‘എന്റെ ഗോഡ്ഫാദറായിരുന്നു ചാത്തുണ്ണി സാർ’- ഐ.എം. വിജയൻ

എന്റെ ആദ്യത്തെ കോച്ചായിരുന്നു ചാത്തുണ്ണി സാർ. ഞാൻ സ്പോർട്സ് കൗൺസിലിൽ കോച്ചിംഗിനുവരുമ്പോൾ സാറായിരുന്നു കോച്ച്. മൂന്നു കൊല്ലം കഴിഞ്ഞ് സാറാണ് എന്നെ കേരള പൊലീസിലേക്കു വിട്ടത്. 1990-ലാണ് ഞങ്ങൾ, കേരള പൊലീസ് ടീം ഫെഡറേഷൻ കപ്പ് വിജയിക്കുന്നത്. ആ ടീമിന്റെ കോച്ച് ചാത്തുണ്ണി സാറായിരുന്നു. അക്കാലത്ത് കേരളത്തിലെ കുറെ മേജർ ടൂർണമെന്റുകളൊക്കെ ചാത്തുണ്ണി സാറിന്റെ കോച്ചിംഗിൽ ഞങ്ങൾ ജയിച്ചു. കൊൽക്കത്തയിൽ സാറിന് വലിയ പേരാണ്. മോഹൻബഗാന്റെ കോച്ചായി ആ ടീമിനെ നാഷനൽ ലീഗിൽ ജയിപ്പിച്ചു. ചർച്ചിൽ ബ്രദേഴ്‌സിന്റെയും സാൽഗോക്കറിന്റെയും കോച്ചായിരുന്നു. ബ്രൂണോ കുട്ടീഞ്ഞോയുടെയൊക്കെ കോച്ചായിരുന്നു. നല്ലൊരു കോച്ചും നല്ലൊരു വ്യക്തിയുമാണ്. അവസാനകാലം വരെ അദ്ദേഹവുമായി നല്ല ബന്ധവുമുണ്ടായിരുന്നു. എന്റെ ഗോഡ് ഫാദർ പോലെയാണ് അദ്ദേഹം.