വയോജന വകുപ്പിന്റെ
പ്രത്യാശകളും വെല്ലുവിളികളും

ഇന്ത്യയിൽ ഏറ്റവും കൂടുതൽ വയോധിക ജനസംഖ്യയുള്ള സംസ്ഥാനങ്ങളിലൊന്നായി കേരളം മാറിക്കഴിഞ്ഞു. മെച്ചപ്പെട്ട ആരോഗ്യ സംരക്ഷണ പദ്ധതികൾ, ഉയർന്ന ജീവിതനിലവാരം, വർദ്ധിച്ച ആയുർദൈർഘ്യം, കുറഞ്ഞ ജനനനിരക്ക് എന്നിവയുടെ ഫലമായി കേരളത്തിന്റെ ആകെ ജനസംഖ്യയുടെ 16 ശതമാനത്തിലധികം 60 വയസ്സിന് മുകളിലുള്ളവരാണ്. യുവാക്കൾക്കിടയിലെ വർദ്ധിച്ചുവരുന്ന വിദേശ കുടിയേറ്റം കൂടി ചേരുമ്പോൾ ജനസംഖ്യാപരമായ ഈ മാറ്റം കേരളത്തെ അതിവേഗം പ്രായമേറുന്ന സമൂഹമായി (Ageing State) മാറ്റിക്കൊണ്ടിരിക്കുകയാണ്.

ഒറ്റപ്പെടലും വാർദ്ധക്യസഹജമായ രോഗങ്ങളും അനുഭവിക്കുന്ന ഭൂരിഭാഗം മുതിർന്ന പൗരർക്കും സുരക്ഷിതത്വവും അന്തസ്സുള്ള ജീവിതവും ഉറപ്പാക്കുക എന്നത് ഇന്ന് നമ്മുടെ സാമൂഹിക ഘടനയിൽ ഏറ്റവും കൂടുതൽ ചർച്ച ചെയ്യപ്പെടേണ്ട അനിവാര്യതയായി മാറിയിരിക്കുന്നു.

2011-ലെ സെൻസസ് പ്രകാരം കേരളത്തിൽ 60 വയസ്സിനു മുകളിൽ പ്രായമുള്ളവർ 37 ലക്ഷത്തിലധികം ആയിരുന്നുവെങ്കിൽ, വരാനിരിക്കുന്ന വർഷങ്ങളിൽ ഈ സംഖ്യ 70 ലക്ഷം കവിയുമെന്നാണ് വിദഗ്ധർ കണക്കാക്കുന്നത്. ഇത്രയധികം വരുന്ന മുതിർന്ന ജനവിഭാഗത്തിൽ ഭൂരിഭാഗവും ഇന്ന് ഒട്ടേറെ വെല്ലുവിളികൾ നേരിടുന്നുണ്ട്. മക്കൾ വിദേശത്തോ മറ്റിടങ്ങളിലോ ജോലി ചെയ്യുന്നതിനാൽ വലിയൊരു വിഭാഗം വയോധികരും ഇന്ന് വീടുകളിൽ ഒറ്റയ്ക്കാണ് ജീവിക്കുന്നത്.

പരമ്പരാഗത കൂട്ടുകുടുംബ വ്യവസ്ഥ തകരുകയും 'അച്ഛൻ- അമ്മ- മക്കൾ' എന്ന ന്യൂക്ലിയർ കുടുംബ ഘടനയിലേക്ക് കേരളം പൂർണ്ണമായി ചുവടുമാറ്റുകയും ചെയ്തതോടെ, മുതിർന്നവർ അനുഭവിക്കുന്ന ഏകാന്തത, ശാരീരിക അസ്വസ്ഥത, മാനസിക സമ്മർദം, സാമ്പത്തിക ദുർബലത എന്നിവ അതീവ ഗുരുതരമായ സാമൂഹ്യ പ്രശ്നമായി മാറിക്കഴിഞ്ഞു. ഈ സാഹചര്യത്തിൽ, വയോജനങ്ങൾക്ക് സുരക്ഷിതത്വവും പരിചരണവും ഉറപ്പാക്കാൻ ശക്തമായ സർക്കാർ ഇടപെടൽ അടിയന്തരമായ അനിവാര്യതയായി മാറിയിരിക്കുകയാണ്.

