അമേരിക്ക മാറുകയാണോ?
ജനാധിപത്യ സോഷ്യലിസത്തിന്റെ
പുതിയ മുന്നേറ്റം

അമേരിക്കൻ രാഷ്ട്രീയത്തിൽ ഡോണൾഡ് ട്രംപിന്റെ നേതൃത്വത്തിലുള്ള റിപ്പബ്ലിക്കൻ ശക്തികൾക്ക് കനത്ത തിരിച്ചടി നൽകി, 2026 നവംബർ 3-ലെ ഇടക്കാല തെരഞ്ഞെടുപ്പിൽ ഡെമോക്രാറ്റിക് പാർട്ടി ശ്രദ്ധേയമായ മുന്നേറ്റം നടത്തിയിരിക്കുന്നു. കോൺഗ്രസിന്റെ ഇരുസഭകളിലും ഭൂരിപക്ഷം തിരിച്ചുപിടിക്കാൻ ഡെമോക്രാറ്റുകൾക്ക് കഴിഞ്ഞതോടെ, ട്രംപ് ഭരണത്തിന്റെ അവസാന രണ്ടു വർഷങ്ങൾ അമേരിക്കൻ രാഷ്ട്രീയത്തിൽ പുതിയ സംഘർഷങ്ങളുടെയും രാഷ്ട്രീയ പുനഃക്രമീകരണങ്ങളുടെയും കാലമായി മാറുകയാണ്.

ജീവിതച്ചെലവിലെ വർധന, സാമ്പത്തിക അനിശ്ചിതത്വം, ഭരണത്തിന്റെ രാഷ്ട്രീയ സമീപനങ്ങളോടുള്ള പ്രതിഷേധം, ജനാധിപത്യ സ്ഥാപനങ്ങളുടെ ഭാവിയെക്കുറിച്ചുള്ള ആശങ്കകൾ എന്നിവ ഈ മുന്നേറ്റത്തിന് പശ്ചാത്തലമൊരുക്കി. എന്നാൽ ഈ തെരഞ്ഞെടുപ്പിനെ പതിവ് വിജയ–പരാജയ വിശകലനങ്ങളിൽ ഒതുക്കാനാവില്ല. അമേരിക്കൻ രാഷ്ട്രീയത്തിൽ രണ്ടു പ്രധാന പ്രവണതകൾ ഒരേസമയം പ്രകടമാകുന്നുണ്ട് ഡെമോക്രാറ്റിക്: പാർട്ടിയുടെ പരമ്പരാഗത രാഷ്ട്രീയത്തിന് കൂടുതൽ പുരോഗമനപരമായ ദിശ നൽകാൻ ശ്രമിക്കുന്ന ജനാധിപത്യ സോഷ്യലിസ്റ്റ് പ്രസ്ഥാനങ്ങളുടെ വളർച്ചയും പാർട്ടിയുടെ വിശാലമായ ജനാധിപത്യ മുന്നണിയെ ശക്തിപ്പെടുത്തുന്നതിൽ ബറാക് ഒബാമയുടെ നിർണായകമായ ഇടപെടലും.

ജനാധിപത്യ സോഷ്യലിസത്തിന്റെ വളർച്ച:
DSA-യുടെ രാഷ്ട്രീയ മുന്നേറ്റം

ഈ തെരഞ്ഞെടുപ്പിലെ മറ്റൊരു ശ്രദ്ധേയമായ പ്രവണത അമേരിക്കയിലെ ജനാധിപത്യ സോഷ്യലിസ്റ്റ് ആശയങ്ങൾക്ക് ലഭിച്ച വർധിച്ച സ്വീകാര്യതയാണ്. Democratic Socialists of America (DSA) എന്ന സംഘടനയുടെ രാഷ്ട്രീയ മുന്നേറ്റം ഈ മാറ്റത്തിന്റെ പ്രധാന സൂചനയാണ്. 1982-ൽ സ്ഥാപിതമായ DSA, ബെർണി സാൻഡേഴ്സിന്റെ 2016-ലെ പ്രസിഡന്റ് സ്ഥാനാർഥിത്വത്തിനുശേഷം അംഗസംഖ്യയിലും രാഷ്ട്രീയ സ്വാധീനത്തിലും വലിയ വളർച്ച നേടി. 2025-ൽ സോഹ്റാൻ മംദാനി ന്യൂയോർക്ക് നഗരത്തിന്റെ മേയറായി തിരഞ്ഞെടുക്കപ്പെട്ടത് സംഘടനയുടെ ദേശീയ ശ്രദ്ധ വർധിപ്പിച്ചു.

