ഒരുവളും വീടുവിട്ടോഴിഞ്ഞേ പോകുന്നത്
ജോലികൾ തീർത്തിട്ടേയല്ല
പാതി തൂത്തു മുറ്റത്തൊതുക്കിയിട്ട
ഒരു കുറ്റിച്ചൂല്
മുറിയുടെ കോണിൽ അഴിച്ചിട്ട
ഒരു ബ്ലൗസ്
കഴുകിയ എന്നാൽ തുടച്ചു കമഴ്ത്താത്ത
കുറച്ചു പാത്രങ്ങൾ
എണ്ണമെഴുക്കു മുറ്റിയ
പാതകമ്പുറം
തേയ്ച്ചുകഴുകാൻ സോപ്പ് പൊടി കലക്കിയൊഴിച്ച
കുളിമുറി
പാതിയടുക്കിവച്ച അവന്റെ തുണി
കുറെ കട്ടിലിൽ
ഉണക്കുപിടിക്കാത്ത തുണി
അയയിൽ
മകൾക്കായി ഉണ്ടാക്കിവച്ച
തണുത്ത സാൻവിച്
നിലത്തു വലിച്ചിട്ട മാറാല
ആർക്കോ എഴുതിയയക്കാത്ത
ഇ മെയിൽ ഒന്ന് ഡ്രാഫ്റ്റ് ബോക്‌സിൽ
ലഭിക്കാതെ പോയ ഉമ്മയുടെ കുളിർമ
നെറ്റിയിൽ
താരാതരംപോലെ ഇവയൊക്കെയാവും അവശേഷിപ്പുകൾ
ഒരുവളും വീടുവിട്ടോഴിഞ്ഞേ പോകുന്നത്
ജോലികൾ തീർത്തിട്ടേയല്ല
ഒരുവളും ജീവിതം വിട്ടൊഴിഞ്ഞു പോകുന്നത്
ജീവിച്ചു തീർന്നേ അല്ല
▮
വായനക്കാർക്ക് ട്രൂകോപ്പി വെബ്‌സീനിലെ ഉള്ളടക്കത്തോടുള്ള പ്രതികരണങ്ങൾ [email protected] എന്ന വിലാസത്തിലേക്ക് അയക്കാം.