ഈ യാഥാർത്ഥ്യം കൃത്യമായി ഉൾക്കൊണ്ട്, പുതിയ സർക്കാർ വയോജന പരിപാലനത്തിന് മാത്രമായി പ്രത്യേക വകുപ്പ് ആരംഭിക്കാൻ തീരുമാനിച്ചിരിക്കുകയാണ്. മുതിർന്ന തലമുറയ്ക്ക് താങ്ങും തണലുമായി മാറേണ്ട ഈ ഔദ്യോഗിക സംവിധാനം ജീവിതത്തിന്റെ നല്ലൊരു പങ്കും നാടിന്റെ പുരോഗതിക്കായി നീക്കിവെച്ചവരോടുള്ള സാമൂഹിക ഉത്തരവാദിത്തം കൂടിയാണ്. കേരളത്തിന്റെ സാമൂഹ്യ ക്ഷേമ ചരിത്രത്തിലെ നാഴികക്കല്ലാകും ഈ ചുവടുവെപ്പ്.

ഇതുവരെ വയോജന ക്ഷേമവുമായി ബന്ധപ്പെട്ട ഭരണനടത്തിപ്പ് സാമൂഹ്യനീതി വകുപ്പ്, ആരോഗ്യ വകുപ്പ്, തദ്ദേശ സ്വയംഭരണ സ്ഥാപനങ്ങൾ എന്നിവയിലൂടെ വ്യത്യസ്ത രീതികളിലാണ് നടപ്പിലാക്കിക്കൊണ്ടിരുന്നത്. വകുപ്പുകൾക്കിടയിലുള്ള വികേന്ദ്രീകൃത പ്രവർത്തനങ്ങൾ പലപ്പോഴും ഏകോപനക്കുറവിനും ഫലപ്രദമായ ഭരണനടത്തിപ്പിന്റെ വിഘാതത്തിനും കാരണമായിട്ടുണ്ട്. തത്ഫലമായി അർഹർക്ക് ആനുകൂല്യങ്ങളും സേവനങ്ങളും യഥാസമയം ലഭ്യമാകാതിരിക്കുന്ന സാഹചര്യവുമുണ്ടായിട്ടുണ്ട്.

വയോജനങ്ങൾക്ക് സ്വതന്ത്ര വകുപ്പ് നിലവിൽ വരുന്നതോടെ എല്ലാ വൃദ്ധജന ക്ഷേമപദ്ധതികളും ഒരൊറ്റ കുടക്കീഴിൽ കൊണ്ടുവരാനാകും. മുതിർന്ന പൗരരുടെ ആരോഗ്യ സംരക്ഷണം, പെൻഷൻ വിതരണം, സുരക്ഷിതമായ ഭവനസൗകര്യം, മാനസികാരോഗ്യ സേവനങ്ങൾ, വയോജന ദുരുപയോഗ പ്രതിരോധം എന്നിവയെല്ലാം ഒരേ കേന്ദ്രത്തിൽനിന്ന് കൃത്യമായി ആസൂത്രണം ചെയ്ത് നടപ്പിലാക്കാൻ സ്വതന്ത്ര വകുപ്പ് വഴി സാധ്യമാകും.

