തെക്കുകിഴക്കന്‍ അറബിക്കടലില്‍ ലക്ഷദ്വീപിന് സമീപത്തായി രൂപംകൊണ്ട ന്യൂനമര്‍ദം 16-ാം തീയതി രാവിലെയോടെ കേരള തീരത്തിന് സമീപത്തേക്ക് എത്തിച്ചേര്‍ന്നതാണ് ഫലമായാണ് തെക്കന്‍ കേരളം മുതല്‍ മധ്യകേരളം വരെയുള്ള ജില്ലകളില്‍ പ്രത്യേകിച്ച് പത്തനംതിട്ട, ഇടുക്കി, കോട്ടയം തുടങ്ങിയ മലയോര ജില്ലകളില്‍ അതിശക്തമായ മഴയ്ക്ക് കാരണമായത്. 

പല സ്ഥലങ്ങളിലും രണ്ട് മണിക്കൂറില്‍ അഞ്ച് സെന്റിമീറ്ററിന് മുകളില്‍ മഴ രേഖപ്പെടുത്തിയതായാണ് കാണുന്നത്. ഇതിനെ ലഘു മേഘവിസ്‌ഫോടനത്തിന്റെ ഗണത്തില്‍ പെടുത്താവുന്നതാണ്. പൊതുവെ മേഘവിസ്‌ഫോടനം എന്നുപറയുന്നത് ഒരു മണിക്കൂറില്‍ 10 സെന്റിമീറ്റര്‍ മഴ ലഭിക്കുന്നതാണ്. പക്ഷേ, ശനിയാഴ്​ച ലഭിച്ച മഴയുടെ കണക്ക് പരിശോധിച്ചാല്‍ രണ്ട് മണിക്കൂറില്‍ അഞ്ച് സെന്റിമീറ്ററിലധികം മഴ പല പ്രദേശങ്ങളിലും ലഭിച്ചതായി മനസ്സിലാക്കാം. ഇത്തരം ലഘു മേഘ വിസ്‌ഫോടനങ്ങളാണ് ഫ്ളാഷ് ഫ്ളഡ് പോലുള്ള  മിന്നല്‍ പ്രളയങ്ങള്‍ക്കും മണ്ണിടിച്ചിലിനുമൊക്കെ കാരണമാവുന്നത്. ശനിയാഴ്ച ഉച്ചയോടുകൂടി ന്യൂനമര്‍ദം കേരളത്തിന്റെ തീരത്തേക്ക് കടന്നു. അതിനാല്‍ തെക്കന്‍ കേരളത്തിലുള്ള മഴ ഒന്നു കുറഞ്ഞ്, ശനിയാഴ്​ച രാത്രിയും ഞായറാഴ്​ച രാവിലെയുമായി മധ്യകേരളത്തിലും വടക്കന്‍ കേരളത്തിലും ഇതിന്റെ ഭാഗമായി കൂടുതല്‍ മഴ ലഭിക്കാം. ഈ ന്യൂനമര്‍ദത്തിന്റെ ഭാഗമായിട്ടുള്ള മഴ ഞായറാഴ്​ച കൂടി തുടരാനുള്ള സാഹചര്യമാണ് നിലവിലുള്ളത്. അതുകൊണ്ട് ഞായറാഴ്​ച വരെയെങ്കിലും എല്ലാവരും ജാഗ്രത പുലര്‍ത്തേണ്ട സമയമാണ്.