DSA പരമ്പരാഗത അർഥത്തിലുള്ള ഒരു തിരഞ്ഞെടുപ്പ് പാർട്ടി മാത്രമല്ല. തൊഴിലാളി പ്രസ്ഥാനങ്ങൾ, സാമൂഹിക നീതി പോരാട്ടങ്ങൾ, ഭവനാവകാശ പ്രസ്ഥാനങ്ങൾ, ആരോഗ്യപരിരക്ഷാ പ്രചാരണങ്ങൾ എന്നിവയുമായി ബന്ധപ്പെട്ടു പ്രവർത്തിക്കുന്ന രാഷ്ട്രീയ സംഘടന കൂടിയാണ്. സാർവത്രിക ആരോഗ്യപരിരക്ഷ, എല്ലാവർക്കും താങ്ങാനാവുന്ന ഭവനം, വിദ്യാഭ്യാസച്ചെലവിന്റെ കുറവ്, തൊഴിലാളികളുടെ അവകാശങ്ങൾ, സമ്പന്നരുടെ മേൽ ഉയർന്ന നികുതി, കോർപ്പറേറ്റ് മൂലധനത്തിന്റെ രാഷ്ട്രീയ സ്വാധീനത്തിനെതിരായ പോരാട്ടം എന്നിവയാണ് അതിന്റെ പ്രധാന ആവശ്യങ്ങൾ. അമേരിക്കയിലെ നിലവിലുള്ള മുതലാളിത്ത വ്യവസ്ഥയ്ക്കുള്ളിൽ സാമൂഹിക ജനാധിപത്യ പരിഷ്കാരങ്ങൾ നടപ്പാക്കുന്നതിൽനിന്ന് കൂടുതൽ ആഴത്തിലുള്ള സോഷ്യലിസ്റ്റ് പരിവർത്തനത്തിലേക്കുള്ള ചർച്ചകളും DSA-യിൽ നടക്കുന്നുണ്ട്.

ബെർണി സാൻഡേഴ്സ്:
ആശയപരമായ അടിത്തറ

2016-ലെയും 2020-ലെയും പ്രസിഡന്റ് തിരഞ്ഞെടുപ്പുകളിൽ ഡെമോക്രാറ്റിക് സ്ഥാനാർഥിത്വത്തിനായി മത്സരിച്ച ബെർണി സാൻഡേഴ്സ് അമേരിക്കൻ രാഷ്ട്രീയത്തിൽ സോഷ്യലിസ്റ്റ് ആശയങ്ങളെ മുഖ്യധാരാ ചർച്ചയിലേക്ക് കൊണ്ടുവന്നതിൽ വലിയ പങ്കുവഹിച്ചു. സാർവത്രിക ആരോഗ്യപരിരക്ഷ, സമ്പന്നരുടെ മേൽ ഉയർന്ന നികുതി, തൊഴിലാളികളുടെ അവകാശങ്ങൾ, വിദ്യാഭ്യാസച്ചെലവിന്റെ കുറവ്, സാമ്പത്തിക അസമത്വത്തിനെതിരായ പോരാട്ടം എന്നിവയിലൂടെ അമേരിക്കൻ ഇടതുപക്ഷത്തിന് പുതിയ രാഷ്ട്രീയ അടിത്തറ ഒരുക്കാൻ അദ്ദേഹത്തിനു കഴിഞ്ഞു.

അമേരിക്കയിൽ ‘സോഷ്യലിസം’ എന്ന പദം ദീർഘകാലം രാഷ്ട്രീയമായി സംശയത്തോടെയും വിരോധത്തോടെയും വീക്ഷിക്കപ്പെട്ടിരുന്നു. എന്നാൽ ആരോഗ്യപരിരക്ഷയും വിദ്യാഭ്യാസവും ഭവനവും സാധാരണക്കാരുടെ സാമ്പത്തിക സുരക്ഷയും രാഷ്ട്രീയ ചർച്ചകളുടെ കേന്ദ്രത്തിലേക്ക് കൊണ്ടുവന്നതിലൂടെ സാൻഡേഴ്സ് ഈ ആശയത്തിന്റെ അർഥവും പ്രസക്തിയും പുനർനിർവചിക്കാൻ ശ്രമിച്ചു.

