ലോകം പലസ്തീനൊപ്പം നിൽക്കണം; നെതന്യാഹു ‘പ്രാകൃത’ ഭരണാധികാരിയെന്ന് പ്രിയങ്ക ഗാന്ധി

പലസ്തീൻ ജനതയ്ക്ക് ഐക്യദാർഢ്യം പ്രഖ്യാപിച്ച് പ്രിയങ്ക ഗാന്ധിയുടെ എക്സ് പോസ്റ്റ്.

ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹുവിനെ രൂക്ഷമായി വിമർശിച്ചിരിക്കുകയാണ് കോൺഗ്രസ് ജനറൽ സെക്രട്ടറി കൂടിയായ പ്രിയങ്ക ഗാന്ധി.

ഗാസയിൽ ഇസ്രയേൽ നടത്തുന്നത് അതിഭീകരമായ വംശഹത്യയാണെന്ന് പറയാതെ വയ്യെന്ന് പ്രിയങ്ക കുറിച്ചു.

ഗാസയിലെ പിഞ്ചുകുഞ്ഞുങ്ങളെയടക്കം ഇസ്രയേൽ ഭരണകൂടം കൊന്നൊടുക്കുകയാണ്.

ഇസ്രയേലിൻെറ നടപടികളെ ലോകജനത ഒന്നിച്ച് നിന്ന് എതിർക്കുകയാണ് ചെയ്യേണ്ടത്.

മാനുഷിക മൂല്യങ്ങൾക്ക് പ്രാധാന്യം നൽകുന്ന ഒരു സമൂഹത്തിൽ ഇസ്രയേൽ സർക്കാരിൻെറ നടപടികൾ ചോദ്യം ചെയ്യപ്പെടുകയാണ് വേണ്ടത്.

അമേരിക്കൻ കോൺഗ്രസിൽ ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹുവിന് വൻ സ്വീകരണം ലഭിച്ചത് നിരാശാജനകമായ കാര്യമാണ്.

ഗാസയിൽ നടക്കുന്നത് ആധുനിക സംസ്കാരവും ‘പ്രാകൃത’രായ മനുഷ്യരും തമ്മിലുള്ള പോരാട്ടമാണെന്നാണ് നെതന്യാഹു പറഞ്ഞിരിക്കുന്നത്.

ആ പറഞ്ഞത് ഒരു പരിധി വരെ ശരിയാണ്. നെതന്യാഹുവിൻെറ സർക്കാർ തന്നെയാണ് ‘പ്രാകൃത’മായി പ്രവർത്തിക്കുന്നത്.

ഇസ്രയേലിൻെറ ‘പ്രാകൃത’ നടപടികൾക്ക് പാശ്ചാത്യ ലോകത്ത് നിന്ന് പിന്തുണ ലഭിക്കുന്നുവെന്നത് നാണക്കേടുണ്ടാക്കുന്ന കാര്യമാണ്.

അക്രമത്തിലും അപരവിദ്വേഷത്തിലും വിശ്വസിക്കാത്ത ഇസ്രയേലിലെ ജനങ്ങളടക്കം, ലോകത്തിലെ എല്ലാ മനുഷ്യരും പലസ്തീൻ ജനതയ്ക്കൊപ്പം നിൽക്കാൻ തയ്യാറാവണം.

ലോകത്തിലെ മനുഷ്യപക്ഷത്ത് നിൽക്കുന്ന ഭരണകൂടങ്ങളെല്ലാം പലസ്തിനൊപ്പം നിൽക്കണമെന്നും പ്രിയങ്ക ഗാന്ധി എക്സ് പോസ്റ്റിൽ പറഞ്ഞു.