ഓണ്‍ലൈനില്‍ പതിയിരിക്കുന്ന അപകടങ്ങള്‍, സുരക്ഷ ശക്തമാക്കാന്‍ ശ്രദ്ധിക്കണം ഈ കാര്യങ്ങള്‍
ഓണ്‍ലൈന്‍ സുരക്ഷയുടെ ഒരു പ്രധാന ഘടകം പാസ്‍വേര്‍ഡുകള്‍ തന്നെയാണ്. ഇതിനുവേണ്ടി നിങ്ങള്‍ ശക്തമായ പാസ്‍വേര്‍ഡുകളും പാസ്‍വേര്‍ഡ് മാനേജറും ഉപയോഗിക്കുക. നിങ്ങള്‍ക്ക് എളുപ്പത്തില്‍ ഒരു പാസ്‍വേര്‍ഡ് ഓര്‍മ്മിക്കാന്‍ സാധിക്കുന്നുണ്ടെങ്കില്‍, ഒരു ഹാക്കര്‍ക്ക് കമ്പ്യൂട്ടര്‍ പ്രോഗ്രാമിന്റെ സഹായത്തോടെ അത് വേഗത്തില്‍ ഊഹിച്ചു കണ്ടെത്താനും കഴിയും.
ലോകമെമ്പാടുമുള്ള പല രാജ്യങ്ങളിലും ഒക്ടോബര്‍ സൈബര്‍ സുരക്ഷാ ബോധവല്‍ക്കരണ മാസമായി ആചരിക്കുന്നുണ്ട്. അമേരിക്കയില്‍ ഓണ്‍ലൈന്‍ സുരക്ഷയുടെ പ്രാധാന്യം ഉയര്‍ത്തിക്കാട്ടുന്നതിനായി 2004 മുതല്‍ ഒക്ടോബര്‍ മാസത്തില്‍ ഒരു വാര്‍ഷിക ബോധവല്‍ക്കരണ പരിപാടി നടക്കാറുണ്ട്. സൈബര്‍ സുരക്ഷാ മേഖലയില്‍ പണിയെടുക്കുന്നവർ അവർക്കറിയുന്ന രീതിയില്‍ നേരിട്ടോ, ഓണ്‍ലൈനിലൂടെയോ സൈബര്‍ തട്ടിപ്പുകളെ എങ്ങനെയൊക്കെ തിരിച്ചറിയാം എന്നതിനെക്കുറിച്ചുമുള്ള ക്ലാസുകള്‍ ഈ മാസം മുഴുവന്‍ സംഘടിപ്പിക്കാറുണ്ട്. പലവിധം സൈബര്‍ സുരക്ഷാ ടിപ്പുകളും പങ്കുവയ്ക്കാറുണ്ട്.
"ഓണ്‍ലൈനില്‍ സുരക്ഷിതമായി ക്രയവിക്രയങ്ങള്‍ ചെയ്യാന്‍ എളുപ്പമാണ്.' എന്നതാണ് ഇക്കൊല്ലത്തെ ഒക്ടോബര്‍ സൈബര്‍ സുരക്ഷാ ബോധവല്‍ക്കരണ മാസത്തിന്റെ പ്രമേയം.
സൈബര്‍ സുരക്ഷയുടെ പ്രാധാന്യത്തെക്കുറിച്ച് ചിന്തിക്കാനും നിങ്ങളെയും നിങ്ങളുടെ കുടുംബത്തെയും ഓണ്‍ലൈനിലും ഓഫ്‌ലൈനിലും സംരക്ഷിക്കുന്നതിന് ലളിതമായതെങ്കിലും ചില നടപടികള്‍ എടുക്കാനുള്ള സമയമാണിത്. ശ്രദ്ധിക്കേണ്ട പ്രധാന കാര്യം, ഈ സംരക്ഷണ നടപടികള്‍ ഒരു മാസത്തില്‍ മാത്രമായി ഒതുങ്ങരുത്. എല്ലാ കാലത്തും തുടരേണ്ടതാണ്. കാരണം നിങ്ങളുടെ ഓണ്‍ലൈന്‍ ആക്റ്റിവിറ്റികള്‍ ഒരു മാസത്തില്‍ മാത്രം ഒതുങ്ങിനില്‍ക്കുന്നവയല്ലല്ലോ.
