ഒരു കാലത്ത് ഭരത് ഗോപി എങ്ങനെയാണോ തന്റെ ശരീരം കൊണ്ട്  മുഖ്യധാരാ സിനിമയെ രാഷ്ട്രീയവത്ക്കരിച്ചത് അതിനെക്കാള്‍ പതിന്മടങ്ങ് ശക്തിയിലാണ് ഫഹദ് ഫാസിലിന്റെ കഥാപാത്രങ്ങള്‍ ഇപ്പോള്‍ രാഷ്ട്രീയം സംസാരിക്കുന്നതെന്ന് സാജു ഗംഗാധരന്‍. വ്യവസ്ഥാപിത താരത്തിന്റെ രൂപസൗകുമാര്യം ഇല്ലാത്ത ഫഹദ് എന്ന നടന്‍ മലയാള സിനിമയില്‍ സ്വന്തം സിംഹാസനം വലിച്ചിട്ടിരിക്കുകയാണെന്ന് ട്രൂ കോപ്പി വെബ്‌സീനില്‍ എഴുതിയ ലേഖനത്തില്‍ അദ്ദേഹം അഭിപ്രായപ്പെടുന്നു. 

‘ഷമ്മി ഹീറോയാടാ, ഹീറോ' എന്ന ഡയലോഗിലൂടെ നായക സ്വരൂപത്തെ അപനിര്‍മ്മിക്കുകയാണ് കാല്‍പനിക നായകനും വില്ലനും ദുര്‍ബലനും കോമാളിയും സൈക്കോയുമൊക്കെയായി പകര്‍ന്നാടുന്ന ഈ നടന്‍. ഈ വിമതത്വം തന്നെയാണ് പുതുകാല രാഷ്ട്രീയ സിനിമകളുടെ പ്രിയതാരമാക്കി ഫഹദിനെ മാറ്റുന്നത്. ചാപ്പാ കുരിശ്, അന്നയും റസൂലും, ആമേന്‍, മഹേഷിന്റെ പ്രതികാരം, തൊണ്ടിമുതലും ദൃക്​സാക്ഷിയും, ടേയ്ക്ക് ഓഫ്, വരത്തന്‍, കുമ്പളങ്ങി നൈറ്റ്സ്, സി യു സൂണ്‍, ജോജി, മാലിക് തുടങ്ങിയ സിനിമകളില്‍ ഫഹദ് മുഖ്യകഥാപാത്രമായി ഈ കാലത്ത് രംഗത്തെത്തി. മലയാളത്തിലെ നവസിനിമയുടെ   ‘പതാകാവാഹകന്‍' എന്ന് അല്‍ജസീറ അഭിമുഖത്തില്‍ ഫഹദ് വിശേഷിപ്പിക്കപ്പെട്ടത് അതുകൊണ്ടു കൂടിയാണ്.

മലയാളത്തില്‍ ഒ.ടി.ടി പ്ലാറ്റ്ഫോമിലൂടെ റിലീസ് ചെയ്യപ്പെട്ട സിനിമകളുടെ എണ്ണം നോക്കിയാല്‍ സ്ട്രീമിംഗ് പ്ലാറ്റ്ഫോമിലെ സൂപ്പര്‍ താരമാണ് ഫഹദ് എന്ന് പറയേണ്ടി വരും. ഒ.ടി.ടി നേരിട്ട് റിലീസ് ചെയ്യുന്നത് തടയാന്‍ ഫഹദിനെ വിലക്കാന്‍ വരെ സിനിമാ വ്യവസായ ഗൂഢസംഘം ആലോചിച്ചിരുന്നു എന്ന കാര്യം ഓര്‍ക്കുക.  ‘‘കോവിഡ് കാലത്ത് നിര്‍മിക്കപ്പെട്ട സുപ്രധാന സിനിമ''യെന്നാണ്  ജോജിയെ കുറിച്ച് ദി ന്യൂയോര്‍ക്കര്‍ എഴുതിയത്. ജോജിയുടെ സംവിധായകന്‍ ദിലീഷ് പോത്തനും തിരക്കഥാകൃത്ത് ശ്യാം പുഷ്‌ക്കരനും 1990 കളില്‍ ആഗോളവത്ക്കരണം തുറന്നുകൊടുത്ത പുതിയ വാതായനങ്ങളുടെ ഉല്‍പ്പന്നങ്ങളാണ്. 

