ഉന്മത്ത കാവ്യാനുഭൂതി തന്നാഗ്നേയ-
ദിവ്യലഹരിയിലാമഗ്നമായ് മനം
ഉത്തുംഗവാനത്തിനപ്പുറത്തായുവാൻ
ദഗ്ദ്ധപ്രയാണം തുടരുന്നു ചിന്തകൾ
ആലക്തികോജ്ജ്വലമാസക്തവേഗങ്ങ-
ളാജന്മമാളിപ്പടർന്നുനീറി സ്വയം
നിത്യനിരാലംബ സ്വപ്നസരിത്തിതിൽ
ഗത്യന്തരംവിനാ ദിക്കറ്റ നാവികൻ
ദീനക്കടൽച്ചുഴിക്കുള്ളിലകപ്പെട്ടു
കാവ്യത്തുഴയ്ക്കായുഴന്നൂ വൃഥാവിലായ്
ഏതോ വിദൂരമാമാദിവേഗങ്ങളി-
ലാവിർഭവിക്കും പ്രപഞ്ചപ്രകാരങ്ങൾ
ഓരോ ദിനത്തിലുമാദിത്യതൂലിക -
യാകെത്തിരുത്തുന്ന ശൂന്യാന്ധകാരത്തിൽ
ഭാവിതൻ പൊൻതാരകങ്ങൾ സ്വരാരോഹ-
രേണുവുമായ് വരാൻ കാക്കും നിശകളിൽ
രാഗലോഭാസക്തചിത്തത്തിൽ വൻ തിര-
ക്കോളുയർത്തുന്നൂ മദാന്ധ സഞ്ചാരണം
ജീവന്റെയോരോ കണങ്ങളും മൃത്യുവിൻ
ഘോരാനലൻ കാർന്നൊടുക്കുന്നനുക്ഷണം
പ്രാണന്റെ കണ്ഠം ഞെരിക്കും മൃഗാരവം
ഭീതിതമെന്നും മുഴക്കുന്നു ഹൃത്തടം
കാലാഗ്നിയിൽ വെന്തെരിഞ്ഞു സമസ്തവും
ചാരമായൊന്നായ് ലയിച്ചുമായുന്നൊരീ
ജീവിതത്തിൻ പൊരുൾ തേടുന്ന മൃത്യുതൻ
താളക്രമത്തിന്നണുമാത്രമാണു ഞാൻ!
▮
വായനക്കാർക്ക് ട്രൂകോപ്പി വെബ്സീനിലെ ഉള്ളടക്കത്തോടുള്ള പ്രതികരണങ്ങൾ [email protected] എന്ന വിലാസത്തിലേക്ക് അയക്കാം.