കഴിഞ്ഞ ദിവസം ഭാരതപ്പുഴയ്ക്കു കുറുകെയുള്ള റെയിൽവേ ട്രാക്ക് വൃത്തിയാക്കുന്നതിനിടെ ദമ്പതികളടക്കം മൂന്ന് ശുചീകരണ തൊഴിലാളികൾ ട്രെയിൻ തട്ടി മരിച്ചു. പുഴയിലേക്കു തെറിച്ചുവീണ നാലാമത്തെയാളെ ഇതുവരെയും കണ്ടെത്താനായിട്ടില്ല. കേന്ദ്രമന്ത്രി അശ്വിനി വൈഷ്ണവിന്റെ സന്ദർശനത്തിനു മുന്നോടിയായി റെയിൽവേയിൽ മാലിന്യം നീക്കുന്ന ജോലിയുണ്ടെന്ന് പരിചയക്കാരനായ ചെലമ്പരശ്ശൻ വിളിച്ചറിയിച്ചതിനെ തുടർന്നാണ് സേലം സ്വദേശികളായ തൊഴിലാളികൾ ഷൊർണൂരിലേക്ക് തിരിച്ചത്. ട്രാക്ക് ശുചീകരിക്കാൻ കരാറെടുത്തയാൾ ഒരു ദിവസത്തേക്കായി എത്തിച്ച കരാർ തൊഴിലാളികളായിരുന്നു ഇവർ. ഇന്ത്യൻ റെയിൽവേയുടെ ട്രാക്കിൽ ജീവൻപണയംവെച്ച് ജോലി ചെയ്യുന്ന തൊഴിലാളികളുടെ മരണം തുടർക്കഥയായിട്ട് വർഷങ്ങളായി. അതിന്റെ ഏറ്റവും ഒടുവിലത്തെ ഉദാഹരണമാണ് ഷൊർണൂർ പാലത്തിൽ കഴിഞ്ഞ ദിവസം സംഭവിച്ചത്. തൊഴിലാളികളെ നിരന്തരം മരണത്തിലേക്ക് തള്ളി വിടുന്ന ഇന്ത്യൻ റയിൽവെയെ പ്രതികൂട്ടിൽ നിർത്തുന്നതാണ് ഈ അപകടം.
2017 2018 കാലയളവിൽ മാത്രമായി 103 റെയിൽവേ ജീവനക്കാരാണ് തീവണ്ടി അപകടങ്ങളിൽ മരണപ്പെട്ടിട്ടുള്ളതെന്ന്, 2021 ഡിസംബറിൽ അന്നത്തെ റെയിൽവേ മന്ത്രി അശ്വനി വൈഷ്ണവ് രാജ്യസഭയിൽ സമർപ്പിച്ച കണക്കുകൾ വ്യക്തമാക്കിയിരുന്നു. 2012 മുതൽ 2016 വരെയുള്ള കാലത്തിനിടയിൽ ഓരോ വർഷവും, ട്രാക്ക് മെയിന്റനൻസ് ജോലി ചെയ്യുന്ന ശരാശരി 600 തൊഴിലാളികൾ ജോലിക്കിടെ മരിച്ചിട്ടുണ്ടെന്നാണ് കണക്ക്. 2017- 2019 കാലയളവിൽ ഓരോ വർഷവും ശരാശരി 1000 മരണമെന്ന നിലയിൽ അതുയർന്നിരുന്നു. ട്രാക്കുകളിൽ ജോലിചെയ്യുന്ന ഇന്ത്യൻ റെയിൽവേ തൊഴിലാളികളിൽ പ്രതിദിനം മൂന്ന് പേരെങ്കിലും മരണപ്പെടുന്നുണ്ടെന്നാണ് കണക്ക്.
