കെ - റെയിലിനെക്കുറിച്ചുള്ള ചില സംശയങ്ങള്‍ കുറിച്ചിട്ടതിന് (അതൊരു കവിതയോ കുറിപ്പോ എന്നുള്ള സംശയത്തെ നീക്കിനിര്‍ത്തുന്നു) കവി റഫീക്ക്​അഹമ്മദിനെതിരെ സൈബര്‍ സ്ഥലങ്ങളില്‍ വാക്കുകള്‍ കൊണ്ടുള്ള ദ്രോഹങ്ങള്‍ നടക്കുന്നു എന്ന് വാര്‍ത്തയില്‍ നിന്നറിഞ്ഞു.

ഒരാള്‍ക്ക്, അവളോ അയാളോ, കവിയോ സാധാരണ പൗരനോ ആരുമായിക്കൊള്ളട്ടെ, ചില കാര്യങ്ങളോട് സംശയം തോന്നിയാല്‍ അത് ചോദിക്കുവാനുള്ള അവകാശം ഒരു ജനാധിപത്യ രാജ്യത്തുണ്ടെന്ന് വിശ്വസിക്കുന്നു. എന്റെ അറിവില്‍ റഫീക്ക്​ അഹമ്മദ് ഇടതുപക്ഷ ചിന്തകളോട് ചേര്‍ന്ന് നില്‍ക്കുന്ന വ്യക്തിയാണ്. യുക്തിപൂര്‍വ്വം ഇടപെടലുകള്‍ നടത്തുന്നതില്‍ ശ്രദ്ധാലുവാണ്. മാറി വരുന്ന ഭരണങ്ങള്‍ക്കനുസരിച്ച് ചുവടു വെക്കാത്ത വ്യക്തിയാണ്. അധികാര മോഹത്തിനനുസരിച്ച് മൗനിയാവാന്‍ മിടുക്ക് കാട്ടാറുമില്ല. തീവ്ര ഇസ്​ലാം മത അടയലുകളോട് ഒരു തുറവിനായി നിരന്തരം കലഹിക്കുകയും ചെയ്യുന്നു. അങ്ങനെയൊരാള്‍ ചില ചോദ്യങ്ങള്‍ ചോദിക്കുമ്പോള്‍ സഹിഷ്ണുതയോടെ അതിനെ കേള്‍ക്കുകയും അതിനോട് പ്രതികരിക്കുകയും ചെയ്യുക എന്നതല്ലേ ജനാധിപത്യപരമായ ശരി?

ഇടതുപക്ഷത്തോട് നിരന്തരമായി ചോദ്യങ്ങള്‍ ചോദിച്ചിരുന്നു ഒ.വി. വിജയന്‍. വിജയന്റെ ചോദ്യങ്ങള്‍ക്ക് ഇ. എം.എസ് മറുപടിയും നല്‍കിയിരുന്നു. സംവാദാത്മകതയിലാണ് ആരോഗ്യപരമായ ഒരു സമൂഹം വേരുകള്‍ പടര്‍ത്തുക. എവിടെ അധികാരത്തിന്റെ നെറുകയില്‍ നിന്ന് ശാസനകള്‍ പുറപ്പെടുന്നുവോ അവിടെ ഒരു സമൂഹം വേരറ്റ് നിപതിക്കുകയാണ് ചെയ്യുക.

ALSO READ

'ആ മനുഷ്യന്‍ നീ തന്നെ' എന്ന് ഫ്രാങ്കോ മുളയ്ക്കലിനോട് പറയാന്‍ സഭയില്‍ ആരുമുണ്ടായില്ല; വട്ടോലിയച്ചന്‍ സംസാരിക്കുന്നു

എന്തുകൊണ്ട് ശാസ്ത്രസാഹിത്യ പരിഷത്ത് കെ- റെയിലിനെതിരായി സംശയിച്ചു? എന്തുകൊണ്ട് മേധാ പട്ക്കര്‍ തൊഴു കൈയ്യോടെ യാചിച്ചു? എന്തുകൊണ്ട് ഒരു കവി തന്റെ സംശയങ്ങള്‍ കുറിച്ചു? അല്‍പ്പം ക്ഷമയോടെ ഇതെല്ലാം ചര്‍ച്ച ചെയ്യാന്‍ നമുക്കാവില്ലേ? അതല്ല, തങ്ങള്‍ക്ക് അഹിതമായത് പറയുന്നവരെ ഉന്മൂലനം ചെയ്യുകയാണ് വേണ്ടതെങ്കില്‍ അത് ഫാസിസത്തില്‍ നിന്ന്​വ്യത്യസ്തമാവില്ല.

ഒരാളും ഒന്നിനേയും സംശയിക്കാതെ, ഭയത്തോടെ, നിശ്ശബ്ദമായി ഇരിക്കുന്നിടത്ത്, ഒരു കവി ഈ ദേശത്തിനായി സങ്കടപ്പെടുമ്പോള്‍ അത് കേള്‍ക്കാന്‍ നമുക്കൊരു കാതില്ലെങ്കില്‍ അത് കഷ്ടമാണ്. ഇടതുപക്ഷ സ്ഥാനാര്‍ത്ഥികള്‍ക്കായി നാടുനീളെ പ്രചാരണം നടത്തിയ എന്റെ സഹ എഴുത്തുകാരേ, നിങ്ങള്‍ക്ക് റഫീക്ക് അഹമ്മദ് എന്ന കവിയെ അറിയില്ല എന്നുണ്ടോ? അതോ നിങ്ങള്‍ സൗകര്യപൂര്‍വ്വമായ മൗനത്തിലാണോ?

സുഗതകുമാരിയും അയ്യപ്പപ്പണിക്കരും കടമ്മനിട്ടയും വിഷ്ണുനാരായണന്‍ നമ്പൂതിരിയുമെല്ലാം പാടിയും പറഞ്ഞും സമരം ചെയ്താണ്​ സൈലൻറ്​ വാലിയെ തിരിച്ചെടുത്തത്. അവര്‍ കൊണ്ട വെയിലാണ് നമ്മുടെ തണല്‍. അതു മറക്കരുത്.