പുതിയ തലമുറയുടെ ശബ്ദം:
ഒകാസിയോ- കോർട്ടസും മംദാനിയും

2018-ൽ കോൺഗ്രസിലേക്ക് തിരഞ്ഞെടുക്കപ്പെട്ട അലക്സാണ്ട്രിയ ഒകാസിയോ-കോർട്ടസ് അമേരിക്കൻ ജനാധിപത്യ സോഷ്യലിസ്റ്റ് പ്രസ്ഥാനത്തിന്റെ ഏറ്റവും ശ്രദ്ധേയമായ യുവ നേതാക്കളിലൊരാളാണ്. കാലാവസ്ഥാ വ്യതിയാനം, സാമ്പത്തിക അസമത്വം, തൊഴിലാളികളുടെ അവകാശങ്ങൾ, സാമൂഹിക നീതി എന്നിവയിൽ ശക്തമായ നിലപാടുകൾ സ്വീകരിച്ച അവർ യുവജനങ്ങളെയും സാധാരണ തൊഴിലാളികളെയും രാഷ്ട്രീയത്തിലേക്ക് ആകർഷിക്കുന്നതിൽ പ്രധാന പങ്കുവഹിച്ചു.

2025-ൽ ന്യൂയോർക്ക് നഗരത്തിന്റെ മേയറായി തിരഞ്ഞെടുക്കപ്പെട്ട സോഹ്റാൻ മംദാനിയുടെ വിജയം അമേരിക്കൻ ഇടതുപക്ഷത്തിന് പുതിയ ആത്മവിശ്വാസം നൽകി. ജീവിതച്ചെലവിലെ വർധന, ഭവനപ്രതിസന്ധി, പൊതുഗതാഗതം, സാമൂഹിക ക്ഷേമം തുടങ്ങിയ ജനങ്ങളുടെ ദൈനംദിന പ്രശ്നങ്ങളെ കേന്ദ്രീകരിച്ചുള്ള അദ്ദേഹത്തിന്റെ രാഷ്ട്രീയ പ്രവർത്തനങ്ങൾ ശ്രദ്ധേയമാണ്. ന്യൂയോർക്ക് പോലെയുള്ള ലോകത്തിലെ പ്രധാന സാമ്പത്തിക കേന്ദ്രങ്ങളിലൊന്നിൽ ഒരു ഡെമോക്രാറ്റിക് സോഷ്യലിസ്റ്റ് മേയറായി തിരഞ്ഞെടുക്കപ്പെടുന്നത് പ്രതീകാത്മകമായും രാഷ്ട്രീയമായും വലിയ പ്രാധാന്യമുള്ള സംഭവമാണ്.

2026-ലെ തിരഞ്ഞെടുപ്പ്:
DSA-യുടെ വിപുലമായ മുന്നേറ്റം

2026-ലെ തിരഞ്ഞെടുപ്പിൽ DSA പിന്തുണച്ച സ്ഥാനാർഥികൾ ഫെഡറൽ, സംസ്ഥാന, പ്രാദേശിക തലങ്ങളിൽ ശ്രദ്ധേയമായ മുന്നേറ്റം നടത്തിയതായി സംഘടനയുടെ കണക്കുകൾ സൂചിപ്പിക്കുന്നു. സംഘടനയുടെ ഔദ്യോഗിക കണക്കുകൾ പ്രകാരം, 43 സംസ്ഥാനങ്ങളിലെ 130-ലധികം പ്രാദേശിക ഘടകങ്ങൾ തിരഞ്ഞെടുപ്പ് പ്രവർത്തനങ്ങളിൽ പങ്കെടുത്തു; കുറഞ്ഞത് 105 വിജയങ്ങൾ നേടാനായിട്ടുണ്ട്.

