനസ്സിലാക്കുന്നത് ചികിത്സയെ സഹായിക്കുന്നു:
നോസിസെപ്റ്റീവ് വേദന
മങ്ങിയ, അല്ലെങ്കിൽ മിടിക്കുന്ന വേദന (ഉദാ. അസ്ഥിയിൽ അസുഖം വ്യാപിക്കുമ്പോൾ ഉണ്ടാകുന്ന വേദന).
ന്യൂറോപതിക് വേദന
പുകച്ചിൽ, മിന്നൽ പോലുള്ള വേദന, ഷോക്കടിക്കുന്ന പോലുള്ള വേദന (നാഡിയെ ബാധിക്കുമ്പോൾ).
ബ്രേക്ക് ത്രൂ വേദന
അടിസ്ഥാന നിയന്ത്രണം ഉണ്ടായിരുന്നിട്ടും കഠിനമായ വേദനയുടെ പെട്ടെന്നുള്ള ജ്വലനം.
ഇൻസിസിഡന്റ് വേദന
ചലനം അല്ലെങ്കിൽ പ്രവർത്തനം മൂലമുണ്ടാകുന്ന വേദന.
കാൻസർ വേദനയുടെ ചികിത്സാരീതി
പതിവ് വിലയിരുത്തൽ:
ആദ്യം ചെയ്യേണ്ടതും പ്രധാനവുമായ കാര്യമാണ് വേദനയുടെ ശരിയായ വിലയിരുത്തൽ. വേദനയെ "അഞ്ചാമത്തെ സുപ്രധാന ലക്ഷണമായി" കണക്കാക്കണം. (മറ്റ് 4 എണ്ണം പൾസ്, രക്തസമ്മർദ്ദം, ശ്വസനനിരക്ക്, താപനില എന്നിവയാണ്). വേദനയുടെ കൃത്യമായ സ്ഥാനം, 0 മുതൽ 10 വരെയുള്ള സ്കെയിലിൽ തീവ്രത, വേദനയുടെ സ്വഭാവം, ദൈർഘ്യം, വേദന വഷളാക്കുന്നതും ആശ്വാസകരവുമായ ഘട കങ്ങൾ, ദൈനംദിന ജീവിതത്തിൽ വേദനയുടെ സ്വാധീനം എന്നിവ വിലയിരുത്തി ചെയ്യണം.
അനൽജസിക് ലാഡർ
കാൻസർ വേദന കൈകാര്യം ചെയ്യുന്നതിൽ പടിപടിയായുള്ള സമീപനമാണ് ഉപയോഗിക്കുന്നത്. ഇതിൽ മൂന്ന് ഘട്ടങ്ങളായുള്ള മരുന്നുകൾ ഉപയോഗിക്കുന്നു.
ആദ്യ ഘട്ട മരുന്നുകൾ:
നേരിയ വേദനയ്ക്ക് ഉപയോഗിക്കുന്നു. (പാരസെറ്റമോൾ പോലുള്ളവ).
ഘട്ടം 2 മരുന്നുകൾ:
മിതമായ വേദന നിയന്ത്രിക്കാൻ ഉപയോഗിക്കുന്നു (ട്രമാഡോൾ പോലുള്ളവ).
ഘട്ടം 3 മരുന്നുകൾ:
കഠിനമായ വേദന നിയന്ത്രിക്കാൻ ഉപയോഗിക്കുന്നു (മോർഫിൻ, ഫെന്റനൈൽ മുതലായവ).
പ്രായമായവരിൽ വേദനാസംഹാരികൾ തുടങ്ങുമ്പോ ളുള്ള പ്രത്യേക പരിഗണനകൾ:
കുറഞ്ഞ അളവിലുള്ള ആരംഭ ഡോസുകൾ.
