ധനമന്ത്രി നിർമല സീതാരാമൻ ചൊവ്വാഴ്ച അവതരിപ്പിച്ച മൂന്നാം മോദി സർക്കാരിന്റെ ആദ്യ ബജറ്റ് അധിക്കാര കസേര നിലനിർത്താനും സർക്കാറിനെ രക്ഷിക്കാനുമുള്ള 'Kursi-Bachao' Budget ആണെന്ന് പ്രതിപക്ഷം. പാർലമെന്റിൽ ‘ഇന്ത്യ’ മുന്നണി പാർട്ടികളുടെ വൻ പ്രതിഷേധം.
പ്രതിപക്ഷ പാർട്ടികൾ ഭരിക്കുന്ന സംസ്ഥാനങ്ങളോട് കടുത്ത വിവേചനമെന്ന് ‘ഇന്ത്യ’ മുന്നണി.
കോൺഗ്രസ് അധ്യക്ഷൻ മല്ലികാർജുൻ ഖാർഗെ, സോണിയാ ഗാന്ധി, രാഹുൽ ഗാന്ധി, സമാജ് വാദി പാർട്ടി അധ്യക്ഷൻ അഖിലേഷ് യാദവ് അടക്കമുള്ള പ്രതിപക്ഷ എം.പിമാർ പാർലമെന്റ് പരിസരത്ത് പ്രതിഷേധിച്ചു.
കോൺഗ്രസ് പ്രകടനപത്രിക കോപ്പിയടിച്ചു, സഖ്യകക്ഷികളെ പ്രീണിപ്പിക്കുന്നു, മറ്റ് സംസ്ഥാനങ്ങളുടെ ചെലവിൽ അവർക്ക് പൊള്ളയായ വാഗ്ദാനങ്ങൾ നൽകുന്നു- രാഹുൽ ഗാന്ധി.
എല്ലാ സംസ്ഥാനങ്ങളേയും തുല്യമായി പരിഗണിക്കണമെന്ന് നേതാക്കൾ.
ബജറ്റിൽ നീതിയില്ലെന്നും അതിനുവേണ്ടിയാണ് തങ്ങൾ പോരാടുന്നതെന്നും കോൺഗ്രസ് അധ്യക്ഷനും രാജ്യസഭയിലെ പ്രതിപക്ഷനേതാവുമായ മല്ലികാർജുൻ ഖാർഗെ.
ബജറ്റ് ഒരു സംസ്ഥാനത്തിനും ഗുണകരമല്ല. രണ്ട് സംസ്ഥാനങ്ങൾ ഒഴിച്ച് ബാക്കിയുള്ളവയുടെയെല്ലാം പ്ലേറ്റുകൾ ശൂന്യമാണ്. തമിഴ്നാട്, കേരളം, കർണാടകം, മഹാരാഷ്ട്ര, പഞ്ചാബ്, ഹരിയാന, ദൽഹി സംസ്ഥാനങ്ങൾക്ക് ഒന്നുമില്ല. സ്വന്തം കസേര സംരക്ഷിക്കാൻ ചിലരെ പ്രീണിപ്പിക്കുന്നു ബജറ്റാണിത്''- മല്ലികാർജുൻ ഖാർഗേ.
തങ്ങൾ കർഷകർക്ക് താങ്ങുവിലയ്ക്കായി ശബ്ദമുയർത്തുമ്പോൾ, സർക്കാരിനെ താങ്ങിനിർത്തുന്ന കൂട്ടുകക്ഷികൾക്കാണ് കേന്ദ്രം താങ്ങുവില അനുവദിക്കുന്നതെന്ന് അഖിലേഷ് യാദവ്.
സർക്കാറിന്റെ തകർച്ചയുടെ സമയം നീട്ടിവാങ്ങുന്ന ബജറ്റെന്ന് തൃണമൂൽ കോൺഗ്രസ്.
കേരളത്തിനേയും പാടെ അവഗണിച്ചെന്ന് ശശി തരൂർ എംപി.
ബി.ജെ.പിക്ക് ഒരു സീറ്റുപോലും നൽകാത്തതുകൊണ്ടാണ് പഞ്ചാബിനെ അവഗണിച്ചതെന്ന് എം.പിയും പി.സി.സി. അധ്യക്ഷനുമായ അമരീന്ദർ സിങ് രാജാവാറിങ്.
ഇരുസഭകളിലും പുറത്തും ബജറ്റിനെതിരെ വ്യാപക പ്രതിഷേധം അഴിച്ചുവിടാനാണ് ‘ഇന്ത്യ’ സഖ്യത്തിന്റെ തീരുമാനം.
ബജറ്റ് വിവേചനപരമാണെന്നാരോപിച്ച് ജൂലായ് 27-ന് നടക്കുന്ന നിതി ആയോഗ് യോഗം ബഹിഷ്‌കരിക്കാനൊരുങ്ങി നാല് സംസ്ഥാനങ്ങളിലെ മുഖ്യമന്ത്രിമാർ.
തമിഴ്നാട് മുഖ്യമന്ത്രി എം.കെ സ്റ്റാലിൻ തെലങ്കാന മുഖ്യമന്ത്രി രേവന്ത് റെഡ്ഡി, കർണാടക മുഖ്യമന്ത്രി സിദ്ധരാമയ്യ, ഹിമാചൽ പ്രദേശ് മുഖ്യമന്ത്രി സുഖ്വിന്ദർ സിങ് സുഖു എന്നിവരാണ് യോഗം ബഹിഷ്‌കരിക്കുമെന്ന് പ്രഖ്യാപിച്ചിട്ടുള്ളത്.
കേരളം പോലുള്ള സംസ്ഥാനങ്ങളുടെ മുന്നോട്ടുള്ള പ്രയാണം തടയുന്ന സമീപനമെന്നും കേരളം നിരന്തരം ഉയർത്തിയ സുപ്രധാന ആവശ്യങ്ങൾ പരിഗണിക്കാൻ തയാറാകാത്തത് ജനങ്ങളോടാകെയുള്ള വെല്ലുവിളിയാണെന്നും മുഖ്യമന്ത്രി പിണറായി വിജയൻ.
ബിഹാറിന് 58,900 കോടി രൂപയും ആന്ധ്രയ്ക്ക് 15,000 കോടി രൂപയും വകയിരുത്തിയ ബജറ്റിൽ ദക്ഷിണേന്ത്യൻ സംസ്ഥാനങ്ങൾ ഉൾപ്പെടെ കാര്യമായ വിഹിതമില്ല.
ബജറ്റിൽ വിവേചനമില്ലെന്ന് ധനമന്ത്രി നിർമലാ സീതാരാമൻ. 230-ൽ താഴെ സീറ്റു ലഭിച്ച പ്രതിപക്ഷത്തിന് ചോദ്യംചെയ്യാൻ അവകാശമില്ലെന്നും മന്ത്രി.