പലസ്തീൻ കവിത

അനുകരണം

(പലസ്തീൻ- ​അമേരിക്കൻ കവി ഫാഡി ജൗദ എഴുതിയ കവിത. വിവർത്തനം ബി. ഉണ്ണികൃഷ്ണൻ)

രണ്ടാഴ്ചകളായി അവളുടെ
സൈക്കിൾ ഹാൻഡിലിൽ
ഒരു ചിലന്തി, വലനെയ്ത്‌,
കൂടുകൂട്ടിയിട്ട്‌.

അതിനെ ക്ഷതപ്പെടുത്താതെ
എന്റെ മകൾ കാത്തിരുന്നു,
അത് സ്വയം വിട്ടുപോവും വരെ.

നീ വല പൊട്ടിച്ചുകളഞ്ഞിരുന്നെങ്കിൽ
അതറിഞ്ഞേനെ,
ഇത് പാർക്കാനുള്ളിടമായിരുന്നില്ലെന്ന്
നിനക്ക് സൈക്കിൾ ഓടിക്കാനും കഴിഞ്ഞേനേ.

അതിനവൾ പറഞ്ഞതിങ്ങനെ,
അങ്ങനെയാണല്ലേ
അഭയാർത്ഥികൾ ഉണ്ടാവുന്നത്.