സിഡ്നി കൂട്ടക്കൊലയ്ക്ക് പിന്നിൽ ആരുടെ കരങ്ങൾ?

തിരമാലകളുടെ ഇരമ്പം നിലയ്ക്കാത്ത സിഡ്നിയിലെ ബോണ്ടി ബീച്ച് ആഹ്ളാദങ്ങളുടെയും ആഘോഷങ്ങളുടെയും തീരമാണ്. 2025 ഡിസംബർ 14-ലെ സായാഹ്നത്തിൽ അവിടെ ഹാനുക്ക ആഘോഷം നടക്കുന്നു. ജൂതജനത തങ്ങളുടെ അതിജീവനത്തിന്റെ ഓർമ്മയ്ക്കായി ആഘോഷിക്കുന്ന ആഘോഷമാണ് 'ഹാനുക്ക' അഥവാ പ്രകാശത്തിന്റെ ഉത്സവം. അന്ധകാരത്തിന് മേൽ പ്രകാശം വിജയം നേടിയ ചരിത്രത്തെ ഓർമ്മിച്ച്, മെഴുകുതിരി നാളങ്ങൾ തെളിയിക്കാൻ നൂറുകണക്കിന് മനുഷ്യർ ഒത്തുകൂടിയിരിക്കുന്നു ബീച്ചിൽ. കളിചിരികളുമായി ഓടിനടക്കുന്ന കുട്ടികൾ. പ്രാർത്ഥനാനിരതമായ മനസ്സുകളുമായി പ്രായം ചെന്ന സ്ത്രീ പുരുഷന്മാർ. നിമിഷനേരമേ വേണ്ടി വന്നുള്ളൂ, വെളിച്ചത്തിൽ കുളിച്ച ബോണ്ടി തീരത്തെ ഇരുട്ടിലാഴ്ത്തി വെടിയുണ്ടകൾ പെയ്തിറങ്ങി. ആഘോഷങ്ങളുടെ സംഗീതം നിലവിളികൾക്ക് വഴിമാറി. കടൽതീരത്തെ മണൽ തരികൾ രക്തത്തിൽ കുതിർന്നു. ഒരു പത്തു വയസ്സുകാരിയും ഹോളോകോസ്റ്റിനെ അതിജീവിച്ച വൃദ്ധനും ഉൾപ്പെടെ 15 മനുഷ്യജീവനുകൾ ചേതനയറ്റ് പിടഞ്ഞു.

ആസൂത്രിതമായ കൂട്ടക്കൊല

ഓസ്ട്രേലിയൻ ചരിത്രത്തിലെ ഏറ്റവും ഇരുണ്ട അധ്യായങ്ങളിലൊന്നായി മാറിയ ഈ ആക്രമണം, കൃത്യമായ ആസൂത്രണത്തോടെ നടപ്പാക്കിയ ഭീകരകൃത്യമാണെന്നാണ് അന്വേഷണ ഉദ്യോഗസ്ഥർ നൽകുന്ന വിവരം. ഹാനുക്ക ആഘോഷത്തിൽ, സൈനിക വേഷം ധരിച്ചെത്തിയ സാജിദ് അക്രം (50), മകൻ നവീദ് അക്രം (24) എന്നിവർ നടത്തിയ നരനായാട്ട് സിഡ്നിയുടെ സുരക്ഷാ സംവിധാനങ്ങളെ നോക്കുകുത്തിയാക്കി. കൊലയാളി സാജിദ് അക്രം ഇന്ത്യൻ വംശജൻ ആണെന്നാണ് പ്രാഥമിക വിവരം. ജനങ്ങൾ തിങ്ങിനിറഞ്ഞ വേദിയിലേക്ക് രണ്ട് വശങ്ങളിൽ നിന്നും തോക്കുകളുമായി ഇവർ പാഞ്ഞടുത്തത് ആർക്കും രക്ഷപ്പെടാൻ പഴുതുകളില്ലാത്ത വിധമായിരുന്നു. നിയമപരമായി സ്വന്തമാക്കിയ ആയുധങ്ങൾ ഉപയോഗിച്ച് പിതാവ് വെടിയുതിർത്തപ്പോൾ, മകൻ കൊലക്കത്തി വീശി. 'ഫാമിലി ടെറർ സെൽ' എന്ന് പൊലീസ് വിശേഷിപ്പിച്ച ഈ അച്ഛൻ-മകൻ കൂട്ടുകെട്ട് ആധുനിക തീവ്രവാദത്തിന്റെ ഭയാനകമായ മുഖമാണ് വെളിപ്പെടുത്തുന്നത്. പുറത്തുനിന്നുള്ള റിക്രൂട്ട്മെന്റുകളില്ലാതെ, വീടിനുള്ളിൽ വെച്ച് തന്നെ വിഷലിപ്തമായ ആശയങ്ങൾ കൈമാറി വളർത്തുന്ന 'ഇൻകുബേഷൻ' രീതിയാണ് ഇവിടെ കണ്ടത്. പിതാവ് പൊലീസ് വെടിവെപ്പിൽ കൊല്ലപ്പെടുകയും മകൻ പിടിയിലാവുകയും ചെയ്തെങ്കിലും, അവർ ബാക്കിവെച്ചത് ഉത്തരമില്ലാത്ത ഒട്ടേറെ ചോദ്യങ്ങളാണ്.