ഇത്തവണത്തെ സുരക്ഷാമാര്‍ഗ്ഗങ്ങളില്‍ നമ്മള്‍ ശ്രദ്ധ കേന്ദ്രീകരിക്കുന്നത്, ഓണ്‍ലൈനില്‍ സുരക്ഷിതമായി ഇടപെടലുകള്‍ നടത്താന്‍ ഉതകുന്ന രീതിയില്‍ നിങ്ങള്‍ക്ക് വേഗത്തിലും എളുപ്പത്തിലും ചെയ്യാന്‍ കഴിയുന്ന നാല് പ്രധാന ഓണ്‍ലൈന്‍ പെരുമാറ്റങ്ങളില്‍ ആണ്.
1 ) Multi-factor authentication ഓണ്‍ ചെയ്യുക :
ഓണ്‍ലൈനില്‍ സുരക്ഷിതമായി തുടരുന്നതിനും ഇടപെടലുകള്‍ നടത്തുന്നതിനും ഏറ്റവും വേഗതയേറിയതും എളുപ്പവുമായ മാര്‍ഗ്ഗങ്ങളിലൊന്ന് നിങ്ങളുടെ അക്കൗണ്ടുകളില്‍ Multi-factor authentication ഓണ്‍ ചെയ്യുക എന്നതാണ്. ഏതാനും മിനിറ്റുകള്‍ മാത്രം എടുക്കുന്ന ഏറ്റവും ലളിതമായ ഒരു കാര്യമാണ്. ഒരു അക്കൗണ്ടില്‍, നിങ്ങള്‍ ഇത് ഒറ്റ തവണ മാത്രമേ ചെയ്യേണ്ടതുള്ളൂ. നിങ്ങളുടെ അക്കൗണ്ടുകളില്‍ Multi-factor authentication ഓണ്‍ ആയാല്‍, ഹാക്കര്‍മാര്‍ക്ക് നിങ്ങളുടെ അക്കൗണ്ടുകളിലേക്ക് ആക്‌സസ് നേടുന്നത് ഇരട്ടി ബുദ്ധിമുട്ടാണ്.
എന്താണ് Multi-factor authentication (MFA)?
ടു-ഫാക്ടര്‍ authentication എന്നും അറിയപ്പെടുന്ന ഈ ടെക്‌നോളജി നിങ്ങളുടെ അക്കൗണ്ടിലേക്ക് ലോഗിന്‍ ചെയ്യുന്നതിന് രണ്ട് ഭാഗമായുള്ള വിവരങ്ങള്‍ നിര്‍ബന്ധമാക്കിക്കൊണ്ടു നിങ്ങളുടെ അക്കൗണ്ടുകള്‍ കൂടുതല്‍ സുരക്ഷിതമാക്കുന്നു. ടു-ഫാക്ടര്‍ authentication ന്റെ ഒരു സാധാരണ ഉദാഹരണം: നിങ്ങളുടെ ജിമെയില്‍ അക്കൗണ്ടിലേക്ക് ലോഗിന്‍ ചെയ്യുമ്പോള്‍ ആദ്യം നിങ്ങളുടെ ഇമെയില്‍ ഐഡിയും അതിനുശേഷം നിങ്ങളുടെ പാസ്‌വേര്‍ഡും ടൈപ്പ് ചെയ്യുക , അതിനുശേഷം നിങ്ങളുടെ രജിസ്റ്റര്‍ ചെയ്ത സ്മാര്‍ട്ട്‌ഫോണിലേക്ക് അയച്ച OTP ടൈപ്പ് ചെയ്യുക. എന്നാല്‍ മാത്രമേ ലോഗിന്‍ ചെയ്യാന്‍ പറ്റൂ . അതായത് , നിങ്ങളുടെ യൂസര്‍ നെയിമും പാസ്‍വേഡും ആണ് ആദ്യത്തെ ഫാക്ടര്‍. രണ്ടാമത്തെ ഫാക്ടര്‍ ആണ് രജിസ്റ്റര്‍ ചെയ്ത സ്മാര്‍ട്‌ഫോണില്‍ വരുന്ന OTP.
ടു-ഫാക്ടര്‍ authentication ഉപയോഗിച്ചേക്കാവുന്ന ഒരു രണ്ടാം ഘട്ടത്തിന്റെ മറ്റ് ഉദാഹരണങ്ങളില്‍ ഇനിപ്പറയുന്നവ ഉള്‍പ്പെടുന്നു:
ഒരു സുരക്ഷാ ചോദ്യം ( ഉദാഹരണത്തിന്, "നിങ്ങളുടെ പ്രിയപ്പെട്ട സുഹൃത്തിന്റെ പേര് എന്തായിരുന്നു?') നിങ്ങളുടെ മുഖം അല്ലെങ്കില്‍ വിരലടയാളം പോലുള്ള ഒരു ബയോമെട്രിക് ഐഡന്റിഫയര്‍.