ശാരീരികാരോഗ്യം പോലെ പ്രധാനമാണ് വയോജനങ്ങളുടെ മാനസികാരോഗ്യവും. മാതാപിതാക്കൾ അനുഭവിക്കുന്ന 'എംപ്റ്റി നെസ്റ്റ് സിൻഡ്രോം' (Empty Nest Syndrome), ഒറ്റപ്പെടൽ, കുടുംബങ്ങളിൽ നിന്നുള്ള അവഗണന, മാനസിക-ശാരീരിക ദുരുപയോഗം എന്നിവ ഇന്ന് കേരളത്തിൽ ഗുരുതരമായ വ്യാപ്തി കൈവരിച്ചിട്ടുണ്ട്. ഓരോ ജില്ലയിലും 'വൃദ്ധ ജനമൈത്രീകേന്ദ്രങ്ങൾ' ആരംഭിക്കുമെന്ന പ്രഖ്യാപനം ഈ സാഹചര്യത്തിൽ ശ്രദ്ധേയമാണ്. മുതിർന്ന പൗരർക്കാവശ്യമായ മാനസികാരോഗ്യ കൗൺസലിങ്, സൗഹൃദം പങ്കിടാനുള്ള ഗ്രൂപ്പ് ആക്ടിവിറ്റികൾ, കലാ-സാംസ്കാരിക പരിപാടികൾ എന്നിവ ഈ കേന്ദ്രങ്ങളിൽ ഒരുക്കും. പുതുതലമുറയോടൊപ്പം സഞ്ചരിക്കാൻ പ്രാപ്തരാക്കുന്ന ഡിജിറ്റൽ സാക്ഷരതാ ക്ലാസ്സുകളും ഇവിടെ ലഭ്യമാക്കും. കേവലം സങ്കേതങ്ങൾ എന്നതിനപ്പുറം, മുതിർന്നവർക്ക് നിത്യജീവിതത്തിൽ വലിയൊരു പോസിറ്റീവ് ഊർജ്ജം പകരാൻ ഇത്തരം കേന്ദ്രങ്ങൾക്ക് സാധിക്കും. ഇതുവഴി ജീവിതത്തിലെ ഒറ്റപ്പെടൽ അവസാനിക്കാനും തങ്ങളും ഈ സമൂഹത്തിന്റെ പ്രധാന ഭാഗമാണെന്ന ഉൾക്കൊള്ളൽ മനോഭാവം ശക്തിപ്പെടാനും സാഹചര്യമൊരുങ്ങും.

വയോജനങ്ങൾ മറ്റുള്ളവരെ ആശ്രയിച്ചു കഴിയേണ്ടവരല്ല, മറിച്ച് പതിറ്റാണ്ടുകളുടെ അനുഭവജ്ഞാനവും കഴിവും കൈമുതലായ സമൂഹത്തിലെ ഏറ്റവും ശ്രേഷ്ഠമായ ജനവിഭവമാണ് (Senior Resource). ഈ ദർശനം മുൻനിർത്തി, പുതിയ വകുപ്പ് 'സീനിയർ ഫെലോഷിപ്പ്' എന്ന നൂതന പദ്ധതിക്ക് രൂപം നൽകുമെന്ന് ​പ്രഖ്യാപിച്ചിട്ടുണ്ട്. സർവീസിൽനിന്ന് വിരമിച്ച ഡോക്ടർമാർ, അഭിഭാഷകർ, എഞ്ചിനീയർമാർ, ശാസ്ത്രജ്ഞർ, കർഷകർ, വിവിധ തൊഴിൽ വിദഗ്ദ്ധർ എന്നിവരുടെ അനുഭവസമ്പത്ത് ഈ പദ്ധതിയിലൂടെ അടുത്ത തലമുറയ്ക്ക് പകർന്നു നൽകാനാകും.

