യുക്രെയ്​നെതിരായ റഷ്യയുടെ യുദ്ധം ആരംഭിച്ചശേഷം അവിശ്വസനീയമാംവിധമുള്ള പുടിന്‍ ന്യായീകരണമാണ് മലയാളത്തിലെ ന്യൂസ് ചാനല്‍ അവതാരകരും അവര്‍ ആനയിച്ചുകൊണ്ടുവരുന്ന  സോകോള്‍ഡ് വിദേശകാര്യ വിദഗ്ദ്ധരും ചേര്‍ന്ന് നടത്തുന്നത്​. ചാനല്‍ അവതാരകര്‍ക്ക് പൊതുവെ വിദേശകാര്യ വിഷയങ്ങളിലുള്ള ഗ്രാഹ്യക്കുറവുകൊണ്ടാവണം, അവര്‍ ഈ  ‘വിദേശകാര്യ വിദഗ്ദ്ധരു’ടെ കണ്ടെത്തലുകള്‍ അപ്പാടെ വിശ്വസിച്ച്, അവയെ കുറേക്കൂടി പൊലിപ്പിച്ച് വീണ്ടും വീണ്ടും പുടിനെ വെള്ളപൂശിക്കൊണ്ടിരുന്നു. നാറ്റോ അംഗത്വത്തിനും യൂറോപ്യന്‍ യൂണിയന്‍ അംഗത്വത്തിനും ശ്രമിച്ച് റഷ്യയെ പ്രകോപിപ്പിച്ചതുവഴി യുക്രെയ്​നാണ് ഇതെല്ലാം തുടങ്ങിവച്ചത് എന്നുവരെ പലരും പറഞ്ഞുവച്ചു. 
കെ. വേണുവും എൻ.എം. പിയേഴ്സണും സി.പി.എമ്മിന്റെ റഷ്യാന്യായീകരണത്തെപ്പറ്റി വെബ്​സീനിൽ എഴുതിയതു വായിച്ചു. എന്നാല്‍ അതിലും അപകടകരമായിരുന്നു, വാര്‍ത്താചാനലുകളുടെ ഈ ന്യായീകരണം. എന്തുകൊണ്ടെന്നാൽ; സി.പി.എം നിലപാടുകളും ന്യായീകരണങ്ങളും അതില്‍ താല്‍പര്യമുള്ളവര്‍ മാത്രമേ കേൾക്കൂ, എന്നാല്‍ ന്യൂസ് ചാനലുകളെ വിശ്വസിക്കുന്നത് മലയാളികള്‍ മുഴുവനാണ്, അവര്‍ തെറ്റിദ്ധരിപ്പിക്കുന്നത് മുഴുവന്‍ കേരളത്തെയുമാണ്.  

ഏറ്റവും രൂക്ഷമായി സര്‍ക്കാര്‍ വിരുദ്ധശബ്ദങ്ങള്‍ അടിച്ചമര്‍ത്തപ്പെടുന്ന നാടായിട്ടുപോലും, യുക്രെയ്​ന്‍ ആക്രമണത്തെപ്പറ്റിയുള്ള പുടിന്‍ ഭാഷ്യമല്ലാതെ ഒന്നും അറിയാന്‍ നിവൃത്തിയില്ലാതിരുന്നിട്ടുപോലും റഷ്യയില്‍ നിരവധിയാളുകൾ പുടിനെതിരേ പ്രതിഷേധവുമായി തെരുവിലിറങ്ങിയ സമയത്താണ് ഇവിടുത്തെ ചാനലുകള്‍ പുടിന്‍ സ്നേഹികളെക്കൊണ്ടുനിറഞ്ഞത്!

