ടി.പി ചന്ദ്രശേഖരന്‍ വധക്കേസില്‍ പ്രതികളുടെ ശിക്ഷ ഹൈക്കോടതി ശരിവെച്ചു. വിചാരണാ കോടതിയുടെ ശിക്ഷാവിധി അംഗീകരിച്ചുകൊണ്ടാണ് ഉത്തരവ്.
കെ.കെ. കൃഷ്ണന്‍, ജ്യോതിബാബു എന്നിവരെ വെറുതെവിട്ട നടപടി കോടതി റദ്ദാക്കി. ഒഞ്ചിയം ഏരിയ കമ്മിറ്റി അംഗമായിരുന്നു കെ.കെ. കൃഷ്ണൻ. പാനൂരിലെ സി.പി.എം നേതാവാണ് ജ്യോതി ബാബു.
ശിക്ഷ റദ്ദാക്കണമെന്നാവശ്യപ്പെട്ട് പ്രതികള്‍ ഹൈക്കോടതിയില്‍ സമര്‍പ്പിച്ച അപ്പീലിലാണ് വിധി. 1 മുതല്‍ 8 വരെയുള്ള പ്രതികളുടെ ശിക്ഷയാണ് കോടതി ശരിവെച്ചത്. 12 പ്രതികളാണ് അപ്പീല്‍ നല്‍കിയത്. പ്രതികളും സര്‍ക്കാറും ടി.പിയുടെ പങ്കാളിയും എം.എല്‍.എയുമായ കെ.കെ. രമയും നല്‍കിയ അപ്പീലുകളാണ് കോടതി പരിഗണിച്ചത്.
പി. മോഹനനെ വെറുതെവിട്ടത് ശരിവച്ചു.
പി.കെ. കുഞ്ഞനന്തനെ ശിക്ഷിച്ച വിധി ശരിവെച്ചു. (ശിക്ഷയനുഭവിക്കുന്നതിനിടെ കുഞ്ഞനന്തൻ മരിച്ചു).
പി. മോഹനൻ അടക്കം വെറുതെവിട്ടവർക്കെതിരെ വീണ്ടും അപ്പീൽ നൽകുമെന്ന് സ്പെഷ്യൽ പ്രോസിക്യൂട്ടർ അഡ്വ. കുമാരൻ കുട്ടി.
സി.പി.എം തന്നെയാണ് കൊലപാതകം നടത്തിയതെന്ന് തെളിയിക്കുന്ന വിധിയെന്ന് കെ.കെ. രമ. ഒഞ്ചിയം ഏരിയ കമ്മിറ്റി അംഗമായിരുന്ന കെ.കെ. കൃഷ്ണനെ കൂടി പ്രതിയാക്കിയതോടെ പാർട്ടിയുടെ പങ്ക് വ്യക്തമായെന്ന് രമ. കൊലയാളികൾക്കുവേണ്ടി കേസ് നടത്തിയിരുന്നത് സി.പി.എമ്മാണെന്നും രമ.
വിധി സ്വാഗതം ചെയ്യുന്നു, നടന്നത് വലിയ നിയമയുദ്ധം, പി. മോഹനൻ അടക്കമുള്ളവരെ വേട്ടയാടാൻ ശ്രമം നടന്നു- എം.വി. ഗോവിന്ദൻ.
കേസിന്റെ വിചാരണ 2014- ല്‍ പൂര്‍ത്തിയാകുമ്പോള്‍ എം.സി. അനൂപ്, കിര്‍മാണി മനോജ്, മുഹമ്മദ് ഷാഫി, അണ്ണന്‍ സിജിത്ത്, ട്രൗസര്‍ മനോജ്, കൊടി സുനി, ടി.കെ. രജീഷ്, പി.കെ. കുഞ്ഞനന്ദന്‍ (സി.പി.ഐ.എം പാനൂര്‍ ഏരിയ കമ്മിറ്റി അംഗം) ഉള്‍പ്പെടെയുള്ളവര്‍ക്ക് ജീവപര്യന്തം തടവും ലംബു പ്രദീപെന്ന പ്രതിക്ക് 3 വര്‍ഷം തടവും വിചാരണക്കോടതി വിധിച്ചിരുന്നു. ഇവരുടെ ശിക്ഷയാണിപ്പോള്‍ ഹൈക്കോടതി ശരിവെച്ചിരിക്കുന്നത്. 36 പ്രതികളുണ്ടായിരുന്നു ആദ്യ ഘട്ടത്തില്‍. പിന്നീട് സി.പി.എം നേതാവായ പി. മോഹനന്‍ അടക്കമുള്ള 24 പ്രതികളെ വിട്ടയച്ചു.
12 പ്രതികളാണ് ശിക്ഷ റദ്ദാക്കണമെന്നാവശ്യപ്പെട്ട് കോടതിയെ സമീപിച്ചത്. പ്രതികള്‍ക്ക് പരമാവധി ശിക്ഷ നല്‍കണമെന്നാവശ്യപ്പെട്ട് പ്രോസിക്യൂഷനും അപ്പീല്‍ നല്‍കി. പി. മോഹനന്‍ ഉള്‍പ്പടെയുള്ളവരെ വിട്ടയച്ചതിനെതിരെയാണ് കെ.കെ. രമ അപ്പീല്‍ നല്‍കിയത്.
കൊലപാതകത്തിനുപിന്നില്‍ സി.പി.എമ്മിന്റെ രാഷ്ട്രീയ വിരോധമാണെന്ന് കോഴിക്കോട് അഡീഷണല്‍ സെഷന്‍സ് കോടതി വിധിന്യായത്തില്‍ നിരീക്ഷിച്ചിരുന്നു. ജസ്റ്റിസ് എ.കെ. ജയശങ്കര്‍ നമ്പ്യാര്‍, ജസ്റ്റിസ് കൗസര്‍ എടപ്പഗത്ത് എന്നിവര്‍ ഉള്‍പ്പെട്ട ഡിവിഷന്‍ ബെഞ്ചാണ് കേസ് പരിഗണിച്ചത്.
കേസിലെ എല്ലാ പ്രതികളും 26ന് ഹാജരാകണം. അത്ഭുതകരമായ കൂറുമാറ്റം നടന്ന കേസാണിതെന്നും സംശയത്തിന്റെ ആനുകൂല്യം നല്‍കിയാണ് ചില പ്രതികളെ കോടതി വിട്ടയച്ചതെന്നും അഭിഭാഷകര്‍. ടി.പി വധക്കേസിന്റെ ഗൂഢാലോചനയില്‍ പങ്കാളികളായെന്ന് കരുതുന്ന രണ്ടുപേരെയാണ് വീണ്ടും പ്രതിച്ചേര്‍ത്തിരിക്കുന്നതെന്നും അവര്‍ പറഞ്ഞു.
2012 മേയിലാണ് വടകരക്കടുത്ത് വള്ളിക്കാടുവെച്ച് ടി.പി. ചന്ദ്രശേഖരനെ ബോംബെറിഞ്ഞ് വീഴ്ത്തി ഒരു സംഘം വെട്ടിക്കൊന്നത്. ചന്ദ്രശേഖരന്‍ സി.പി.എമ്മില്‍ നിന്ന് വിട്ടുപോയി ആര്‍.എം.പി എന്ന പേരില്‍ പുതിയ പാര്‍ട്ടിയുണ്ടാക്കിയതിന് പകരം വീട്ടാന്‍ സി.പി.എമ്മുകാരായ പ്രതികള്‍ കൊല നടത്തിയെന്നാണ് പ്രോസിക്യൂഷന്‍ വാദം.
