കോഴിക്കോട് കോര്‍പറേഷന്‍ 'സഞ്ചയ' തട്ടിപ്പിന് പിന്നിലാര്‌?

തദ്ദേശസ്ഥാപനങ്ങളുടെ സേവനങ്ങള്‍ പൊതുജനങ്ങള്‍ക്ക് എളുപ്പത്തിലും സുതാര്യമായും ലഭ്യമാക്കുന്നതിനുവേണ്ടിയാണ് സഞ്ചയ എന്ന പേരില്‍ ഇ- ഗവേണന്‍സ് ആപ്ലിക്കേഷന്‍സ് സോഫ്റ്റ്‌വെയര്‍ സ്യൂട്ട് തുടങ്ങിയത്. ഫീസ്, ലെവികള്‍, നികുതികള്‍ എന്നിവയെല്ലാം ഇതിലൂടെ അടക്കാം. മാത്രമല്ല, ഇ- ഫയലിങ്, വിവിധ സര്‍ട്ടിഫിക്കറ്റുകള്‍ക്കുള്ള അപേക്ഷ നല്‍കല്‍ എന്നിവയും സഞ്ചയ ഓണ്‍ലൈനിലൂടെ സാധ്യമാണ്. എന്നാല്‍, സഞ്ചയ എന്നത് കോഴിക്കോട് കോര്‍പറേഷനെ സംബന്ധിച്ച് ഇപ്പോള്‍ ഒരു വന്‍ ക്രമക്കേടിന്റെ പര്യായമായിരിക്കുന്നു. പൊളിച്ചുമാറ്റാന്‍ തീരുമാനിച്ച കെട്ടിടങ്ങള്‍ക്ക് നമ്പര്‍ അനുവദിച്ച് അപ്രൂവല്‍ നല്‍കുകയും ചില കെട്ടിടങ്ങള്‍ക്ക് ഡിജിറ്റല്‍ ഒപ്പ് നല്‍കി നികുതി അടച്ചതുമടക്കമുള്ള ക്രമക്കേടുകളാണ് പുറത്തുവന്നത്. കോര്‍പറേഷന്‍ ഓഫീസിനുപുറത്തുനിന്ന് ഉദ്യോഗസ്ഥരുടെ പാസ്‌വേഡുപയോഗിച്ച് ലോഗിന്‍ ചെയ്തായിരുന്നു തട്ടിപ്പ്. സഞ്ചയ സോഫ്റ്റ്‌വെയറിന്റെ സുരക്ഷയില്ലായ്മയും ക്രമക്കേടിനിടിയാക്കിയതായി പൊലീസ് അന്വേഷണത്തില്‍ കണ്ടെത്തിയിട്ടുണ്ട്. സാങ്കേതികവിദ്യയുടെ ജനവിരുദ്ധമായ ദുരുപയോഗത്തിന്റെ ഒരു ദൃഷ്ടാന്തം കൂടിയാണ് കോഴിക്കോട് കോര്‍പറേഷനിലെ തട്ടിപ്പ്.