ഒരു ആധികാരിക ആപ്ലിക്കേഷന്‍ വഴി നിങ്ങള്‍ക്ക് ലഭിക്കുന്ന ഒരു താല്‍ക്കാലിക പാസ്‌കോഡ് അഥവാ OTP. (ഇത് ഗൂഗിള്‍ അല്ലെങ്കില്‍ മൈക്രോസോഫ്ട് authenticator അങ്ങനെ ഏതെങ്കിലും ആപ്ലിക്കേഷന്‍സ് ആവാം ... പക്ഷേ അവ പ്ലേ സ്റ്റോറില്‍ നിന്നോ അഥവാ ആപ്പ് സ്റ്റോറില്‍ നിന്നോ മാത്രമേ ഇന്‍സ്റ്റാള്‍ ചെയ്യാവൂ . വേറെ സൈറ്റുകളില്‍ നിന്നും ഡൗണ്‍ലോഡ് ചെയ്തു ഇന്‍സ്റ്റാള്‍ ചെയ്യുന്നത് സുരക്ഷിതമല്ല)
നിങ്ങള്‍ക്ക് സാധാരണയായി നിങ്ങളുടെ ഏതെങ്കിലും ഒരു അക്കൗണ്ടിലേക്ക് പോയി, സെറ്റിംഗ്‌സില്‍ സെക്യൂരിറ്റിയുടെ കീഴില്‍ മള്‍ട്ടി-ഫാക്ടര്‍ authentication ഓണ്‍ ചെയ്യാന്‍ കഴിയും. അവിടെ നിങ്ങള്‍ക്ക് മള്‍ട്ടി-ഫാക്ടര്‍ authentication "ഓണ്‍' എന്നതിലേക്ക് ടോഗിള്‍ ചെയ്യാം. എവിടെയ്ക്കാണോ നിങ്ങളുടെ സെക്യൂരിറ്റി കോഡ് അയയ്ക്കാന്‍ നിങ്ങള്‍ ആഗ്രഹിക്കുന്നത്, അവിടെ നിങ്ങളുടെ ഫോണ്‍ നമ്പര്‍ അല്ലെങ്കില്‍ ഇമെയില്‍ വിലാസം പോലുള്ള എന്തെങ്കിലും ആവശ്യമായ വിവരങ്ങള്‍ നല്‍കി രജിസ്റ്റര്‍ ചെയ്യാം.
നിങ്ങളുടെ ഫേസ്ബുക് അക്കൗണ്ടില്‍ ഈ സെറ്റിംഗ്‌സ് ചെയ്യാന്‍ ഇവിടെ സന്ദര്‍ശിക്കുക , നിങ്ങളുടെ ജിമെയില്‍ അക്കൗണ്ടില്‍ ഈ സെറ്റിംഗ്‌സ് ചെയ്യാന്‍ ഇവിടെ സന്ദര്‍ശിക്കുക
അടുത്തതായി നിങ്ങള്‍ ഉടനെ ചെയ്യേണ്ട ചില കാര്യങ്ങള്‍. ഒരു അരമണിക്കൂറിനുള്ളില്‍ നിങ്ങളുടെ ഏറ്റവും പ്രധാനപ്പെട്ട അക്കൗണ്ടുകളില്‍ മള്‍ട്ടി-ഫാക്ടര്‍ authentication (MFA) സെറ്റപ്പ് ചെയ്യുക. ഏതൊക്കെയാണ് പ്രധാനപ്പെട്ട അക്കൗണ്ടുകള്‍ എന്നത് നിങ്ങളാണ് തീരുമാനിക്കേണ്ടത്. നിങ്ങളുടെ ബാങ്ക്, ക്രെഡിറ്റ് കാര്‍ഡ്, ഇമെയില്‍, പേയ്‌മെന്റ്, യൂട്ടിലിറ്റികള്‍, ഓണ്‍ലൈന്‍ ഷോപ്പിംഗ്, സോഷ്യല്‍ മീഡിയ അക്കൗണ്ടുകള്‍ എന്നതൊക്കെ ആ ലിസ്റ്റില്‍ വരും. സോഷ്യല്‍ മീഡിയ അക്കൗണ്ടുകള്‍ ഒരു നല്ല തുടക്കസ്ഥലമാണ്, പക്ഷേ കൂടുതല്‍ പ്രധാനമായി, നിങ്ങളുടെ സാമ്പത്തിക വിവരങ്ങളും മറ്റ് വ്യക്തിഗത തിരിച്ചറിയല്‍ വിശദാംശങ്ങളും ( PII - Personally Identifiable Information) സംഭരിക്കുന്ന ഏത് അക്കൗണ്ടിലും നിങ്ങള്‍ മള്‍ട്ടി-ഫാക്ടര്‍ authentication (MFA) ഓണ്‍ ആക്കണം .