നിലവിൽ കോൺഗ്രസിലുള്ള അലക്സാണ്ട്രിയ ഒകാസിയോ-കോർട്ടസ്, റഷീദ ത്ലൈബ് എന്നിവർക്കൊപ്പം ആറു DSA പിന്തുണയുള്ള സ്ഥാനാർഥികൾ കൂടി ജനപ്രതിനിധിസഭയിലേക്ക് തിരഞ്ഞെടുക്കപ്പെട്ടു. ഡൊണാവൻ മക്കിന്നി, ക്രിസ് റാബ്, മെലാറ്റ് കിറോസ്, ആഞ്ചല ഗോൺസാലസ്-ടോറസ്, ഡാരിയലിസ അവില ചെവലിയർ, ക്ലെയർ വാൽഡെസ് എന്നിവരാണ് പുതിയ പ്രതിനിധികൾ.

ഈ മുന്നേറ്റത്തിലെ ശ്രദ്ധേയമായ വിജയങ്ങളിലൊന്ന് ലോസ് ആഞ്ചലസ് നഗരത്തിന്റെ മേയർ സ്ഥാനത്തേക്ക് നിത്യാ രാമൻ തിരഞ്ഞെടുക്കപ്പെട്ടതാണ്. കേരളത്തിലെ തൃശ്ശൂരിൽ ജനിച്ച നിത്യാ രാമൻ DSA അംഗവും പുരോഗമന രാഷ്ട്രീയത്തിന്റെ ശ്രദ്ധേയ മുഖവുമാണ്. ന്യൂയോർക്ക് നഗരത്തിന്റെ മേയറായി മംദാനി തിരഞ്ഞെടുക്കപ്പെട്ടതിനു പിന്നാലെ ലോസ് ആഞ്ചലസിലും ലഭിച്ച ഈ വിജയം അമേരിക്കൻ ജനാധിപത്യ സോഷ്യലിസ്റ്റ് ശക്തികൾക്ക്  പുതിയ രാഷ്ട്രീയ ആത്മവിശ്വാസം നൽകുന്നു.

ന്യൂയോർക്കും ലോസ് ആഞ്ചലസും പോലുള്ള വലിയ നഗരങ്ങളിൽ ജനാധിപത്യ സോഷ്യലിസ്റ്റുകൾക്ക് ലഭിക്കുന്ന പിന്തുണ, ഭവനം, പൊതുഗതാഗതം, ആരോഗ്യപരിരക്ഷ, ജീവിതച്ചെലവ് തുടങ്ങിയ വിഷയങ്ങളിൽ ജനങ്ങൾക്ക് പുതിയ രാഷ്ട്രീയ പരിഹാരങ്ങൾ ആവശ്യമാണെന്നതിന്റെ സൂചനയാണ്. ഈ വിജയങ്ങളുടെ പ്രാധാന്യം സ്ഥാനങ്ങളുടെ എണ്ണത്തിൽ മാത്രം ഒതുങ്ങുന്നില്ല. സാർവത്രിക ആരോഗ്യപരിരക്ഷ, എല്ലാവർക്കും താങ്ങാനാവുന്ന ഭവനം, ശിശുപരിചരണം, തൊഴിലാളികളുടെ അവകാശങ്ങൾ, സാമ്പത്തിക അസമത്വത്തിനെതിരായ പോരാട്ടം തുടങ്ങിയ വിഷയങ്ങൾ അമേരിക്കൻ തിരഞ്ഞെടുപ്പ് രാഷ്ട്രീയത്തിന്റെ കേന്ദ്രത്തിലേക്ക് കൊണ്ടുവരാൻ DSA-യ്ക്ക് കഴിഞ്ഞിട്ടുണ്ട്.

രണ്ട് ഡോക്ടർമാർ,
രണ്ട് ശ്രദ്ധേയ വിജയങ്ങൾ

ഈ തിരഞ്ഞെടുപ്പിലെ പുരോഗമന രാഷ്ട്രീയത്തിന്റെ മറ്റൊരു പ്രധാന മുഖം ഡോക്ടർമാരായ അബ്ദുൽ എൽ-സയീദിന്റെയും ആദം ഹമാവിയുടെയും വിജയങ്ങളാണ്. ആരോഗ്യപരിരക്ഷയും സാമൂഹിക സുരക്ഷയും സാധാരണക്കാരുടെ ജീവിതപ്രശ്നങ്ങളും രാഷ്ട്രീയത്തിന്റെ കേന്ദ്രത്തിലേക്ക് കൊണ്ടുവരുന്നതിൽ ഇരുവരുടെയും പശ്ചാത്തലം പ്രത്യേക പ്രാധാന്യമർഹിക്കുന്നു.