വിദ്യാലയങ്ങൾ, കോളേജുകൾ, തൊഴിൽ പരിശീലന കേന്ദ്രങ്ങൾ എന്നിവിടങ്ങളിൽ ഇവരുടെ സേവനം ഗസ്റ്റ് ഫാക്കൽറ്റികളായി പ്രയോജനപ്പെടുത്താനാണ് വകുപ്പ് ഉദ്ദേശിക്കുന്നത്. ഇത് പുതിയ തലമുറയ്ക്ക് കൃത്യമായ മാർഗ്ഗനിർദ്ദേശം നൽകാൻ സഹായിക്കുമെന്ന് മാത്രമല്ല, വ്യത്യസ്ത തലമുറകൾ തമ്മിലുള്ള അകലം കുറച്ച് പരസ്പരബന്ധം കൂടുതൽ ദൃഢമാക്കുകയും ചെയ്യും. എല്ലാത്തിലുമുപരി, വിശ്രമജീവിതത്തിലും തങ്ങൾ സമൂഹത്തിന് പ്രയോജനപ്പെടുന്നുണ്ടെന്ന ചിന്ത മുതിർന്ന പൗരർക്ക് ആത്മവിശ്വാസവും ആത്മബഹുമാനവും ജീവിതത്തിൽ പുതിയൊരു ലക്ഷ്യബോധവും സമ്മാനിക്കും.

ഡിജിറ്റൽ ഇന്ത്യയുടെയും ഇ-ഗവേണൻസിന്റെയും ഈ ആധുനിക കാലഘട്ടത്തിൽ, ഡിജിറ്റൽ നിരക്ഷരത മുതിർന്ന പൗരർക്ക് ദൈനംദിന ജീവിതത്തിൽ വലിയൊരു തടസ്സമായി മാറിയിരിക്കുകയാണ്. ഓൺലൈൻ ബാങ്കിങ്, ഇ-ഹോസ്പിറ്റൽ സംവിധാനങ്ങൾ, ഡിജിലോക്കർ, ഇ-റേഷൻ, ടെലിമെഡിസിൻ തുടങ്ങിയ അത്യന്താപേക്ഷിതമായ ഡിജിറ്റൽ സേവനങ്ങൾ സ്വയം ഉപയോഗിക്കാൻ അറിയാത്തതുമൂലം പല വയോധികരും സങ്കീർണ്ണമായ ചുവപ്പുനാടകളിൽ കുടുങ്ങിപ്പോകുന്നു. ഈ പ്രതിസന്ധിക്ക് പരിഹാരമായി പുതിയ വകുപ്പ് 'ഡിജിറ്റൽ ദൂത്' എന്ന സവിശേഷമായ പദ്ധതി വിഭാവനം ചെയ്യുന്നുണ്ട്. ഇതിന്റെ ഭാഗമായി വാർഡ് തലത്തിൽ 'ഡിജിറ്റൽ സ്വയം സഹായ ക്ലബ്ബുകൾ' രൂപീകരിക്കുകയും, യുവ സന്നദ്ധപ്രവർത്തകർ വഴി മുതിർന്നവർക്ക് സ്മാർട്ട്ഫോണുകളും ഇ-സേവനങ്ങളും ലളിതമായി കൈകാര്യം ചെയ്യാനുള്ള അടിസ്ഥാന പരിശീലനം ലഭ്യമാക്കുകയും ചെയ്യും.

സാങ്കേതികവിദ്യയുടെ ഈ യുഗത്തിൽ മുതിർന്നവരെക്കൂടി ചേർത്തുനിർത്തുന്ന ഈ പദ്ധതി, സമൂഹത്തിലെ ഡിജിറ്റൽ വിടവ് (Digital Divide) ഇല്ലാതാക്കാൻ സഹായിക്കും. തദ്ഫലമായി, സർക്കാരിന്റെയും മറ്റ് സേവനങ്ങളുടെയും എല്ലാവിധ ഡിജിറ്റൽ ആനുകൂല്യങ്ങളും മറ്റാരുടെയും സഹായമില്ലാതെ സ്വന്തമായി നേടിയെടുക്കാൻ ഈ ജനവിഭാഗത്തെ ഇത് പ്രാപ്തരാക്കും.  

