വനിത- ശിശു വികസന വകുപ്പു മന്ത്രി വീണാ ജോർജ് മാധ്യമ പ്രവർത്തകയായിരുന്ന കാലത്ത് പ്രശസ്ത നടി സരിതയുമായി നടത്തിയ അഭിമുഖം മന്ത്രിസഭയിലെ മുഴുവൻ മന്ത്രിമാരും ഇടതുപക്ഷ മുന്നണിയിലെ നേതാക്കളും കാണണം എന്നഭ്യർത്ഥിക്കുന്നു. സരിതയുടെ ഭർത്താവായിരുന്ന നടനും ഇപ്പോൾ എം.എൽ എ യുമായ മുകേഷ് നടത്തിയ ഗാർഹികപീഡനങ്ങളുടെ ഭീകരമായ അനുഭവങ്ങളാണ് ആ അഭിമുഖത്തിലുള്ളത്. ഇപ്പോൾ, മുകേഷിൻ്റെ ലൈംഗിക പീഡനങ്ങളെക്കുറിച്ച് സിനിമാമേഖലയിലെ സ്ത്രീകൾ തുറന്നു പറയുന്ന വാർത്തകളും വന്നുകൊണ്ടിരിക്കുകയാണ്. ഹേമ കമ്മറ്റി റിപ്പോർട്ടിൽ അതിൻ്റെ വിശദവിവരങ്ങൾ ഉണ്ടാവാതിരിക്കില്ല.
ഭാര്യയെ മർദ്ദിക്കുന്ന, കൊടിയ ഗാർഹികാതിക്രമങ്ങൾ നടത്തിയ മുകേഷ് എം എൽ എയായി തുടരാൻ പാടില്ല. അയാളുടെ അതിക്രമത്തിൻ്റെ ഇരകളും അതിജീവിതകളുമായ സ്ത്രീകൾക്ക് നീതി ലഭ്യമാക്കാൻ ഇടതുപക്ഷ മുന്നണിയും സർക്കാരും എം എൽ എ സ്ഥാനത്തുനിന്ന് മുകേഷിൻ്റെ രാജി ആവശ്യപ്പെടണം. കേരളത്തിലെ സ്ത്രീകളുടെ ആഗ്രഹവും ആവശ്യവുമാണിത്. മന്ത്രിമാരായ വീണാ ജോർജും ആർ. ബിന്ദുവും മുകേഷിൻ്റെ രാജിക്കായി മന്ത്രിസഭയിൽ ശബ്ദമുയർത്തേണ്ടതുണ്ട്.