ട്രാക്കിന്റെയും തൊഴിലാളികളുടെയും സുരക്ഷക്കാണ് ഇന്ത്യൻ റെയിൽവേ മുൻഗണന നൽകുന്നതെന്നും ട്രാക്ക് മെയിന്റനസ് പ്രവർത്തനങ്ങൾ നടത്തുമ്പോൾ ട്രാക്ക് മെയിന്റനർമാരുടെ സുരക്ഷക്കായി വിവിധ സുരക്ഷാ നടപടികൾ സ്വീകരിച്ചിട്ടുണ്ടെന്നും വകുപ്പ് ചുമതലയുണ്ടായിരുന്ന മന്ത്രി അശ്വനി വൈഷ്ണവ് നേരത്തെ പാർലമെന്റിൽ വ്യക്തമാക്കിയിരുന്നു. അതേ മന്ത്രിയ്ക്ക് വഴിയൊരുക്കുന്നതിനിടെയാണ് ട്രാക്കിൽ തൊഴിലാളികളുടെ ജീവൻ ഛേദിച്ചത്.
ഒറ്റപ്പാലത്തു വാടകയ്ക്കു താമസിക്കുന്ന സേലം അയോധ്യാപട്ടണം അടിമലൈപുത്തൂർ സ്വദേശികളായ ലക്ഷ്മണൻ (60), പങ്കാളി വള്ളി (55), വള്ളിയുടെ ബന്ധു റാണി (45) എന്നിവരാണു മരിച്ചത്. റാണിയുടെ പങ്കാളി ലക്ഷ്മണൻ (48) ആണു പുഴയിലേക്കു വീണത്.
ഇന്നലെ ഉച്ചയ്ക്കു 3.05നു പാലക്കാട് – തൃശൂർ ലൈനിലെ ഷൊർണൂർ പാലത്തിൽ തിരുവനന്തപുരത്തേക്കുള്ള കേരള എക്സ്പ്രസ് തട്ടിയാണു ദുരന്തം. അപകടത്തെ മുഖാമുഖം കണ്ടപ്പോഴും രക്ഷപെടാൻ തൊഴിലാളികൾക്ക് മുന്നിൽ സാധ്യതകളൊന്നും തന്നെയുണ്ടായിരുന്നില്ല. പാലത്തിൽ നിന്നും ഓടി കരഭാഗത്തെ ട്രാക്കിലേക്കോ ക്യാബിനിലേക്കോ കയറാൻ സമയം ലഭിക്കാതിരുന്ന തൊഴിലാളികളാണ് മരണപ്പെട്ടത്. തൃശൂർ റെയിൽ പാതയിലെ പാലത്തിൽ പരമാവധി വേഗം മണിക്കൂറിൽ 70 കിലോമീറ്ററാണ്. അപകടം നടക്കുമ്പോൾ ഇന്നലെ കേരളാ എക്സ്പ്രസ് ട്രെയിൻ ഇതേ വേഗത്തിലായിരുന്നുവെന്നാണ് വിവരം. റെയിൽവേ പാലത്തിന് മുമ്പ് മന്നനൂർ സ്റ്റേഷൻ പിന്നിട്ടാൽ 90 ആണ് ഡൗൺ ലൈനിലെ പരമാവധി വേഗം. പാലത്തോടടുക്കുമ്പോൾ അനുവദനീയമായ 70 കിലോമീറ്റർ വേഗം വള്ളത്തോൾ നഗർ വരെ തുടരുന്നതാണ് നിലവിലെ സംവിധാനം.
ജീവനക്കാരുടെ സുരക്ഷക്കുവേണ്ടി റെയിൽവേ ശരിക്കും ഒന്നും ചെയ്യുന്നില്ലെന്നും ആവശ്യമായ യാതൊരു സുരക്ഷാ സൗകര്യവും റെയിൽവേ നടപ്പിലാക്കുന്നില്ലെന്നും ദക്ഷിണ റെയിൽവെ എംപ്ലോയേഴ്‌സ് യൂണിയൻ പാലക്കാട് ഡിവിഷൻ സെക്രട്ടറി മാത്യു സിറിയക് ട്രൂകോപ്പി തിങ്കിനോട് പറഞ്ഞു.