ലോക രാഷ്ട്രീയവും രാഷ്ട്രങ്ങള്‍ തമ്മിലുള്ള സമവാക്യങ്ങളുമൊക്കെ ഇറാഖ്​യുദ്ധകാലത്തുനിന്ന്​ ഏറെ മാറിക്കഴിഞ്ഞിരിക്കുന്നു. (അന്നും കുവൈറ്റ് എന്ന ചെറുരാജ്യത്തെ വിഴുങ്ങിയ സദ്ദാമില്‍ നാം ഒരു കുറ്റവും കണ്ടില്ല. മറിച്ച് തികഞ്ഞ സ്വേച്ഛാ​ധിപധിയും ആയിരക്കണക്കിന് മരണങ്ങള്‍ക്കുത്തരവാദിയുമായ ആ മനുഷ്യന് നമ്മള്‍ വീരപരിവേഷം കൊടുത്തു.) ഒരു രാഷ്ട്രമോ രാഷ്ട്രത്തലവനോ അമേരിക്കക്ക് എതിരായി നില്‍ക്കുന്നു എന്നതുകൊണ്ടുമാത്രം അവരുടെ തെറ്റുകള്‍ എങ്ങനെയെങ്കിലും ന്യായീകരിക്കുക എന്നത് എത്ര പരിതാപകരമാണ്. ചിലിയിലായാലും ഗള്‍ഫിലായാലും അഫ്ഗാനിസ്ഥാനിലായാലും അമേരിക്ക ലോകത്ത് ഒരുപാട് ക്രൂരതകൾ ചെയ്തിട്ടുണ്ട്. പക്ഷേ യുക്രെയ്​ന്‍ യുദ്ധം അമേരിക്കയുടെ തലയില്‍ കെട്ടിവക്കുന്നത് ഒരുമാതിരി കടന്നകൈയാണ്.

ALSO READ

ജെ.എന്‍.യുവിലെ പ്രകാശ് കാരാട്ടും വൃന്ദയും

ഒരു ന്യൂസ് പ്രസന്റര്‍ സെലെന്‍സ്‌കിക്കെതിരെ രോഷം കൊള്ളുന്നതു കണ്ടു, സംയമനം പാലിക്കേണ്ടതിനു പകരം സെലെന്‍സ്‌കി റഷ്യയെ പ്രകോപിപ്പിക്കുകയാണത്രേ. വ്യംഗ്യാര്‍ത്ഥം ഇതാണ്, യുക്രെയ്​ന്‍ ചെറിയ രാജ്യമായതുകൊണ്ട് പൊറുക്കാനും സഹിക്കാനുമൊക്കെ പഠിക്കണം. റഷ്യ എത്ര പ്രകോപിപ്പിച്ചാലും രാജ്യം നശിപ്പിച്ചാലും നാട്ടാരെ കൊന്നാലും യുക്രെയ്​ന്‍ പ്രകോപിതരാകരുത്, തിരിച്ചടിക്കാന്‍ നാട്ടുകാരോട് പറയരുത്.
സെലെന്‍സ്‌കിക്ക് ചെറിയ നാടകീയതയൊക്കെ ഉണ്ടായേക്കാം. പക്ഷേ ഒരാഴ്ചക്കകം യുക്രെയ്​ന്‍ കീഴടക്കി തിരിച്ചുപോരാമെന്നു കരുതിയ റഷ്യന്‍ സൈന്യം രണ്ടുമാസത്തിനിപ്പുറവും അവിടെ ഗതിയില്ലാത്തവിധം കുടുങ്ങിക്കിടക്കുന്നതില്‍ ആ നാടകീയതക്ക് വലിയ പങ്കുണ്ട്. മൂന്നു നേരം മൃഷ്ടാന്നം കഴിച്ച് ഏമ്പക്കവും വിട്ടിരിക്കുന്ന നമുക്ക് യുദ്ധം ചെയ്ത്​ മരിച്ചു വീഴുന്ന ഒരു ജനതയെയോ എപ്പോള്‍ വേണമെങ്കിലും മരിക്കാവുന്ന അവരുടെ നേതാവിനെയോ ജഡ്ജ് ചെയ്യാന്‍ എന്തവകാശമാണുള്ളത്? 
ലേഖനത്തിന്റെ പൂര്‍ണരൂപം വായിക്കാം:

മലയാള ചാനലുകളുടെ പുടിൻ വാതം  | സന്ധ്യാ മേരി