ഓപ്പറേഷൻ തിയറ്ററിനുവേണം
മുൻകരുതലുകൾ, ചില മുൻഗണനകളും

ആധുനിക വൈദ്യശാസ്ത്രത്തിന്റെ അന്തഃസ്സത്ത ഉൾക്കൊള്ളുന്ന മെഡിക്കൽ പ്രൊഫഷണലുകളുടെ ഏറ്റവും നിർണായകമായ ഉത്തരവാദിത്തങ്ങളിലൊന്ന് അവരുടെ രോഗികളുടെ സുരക്ഷയും ക്ഷേമവും ഉറപ്പാക്കുക എന്നതാണ്. അവരെ നയിക്കുന്ന സങ്കല്പം തന്നെ Primum non nocere അഥവാ ‘ഉപദ്രവിക്കാതിരിക്കുക ആദ്യം’ എന്നതാണ്. സങ്കീർണ നടപടിക്രമങ്ങൾ കൃത്യതയോടെയും ശ്രദ്ധയോടെയും നടക്കുന്ന ഓപ്പറേഷൻ തിയറ്ററിൽ ഇത് പ്രത്യേകം പാലിക്കേണ്ടതാണ് എന്ന് പറയേണ്ടതില്ലല്ലോ. ഓപ്പറേഷൻ റൂമിലെ പ്രധാന മുൻഗണനകളിൽ ഒന്നാണ് വിനാശകരമായ രണ്ട് പിഴവുകൾ തടയുന്നത്.
തെറ്റായ രോഗിയിൽ ഓപ്പറേഷൻ ചെയ്യുക അല്ലെങ്കിൽ തെറ്റായ അവയവത്തിൽ ഓപ്പറേഷൻ ചെയ്യുക എന്നതാണ് ഈ പിഴവുകൾ.

ഈ അപകടസാധ്യതകൾ ലോകമാസകലം തിരിച്ചറിഞ്ഞിട്ടുള്ളതാണ്. അതുകൊണ്ടുതന്നെ ഇവ തടയുന്നതിന് ഈ രംഗത്ത് പ്രവർത്തിക്കുന്ന സംഘടനകൾ, സർജിക്കൽ ടീമുകൾ കർശനമായി പാലിക്കേണ്ട സമഗ്രമായ മുൻകരുതലുകൾ വികസിപ്പിച്ചെടുത്തിട്ടുണ്ട്. ഒന്നിലധികം പോയിന്റുകളിൽ പരിശോധനകൾ നടക്കുന്നതും സുപ്രധാനമായ എല്ലാ വിവരങ്ങളും പല തവണ ചെക്ക് ചെയ്യുന്നതും ഇത്തരം മുൻകരുതലുകളുടെ ഭാഗമാണ്.

മനുഷ്യർ പിഴവ് വരുത്താൻ സാധ്യതയുള്ള ജീവികളാണ് എന്ന വസ്തുത അംഗീകരിക്കുകയാണ് ഇത്തരം മുൻകരുതലുകൾ നടപ്പാക്കാൻ നാം ആദ്യം ചെയ്യേണ്ടത്. കൂടുതൽ ആളുകൾ ഒരേ കാര്യം പരിശോധിക്കുമ്പോൾ പിഴവുകൾ തിരിച്ചറിയപ്പെടാതെ പോകാനുള്ള സാധ്യത കുറയുന്നു. ഇത്തരം മുൻകരുതലുകൾ നടപ്പാക്കാൻ കഴിയുന്ന രീതിയിൽ മനുഷ്യവിഭവ ശേഷി, ജോലിഭാരം, പശ്ചാത്തല സൗകര്യങ്ങൾ എന്നിവയെല്ലാം ക്രമീകരിച്ചാൽ മാത്രമേ ഇത്തരം പിഴവുകൾ ഒഴിവാക്കാൻ ആരോഗ്യ സംവിധാനത്തിന് സാധിക്കൂ. ഓപ്പറേഷൻ ചെയ്യുന്ന സർജന് ഒറ്റയ്ക്ക് പരിഹരിക്കാനാകുന്ന ഒരു പ്രശ്നമല്ല ഇത്. സുരക്ഷയും അതിനുള്ള ചെലവും ആരോഗ്യ സംസ്കാരത്തിന്റെ ഭാഗമായി മാറണം.