“ജീവനക്കാരെ വെട്ടിക്കുറച്ച് നിലവിൽ എല്ലാ മേഖലയിലും കരാർ ജീവനക്കാരെയാണ് റെയിൽവേ നിയമിക്കുന്നത്. റെയിൽവേയുടെ കൂടുതൽ ഭാഗങ്ങൾ വൃത്തിയാക്കേണ്ടി വരുമ്പോൾ സ്വാഭാവികമായി തൊഴിലാളികളുടെ എണ്ണം കൂട്ടുകയാണ് വേണ്ടത്. എന്നാൽ ഇവിടെ അങ്ങനെയല്ല നടക്കുന്നത്. പാലക്കാട്, കോഴിക്കോട്, ഷൊർണൂർ മംഗലാപുരം ഇതൊക്കെയാണ് നമ്മുടെ ഡിവിഷനിലെ പ്രധാന സ്റ്റേഷനുകൾ. ഇവിടങ്ങളിലെല്ലാം ജീവനക്കാരുടെ എണ്ണം കുറക്കുകയാണ് ചെയ്തത്. സ്ഥിരം തൊഴിലാളികളാണെങ്കിൽ റെയിൽവേ പാതയുടെ ജോഗ്രെഫിയൊക്കെ ഇവർക്ക് അറിയാൻ കഴിയും. എന്നാൽ പെട്ടന്നൊരു ദിവസം പുറത്ത് നിന്നൊരു തൊഴിലാളി ജോലിക്ക് കയറുമ്പോൾ വണ്ടി എപ്പോഴാണ് വരുന്നത്, വണ്ടി വരുമ്പോൾ എങ്ങോട്ട് കയറി നിൽക്കണം തുടങ്ങിയ കാര്യങ്ങളൊന്നും അവർക്ക് അറിയില്ലല്ലോ? അപകടം നടന്ന പാലത്തിലാണെങ്കിൽ അതിനുള്ള സംവിധാനവുമില്ല. ജീവനക്കാരുടെ സുരക്ഷക്കുവേണ്ടി റെയിൽവേ ശരിക്കും ഒന്നും ചെയ്യുന്നില്ല. സെമിനാറുകൾ നടത്തുന്നു എന്നല്ലാതെ പ്രാഥമികമായ ഉത്തരവാദിത്തങ്ങളൊന്നും നിറവേറ്റുന്നില്ല. രക്ഷക് പോലെയുള്ള സംവിധാനങ്ങൾ ഇപ്പോഴും കൊടുത്ത് തുടങ്ങിയിട്ടില്ല. വണ്ടികൾ തമ്മിലുള്ള അപകടങ്ങൾ കുറക്കാൻ കൊണ്ടുവന്ന കവച് എന്ന സംവിധാനവും ഇതുവരെയും നടപ്പിൽ വരുത്തിയിട്ടില്ല. ഇത്തരത്തിൽ പ്രധാനപ്പെട്ട ആവശ്യങ്ങൾ നടപ്പിലാക്കാൻ സർക്കാറിന്റെ കൈവശം ഫണ്ടില്ല. ബാക്കി കാര്യങ്ങൾക്കൊക്കെ ഫണ്ട് ഉണ്ട്. കരാർ ജീവനക്കാർക്ക് അപകടങ്ങൽ സംഭവിച്ചാൽ അനുകൂല്യങ്ങളന്നും ലഭ്യമാകുന്നില്ല. സർക്കാർ എന്തെങ്കിലും ധനസഹായം പ്രഖ്യാപിച്ചാൽ അത് മാത്രമായിരിക്കും ലഭിക്കുക. ഇവിടുത്തെ മരണത്തിൽ 1 ലക്ഷം രൂപ സർക്കാർ പ്രഖ്യാപിച്ചിട്ടുണ്ട്. ദാരുണമായൊരു