അസാധ്യതയുടെ ഒന്നിലധികം ഉപമകൾ

ഒന്ന്​

തുണിത്തുണ്ടുകളെ
തുന്നിച്ചേർക്കുമ്പോൾ
തയ്യൽയന്ത്രം ഉണ്ടാക്കുന്ന ശബ്ദം
ഉടുപ്പിന്റെ കൂടെ
സഞ്ചരിക്കാത്തതുപോലെ
നമ്മൾ സ്നേഹിച്ചിരുന്നതിലെ
വാക്യങ്ങൾ, മൗനങ്ങൾ.

രണ്ട്​

വിചാരിച്ചതിലും
നേരത്തെ എഴുന്നേറ്റ ഒരാൾ
കൃത്യസമയത്ത് അടിച്ച
അലാറത്തെ ഓഫ് ചെയ്യുന്നപോലെ
നഷ്ടമെന്നോ ലാഭമെന്നോ
കണക്കാക്കാനാകാത്ത
ഒരു സമയത്തെ
നമ്മൾ ജീവിച്ചിരുന്നത്.

മൂന്ന്​

അതൃപ്തികളെ
പ്രതീക്ഷിക്കുന്നൊരു
ആചാരം പോലെയെന്തോ
നമ്മുടെ ബോധത്തെ നമ്മൾ
ശീലിപ്പിച്ചിട്ടുണ്ട്.