ത്രില്ലർ സിനിമകളെ വെല്ലുന്ന ഈ ഭീകരതയ്ക്കിടയിലും മാനവികതയുടെ ഒരു തിരിനാളം തെളിഞ്ഞുനിന്നത് ഈ സംഭവത്തിന്റെ വാർത്തകളിൽ ഏറെ പ്രതീക്ഷ നൽകുന്ന ഒന്നായിരുന്നു. അഹമ്മദ് അൽ അഹമ്മദ് എന്ന നാൽപത്തി രണ്ടുകാരനായ സിറിയൻ അഭയാർത്ഥി സ്വന്തം ജീവൻ പണയം വെച്ച്, അക്രമികളിൽ ഒരാളെ പിന്നിൽ നിന്ന് കീഴ്പ്പെടുത്തി. അഹമ്മദ് ഇല്ലായിരുന്നെങ്കിൽ മരണസംഖ്യ ഇരട്ടിയാകുമായിരുന്നു. ഈ ധീരകൃത്യം, വെറുപ്പിന്റെ രാഷ്ട്രീയത്തിനുള്ള വലിയൊരു മറുപടിയായി ആശ്വസിക്കാം.

ഓസ്ട്രേലിയയുടെ ജനസംഖ്യാ ഘടന

ഈ ആക്രമണത്തിന്റെ ആഴം മനസ്സിലാക്കണമെങ്കിൽ ഓസ്ട്രേലിയയുടെ സാമൂഹിക ഘടനയെക്കുറിച്ചുള്ള അറിവ് അനിവാര്യമാണ്. ഓസ്ട്രേലിയയിലെ മൊത്തം ജനസംഖ്യയുടെ 0.4 ശതമാനം (ഏകദേശം ഒരു ലക്ഷം) മാത്രമാണ് ജൂതർ. എണ്ണത്തിൽ കുറവാണെങ്കിലും, മെൽബൺ, സിഡ്നി നഗരങ്ങൾ കേന്ദ്രീകരിച്ച് പ്രവർത്തിക്കുന്ന ഇവർ സാമ്പത്തികമായും രാഷ്ട്രീയമായും വലിയ സ്വാധീനശക്തിയാണ്. വ്യവസായ, അക്കാദമിക, നിയമ മേഖലകളിലെല്ലാം ഇവരുടെ സാന്നിധ്യം നിർണ്ണായകമാണ്.

