പൾസർ സുനിക്ക് ജാമ്യം, വിചാരണ നീളുന്നതിൽ സുപ്രീംകോടതിയുടെ രൂക്ഷ വിമർശനം

നടിയെ ആക്രമിച്ച കേസിലെ ഒന്നാം പ്രതി പൾസർ സുനിക്ക് സുപ്രീംകോടതി ജാമ്യം അനുവദിച്ചു.

ഏഴര വർഷത്തിനുശേഷമാണ് ജാമ്യം. 2017 ഫെബ്രുവരി 23 മുതൽ സുനി ജയിലിലാണ്.

വിചാരണ നീണ്ടുപോകുന്നതിനാലാണ് ജാമ്യം. ഒരാഴ്ചക്കുള്ളിൽ വിചാരണ കോടതി ജാമ്യം അനുവദിക്കണമെന്ന് സുപ്രീംകോടതി.

കേസിലെ പ്രതിയായ ദിലീപിന്റെ അഭിഭാഷകൻ വിചാരണ നീട്ടിക്കൊണ്ടുപോകുന്നുവെന്ന് പൾസർ സുനി, നീതിപൂർവകമായ വിചാരണ നടക്കുന്നില്ലെന്നും പരാതി.

'ഇതെന്ത് വിചാരണ' എന്ന് സുപ്രീംകോടതിയുടെ വിമർശനം. ഒരാൾ എത്ര തവണ ജാമ്യത്തിനായി കോടതി കയറണമെന്നും ചോദ്യം.

വിചാരണയുടെ അന്തിമഘട്ടത്തിലായതിനാൽ ജാമ്യം നൽകുന്നതിനെ സംസ്ഥാനം എതിർത്തു, കടുത്ത ജാമ്യ വ്യവസ്ഥകൾക്കായി സംസ്ഥാനത്തിന് വാദിക്കാം.

സുനിക്ക് ജാമ്യം നൽകിയാൽ ദൃശ്യങ്ങൾ പരസ്യപ്പെടുത്തി അതിജീവിതയെ ഭീഷണിപ്പെടുത്താൻ സാധ്യതയുണ്ടെന്ന് സംസ്ഥാന സർക്കാർ സത്യവാങ്മൂലം.

നേരത്തെ, ആവർത്തിച്ച് ജാമ്യാപേക്ഷ നൽകിയതിന് സുനിക്ക് ഹൈക്കോടതി വിധിച്ച പിഴ 25,000 രൂപ സുപ്രീംകോടതി സ്റ്റേ ചെയ്തിരുന്നു.

സുനി ഹാജരാക്കിയ മെഡിക്കൽ സർട്ടിഫിക്കറ്റുകൾ ഉൾപ്പടെ പരിശോധിച്ച ശേഷമാണ് ജാമ്യം. ആരോഗ്യകാരണങ്ങൾ ചൂണ്ടിക്കാട്ടിയാണ് ഇത്തവണ സുനി ജാമ്യാപേക്ഷ നൽകിയത്.

2017 ഫെബ്രുവരിയിലാണ് നടി കൊച്ചിയിൽ കാറിൽ ആക്രമിക്കപ്പെട്ടത്. നടൻ ദിലീപിന് വേണ്ടി ക്വട്ടേഷൻ ഏറ്റെടുക്കുകയായിരുന്നുവെന്നായിരുന്നു സുനിയുടെ മൊഴി. പ്രതിയായ ദിലീപിന് അടക്കം നേരത്തെ ജാമ്യം ലഭിച്ചിരുന്നു.