വിമീഷ്‌ മണിയൂർ

മെൻസ്ട്രൽ കപ്പ്

പെട്ടെന്നൊരു മാസം
ഒരു റബ്ബർ ശിവനെ
തലകീഴായ്
യോനിയിൽ പ്രതിഷ്ഠിച്ചു
എൻ്റെ ഭാര്യ.

പുറത്തറിഞ്ഞാൽ എന്താവും സ്ഥിതി?
ഭജനക്കാളുകൂടിയാൽ
തടുക്കാൻ ആരെക്കൊണ്ടാവും?
ഞാനെൻ്റെ വികാരത്തെ
കടിച്ചുപിടിച്ചു കിടന്നു
അതുമാത്രമല്ല,
ആരുപണിതു ഇത്ര കൃത്യമായ്
അവൾക്കു ചേരുംപടി
ഈ ലിംഗം?

ഇങ്ങനെയൊരിടത്ത്
ചെന്നിരിക്കാൻ മാത്രം
എന്ത് പാപമാണയാൾ ചെയ്തത്?
പാർവതിയിതറിഞ്ഞാൽ
ചിരിച്ചു സൈഡാവില്ലേ?

നാളിതുവരെയുണ്ടായ
ശിവൻമാരെക്കുറിച്ചും
അയാളുടെ കുടുംബക്കാരെക്കുറിച്ചും
നടത്തിയ സാമൂഹ്യഅടുക്കളകളെക്കുറിച്ചും
തകൃതിയായ് ഞാനാലോചിച്ചു.

ചോദിച്ചപ്പോളവൾ പറഞ്ഞു:
ശിവനും ചാത്തനുമൊന്നുമല്ല
ഇടയ്ക്കിടെ എന്നെയടച്ചുവെക്കാനുള്ള
മൂടിയാണിത്, അല്ലെങ്കിൽ
സ്വാതന്ത്രത്തിൻ്റെ ദൈവകോപ്പ,
നൂറ്റിയൊന്നാമത്തെ അവയവം,
ചോരാതിരിക്കാനായ്
തിരിച്ചുപിടിച്ച കാലില്ലാ കുട,
അതുമല്ലെങ്കിൽ ചോരക്കുഴി.
മാന്താനല്ലാതെ
മറ്റെന്തിനു കൊള്ളും
നിൻ്റെ ഇരുതലയൻ ജെ. സി. ബി?

ഞാൻ കിടന്നു നാണിച്ചു
എത്രയായാലും പള്ളിയല്ലല്ലോ
ആവട്ടെ, ആരും
പൊളിക്കില്ലെന്ന് വിചാരിക്കാം.


Summary: menstrual cup malayalam poem by vimeesh maniyur published in Truecopy webzine.


വിമീഷ്‌ മണിയൂർ

നോവലിസ്​റ്റ്​, കവി. റേഷൻ കാർഡ്, ആനയുടെ വളർത്തു മൃഗമാണ് പാപ്പാൻ, എന്റെ നാമത്തിൽ ദൈവം, ഒരിടത്ത് ഒരു പ്ലാവിൽ ഒരു മാങ്ങയുണ്ടായി, യേശുവും ക്രിസ്തുവും ഇരട്ടകളായിരുന്നു (കവിത സമാഹാരങ്ങൾ), സാധാരണം (നോവൽ) എന്നിവ പ്രധാന പുസ്​തകങ്ങൾ. കവിതകൾ തമിഴ്, കന്നട, ഇംഗ്ലീഷ് ഭാഷകളിലേക്ക് വിവർത്തനം ചെയ്യപ്പെട്ടിട്ടുണ്ട്.

Comments