മറുവശത്ത്, മുസ്ലിം ജനസംഖ്യ ഏകദേശം 3.2 ശതമാനത്തോളമുണ്ട്. വിവിധ രാജ്യങ്ങളിൽ നിന്നുള്ള കുടിയേറ്റക്കാരായ മുസ്ലിംകൾ ഓസ്ട്രേലിയയുടെ ബഹുസ്വര സംസ്കാരത്തിന്റെ അഭിവാജ്യ ഘടകമാണ്. ചരിത്രപരമായി, ജൂത-മുസ്ലിം വിഭാഗങ്ങൾക്കിടയിൽ ഓസ്ട്രേലിയയിൽ വലിയ സംഘർഷങ്ങൾ ഉണ്ടായിട്ടില്ല. ഇന്റർ-ഫെയ്ത്ത് ഡയലോഗുകളിലൂടെയും പരസ്പര സഹകരണത്തിലൂടെയും മുന്നോട്ടുപോയിരുന്ന ഈ ബന്ധത്തിൽ വിള്ളലുകൾ വീഴാൻ തുടങ്ങിയത് ഗാസ-ഇസ്രയേൽ യുദ്ധത്തിന് ശേഷമാണ്.

പ്രതികരണവും ആശങ്കകളും

ഈ ഭീകരാക്രമണത്തെ ഓസ്ട്രേലിയയിലെ മുസ്ലിം സമൂഹം ഒറ്റക്കെട്ടായാണ് എതിർത്തത്. സംഭവത്തെ ശക്തമായി അപലപിച്ച ഓസ്ട്രേലിയൻ നാഷണൽ ഇമാമ്സ് കൗൺസിൽ (ANIC) "നിരപരാധികളെ കൊല്ലുന്നതിന് ഇസ്ലാമിൽ ന്യായീകരണമില്ല" എന്ന് പ്രഖ്യാപിച്ചു. ലകെമ്പ പള്ളി ഉൾപ്പെടെയുള്ള പ്രധാന കേന്ദ്രങ്ങളിലെല്ലാം ഈ ക്രൂരകൃത്യത്തിനെതിരെ പ്രമേയങ്ങൾ പാസാക്കി. അക്രമികൾ പള്ളികളുമായി ബന്ധമില്ലാത്തവരും, ഇന്റർനെറ്റിലൂടെ തീവ്രവാദത്തിൽ ആകൃഷ്ടരായവരുമാണെന്ന കണ്ടെത്തൽ, സമുദായ നേതൃത്വത്തിന് ആശ്വാസത്തോടൊപ്പം ആശങ്കയും നൽകുന്നുണ്ട്. തങ്ങളുടെ നിയന്ത്രണത്തിന് പുറത്തുള്ള ഇത്തരം ആളുകൾ മുഴുവൻ സമുദായത്തെയും പ്രതിക്കൂട്ടിലാക്കുമോ എന്ന ഭയം അവർക്കുണ്ട്.

പലസ്തീൻ കുടിയേറ്റക്കാരും രാഷ്ട്രീയ സമവാക്യങ്ങളും

ഓസ്ട്രേലിയയിൽ ഏകദേശം 20,000-ത്തോളം വരുന്ന പലസ്തീൻ കുടിയേറ്റക്കാരുണ്ട്. ഗാസയിലെ യുദ്ധത്തിന് ശേഷം ഓസ്ട്രേലിയൻ തെരുവുകളിൽ നടന്ന വമ്പിച്ച പലസ്തീൻ ഐക്യദാർഢ്യ റാലികളിൽ ജൂതർ പോലും പങ്കെടുത്തിരുന്നു എന്നത് ശ്രദ്ധേയമാണ്. 'പലസ്തീൻ വിമോചനം' ഒരു മനുഷ്യാവകാശ പ്രശ്നമായി ഉയർത്തിക്കാട്ടാൻ ഓസ്ട്രേലിയയിലെ പൗരസമൂഹത്തിന് കഴിഞ്ഞിരുന്നു. എന്നാൽ, സിഡ്നിയിലെ ഈ ആക്രമണം പലസ്തീൻ അനുകൂല മുന്നേറ്റങ്ങൾക്ക് വലിയ തിരിച്ചടിയാണ്.