ഏതൊക്കെ ഓണ്‍ലൈന്‍ വെബ്‌സൈറ്റുകള്‍ മള്‍ട്ടി-ഫാക്ടര്‍ authentication (MFA) സപ്പോര്‍ട്ട് ചെയ്യുന്നുണ്ട് എന്നതറിയാന്‍ ഓണ്‍ലൈനില്‍ സെര്‍ച്ച് ചെയ്യുക .
2. നല്ല പാസ്‍വേര്‍ഡ് പ്രാക്റ്റീസുകള്‍ പരിശീലിക്കുക :
ഓണ്‍ലൈന്‍ സുരക്ഷയുടെ മറ്റൊരു പ്രധാന ഘടകം പാസ്‍വേര്‍ഡുകള്‍ തന്നെയാണ്. ഇതിനുവേണ്ടി നിങ്ങള്‍ ശക്തമായ പാസ്‍വേര്‍ഡുകളും പാസ്‍വേര്‍ഡ് മാനേജറും ഉപയോഗിക്കുക. നിങ്ങള്‍ക്ക് എളുപ്പത്തില്‍ ഒരു പാസ്‍വേര്‍ഡ് ഓര്‍മ്മിക്കാന്‍ സാധിക്കുന്നുണ്ടെങ്കില്‍, ഒരു ഹാക്കര്‍ക്ക് ഒരു കമ്പ്യൂട്ടര്‍ പ്രോഗ്രാം ഉപയോഗിച്ച് അത് വേഗത്തില്‍ ഊഹിച്ചു കണ്ടെത്താനും നിങ്ങളുടെ ഓണ്‍ലൈന്‍ അക്കൗണ്ടുകളിലേക്കുള്ള അക്‌സസ്സ് ലഭിക്കാനും സാധ്യതയുണ്ട്. പിന്നത്തെ കാര്യം പറയേണ്ടല്ലോ
സ്‌ട്രോങ്ങായ ഒരു പാസ്‍വേര്‍ഡിന് താഴെപ്പറഞ്ഞ ഗുണങ്ങളുള്ളത് അഭികാമ്യമാണ് :
കോംപ്ലക്‌സ് - വലിയ അക്ഷരങ്ങളും ചെറിയ അക്ഷരങ്ങളും അക്കങ്ങളും ചിഹ്നങ്ങളും ഒക്കെ ഉണ്ടാവണം, നീളം - കുറഞ്ഞത് 16 അക്ഷരങ്ങള്‍ എങ്കിലും വേണം . നീണ്ട പാസ്‍വേര്‍ഡുകള്‍ കമ്പ്യൂട്ടര്‍ പ്രോഗ്രാം ഉപയോഗിച്ച് വേഗത്തില്‍ കണ്ടെത്താന്‍ ബുദ്ധിമുട്ടാണ്, ഊഹിക്കാന്‍ പ്രയാസമായിരിക്കണം - പേരുകളും ജന്മദിനങ്ങളും പോലുള്ള യഥാര്‍ഥ വാക്കുകളോ വ്യക്തിഗത വിശദാംശങ്ങളോ പാസ്‍വേര്‍ഡില്‍ ഉണ്ടാവരുത്.