1950- 85 എന്ന മൂന്നുപതിറ്റാണ്ടുകാലമാണ് കെ.ജി. ജോര്‍ജിന്റെ ഇരകളെ സൃഷ്ടിച്ചതെങ്കില്‍ 1990- 2021 എന്ന മൂന്നുപതിറ്റാണ്ട് കാലമാണ് ജോജിയെ സൃഷ്ടിച്ചത്. ആദ്യ സിനിമയുടെ രാഷ്ട്രീയ പശ്ചാത്തലം ഇന്ദിരാഗാന്ധിയുടെ അടിയന്തരാവസ്ഥ കാലമാണെങ്കില്‍ രണ്ടാമത്തേതിന്റേത് നരേന്ദ്ര മോദിയുടെ അപ്രഖ്യാപിത അടിയന്തിരാവസ്ഥാ കാലമാണ്. തട്ടുപൊളിപ്പന്‍ അസംബന്ധ ജഡിലമായ പടപ്പുകളില്‍ നിന്നു വഴിമാറി മുഖ്യധാരാസിനിമയിലെ പുതിയ തലമുറ എന്തുകൊണ്ട് രാഷ്ട്രീയം സംസാരിക്കുന്ന സിനിമകള്‍ എടുക്കുന്നു എന്ന ചോദ്യത്തെ മൂര്‍ത്തമായ ഈ ചരിത്ര സാമ്യതയില്‍ നിന്നും സാഹചര്യത്തില്‍ നിന്നും കൊണ്ട് വിശകലനം ചെയ്യാം. 

സംവിധാനം, തിരക്കഥ, അഭിനയം, ഛായാഗ്രഹണം, എഡിറ്റിംഗ് തുടങ്ങി സിനിമയുടെ സര്‍വ മേഖലകളിലും പുതിയ തലമുറയുടെ കടന്നുവരവിന് സാക്ഷ്യം വഹിച്ച കഴിഞ്ഞ ഒരു ദശാബ്ദക്കാലം എണ്ണം പറഞ്ഞ 100 സിനിമകള്‍ എങ്കിലും ഗുണമേന്മയുടെ അടിസ്ഥാനത്തില്‍ ഉദാഹരിക്കാവുന്ന തരത്തിലേക്ക് മലയാള സിനിമ വളര്‍ന്നു കഴിഞ്ഞിരിക്കുന്നു എന്ന് അര്‍ത്ഥശങ്കയ്ക്കിടയില്ലാതെ പറയാന്‍ കഴിയും. ഒ.ടി.ടി യുഗത്തിലേക്ക് കൂടി ചുവടുവെച്ചതോടെ മലയാള സിനിമയെ കാത്തിരിക്കുന്നത് ഒരു സുവര്‍ണകാലമാണ് എന്ന് സങ്കല്‍പ്പിച്ചാല്‍ അതൊരു അതിമോഹമായിരിക്കില്ല എന്നാണ് ഏറ്റവും ഒടുവില്‍ ആമസോണ്‍ പ്രൈമില്‍ റിലീസ് ചെയ്ത സാറാസും മാലിക്കും തെളിയിക്കുന്നത്- സാജു ഗംഗാധരന്‍ എഴുതുന്നു. 

കഴിഞ്ഞ ഒരു ദശകത്തിലെ മലയാള സിനിമയുടെ രാഷ്ട്രീയവും സൗന്ദര്യശാസ്ത്രവും വിശകലനം ചെയ്യുന്നു 
ഫഹദ് എന്ന വിമത ശരീരം - സാജു ഗംഗാധരന്‍
വെബ്‌സീന്‍ പാക്കറ്റ് 34ല്‍ വായിക്കാം, കേള്‍ക്കാം.