ഇന്ത്യയിലെ പല ഉന്നത വിദ്യാഭ്യാസ സ്ഥാപനങ്ങളിലേക്കും  പിന്നാക്ക വിഭാഗക്കാരായ വിദ്യാർഥികൾ ധാരാളമായി കടന്നുവരുന്നുണ്ടെന്നും അതുകൊണ്ടുതന്നെ അവർക്കെതിരെ ബോധപൂര്‍വമായ ആക്രമണം നടക്കുന്നുണ്ടെന്നും ഈ പാശ്ചാത്തലത്തിൽ വേണം കെ.ആര്‍. നാരായണന്‍ ഫിലിം ഇന്‍സ്റ്റിറ്റ്യൂട്ടിലെ പ്രശ്‌നങ്ങളെയും വിലയിരുത്തേണ്ടത് എന്നും അശോകന്‍ ചെരുവില്‍. ട്രൂകോപ്പി തിങ്കിനുവേണ്ടി വി.കെ. ബാബുവുമായി നടത്തിയ അഭിമുഖത്തിലായിരുന്നു അദ്ദേഹത്തിന്റെ പ്രതികരണം. 

2016 ജനുവരി 17നാണ്​ ഹൈദരാബാദ് യൂണിവേഴ്സിറ്റിയിലെ ജാതി മേധാവിത്വത്തിലേയ്ക്ക് രാജ്യത്തിന്റെ ശ്രദ്ധതിരിച്ച് രോഹിത് വെമുല എന്ന വിദ്യാര്‍ഥി ആത്മഹത്യ ചെയ്യുന്നത്. ""ഈ സമയത്ത് ആര്‍.എസ്.എസ് മുഖമാസികയായ കേസരിയില്‍ ഒരു ലേഖനം വന്നു. ഇന്ത്യയിലെ ഉന്നത വിദ്യാഭ്യാസ സ്ഥാപനങ്ങള്‍ മുഴുവന്‍ തകര്‍ന്നിരിക്കുന്നു എന്നായിരുന്നു ആ ലേഖനത്തിന്റെ ഉള്ളടക്കം. മുന്‍ മാനവവിഭവശേഷി മന്ത്രിയായിരുന്ന അര്‍ജുന്‍ സിംഗ് ഉന്നതവിദ്യാഭ്യാസസ്ഥാപനങ്ങളില്‍ പിന്നാക്ക, ദലിത് സംവരണം കൊണ്ടുവന്നതിന്റെ ഫലമായി, പല ഗ്രാമങ്ങളില്‍ നിന്നും ഈ വിഭാഗക്കാരായ വിദ്യാർഥികൾ, ആര്‍.എസ്.എസിന്റെ ഭാഷയില്‍ പറഞ്ഞാല്‍ 
"ചട്ടമ്പികളും ഗുണ്ടകളുമായി നടന്ന ആളുകള്‍', ഉന്നതവിദ്യാഭ്യാസ സ്ഥാപനങ്ങളില്‍ പഠിക്കാനെത്തിയതോടെ അവിടുത്തെ സമാധാനാന്തരീക്ഷം തകര്‍ന്നു, വിദ്യാസരസ്വതിയുടെ ഇടമാകെ മോശപ്പെട്ടു എന്ന രീതിയിലായിരുന്നു ലേഖനം. ഈ ചിന്താഗതിയുടെ തുടര്‍ച്ചയായി ഉന്നതവിദ്യാഭ്യാസത്തിനെത്തുന്ന ദലിതര്‍ക്കെതിരെ ബോധപൂര്‍വ ആക്രമണം ശക്തമാണ്. ഈ പശ്ചാത്തലത്തിലാണ് കെ.ആര്‍. നാരായണന്‍ ഇന്‍സ്റ്റിറ്റ്യൂട്ടില്‍ വിദ്യാര്‍ഥികള്‍ക്കും ജീവനക്കാര്‍ക്കും എതിരായ ജാതിവിവേചനത്തെ കാണേണ്ടത്​.''

‘‘ആദ്യം ആരോപണം ഡയറക്ടര്‍ ശങ്കര്‍ മോഹനെതിരെയായിരുന്നു. അടൂര്‍ ഗോപാലകൃഷ്ണന്‍ അതില്‍ ഇടപെടും എന്നായിരുന്നു ഞങ്ങളുടെ പ്രതീക്ഷ. അടൂര്‍ ഗോപാലകൃഷ്ണനെ പോലൊരു കലാകാരനെ അവഗണിച്ചുകൊണ്ടാണ് ഡയറക്ടര്‍ ഇങ്ങനെയൊരു തീരുമാനമെടുത്തത് എങ്കില്‍ അത് അത്ര നല്ല കാര്യമല്ല. പക്ഷേ, ഡയറക്​ടറെ ന്യായീകരിച്ചുകൊണ്ടുള്ള അടൂരിന്റെ പ്രസ്താവന ഞെട്ടിച്ചു. അത് വളരെ ദുഃഖകരമായ കാര്യമാണ്’’- അഭിമുഖത്തില്‍ അശോകന്‍ ചരുവില്‍ പറഞ്ഞു.

സംസ്​ഥാന സർക്കാർ സ്​ഥാപനമായ കോട്ടയത്തെ കെ.ആര്‍. നാരായണന്‍ നാഷനൽ ഇൻസ്​റ്റിറ്റ്യൂട്ട്​ ഓഫ്​ വിഷ്വൽ സയൻസ്​ ആൻറ്​ ആർട്​സിൽ ജാതി വിവേചനത്തിനും സംവരണ അട്ടിമറിക്കും എതിരെ വിദ്യാർഥികളും ജീവനക്കാരും പ്രക്ഷോഭത്തിലാണ്​. ഡയറക്​ടർ ജാതി വിവേചനം കാണിക്കുന്നയാളല്ല എന്ന് ശങ്കര്‍ മോഹനെ ന്യായീകരിച്ച്​ ഇന്‍സ്റ്റിറ്റ്യൂട്ട്​ ചെയർമാൻ കൂടിയായ അടൂർ ഗോപാലകൃഷ്​ണൻ അഭിപ്രായപ്രകടനം നടത്തിയിരുന്നു​. 

(അശോകൻ ചരുവിലുമായുള്ള അഭിമുഖത്തിന്റെ പൂർണരൂപം ട്രൂ കോപ്പി തിങ്കിൽ ഉടൻ കാണാം.)