എന്നാല്‍ മുകളില്‍ പറഞ്ഞ സ്‌ട്രോങ്ങായ ഒരു പാസ്‍വേര്‍ഡിന് ഉണ്ടായിരിക്കേണ്ട സവിശേഷതകള്‍ പാസ്‍വേര്‍ഡുകള്‍ ഓര്‍ത്തിരിക്കാന്‍ ബുദ്ധിമുട്ടുണ്ടാക്കുന്നു. അതുകൊണ്ടാണ് നമ്മുടെ പാസ്‍വേര്‍ഡുകളെ സുരക്ഷിതമായി ഓര്‍ത്തിരിക്കാന്‍ പാസ്‍വേര്‍ഡ് മാനേജര്‍മാര്‍ ഒരു നല്ല അപ്ലിക്കേഷന്‍ ആണ്. പാസ്‍വേര്‍ഡ് മാനേജര്‍മാര്‍ സുരക്ഷിതമായ ഒരു ഓണ്‍ലൈന്‍ സ്റ്റോറേജില്‍ അഥവാ വാള്‍ട്ടില്‍ നിങ്ങളുടെ എല്ലാ പാസ്‍വേര്‍ഡുകളും സൂക്ഷിക്കുന്നു, ആവശ്യാനുസരണം നിങ്ങള്‍ക്കായി സ്‌ട്രോങ്ങായ പാസ്‍വേര്‍ഡുകള്‍ സൃഷ്ടിക്കാനും അവയ്ക്കു കഴിയും, കൂടാതെ നിങ്ങളുടെ ക്രെഡിറ്റ് കാര്‍ഡ് നമ്പറുകള്‍ പോലുള്ള മറ്റ് പ്രധാന വിവരങ്ങള്‍ പോലും സുരക്ഷിതമായി സ്റ്റോര്‍ ചെയ്യാനും കഴിയും. നിങ്ങള്‍ ഒരു സൈറ്റിലേക്ക് ലോഗിന്‍ ചെയ്യുമ്പോള്‍ നിങ്ങള്‍ക്കായി നിങ്ങളുടെ പാസ്‍വേര്‍ഡുകള്‍ വേഗത്തിലും എളുപ്പത്തിലും ഓട്ടോ-ഫില്‍ ചെയ്യാനും പാസ്‍വേര്‍ഡ് മാനേജര്‍സിനു കഴിയും.
ഏതൊക്കെ പാസ്‍വേര്‍ഡ് മാനേജര്‍മാരുണ്ടെന്നുള്ള കൂടുതല്‍ വിവരങ്ങള്‍ വായിക്കാനുള്ള ലിങ്ക്
നിങ്ങളുടെ പാസ്‍വേര്‍ഡ് മാനേജര്‍ തിരഞ്ഞെടുക്കുക, ഒരു അക്കൗണ്ടിനായി രജിസ്റ്റര്‍ ചെയ്യുക, ഒരു മാസ്റ്റര്‍ പാസ്‍വേര്‍ഡ് തിരഞ്ഞെടുക്കുക. നിങ്ങളുടെ മാസ്റ്റര്‍ പാസ്‍വേര്‍ഡ് വളരെ ദൈര്‍ഘ്യമേറിയതും ഊഹിക്കാന്‍ വളരെ ബുദ്ധിമുട്ടുള്ളതുമാക്കുക. അത് സുരക്ഷിതമായ ഒരിടത്ത് സൂക്ഷിക്കുന്നുണ്ടെന്ന് ഉറപ്പുവരുത്തുക. ദയവുചെയ്ത് നിങ്ങളുടെ പാസ്‍വേര്‍ഡുകള്‍ ഒരിടത്തും എഴുതി സൂക്ഷിക്കാതിരിക്കുക. നിങ്ങളുടെ മാസ്റ്റര്‍ പാസ്‍വേര്‍ഡ് നിങ്ങളുടെ പാസ്‍വേര്‍ഡ് മാനേജറിലേക്ക് നിങ്ങള്‍ക്ക് ആക്‌സസ് നല്‍കുന്ന പോലെ മറ്റേതൊരാള്‍ക്കും അക്‌സസ്സ് നല്‍കാം എന്നോര്‍മിക്കുക.
3 ) നിങ്ങളുടെ സോഫ്റ്റ്‍വെയര്‍ ഉടനടി അപ്‌ഡേറ്റ് ചെയ്യുക:
നിങ്ങളുടെ സോഫ്റ്റ്‍വെയര്‍ കാലികമായി നിലനിര്‍ത്തുന്നത് ഓണ്‍ലൈനില്‍ സുരക്ഷിതമായി ക്രയവിക്രയം നടത്താന്‍ നിങ്ങള്‍ക്ക് ചെയ്യാന്‍ കഴിയുന്ന ഏറ്റവും എളുപ്പവും പ്രധാനപ്പെട്ടതുമായ കാര്യങ്ങളില്‍ ഒന്നാണ്. സോഫ്റ്റ്‍വെയര്‍ അപ്‌ഡേറ്റുകള്‍ പലപ്പോഴും സോഫ്റ്റ്‍വെയര്‍ ബഗ്ഗുകളോ സെക്യൂരിറ്റി പഴുതുകളോ പരിഹരിക്കുന്നതിനാല്‍ ആക്രമണകാരികള്‍ക്ക് നിങ്ങളുടെ ഡാറ്റയിലേക്ക് ആക്‌സസ് നേടാനും വൈറസ് അല്ലെങ്കില്‍ റാന്‍സംവെയര്‍ ഉപയോഗിച്ച് നിങ്ങളുടെ ഉപകരണത്തെ ഇന്‍ഫെക്ട് ചെയ്യാനും റിമോട്ടായി നിങ്ങളുടെ കമ്പ്യൂട്ടര്‍ നിയന്ത്രിച്ച് ചൂഷണം ചെയ്യാനും കഴിയും.