മയക്കം, ആശയക്കുഴപ്പം എന്നിവയുടെ ശ്രദ്ധാപൂർവ്വമായ നിരീക്ഷണം
വൃക്കകളും വിലയിരുത്തണം
മറ്റു മാർഗങ്ങൾ:
ഇന്റർവെൻഷണൽ, നോൺ-ഡ്രഗ് തെറാപ്പികൾ:
വേദന സങ്കീർണമാകുമ്പോൾ അല്ലെങ്കിൽ വേദനയിൽ മാറ്റം ഇല്ലാത്തപ്പോൾ നാഡി ബ്ലോക്ക് (ഇന്റർവെൻഷണൽ രീതി) ചെയ്യാറുണ്ട്. ഇത് 10 ശതമാനം രോഗികൾക്ക് മാത്രമേ ചെയ്യേണ്ടി വരാറുള്ളൂ. (ഇന്റർവെൻഷണൽ തെറാപ്പി- വലിയ ശാസ്ത്രക്രിയകളിലൂടെയല്ലാതെ ചെറിയ സുഷിരങ്ങളിലൂടെ സൂചികൾ, കത്തീറ്ററുകൾ എന്നിവ ഉപയോഗിച്ച് ഇമേജിങ് സാങ്കേതിക വിദ്യയുടെ സഹായത്തോടെ വേദന കുറക്കുന്ന ആധുനിക രീതിയാണ്).
ഇതു കൂടാതെ മനഃശാസ്ത്രപരമായ പിന്തുണ, ഫിസിയോതെറാപ്പി, റീലാക്സേഷൻ, മൈൻഡ്ഫുൾനെസ് ടെക്നിക്കുകൾ എന്നിവയ്ക്ക് പുറമേ, ആത്മീയ പരിചരണ പിന്തുണയും പരിഗണിക്കപ്പെടുന്നു. കാരണം വേദനയ്ക്ക് മാനസികവും സാമൂഹികവും ആത്മീയവുമായ ഘടകങ്ങളും ഉണ്ട്. അതിനാൽ ഒരു മൾട്ടി ഡിസിപ്ലിനറി സമീപനം മികച്ച ഫലങ്ങൾ നൽകുന്നു.
കാൻസർ വേദനയെക്കുറിച്ചുള്ള പൊതുവായ മിഥ്യാധാരണകൾ:
മോർഫിൻ പോലുള്ള ശക്തമായ വേദന സംഹാരികൾ കഴിക്കാൻ പലരും ഭയപ്പെടുന്നു. ചില തെറ്റിദ്ധാരണകൾ നോക്കാം:
മിഥ്യ: മോർഫിൻ കഴിക്കുന്നത് രോഗത്തിന്റെ അവസാന ഘട്ടത്തിലാണ്.
സത്യം: വേദന കഠിനമാകുമ്പോഴെല്ലാം, ഏത് ഘട്ടത്തിലും മോർഫിൻ ഉപയോഗിക്കുന്നു.
മിഥ്യ: മോർഫിൻ പോലുള്ള ശക്തമായ മരുന്നുകൾക്ക് രോഗി അടിമപ്പെടാൻ (addiction) കാരണമാകുന്നു.
സത്യം: കാൻസർ വേദനയ്ക്ക് മോർഫിൻ ശരിയായി നിർദ്ദേശിക്കുമ്പോൾ, അടിമപ്പെടുന്നത്(addiction) വളരെ അപൂർവമാണ്.
മിഥ്യ: കാൻസർ രോഗികൾ സഹിക്കേണ്ട ഒന്നാണ് വേദന.
സത്യം: വേദന എപ്പോഴും ചികിത്സിക്കേണ്ടതാണ്.
ഈ തെറ്റിദ്ധാരണകൾ പലപ്പോഴും മതിയായ ചികിത്സ വൈകിപ്പിക്കുന്നു. മെഡിക്കൽ മേൽനോട്ടത്തിൽ ഉചിതമായി ഉപയോഗിക്കുമ്പോൾ, മോർഫിൻ പോലുള്ള ഒപിയോയിഡുകൾ സുരക്ഷിതവും ഫലപ്രദവുമാണ്, കൂടാതെ കാൻസർ രോഗികളിൽ മാനസിക ആസക്തിക്ക് കാരണമാകുന്നത് അപൂർവമാണ്.