രോഗിയെ തിരിച്ചറിയൽ:
രോഗിയെ കൃത്യമായി തിരിച്ചറിയുക എന്നതാണ് ആദ്യത്തേതും ഏറ്റവും അടിസ്ഥാനപരവുമായ ഘട്ടം. ഏതെങ്കിലും ശസ്ത്രക്രിയ ആരംഭിക്കുന്നതിനുമുമ്പ്, ശസ്ത്രക്രിയാസംഘം രോഗിയുടെ പേര്, ജനനത്തീയതി, മെഡിക്കൽ റെക്കോർഡ് നമ്പർ എന്നിവ ശസ്ത്രക്രിയാ സമ്മതപത്രത്തോടും രോഗിയുടെ ആശുപത്രി രേഖകളോടും ക്രോസ്-ചെക്ക് ചെയ്യും. ഐഡൻ്റിറ്റി സ്ഥിരീകരിക്കുന്നതിന് അവരുടെ മുഴുവൻ പേരും ജനനത്തീയതിയും ഏത് ശസ്ത്രക്രിയയാണ് ചെയ്യാൻ പോകുന്നത് എന്ന കാര്യവും രോഗിയോട് നേരിട്ട് ചോദിച്ച് സ്ഥിരീകരിക്കുകയും ചെയ്യാറുണ്ട്. കൂടാതെ സമ്മതപത്രത്തിലെ ഒപ്പ് രോഗിയുടേതു തന്നെയാണോ എന്ന് അവരോട് ചോദിച്ച് ഉറപ്പുവരുത്തുകയും ചെയ്യും. സ്വയം സമ്മതം നൽകാൻ കപ്പാസിറ്റി ഇല്ലാത്ത വ്യക്തിയാണെങ്കിൽ അവർക്കുവേണ്ടി സമ്മതപത്രം ഒപ്പിട്ട ആളെ ഇത്തരം വെരിഫിക്കേഷനിൽ ഉൾപ്പെടുത്തുന്നു.

ഓപ്പറേഷൻ ചെയ്യുന്ന സ്ഥലം അടയാളപ്പെടുത്തൽ: രോഗിയുടെ ഐഡൻ്റിറ്റി പരിശോധിച്ചുറപ്പിച്ചുകഴിഞ്ഞാൽ, ശസ്ത്രക്രിയ നടക്കുന്ന രോഗിയുടെ ശരീരത്തിലെ കൃത്യമായ സ്ഥാനം വ്യക്തമായി അടയാളപ്പെടുത്താൻ സർജൻ ഒരു സ്കിൻ മാർക്കർ ഉപയോഗിക്കും. രോഗിക്ക് മയക്കം നൽകി കഴിഞ്ഞാൽ പിന്നീട് പരിശോധിക്കനോ ചോദ്യങ്ങൾ ചോദിക്കാനോ പറ്റാത്ത സാഹചര്യത്തിൽ വ്യക്തമായ ഇത്തരമൊരു അടയാളം മുഴുവൻ ടീമിനും നിർണായക റഫറൻസ് പോയിൻ്റായി വർത്തിക്കുന്നു.