ഒരു സാധാരണ ഷെഡ്യൂളില്‍ അല്ലെങ്കില്‍ അപ്‌ഡേറ്റ് ലഭ്യമാണെന്ന് നിങ്ങളെ അറിയിക്കുന്ന അലേര്‍ട്ട് ലഭിക്കുമ്പോഴെല്ലാം നിങ്ങളുടെ സോഫ്റ്റ്‍വെയര്‍ അപ്‌ഡേറ്റ് ചെയ്യുന്നുവെന്ന് ഉറപ്പാക്കുക. സോഫ്റ്റ്‍വെയര്‍ അപ്‌ഡേറ്റുകള്‍ പിന്നീട് ചെയ്യാം എന്നു വിചാരിച്ചു മാറ്റിവയ്ക്കുന്നതിനു പകരം ഉടന്‍ തന്നെ ചെയ്യുന്ന ശീലം പ്രാവര്‍ത്തികമാക്കുക. പരിരക്ഷയുടെ ഒരു എക്‌സ്ട്രാ ലെയര്‍ ആയി നല്ല ക്വാളിറ്റിയുള്ള ഒരു സുരക്ഷാ സോഫ്റ്റ്‍വെയര്‍ ഇന്‍സ്റ്റാള്‍ ചെയ്തു ഉപയോഗിക്കുന്നതും നല്ല ശീലമാണ്. സൗകര്യത്തിനും വേഗതയ്ക്കും, ഓട്ടോമാറ്റിക് സോഫ്റ്റ്‍വെയര്‍ അപ്‌ഡേറ്റുകള്‍ ഓണാക്കുക. സോഫ്റ്റ്‍വെയര്‍ മാനുവലായി അപ്‌ഡേറ്റ് ചെയ്യാന്‍ നിങ്ങള്‍ ആഗ്രഹിക്കുന്നുവെങ്കില്‍, മാസത്തിലൊരിക്കല്‍ അപ്‌ഡേറ്റുകള്‍ക്കായി പരിശോധിക്കാന്‍ നിങ്ങളെ ഓര്‍മ്മിപ്പിക്കുന്നതിന് ഒരു അലെര്‍ട്ട് സെറ്റ് ചെയ്യുക .
4 ) ഫിഷിങ് തട്ടിപ്പുകള്‍ തിരിച്ചറിയുക
ഫിഷിംഗ് തട്ടിപ്പുകള്‍ തിരിച്ചറിയാനും റിപ്പോര്‍ട്ട് ചെയ്യാനും പഠിക്കുന്നത് ഓണ്‍ലൈനില്‍ സുരക്ഷിതമായി ഇരിക്കുന്നതിന് നിങ്ങള്‍ക്ക് എടുക്കാന്‍ കഴിയുന്ന ഒരു മികച്ച നടപടിയാണ്. ഭാഗ്യവശാല്‍, ഇത് ചെയ്യാന്‍ വളരെ എളുപ്പമാണ്, മാത്രമല്ല അധികം സമയമെടുക്കില്ല താനും .