സംഭവമാണ് നടന്നിരിക്കുന്നത്. ഇവരുടെ ആശ്രിതർക്ക് ജോലി നൽകുമോ പോലെയുള്ള ചോദ്യങ്ങൾ ഇവിടെ നിലനിൽക്കുന്നുണ്ട്. സ്ഥിരം ജീവനക്കാരുടെ കാര്യത്തിൽ തന്നെ പലപല കാരണങ്ങൾ കാണിച്ച് ആശ്രിതർക്ക് ജോലി നൽകാതിരിക്കാനാണ് റെയിൻവേ ശ്രമിക്കുന്നത്. പിന്നെ എങ്ങനെയാണ് കരാർ തൊഴിലാളികൾക്ക് നീതി കിട്ടുന്നത്. കരാറുടമകൾ ഇടക്കിടെ മാറുമ്പോൾ, അവർക്ക് ഇഷ്ടപ്പെട്ടവരെ ജോലി ചെയ്യാൻ വിളിക്കുകയാണ് ചെയ്യുന്നത്. യൂണിയനുകൾ ഇടപെട്ടാണ് ഈ പ്രശ്‌നങ്ങളൊക്കെ ഒരുപരിധി വരെ പരിഹരിച്ച് പോവുന്നത്.”
പാലക്കാട് ഭാഗത്തുനിന്ന് വരുന്ന ട്രെയിനുകൾ ഭാരതപ്പുഴക്ക് കുറുകയുള്ള പാലത്തിലേക്ക് കയറുന്ന കരഭാഗത്തെ വളവും അപകടത്തിന് കാരണമായിട്ടുണ്ടെന്നാണ് തൊഴിലാളി സംഘടനകൾ ഉന്നയിക്കുന്ന പ്രധാന ആരോപണം. തൊഴിലാളികൾ വള്ളത്തോൾ നഗർ സ്റ്റേഷൻ പരിസരത്ത് നിന്നും മാലിന്യം ശേഖരിച്ച് വരുന്ന വഴിക്കാണ് അപ്രതീക്ഷിതമായി അപകടം സംഭവിക്കുന്നത്. റെയിൽവേയുടെ ചുവന്ന സിഗ്നൽ പെട്ടെന്ന് പച്ചയായത് ഇതിനിടയിൽ ഇവർ ശ്രദ്ധിച്ചിരുന്നില്ല. അപകടസമയത്ത ചെറിയതോതിൽ മഴയുമുണ്ടായിരുന്നു. മരണപ്പെട്ടവർ കരാർ ജീവനക്കാരായതുകൊണ്ട് തന്നെ, കരാറുകാരനെതിരെ ക്രിമിനൽ കേസ് രജിസ്റ്റർ ചെയ്യാനുള്ള നടപടികൾ സ്വീകരിച്ചതായും കരാർ റദ്ദാക്കുന്നതായും റെയിൽവേ അറിയിച്ചു.
മരിച്ചവരുടെ കുടുംബത്തിന് ഒരു ലക്ഷം രൂപ നഷ്ടപരിഹാരവും റെയിൽവേ പ്രഖ്യാപിച്ചിട്ടുണ്ട്. അപകടത്തിൽ റെയിൽവേ അന്വേഷണവും ആരംഭിച്ചിട്ടുണ്ട്. ആർ.പി.എഫിന്റെ നേതൃത്വത്തിലാണ് അന്വേഷണം. ട്രാക്കിൽ നിന്നും മാലിന്യം നീക്കാനുള്ള പരിശീലനമുൾപ്പെടെ കരാർ വ്യവസ്ഥകൾ പ്രകാരമുള്ള സുരക്ഷാക്രമീകരണം കരാറുടമ പാലിച്ചിട്ടുണ്ടോ എന്നാണ് അന്വേഷിക്കുന്നത്.