ടൈം ഔട്ട് നടപടിക്രമം:
ശസ്ത്രക്രിയ ആരംഭിക്കുന്നതിന് തൊട്ടുമുമ്പ്, സർജൻ, അനസ്‌തേഷ്യോളജിസ്റ്റ്, നഴ്‌സുമാർ, മറ്റ് സപ്പോർട്ട് സ്റ്റാഫ് എന്നിവരുൾപ്പെടെ മുഴുവൻ സർജിക്കൽ ടീമും അവരുടെ മറ്റു ജോലികൾ എല്ലാം നിർത്തിവച്ച് രോഗിയുടെ ചുറ്റും ഒത്തുചേർന്ന് ‘ടൈം ഔട്ട്’ നടത്തും. ഈ അവസരത്തിൽ, രോഗിയുടെ ഐഡൻ്റിറ്റി, ആസൂത്രണം ചെയ്ത ശസ്ത്രക്രിയാ നടപടിക്രമം, അടയാളപ്പെടുത്തിയ ശസ്ത്രക്രിയാ സ്ഥലം, പ്രതീക്ഷിക്കുന്ന സങ്കീർണതകൾ, അവശ്യം വേണ്ട ഉപകരണങ്ങളും സംവിധാനങ്ങളും എന്നിവ അവർ കൂട്ടായി സ്ഥിരീകരിക്കും. പ്രധാന വിശദാംശങ്ങളെക്കുറിച്ച് ഓപ്പറേഷനിൽ പങ്കെടുക്കുന്ന എല്ലാവരും ബോധവാന്മാരാണെന്ന് ഉറപ്പാക്കാൻ ഇത് ഉപകരിക്കുന്നു.

സർജിക്കൽ ചെക്ക്‌ലിസ്റ്റുകൾ: സുരക്ഷ കൂടുതൽ ശക്തിപ്പെടുത്തുന്നതിന്, ലോകാരോഗ്യ സംഘടനയുടെ (WHO) സർജിക്കൽ സേഫ്റ്റി ചെക്ക്‌ലിസ്റ്റ് പോലുള്ള സ്റ്റാൻഡേർഡ് സർജിക്കൽ ചെക്ക്‌ലിസ്റ്റുകൾ പല ആശുപത്രികളും സർവീസുകളും ഉപയോഗപ്പെടുത്താറുണ്ട്. ഇത്തരം ചെക്ക് ലിസ്റ്റുകൾ സമഗ്രമായതാണ്, രോഗിയെ തിരിച്ചറിയുന്നതു മുതൽ സൈറ്റ് അടയാളപ്പെടുത്തൽ വരെയും അതിനപ്പുറവുമുള്ള പ്രക്രിയകളിലൂടെ ടീമിനെ നയിക്കുകയും നിർണായകമായ ഒരു ഘടകവും അവഗണിക്കപ്പെടുന്നില്ലെന്ന് ഉറപ്പാക്കാൻ സഹായിക്കുകയും ചെയ്യുന്നു.

ആശയവിനിമയവും ടീം വർക്കും: ശസ്ത്രക്രിയാ ടീം അംഗങ്ങൾക്കിടയിൽ ഫലപ്രദമായ ആശയവിനിമയവും സഹകരണ മനോഭാവവും അത്യാവശ്യമാണ്. ഏതെങ്കിലും പൊരുത്തക്കേടുകൾ ശ്രദ്ധയിൽപ്പെട്ടാൽ അല്ലെങ്കിൽ രോഗിയെക്കുറിച്ചോ ശസ്ത്രക്രിയാ സൈറ്റിനെക്കുറിച്ചോ ആശങ്കയോ സംശയമോ ഉണ്ടെങ്കിൽ അത് തുറന്നു സംസാരിക്കാൻ എല്ലാ ടീം അംഗങ്ങളും തയ്യാറാവുകയും അവർക്ക് അതിന് സാധിക്കുന്ന അന്തരീക്ഷം സൃഷ്ടിക്കപ്പെടുകയും വേണം. സർജൻ, സർജനെ സഹായിക്കുന്ന അസിസ്റ്റന്റുമാരും സ്ക്രബ് നേഴ്സുമാരും, അനസ്ത്തറ്റിസ്റ്റ്, അനസ്ത്തറ്റിക് നേഴ്സ്, തിയേറ്റർ അസിസ്റ്റൻറ് / ടെക്നീഷ്യന്മാർ, അഡ്മിഷൻ ഏരിയയിൽ രോഗിയെ ചെക്-ഇൻ ചെയ്യാൻ സഹായിക്കുന്ന ജീവനക്കാർ എന്നിവരൊക്കെ ഉൾപ്പെട്ട വലിയ ഒരു ടീമായിരിക്കണം ഓപ്പറേഷൻ തിയേറ്ററിലെ ജീവനക്കാർ. അനാവശ്യമായ അധികാരമനോഭാവമോ ഹയറാർക്കിയോ ഓപ്പറേഷൻ തിയേറ്ററിൽ പാടില്ല. സുരക്ഷിതത്വത്തിൻ്റെയും ഉത്തരവാദിത്തങ്ങൾ പങ്കിടുന്നതിന്റെയും സംസ്കാരം ഓപ്പറേഷൻ തിയേറ്ററിൽ വളർത്തുന്നതിന് ഇത്തരം നടപടികൾ സഹായിക്കും. ആത്യന്തികമായി രോഗിയുടെയും സർജിക്കൽ ടീമിന്റെയും സുരക്ഷയ്ക്ക് ഇത് സഹായിക്കും.