വയോജനങ്ങൾക്കെതിരായ അതിക്രമങ്ങളും അവഗണനകളും (Elder Abuse) ഇന്ന് ഗൗരവമായി കാണേണ്ട കുടുംബ- സാമൂഹിക പ്രശ്നമായി മാറിയിരിക്കുകയാണ്. മുതിർന്ന പൗരർക്ക് നേരെയുള്ള ശാരീരിക- മാനസിക പീഡനങ്ങൾ, സാമ്പത്തിക ചൂഷണം, അവഗണന, സ്വത്ത് വകകൾ തട്ടിയെടുക്കൽ എന്നിവയുമായി ബന്ധപ്പെട്ട് റിപ്പോർട്ട് ചെയ്യപ്പെടുന്ന കേസുകളുടെ എണ്ണം വർദ്ധിച്ചുവരികയാണ്. ഈ സാഹചര്യത്തിൽ, വയോജനങ്ങൾക്ക് പൂർണ്ണ സുരക്ഷിതത്വം ഉറപ്പാക്കാൻ ശക്തമായ പ്രതിരോധ സംവിധാനങ്ങളാണ് പുതിയ വകുപ്പ് വിഭാവനം ചെയ്യുന്നത്. ഇതിനായി അടിയന്തര സഹായം ലഭ്യമാക്കുന്ന ‘എൽഡർ ഹെൽപ്പ്‌ലൈൻ' (Elder Helpline - 1090 അല്ലെങ്കിൽ പ്രത്യേക ടോൾ ഫ്രീ നമ്പർ), ജില്ലാ തലങ്ങളിൽ ഉടനടി ഇടപെടാൻ ശേഷിയുള്ള ദ്രുതകർമ്മസേന (Rapid Action Team), വയോജന കേസുകൾ വേഗത്തിൽ തീർപ്പാക്കാനുള്ള ഫാസ്റ്റ് ട്രാക്ക് കോടതികൾ എന്നിവ സ്ഥാപിക്കാൻ വകുപ്പ് ഉദ്ദേശിക്കുന്നു.

കൂടാതെ, സ്വന്തം ഭൂമിയിലോ വീടുകളിലോ ഒറ്റയ്ക്ക് താമസിക്കുന്ന വയോധികരുടെ സ്വത്തിൽ നിയമപരമായ ഉടമസ്ഥതയും സംരക്ഷണവും ഉറപ്പാക്കാനുള്ള പ്രത്യേക നടപടികളും സ്വീകരിക്കും. ഈ സേവനങ്ങളെല്ലാം ഒരൊറ്റ വകുപ്പിന് കീഴിൽ ഏകോപിപ്പിക്കുന്നതിലൂടെ, അതിക്രമങ്ങൾക്ക് ഇരയാകുന്ന മുതിർന്ന പൗരന്മാർക്ക് ആവശ്യമായ നിയമപരവും ഭരണപരവുമായ സഹായങ്ങളും മാനസിക പിന്തുണയും ഒരേ മേൽക്കൂരയ്ക്ക് കീഴിൽ (Single Window System) വളരെ വേഗത്തിൽ ലഭ്യമാക്കാൻ സാധിക്കും.  

ആരോഗ്യ മേഖലയിലായിരിക്കും പുതിയ വകുപ്പിന്റെ ഏറ്റവും അടിയന്തരമായ പ്രതിഫലനമുണ്ടാകുക. വാർദ്ധക്യസഹജമായ രോഗങ്ങളാൽ ബുദ്ധിമുട്ടുന്നവർക്ക് പ്രത്യേക ഗെറിയാട്രിക് (Geriatric) ചികിത്സാസൗകര്യമൊരുക്കുക എന്നതായിരിക്കും പുതിയ വകുപ്പിന്റെ പ്രാഥമിക ലക്ഷ്യം. ഡിമൻഷ്യ, അൽഷൈമേഴ്സ്, ഓസ്റ്റിയോ ആർത്രൈറ്റിസ്, പ്രമേഹസംബന്ധമായ സങ്കീർണ്ണതകൾ എന്നിവ മുൻകൂട്ടി തിരിച്ചറിഞ്ഞ് ഫലപ്രദമായി കൈകാര്യം ചെയ്യുന്നതിന് ജില്ലാ ആശുപത്രികൾ മുതൽ താലൂക്ക് തലങ്ങളിൽ വരെ പ്രത്യേക ക്ലിനിക്കുകൾ ആരംഭിക്കാൻ വകുപ്പ് വിഭാവനം ചെയ്യുന്നുണ്ട്.