മിഷിഗണിൽ നിന്ന് അമേരിക്കൻ സെനറ്റിലേക്ക് തിരഞ്ഞെടുക്കപ്പെട്ട അബ്ദുൽ എൽ-സയീദ് പൊതുജനാരോഗ്യ രംഗത്ത് പ്രവർത്തിച്ചിട്ടുള്ള വ്യക്തിയാണ്. ആരോഗ്യപരിരക്ഷ, സാമ്പത്തിക നീതി, കോർപ്പറേറ്റ് സ്വാധീനത്തിനെതിരായ നിലപാടുകൾ എന്നിവ ഉൾക്കൊള്ളുന്ന പുരോഗമന രാഷ്ട്രീയമാണ് അദ്ദേഹം മുന്നോട്ടുവച്ചത്. മിഷിഗൺ സെനറ്റ് തിരഞ്ഞെടുപ്പിൽ റിപ്പബ്ലിക്കൻ സ്ഥാനാർഥി മൈക്ക് റോജേഴ്സിനെ പരാജയപ്പെടുത്തിയ അദ്ദേഹത്തിന്റെ വിജയം ഡെമോക്രാറ്റിക് പാർട്ടിയുടെ പുരോഗമന വിഭാഗത്തിന് വലിയ നേട്ടമായി വിലയിരുത്തപ്പെടുന്നു.

ന്യൂജേഴ്‌സിയിലെ 12-ാം കോൺഗ്രഷണൽ ജില്ലയിൽ നിന്ന് ജനപ്രതിനിധിസഭയിലേക്ക് തിരഞ്ഞെടുക്കപ്പെട്ട ഡോ. ആദം ഹമാവി ഒരു സർജനും മുൻ അമേരിക്കൻ സൈനിക ട്രോമ സർജനുമാണ്. ഇറാഖിൽ സൈനിക സേവനം അനുഷ്ഠിച്ച അദ്ദേഹം ഗാസ ഉൾപ്പെടെയുള്ള പ്രദേശങ്ങളിൽ മെഡിക്കൽ സേവനങ്ങൾ നൽകിയിട്ടുണ്ട്. ആരോഗ്യപരിരക്ഷയ്ക്കും സാമൂഹിക നീതിക്കും പ്രാധാന്യം നൽകിയ അദ്ദേഹത്തിന്റെ പ്രചാരണ മുദ്രാവാക്യം “Healthcare, not bombs” എന്നതായിരുന്നു.

ഇരുവരുടെയും വിജയങ്ങൾ അമേരിക്കൻ രാഷ്ട്രീയത്തിൽ ആരോഗ്യപരിരക്ഷയെ ഒരു പൊതുനയപ്രശ്നമായി മാത്രമല്ല, സാമൂഹിക നീതിയുടെയും സാമ്പത്തിക സമത്വത്തിന്റെയും വിഷയമായി കാണുന്ന പ്രവണത ശക്തിപ്പെടുന്നതിന്റെ സൂചനയാണ്. ഡോക്ടർമാരുടെ പ്രൊഫഷണൽ അനുഭവം രാഷ്ട്രീയത്തിലേക്ക് കൊണ്ടുവരുന്നതിലൂടെ ആരോഗ്യപരിരക്ഷയുടെ ചെലവ്, പൊതുജനാരോഗ്യ സംവിധാനങ്ങൾ, സാമൂഹിക സുരക്ഷ എന്നിവയ്ക്ക് കൂടുതൽ പ്രാധാന്യം ലഭിക്കുമെന്ന പ്രതീക്ഷയും ഉയരുന്നു.