എന്താണ് ഫിഷിംഗ് തട്ടിപ്പ്? തട്ടിപ്പിനായി ഉണ്ടാക്കിയിട്ടുള്ള ഏതെങ്കിലും ഒരു ലിങ്ക് ക്ലിക്കുചെയ്യാന്‍ പ്രേരിപ്പിക്കല്‍ , വ്യക്തിഗത വിവരങ്ങള്‍ നല്‍കാന്‍ പ്രേരിപ്പിക്കല്‍, അല്ലെങ്കില്‍ പേയ്‌മെന്റ് നടത്താന്‍ പ്രേരിപ്പിക്കല്‍ തുടങ്ങിയ ഏതെങ്കിലും ഒരു ഫ്രോഡ് നടപടി എടുക്കുന്നതില്‍ നിങ്ങളെ കബളിപ്പിക്കാന്‍ ശ്രമിക്കുന്നതിനായി സൈബര്‍ തട്ടിപ്പുകാര്‍ നിങ്ങള്‍ക്ക് ഒരു വ്യാജ ഇമെയില്‍, നേരിട്ടുള്ള സന്ദേശം, ടെക്സ്റ്റ് അല്ലെങ്കില്‍ ഒരു പോപ്പ്-അപ്പ് പരസ്യം ഒക്കെ അയയ്ക്കുമ്പോഴാണ് ഫിഷിങ് സംഭവിക്കുന്നത്. ഉദാഹരണത്തിന്, നിങ്ങളുടെ ബാങ്ക് പോലുള്ള പരിചിതമായ കമ്പനിയില്‍ നിന്നുള്ള ഒരു യഥാര്‍ഥ ഇമെയില്‍ പോലെയായിരിക്കും ഇമ്മാതിരി ഫിഷിങ് ഇമെയിലുകള്‍. ഒറ്റ നോട്ടത്തില്‍ കണ്ടാല്‍ ബാങ്കില്‍ നിന്നും അയച്ചിരിക്കുന്നു എന്ന് തോന്നാമെങ്കിലും സൂക്ഷിക്കേണ്ടതാണ് .
ഫിഷിംഗ് ഇ മെയിലുകള്‍ അയയ്ക്കുന്ന കാര്യത്തില്‍ തട്ടിപ്പുകാര്‍ കൂടുതല്‍ സങ്കീര്‍ണ്ണരായി തീര്‍ന്നിട്ടുണ്ട് എന്ന് നിസ്സംശയം പറയാം. എന്നാലും നിങ്ങള്‍ക്ക് കണ്ടുപിടിക്കാന്‍ കഴിയുന്ന ചില അടയാളങ്ങള്‍ ഇപ്പോഴും ഉണ്ട്. പല ഓഫറുകളും കണ്ടാല്‍ "ഇതിലും മികച്ച ഓഫര്‍ സ്വപ്നങ്ങളില്‍ മാത്രം ' എന്ന പോലെ തോന്നാം. അപ്പോള്‍ ഉറപ്പിച്ചോളൂ അമ്മാതിരി ഓഫറുകള്‍ സ്വപ്നങ്ങളിലേ കാണൂ എന്ന്. വിശ്വസിക്കാതിരിക്കുക. അത്രന്നെ. വിലക്കുറവുള്ള സ്മാര്‍ട്ട്‌ഫോണുകള്‍ അല്ലെങ്കില്‍ അന്തരാഷ്ട്ര വെക്കേഷന് ട്രിപ്പുകള്‍ പോലുള്ള കാര്യങ്ങള്‍ക്ക് അവിശ്വസനീയമാംവിധം വിലകുറഞ്ഞ ഓഫറുകളായി തോന്നുന്നവയുമായി ഫിഷിംഗ് ഇമെയിലുകള്‍ നിങ്ങളെ ആകര്‍ഷിക്കാന്‍ ശ്രമിച്ചേക്കാം. ഓഫറുകള്‍ ഒഴിവാക്കാനാവാത്തതായി തോന്നാം. അവ ഫിഷിംഗ് ഇമെയിലുകള്‍ ആയിരിക്കാം. ഇമ്മാതിരി തട്ടിപ്പുകള്‍ക്ക് ഇപ്പോഴും പലരും ഇരകളാകാറുണ്ട് എന്നതാണ് അവസ്ഥ.