ഇതിനുപുറമേ, ആശുപത്രികളിൽ നേരിട്ടെത്താൻ കഴിയാത്ത കിടപ്പുരോഗികൾക്ക് 'ഹോം കെയർ' (വീട്ടുപാലന) പദ്ധതികൾ വ്യാപകമാക്കും. വീടുകളിലേക്ക് നേരിട്ടെത്തുന്ന വിദഗ്ധ പരിചരണ സംവിധാനങ്ങൾ വഴി വലിയ ആശുപത്രികളിലെ അനാവശ്യ തിരക്കും ഭാരവും കുറയ്ക്കാൻ സാധിക്കും. അതോടൊപ്പം, നഗരങ്ങളിൽ നിന്ന് മാറി ഒറ്റപ്പെട്ടു കഴിയുന്ന ഗ്രാമീണ- ഉൾനാടൻ പ്രദേശങ്ങളിലെ വയോജനങ്ങൾക്ക് ഗുണമേന്മയേറിയ ആരോഗ്യ സേവനം യഥാസമയം വിരൽത്തുമ്പിൽ ലഭ്യമാക്കാൻ ഈ പദ്ധതിയിലൂടെ സാധ്യമാകും.

കേരളത്തിലെ വലിയൊരുവിഭാഗം മുതിർന്ന പൗരരുടെയും ഏക വരുമാന സ്രോതസ്സ് സാമൂഹ്യസുരക്ഷാ പെൻഷനാണ്. എന്നാൽ 2000 രൂപ ചികിത്സ അടക്കമുള്ള ഉയർന്ന ജീവിതച്ചെലവ് വച്ചുനോക്കുമ്പോൾ അപര്യാപ്തമാണ്. പെൻഷൻ തുക കാലാനുസൃതമായി വർദ്ധിപ്പിക്കുക, സാമ്പത്തികമായി പിന്നാക്കം നിൽക്കുന്നവക്ക് പ്രത്യേക ഭക്ഷ്യസബ്‌സിഡി ലഭ്യമാക്കുക, സൗജന്യ ഔഷധ സഹായ പദ്ധതികൾ വിപുലീകരിക്കുക, ഇൻഷുറൻസ് പരിരക്ഷ ഉറപ്പാക്കുക എന്നിവ ഒരൊറ്റ കേന്ദ്രീകൃത സംവിധാനത്തിലൂടെ കൂടുതൽ കാര്യക്ഷമമായി നടപ്പിലാക്കാൻ പുതിയ വകുപ്പിന് കഴിയും. ഇതിനുപുറമേ, ബാങ്കുകളുമായും സഹകരണ സ്ഥാപനങ്ങളുമായും കൈകോർത്ത് മുതിർന്ന പൗരർക്കായി കുറഞ്ഞ പലിശനിരക്കിലുള്ള ചെറുകിട വായ്പകളും ചെലവു കുറഞ്ഞ നിക്ഷേപ പദ്ധതികളും ആരംഭിക്കുന്നത് ഈ വകുപ്പിന്റെ സജീവമായ പരിഗണനയിലാണ്.  