വള്ളിയും റാണിയും അവരുടെ പങ്കാളി ലക്ഷ്മണനും ഒറ്റപ്പാലത്തിന് സമീപം സ്ഥിരമായി കൂലിപ്പണിക്ക് വരുന്നവരാണ്. ആരോഗ്യപരമായ പ്രശ്‌നങ്ങളുള്ളതുകൊണ്ട് റാണി വല്ലപ്പോഴും മാത്രമായിരുന്നു ജോലിക്ക് പോയിരുന്നത്. ശാരീരികമായ പ്രശ്‌നങ്ങളുള്ളതിനാൽ വള്ളിയുടെ പങ്കാളി ലക്ഷ്മണനും വല്ലപ്പോഴും മാത്രമായിരുന്നു ജോലിക്ക് പോയിരുന്നത്. അധ്വാനം കുറഞ്ഞ ജോലിയായിരിക്കുമെന്ന് പ്രതീക്ഷിച്ചാണ് ദമ്പദിമാർ ഇന്നലെ ഷൊർണൂരിലേക്ക് പോയത്. കഴിഞ്ഞ മൂന്ന് വർഷമായി ഒറ്റപ്പാലത്തെ ഒരു വാടകവീട്ടിലായിരുന്നു റാണിയും ലക്ഷ്മണനും താമസിച്ചിരുന്നത്. രണ്ട് മാസം മുമ്പാണ് വള്ളിയും ഇവരുടെ പങ്കാളി ലക്ഷ്മണനും അവിടേക്ക് താമസത്തിനായി എത്തുന്നത്. ആ ചെറിയ വീടിന്റെ രണ്ട് ഭാഗങ്ങളിലായാണ് ദമ്പദിമാർ താമസിച്ചിരുന്നത്.
വർഷം തോറും ട്രാക്കുകളിൽ ജോലി ചെയ്യുന്ന തൊഴിലാളികൾ മരണത്തിന് കീഴടങ്ങേണ്ടി വരുന്നുണ്ടെന്നാണ് കണക്കുകൾ സൂചിപ്പിക്കുന്നത്. ട്രാക്മെൻ/വുമെൻ, കീമെൻ/വുമെൻ (Keymen And women) തുങ്ങിയ ജോലികൾ ചെയ്യുന്നവരുടെ കാര്യവും വളരെ അപകടത്തിലാണ്. 2023-ൽ പാർലമെന്റിൽ അവതരിപ്പിച്ച കണക്കുകൾ പ്രകാരം 2019- 2020 നവംബർ വരെയുള്ള കാലത്ത് ട്രാക്മെൻ/വുമെൻ, കീമെൻ/വുമെൻ എന്നിവരുൾപ്പെടുന്ന ഇന്ത്യൻ റെയിൽവേ ജീവനക്കാരിൽ 361 പേർ മരിച്ചുവെന്നാണ് ഔദ്യോഗിക കണക്ക്. സെൻട്രൽ റെയിൽവേയിൽ 44 മരണങ്ങൾ, നോർത്ത് റെയിൽവേയിൽ 40, നോർത്ത് സെൻട്രൽ റെയിൽവേയിൽ 31, ഈസ്റ്റ് സെൻട്രൽ റെയിൽവയിൽ 30, മറ്റ് സോണുകളിലായി 24 എന്നിങ്ങനെയാണ് മരണം സംഭവിച്ചവരുടെ കണക്ക്. എന്നാൽ ഈ കണക്കുകൾ കൃത്യമല്ലെന്നും ഇതിൽ കൂടുതൽ മരണങ്ങൾ സംഭവിക്കുന്നുണ്ടെന്നും റിപ്പോർട്ടുകളുണ്ട്.
Read: പ്രതിദിനം ശരാശരി 3 മരണം; അപകടത്തെ മുന്നിൽ കാണുന്ന റെയിൽവേ ട്രാക്കിലെ തൊഴിലാളികൾ