അക്ഷരത്തെറ്റുകളും വ്യാകരണപിശകുകളും നിങ്ങള്‍ക്കു ലഭിക്കുന്ന ഈമെയിലില്‍ ഉണ്ടെങ്കില്‍ അതും ഒരു സൂചനയാണ് ഫിഷിങ്ങിന്റെ . ഫിഷിംഗ് ഇമെയിലുകള്‍ നിങ്ങളെ പ്രത്യേകമായി അഭിസംബോധന ചെയ്‌തേക്കില്ല. പകരം, "പ്രിയ സര്‍ അല്ലെങ്കില്‍ മാഡം' അല്ലെങ്കില്‍ "ഡിയര്‍ അക്കൗണ്ട് ഹോള്‍ഡര്‍' പോലുള്ള ഒരു പൊതുവായ അഭിവാദ്യത്തോടെ ഇമെയില്‍ ആരംഭിക്കാം. ഇതും ഒരു സൂചനയാണ് . നിങ്ങളുടെ ബാങ്കുകള്‍ ഒരിക്കലും നിങ്ങളോട് ആധാര്‍ പോലെയുള്ള കാര്യങ്ങള്‍ ഇമെയിലിലൂടെ ചോദിക്കില്ല എന്ന് ബാങ്കുകള്‍ തന്നെ കസ്റ്റമേഴ്‌സിനെ സ്ഥിരമായി അറിയിക്കാറുണ്ട് . അപ്പോള്‍ അങ്ങനത്തെ ഫിഷിങ് ഇമെയിലുകള്‍ കിട്ടിയാല്‍ ബാങ്കിന്റെ ഫ്രോഡ് റിപ്പോര്‍ട്ടിങ് സെന്ററില്‍ ബന്ധപ്പെടേണ്ടതാണ് . അതുപോലെ നിങ്ങളുടെ അക്കൗണ്ടുകള്‍ ഉടനെ ക്ലോസ് ചെയ്യും അതുകൊണ്ടു ഉടനെതന്നെ നിങ്ങള്‍ക്കു ലഭിച്ച ഇമെയിലില്‍ ഉള്ള ലിങ്കില്‍ ക്ലിക്കി വിവരങ്ങള്‍ അപ്‌ഡേറ്റ് ചെയ്യുവാന്‍ പറഞ്ഞാലും പരിഭ്രമിച്ചു ഉടന്‍ ലിങ്കില്‍ ക്ലിക്കരുത്. പകരം ബാങ്കിനെ അറിയിക്കുക. അജ്ഞാതമായ ഒരു ഹൈപ്പര്‍ലിങ്കില്‍ ക്ലിക്കുചെയ്യാന്‍ അഭ്യര്‍ഥിക്കുന്ന ഒരു ഇമെയില്‍ നിങ്ങള്‍ക്ക് ലഭിക്കുകയാണെങ്കില്‍, ഓപ്ഷനു മുകളിലൂടെ ഹോവര്‍ ചെയ്താല്‍ (ക്ലിക്കരുത് ...) ലിങ്ക് നിങ്ങളെ ശരിക്കും ഒരു വ്യാജ, അക്ഷരത്തെറ്റുള്ള ഡൊമെയ്‌നിലേക്ക് കൊണ്ടുപോകുന്നുവെന്ന് കാണിച്ചേക്കാം. ഈ ലിങ്ക് ശരിക്കുള്ള ലിങ്കായി കാണപ്പെടാന്‍ വേണ്ടി തട്ടിപ്പില്‍ സൃഷ്ടിച്ചതായിരിക്കും ... പക്ഷേ ഇതും ഫിഷിങ് ടെക്നിക്കുകളുടെ ഒരു ഭാഗമാണ് എന്ന് മനസ്സിലാക്കുക.
സൈബര്‍ സുരക്ഷാ എന്നത് ഏതെങ്കിലും ഒരു മാസത്തില്‍ മാത്രം ആചരിക്കേണ്ട ഒന്നല്ല. അവ എല്ലാ ദിവസവും ശ്രദ്ധിച്ചു മനസ്സിലാക്കി നമ്മളെക്കൊണ്ടാവുന്നതുപോലെ പ്രാവര്‍ത്തികമാക്കേണ്ടവയാണ് എന്നതാണ് ഏറ്റവും പ്രധാനം .
വിമല്‍ സാര്‍ പ്രേമത്തില്‍ ജാവയെക്കുറിച്ചു പഠിപ്പിക്കുന്നതുപോലെയാണ് സൈബര്‍സുരക്ഷയും സോ സിമ്പിള്‍, ബട്ട് പവര്‍ഫുള്‍.
അപ്പോള്‍ എല്ലാവര്‍ക്കും മനസ്സിലായല്ലോ, ഇല്ലെങ്കില്‍ ചോദിക്കാന്‍ മടിക്കരുത് വിമല്‍ സാറിനോടല്ല, എന്നോട്. അപ്പൊ അടുത്ത തവണ കാണാം .
രാംദാസ് കടവല്ലൂര്
Mar 16, 2023
5 minute read
രാംനാഥ് വി.ആർ.
Mar 14, 2023
10 Minutes Read
Truecopy Webzine
Mar 13, 2023
2 minutes Read
Truecopy Webzine
Mar 08, 2023
3 Minutes Read
സംഗമേശ്വരന്‍ മാണിക്യം
Feb 14, 2023
6 Minutes Read
ജേക്കബ് ജോഷി
Feb 06, 2023
8 Minutes Read
സംഗമേശ്വരന്‍ മാണിക്യം
Jan 13, 2023
10 Minutes Read