ഒരു പ്രത്യേക വയോജന പരിപാലന വകുപ്പ് യാഥാർത്ഥ്യമാകുന്നതിലൂടെ ഭാവിയിൽ വലിയ രീതിയിലുള്ള സാമൂഹിക- സാമ്പത്തിക നേട്ടങ്ങളാണ് കേരളത്തെ കാത്തിരിക്കുന്നത്. പ്രായമായവർക്കായി കൃത്യമായ ആരോഗ്യ ഇൻഷുറൻസ് പദ്ധതികൾ, ഡേ-കെയർ സെന്ററുകൾ, മാനസിക ഉല്ലാസത്തിനുള്ള വേദികൾ, മികച്ച പാലിയേറ്റീവ് കെയർ സംവിധാനങ്ങൾ എന്നിവ കേന്ദ്രീകൃത വകുപ്പിലൂടെ നടപ്പിലാക്കാൻ കഴിയും. ഇതു​വഴി വയോജനങ്ങളുടെ ശാരീരിക- മാനസിക ആരോഗ്യം മെച്ചപ്പെടുകയും, കുടുംബങ്ങളുടെ ചികിത്സാച്ചെലവ് വലിയൊരു പരിധിവരെ കുറയ്ക്കാനും സാധിക്കും. കൂടാതെ, മുതിർന്നവരുടെ അനുഭവസമ്പത്തും അറിവും പുതിയ തലമുറയ്ക്ക് പകർന്നുനൽകാൻ സാധിക്കുന്ന തരത്തിലുള്ള കമ്മ്യൂണിറ്റി പ്രോജക്ടുകൾ ആവിഷ്കരിക്കാൻ കഴിഞ്ഞാൽ, അത് സമൂഹത്തിന്റെ മൊത്തത്തിലുള്ള വികാസത്തിന് വഴിതെളിക്കും. ചുരുക്കത്തിൽ, വയോജന പരിപാലന രംഗത്ത് കേരളം കൊണ്ടുവരുന്ന ഇത്തരം മാറ്റങ്ങൾ നമ്മുടെ മുതിർന്ന തലമുറയുടെ ജീവിതത്തിൽ ഒരു പുതിയ പ്രഭാതം സമ്മാനിക്കുമെന്നതിൽ തർക്കമില്ല.

വൃദ്ധജനസംഖ്യയുടെ വർദ്ധനവ് എന്നത് ഒരിക്കലും ഒരു സമൂഹത്തിന്റെ ഭാരമല്ല, മറിച്ച് ആ സമൂഹം ഏറ്റെടുക്കേണ്ട ഏറ്റവും വലിയ ഉത്തരവാദിത്വമാണ്. ഒരു നാഗരിക സമൂഹം എത്രത്തോളം പുരോഗതി കൈവരിച്ചു എന്ന് അളക്കേണ്ടത്, ആ സമൂഹത്തിലെ ഏറ്റവും ദുർബലരായ ജനവിഭാഗങ്ങളോട് അത് എങ്ങനെ പെരുമാറുന്നു എന്നതിനെ അടിസ്ഥാനമാക്കിയാണ്. ഈ ദർശനം മുൻനിർത്തി കേരള സർക്കാർ രൂപീകരിക്കുന്ന പ്രത്യേക വയോജന പരിപാലന വകുപ്പ്, സംസ്ഥാനത്തിന്റെ ഭരണനയങ്ങളിലെ ഗുണാത്മകമായ ഒരു മാറ്റത്തിന്റെ തുടക്കമാണ് കുറിക്കുന്നത്.

ആശ, ആരോഗ്യം, ആദരം, ആത്മബഹുമാനം എന്നിവ മുതിർന്ന പൗരരുടെ ജീവിതത്തിൽ ഉറപ്പാക്കുക എന്ന ചരിത്രപരമായ ദൗത്യമാണ് ഈ നൂതന വകുപ്പ് ഏറ്റെടുക്കേണ്ടത്. ഇന്നത്തെ കേരളത്തിന് അടിത്തറ പാകിയ ഈ മുതിർന്ന തലമുറ, ഭാവികേരളത്തിന്റെ എല്ലാവിധ ഉന്നതിയും പരിചരണവും പൂർണ്ണമായി അർഹിക്കുന്നുണ്ട്. ആ സുരക്ഷിതത്വവും ഉന്നതിയും അവർക്ക് ഉറപ്പുനൽകാൻ ഈ പുതിയ വകുപ്പ് ദൃഢമായ ചുവടുവെപ്പാകുമെന്ന് പ്രത്യാശിക്കാം.