അക്രമികൾ ഐസിസ് (ISIS) ആശയങ്ങളിൽ ആകൃഷ്ടരായിരുന്നു എന്നത് പലസ്തീൻ സമരങ്ങളെ തീവ്രവാദമായി ചിത്രീകരിക്കാൻ ആഗ്രഹിക്കുന്നവർക്ക് വടി കൊടുക്കുന്നതിന് തുല്യമായി. പലസ്തീൻ അനുകൂല സംഘടനകൾ ഈ ആക്രമണത്തെ തള്ളിപ്പറയുന്നുണ്ടെങ്കിലും, പൊതുസമൂഹത്തിന്റെ അനുഭാവം കുറയാൻ ഇത് കാരണമായേക്കാം. ഓസ്ട്രേലിയൻ സർക്കാർ ഇതുവരെ സ്വീകരിച്ചിരുന്ന "ഇസ്രയേലിന്റെ സ്വയരക്ഷയ്ക്കുള്ള അവകാശം അംഗീകരിക്കുമ്പോഴും, ഗാസയിലെ വെടിനിർത്തലിനെ അനുകൂലിക്കുക," എന്ന സന്തുലിത നിലപാടിൽ നിന്ന് പിന്നോട്ട് പോകാനും, സുരക്ഷാ നയങ്ങൾ കർക്കശമാക്കാനും ഈ സംഭവം സമ്മർദ്ദമുണ്ടാക്കും.

നിഗൂഢതകളുടെ കാണാപ്പുറങ്ങൾ

ഇവിടെ ഉയരുന്ന ഏറ്റവും പ്രസക്തമായ ചോദ്യം ഇതാണ്: ഇപ്പോൾ എന്തിനാകാം ഈ കൂട്ടക്കുരുതി ചെയ്തത്?. ലോകമെമ്പാടും ഇസ്രയേൽ വിരുദ്ധ വികാരം, പ്രത്യേകിച്ച് പാശ്ചാത്യ രാജ്യങ്ങളിലെ കലാലയങ്ങളിൽ പോലും ശക്തമായി നിലനിൽക്കുന്ന സമയത്താണ് ജൂതർക്കെതിരെ ഐസിസ് മോഡൽ ആക്രമണം നടക്കുന്നത്. ഇത് ആർക്കാണ് ഗുണം ചെയ്യുക?

ചരിത്രം പരിശോധിച്ചാൽ, പലപ്പോഴും ഐസിസ് പോലെയുള്ള ഭീകരസംഘടനകളുടെ പ്രവർത്തനങ്ങൾ പലസ്തീൻ വിമോചന പോരാട്ടങ്ങളെ ദുർബലപ്പെടുത്താനേ ഉപകരിച്ചിട്ടുള്ളൂ എന്ന് കാണാം. പലസ്തീൻ ജനതയ്ക്ക് ലഭിക്കുന്ന അന്താരാഷ്ട്ര പിന്തുണ തകർക്കാനും, മുസ്ലിംകളെ ഒന്നടങ്കം ഭീകരവാദികളായി മുദ്രകുത്താനും ഇത്തരം ആക്രമണങ്ങൾ വഴിയൊരുക്കുന്നു. ഇവിടെയാണ് അദൃശ്യമായ കരങ്ങളെക്കുറിച്ചുള്ള സംശയങ്ങൾ ബലപ്പെടുന്നത്.