ഡോക്യുമെൻ്റേഷനും ഓഡിറ്റിംഗും: രോഗിയെ തിരിച്ചറിയലും സൈറ്റ് അടയാളപ്പെടുത്തലും ഉൾപ്പെടെ മുഴുവൻ ശസ്ത്രക്രിയാ പ്രക്രിയയുടെയും സൂക്ഷ്മമായ ഡോക്യുമെൻ്റേഷൻ നിർണായകമാണ്. ഇതിനു സഹായിക്കുന്ന കടലാസ് / സോഫ്റ്റ്‌വെയർ ചെക്ക് ലിസ്റ്റുകൾ തയ്യാറാക്കണം. ഓരോ പ്രക്രിയയും ചെയ്യുമ്പോൾ അത് ഡോക്യുമെന്റ് ചെയ്യുന്നു എന്ന് ഉറപ്പുവരുത്തണം. ഈ റെക്കോർഡുകളുടെ ഓഡിറ്റുകളും അവലോകനങ്ങളും പിഴവുകൾ തിരിച്ചറിയാനും കൂടുതൽ മെച്ചപ്പെടാനുള്ള മേഖലകൾ ഏതൊക്കെയാണെന്ന് കണ്ടെത്താനും ഹെൽത്ത് സർവീസിനെ/ ആശുപത്രിയെ സഹായിക്കുന്നു.

ഇത്തരം സമഗ്രമായ സുരക്ഷാനടപടികൾ പാലിക്കുന്നതിലൂടെ ശസ്ത്രക്രിയാസംഘത്തിന് തെറ്റായ രോഗിയിൽ അല്ലെങ്കിൽ തെറ്റായ അവയവത്തിൽ ശസ്ത്രക്രിയ ചെയ്യുന്നതിന്റെ അപകട സാധ്യത ഗണ്യമായി കുറയ്ക്കാൻ സാധിക്കും. ഇത് ആത്യന്തികമായി അവരുടെ സേവനം ലഭ്യമാകുന്ന രോഗികളുടെ സുരക്ഷയ്ക്കും ക്ഷേമത്തിനും വഴിവയ്ക്കുന്നു. രോഗികളുടെ സുരക്ഷയോടുള്ള പ്രതിബദ്ധതയാണ് ആധുനിക ആരോഗ്യരംഗത്തെ മികവിൻ്റെ മുഖമുദ്ര. ആവശ്യത്തിന് മനുഷ്യവിഭവശേഷിയും പശ്ചാത്തല സൗകര്യങ്ങളും ഉറപ്പുവരുത്തിയും അടിയന്തരമല്ലാത്ത ഓപ്പറേഷനുകൾ നീട്ടിവെച്ച് കേസുകളുടെ എണ്ണം സുരക്ഷിതമായ അളവിലേക്ക് താഴ്ത്തിയും രോഗികളുടെ സുരക്ഷ ഉറപ്പു വരുത്തുന്നതിൽ ശ്രദ്ധ പതിപ്പിക്കാം.

(കടപ്പാട്: ഇൻഫോ ക്ലിനിക്ക്)