യു എസ് പ്രസിഡൻഷ്യൽ തിരഞ്ഞെടുപ്പ് സ്ഥാനാർഥിത്വത്തിൽ നിന്ന് നിലവിലെ പ്രസിഡന്റ് ജോ ബൈഡൻ പിന്മാറി.
വൈസ് പ്രസിഡന്റ് കമലാ ഹാരിസിന്റെ സ്ഥാനാർത്ഥിത്വത്തെ പിന്തുണയ്ക്കുന്നുവെന്ന് പിൻമാറ്റത്തിന് ശേഷം ബൈഡൻ എക്സിൽ കുറിച്ചു.
ഡെമോക്രാറ്റിക് പാർട്ടി അംഗങ്ങളും ഒഫീഷ്യൽസും കമലാ ഹാരിസിന് പിന്തുണ അറിയിച്ചുകൊണ്ട് രംഗത്തെത്തിയിട്ടുണ്ട്.
മുൻ പ്രസിഡന്റ് ബരാക് ഒബാമ, നാൻസി പെലോസി എന്നിവർക്ക് കമലാ ഹാരിസ് സ്ഥാനാർത്ഥിയാവുന്നതിൽ അതൃപ്തി.
റിപ്പബ്ലിക്കൻ പാർട്ടി ഇതിനോടകം തന്നെ കമലാ ഹാരിസിനെതിരെ പ്രചാരണം തുടങ്ങിയിട്ടുണ്ട്.
ബൈഡന്റെ പിന്മാറ്റവും കമലാ ഹാരിസിന്റെ സ്ഥാനാർത്ഥിത്വവും സംബന്ധിച്ച് ഹോളിവുഡിൽ നിന്നും സമ്മിശ്ര പ്രതികരണങ്ങളുണ്ടാകുന്നുണ്ട്.
പ്രസിഡൻഷ്യൽ ഡിബേറ്റിൽ എതിർസ്ഥാനാർത്ഥി ഡൊണാൾഡ് ട്രംപിനോട് പൊരുതി നിൽക്കാൻ ബൈഡന് സാധിക്കുന്നില്ലെന്ന് ചൂണ്ടിക്കാട്ടി ഡെമോക്രറ്റുകൾ തന്നെ പരസ്യമായി രംഗത്തെത്തിയിരുന്നു.
ബരാക് ഒബാമ നേരത്തെ തന്നെ ബൈഡൻ പിന്മാറണമെന്ന് ആവശ്യപ്പെട്ടിരുന്നു.
നാല് വ‍ർഷങ്ങൾക്ക് മുമ്പ് മുൻ പ്രസിഡൻറ് ഡൊണാൾഡ് ട്രംപിനെ പരാജയപ്പെടുത്തിയാണ് ജോ ബൈഡൻ വൈറ്റ് ഹൗസിലെത്തുന്നത്.
ഇന്ത്യൻ വംശജ കൂടിയായ കമല ഹാരിസാണ് ഇക്കാലയളവിൽ ബൈഡനൊപ്പം വൈസ് പ്രസിഡൻറായി ഉണ്ടായിരുന്നത്.
കമലാ ഹാരിസിൻെറ സ്ഥാനാ‍ർഥിത്വം ഡെമോക്രാറ്റിക് പാർട്ടി ഔദ്യോഗികമായി പ്രഖ്യാപിച്ചാൽ ഹിലരി ക്ലിൻറന് ശേഷം അമേരിക്കയിലെ പുതിയ വനിതാ പ്രസിഡൻറ് സ്ഥാനാർഥിയായി അവർ മാറും.