കുടുംബാംഗങ്ങൾ ചെയ്യേണ്ട കാര്യങ്ങൾ:
രോഗിയുടെ വേദനയെക്കുറിച്ച് തുറന്നു സംസാരിക്കാൻ രോഗി കളെ പ്രോത്സാഹിപ്പിക്കുക.
ഡോക്ടർമാരുമായി കൂടിയാലോചിക്കാതെ മരുന്നുകൾ നിർത്തരുത്.
വേദന നിയന്ത്രണം മാനസികാവസ്ഥയും ശക്തിയും മെച്ചപ്പെടുത്തുമെന്ന് മനസ്സിലാക്കുക.
നല്ല വേദനാനിയന്ത്രണം രോഗികളെ നന്നായി ഭക്ഷണം കഴിക്കാനും നന്നായി ഉറങ്ങാനും പ്രിയപ്പെട്ടവരുമായി അർത്ഥവത്തായ സമയം ചെലവഴിക്കാനും സഹായിക്കുന്നു.
വേദനയിൽനിന്നുള്ള ആശ്വാസം ഒരു അടിസ്ഥാന മനുഷ്യാവകാശമാണ്. ആയുസ്സ് വർദ്ധിപ്പിക്കുക മാത്രമല്ല, ആശ്വാസവും അന്തസ്സും ഉറപ്പാക്കുക എന്നതാണ് ലക്ഷ്യം.
ഓർമ്മിക്കേണ്ട ആശയങ്ങൾ
കാൻസർരോഗികൾക്ക് വേദന സാധാരണമാണ്, എന്നാൽ ചികിത്സിക്കാവുന്നതാണ്.
മോർഫിൻ, ശരിയായി ഉപയോഗിക്കുമ്പോൾ, സുരക്ഷിതവും ഫലപ്രദവുമാണ്.
വേദനാനിയന്ത്രണം അതിജീവന അനുഭവവും ജീവിതനിലവാരവും മെച്ചപ്പെടുത്തുന്നു.
ഒരു രോഗിയും അനാവശ്യമായ കഷ്ടപ്പാടുകൾ സഹിക്കരുത്.
പാലിയേറ്റീവ് കെയറിലേക്ക് സമയബന്ധിതമായി റഫർ ചെയ്യുന്നത് രോഗികൾക്ക് ഉപകാ രപ്രദമാകും.
നിങ്ങൾക്ക് അറിയാമോ?
ലോകത്തിലെ ഏകദേശം 80% ആളുകൾക്ക് വേദനയിൽ നിന്ന് മതിയായ ആശ്വാസം ലഭിക്കുന്നില്ല.
ക്യാൻസറിലെ ഗുരുതര വേദന ലളിതവും ചെലവുകുറഞ്ഞതുമായ മരുന്നുകളിലൂടെ നിയന്ത്രിക്കാനാകും.
ഡോക്ടറുടെ മേൽനോട്ടത്തിൽ ഉപയോഗിക്കുന്ന മോർഫിൻ സുരക്ഷിതമാണ്, കൂടാതെ കാൻസർ രോഗികളിൽആസക്തി(addiction) വളരെ അപൂർവ്വമാണ്.
ഗുരുതരമായ വേദന ചികിത്സിക്കാതിരിക്കുന്നത് അനാവശ്യമായ മാനസികവും ശാരീരികവുമായ പീഡനമായി കണക്കാക്കപ്പെടുന്നു.
രോഗികളുടെ വേദനയെ ഒരിക്കലും അവഗണിക്കുകയോ ലളിതമായി കരുതുകയോ ചെയ്യരുത്. ആശ്വാസം ചോദിക്കുന്നത് ബലഹീനതയല്ല, അത് ഒരു അവകാശമാണ്.