ഈ ആക്രമണത്തിന് പിന്നിൽ പ്രവർത്തിച്ചത് കേവലം മതഭ്രാന്താണോ, അതോ സാമ്രാജ്യത്വ ശക്തികളുടെയോ ഇസ്രായേൽ അനുകൂല ലോബികളുടെയോ താൽപ്പര്യങ്ങൾ സംരക്ഷിക്കാൻ തീവ്രവാദികളെ ആയുധമാക്കിയതാണോ എന്ന ചോദ്യം പലരും ഉന്നയിക്കുന്നുണ്ട്. സമൂഹത്തിൽ ധ്രുവീകരണം സൃഷ്ടിച്ച്, മധ്യപൂർവേഷ്യയിലെ അധിനിവേശങ്ങൾക്ക് ന്യായീകരണം കണ്ടെത്താൻ ഇത്തരം സംഭവങ്ങൾ ഉപയോഗിക്കപ്പെടാറുണ്ട്. അക്രമികൾ അയച്ചതെന്ന് പറയുന്ന വീഡിയോ സന്ദേശങ്ങളും, അവരുടെ പെട്ടെന്നുള്ള 'റാഡിക്കലൈസേഷനും' ദുരൂഹതകൾ അവശേഷിപ്പിക്കുന്നു. ഐസിസ് എന്ന ലേബലിൽ നടക്കുന്ന ഇത്തരം ആക്രമണങ്ങൾ, യഥാർത്ഥത്തിൽ ഇസ്രയേലിന്റെ നയങ്ങളെ വിമർശിക്കുന്നവരെ നിശബ്ദരാക്കാനുള്ള ആയുധമായി മാറുന്നുണ്ടോ എന്ന് സംശയിക്കുന്ന രാഷ്ട്രീയ നിരീക്ഷകർ ഓസ്ട്രേലിയയിലുണ്ട്.

കൂട്ടക്കൊലയുടെ പ്രത്യാഘാതങ്ങൾ

സിഡ്നി ആക്രമണം ഓസ്ട്രേലിയയുടെ ഭാവിയെ പല രീതിയിൽ സ്വാധീനിക്കാം. തോക്ക് കൈവശം വെക്കുന്നതിൽ (Gun Laws) കർശന നിയന്ത്രണങ്ങൾ വരുമെന്ന സൂചന ഇതിനോടകം വന്നു കഴിഞ്ഞു. കുടിയേറ്റക്കാർക്കും അഭയാർത്ഥികൾക്കും എതിരായ പരിശോധനകൾ ഇനി ശക്തമാക്കും എന്ന കാര്യത്തിൽ സംശയമില്ല. അതിലേറെ പ്രധാനമായത്, സാമൂഹിക ധ്രുവീകരണമാണ്. ബഹുസ്വരതയുടെ മാതൃകാ ദേശമായിരുന്ന ഓസ്ട്രേലിയയിൽ, സംശയത്തിന്റെ വിത്തുകൾ മുളപ്പിക്കുന്നതാണ് ഈ സംഭവം. അയൽക്കാരെ ഭയത്തോടെ നോക്കുന്ന അവസ്ഥയിലേക്ക് സമൂഹം മാറിയേക്കാം. മാത്രമല്ല, വലതുപക്ഷ രാഷ്ട്രീയ കക്ഷികൾ കുടിയേറ്റ വിരുദ്ധ വികാരം ആളിക്കത്തിക്കാൻ ഈ അവസരം ഉപയോഗിക്കും.

എങ്കിലും, എല്ലാ ഇരുട്ടിനും അപ്പുറം ഒരു വെളിച്ചമുണ്ടെന്ന് പ്രത്യാശിക്കാം. ജൂതനായ റാബിയെ രക്ഷിക്കാൻ ശ്രമിച്ച സിറിയൻ അഭയാർത്ഥി അഹമ്മദിന്റെ കൈകൾ, ഈ ദുരന്തത്തിനിടയിലും പ്രതീക്ഷയുടെ പിടിവള്ളിയായി നിൽപ്പുണ്ട്. തീവ്രവാദം മതത്തിന്റെ സൃഷ്ടിയല്ലെന്നും, അത് പിശാചിന്റെ അലർച്ചയാണെന്നും ഈ സംഭവം ഓർമ്മിപ്പിക്കുന്നു. ബോണ്ടി തീരത്തെ കെടാവിളക്കുകൾ വീണ്ടും തെളിയും. അപ്പോഴും, അതിൽ വീണ ചോരപ്പാടുകൾ നൽകുന്ന പാഠം വിസ്മരിക്കപ്പെടാതിരിക്കട്ടെ. വെറുപ്പിന്റെ വിപണിയിൽ ലാഭം കൊയ്യുന്നത് ആരായാലും, നഷ്ടപ്പെടുന്നത് നിരപരാധികളുടെ ജീവനും നാടിന്റെ സമാധാനവുമാണ്.