ഇന്ത്യൻ ബഹിരാകാശ യാത്രയ്ക്ക് മലയാളി നേതൃത്വം

ഇന്ത്യയുടെ സുപ്രധാന ബഹിരാകാശ പദ്ധതിയായ ഗഗൻയാൻ യാത്രാസംഘത്തിന് മലയാളി നേതൃത്വം. പാലക്കാട് നെന്മാറ സ്വദേശി പ്രശാന്ത് ബാലകൃഷ്ണൻ നായർ നാലു പേരടങ്ങുന്ന യാത്രാസംഘത്തെ നയിക്കും.

വ്യോമസേനയിലെ ഗ്രൂപ്പ് കാപ്റ്റനാണ് പ്രശാന്ത് ബാലകൃഷ്ണൻ. 'സുഖോയ്' യുദ്ധവിമാനത്തിന്റെ പൈലറ്റാണ്.

പ്രധാനമന്ത്രി നരേന്ദ്രമോദിയാണ് നാലുപേരുടെ പേര് പ്രഖ്യാപിച്ചത്. പ്രശാന്ത് നേതൃത്വം നൽകുന്ന സംഘത്തിലെ മറ്റ് അംഗങ്ങൾ: ഗ്രൂപ്പ് ക്യാപ്റ്റന്മാരായ അംഗത് പ്രതാപ്, അജിത് കൃഷ്ണൻ, വിങ് കമാൻഡർ ശുഭാൻശു ശുക്ല. ഇവരിൽ മൂന്നുപേരാണ് ഗഗൻയാൻ പേടകത്തിൽ ബഹിരാകാശത്തേക്ക് പോകുക.

നാലുപേരും ബംഗളൂരുവിലെ പരിശീലനകേന്ദ്രത്തിൽ പരിശീലനത്തിലാണ്. ഇവർ ഒന്നര വർഷം റഷ്യയിലെ ഗഗാറിൻ കോസ്‌മോനട്ട് സെന്ററിൽ അടിസ്ഥാന പരിശീലനം പൂർത്തിയാക്കി.

നാലു സഞ്ചാരികളും പ്രതിനിധാനം ചെയ്യുന്നത് ഇന്ത്യയുടെ സാഹസികതയെന്ന് പ്രധാനമന്ത്രി നരേന്ദ്രമോദി.

2025-ലാണ് ഗഗൻയാൻ വിക്ഷേപണം. മൂന്നു സഞ്ചാരികളെ മൂന്നു ദിവസം 400 കിലോമീറ്റർ അകലെയുള്ള ഭ്രമണപഥത്തിലെത്തിച്ച് ഭൂമിയിൽ തിരിച്ചെത്തിക്കുകയാണ് ലക്ഷ്യം. മനുഷ്യരെ ബഹിരാകാശത്തേക്കും തിരിച്ച് ഭൂമിയിലേക്കും സുരക്ഷിതമായി എത്തിക്കാനാകുമെന്ന് തെളിയിക്കുകയാണ് ദൗത്യത്തിന്റെ ലക്ഷ്യം.

ദൗത്യം വിജയിച്ചാൽ അമേരിക്ക, റഷ്യ, ചൈന എന്നീ രാജ്യങ്ങൾക്കുശേഷം ബഹിരാകാശത്ത് മനുഷ്യനെ എത്തിച്ച് സുരക്ഷിതമായി തിരികെ ഭൂമിയിലെത്തിക്കാനുള്ള സാങ്കേതികവിദ്യ സ്വന്തമായുള്ള രാജ്യമായി ഇന്ത്യ മാറും.

വിവിധ ഘട്ടങ്ങളിലായുള്ള പരീക്ഷണ ദൗത്യങ്ങൾക്കുശേഷമാണ് ബഹിരാകാശ യാത്രികരെ അയക്കുക. ജൂണിൽ, വ്യോമമിത്ര എന്ന യന്ത്രവനിതയെ ബഹിരാകാശത്ത് എത്തിക്കാനുള്ള പരീക്ഷണ ദൗത്യം ജി.എക്‌സ് നടക്കും. തുടർന്ന് ജി വൺ, ജി ടു എന്നീ രണ്ടു പരീക്ഷണ ദൗത്യങ്ങൾ കൂടി നടക്കും.

ബഹിരാകാശ സഞ്ചാരികളാകാൻ എന്റോൾ ചെയ്ത ടെസ്റ്റ് പൈലറ്റുമാരിൽനിന്ന് 12 പേരാണ് 2019-ൽ നടന്ന ആദ്യ ലെവൽ സെലക്ഷൻ പൂർത്തിയാക്കിയത്. ഇവരിൽനിന്നാണ് നാലുപേരെ തെരഞ്ഞെടുത്തത്.

ഐ.എസ്.ആർ.ഒയുടെ റോക്കറ്റായ ജി.എസ്.എൽ.വി മാർക്ക്- 3 മനുഷ്യരെ വഹിക്കാനുള്ള ശേഷിയുള്ളതാക്കി മാറ്റി, ലോഞ്ച് വെഹിക്കിൾ മാർക്ക്-3 ആയി മാറ്റിയിരുന്നു. ഇതിന്റെ പരീക്ഷണവും വിജയകരമായി പൂർത്തിയാക്കി.

1984 ഏപ്രിൽ രണ്ടിന് രാകേഷ് ശർമയാണ് ആദ്യമായി ബഹിരാകാശത്തിലെത്തിയ ഇന്ത്യക്കാരൻ. സോവിയറ്റ് യൂണിയന്റെ റോക്കറ്റിലാണ് അദ്ദേഹം യാത്ര ചെയ്തത്.