CPUSA: നേരിട്ടുള്ള തിരഞ്ഞെടുപ്പ് സ്വാധീനത്തിനപ്പുറം

അമേരിക്കൻ കമ്മ്യൂണിസ്റ്റ് പാർട്ടിയായ Communist Party USA (CPUSA)-യുടെ തിരഞ്ഞെടുപ്പ് സ്വാധീനം DSA-യുടേതിൽനിന്ന് വ്യത്യസ്തമാണ്. ഫെഡറൽ തലത്തിൽ സ്വതന്ത്ര സ്ഥാനാർഥികളെ വിജയിപ്പിക്കുന്നതിൽ പാർട്ടിക്ക് പരിമിതമായ ശേഷിയാണുള്ളത്. എന്നാൽ തൊഴിലാളി യൂണിയനുകൾ, പൗരാവകാശ പ്രസ്ഥാനങ്ങൾ, കുടിയേറ്റക്കാരുടെ അവകാശങ്ങൾ, സാമൂഹിക നീതി പോരാട്ടങ്ങൾ എന്നിവയിൽ പാർട്ടി പ്രവർത്തകർ ഇടപെടുന്നുണ്ട്. സമീപകാല തിരഞ്ഞെടുപ്പുകളിൽ വലതുപക്ഷ രാഷ്ട്രീയത്തെ പ്രതിരോധിക്കാൻ വിശാലമായ ജനാധിപത്യ ഐക്യമുന്നണിയെ പിന്തുണയ്ക്കുന്ന സമീപനമാണ് CPUSA സ്വീകരിച്ചത്. റിപ്പബ്ലിക്കൻ വലതുപക്ഷത്തെ പരാജയപ്പെടുത്തുക എന്ന തന്ത്രപരമായ ലക്ഷ്യത്തോടെ ഡെമോക്രാറ്റിക് പാർട്ടിയിലെ പുരോഗമന വിഭാഗങ്ങൾക്ക് അനുകൂലമായി പ്രവർത്തിക്കുന്നതിനെ പാർട്ടി മുൻഗണന നൽകി.

ഇത് അമേരിക്കൻ ഇടതുപക്ഷത്തിന്റെ ഒരു പ്രധാന രാഷ്ട്രീയ യാഥാർഥ്യത്തെ വ്യക്തമാക്കുന്നു: സോഷ്യലിസ്റ്റ് ആശയങ്ങൾ മുന്നോട്ടുവയ്ക്കുന്ന സംഘടനകൾക്ക് തിരഞ്ഞെടുപ്പ് രാഷ്ട്രീയത്തിൽ സ്വതന്ത്രമായ ശക്തിയായി വളരുന്നതിനൊപ്പം, വിശാലമായ ജനാധിപത്യ മുന്നണികളിൽ പങ്കാളികളാകേണ്ടതിന്റെ ആവശ്യകതയും നിലനിൽക്കുന്നു.

ബറാക് ഒബാമ:
പ്രസിഡന്റ് പദവിക്കപ്പുറമുള്ള
രാഷ്ട്രീയ സ്വാധീനം

അമേരിക്കയുടെ ആദ്യ ആഫ്രിക്കൻ- അമേരിക്കൻ പ്രസിഡന്റായ ബറാക് ഒബാമ, ഔദ്യോഗിക പദവിയിൽനിന്ന് മാറിയിട്ടും ഡെമോക്രാറ്റിക് പാർട്ടിയുടെ ഏറ്റവും ജനപ്രീതിയുള്ള പ്രചാരണ നേതാക്കളിലൊരാളായി തുടരുന്നു. 2026-ലെ തിരഞ്ഞെടുപ്പിനു മുന്നോടിയായി അദ്ദേഹം നടത്തിയ പ്രചാരണ റാലികൾ, സ്ഥാനാർഥികൾക്കുവേണ്ടിയുള്ള പരസ്യങ്ങളും പ്രസംഗങ്ങളും, ധനസമാഹരണം, വോട്ടർമാരെ നേരിട്ട് അഭിസംബോധന ചെയ്തുള്ള ഇടപെടലുകൾ എന്നിവ പാർട്ടിയുടെ തിരഞ്ഞെടുപ്പ് പ്രവർത്തനങ്ങൾക്ക് പുതിയ ഊർജം പകർന്നു.

ഒഹായോ, മിഷിഗൺ, ജോർജിയ തുടങ്ങിയ നിർണായക സംസ്ഥാനങ്ങളിൽ ഒബാമ നടത്തിയ പ്രചാരണ ഇടപെടലുകൾ ശ്രദ്ധേയമായിരുന്നു. ഷെറോഡ് ബ്രൗൺ, ജോൺ ഓസോഫ് തുടങ്ങിയ സ്ഥാനാർഥികൾക്കൊപ്പം മിഷിഗണിലെ അബ്ദുൽ എൽ-സയീദിനും അദ്ദേഹം പിന്തുണ നൽകി. ഡെമോക്രാറ്റിക് പാർട്ടിക്കായി 13.6 മില്യൺ ഡോളറിലധികം ധനസമാഹരണം നടത്തിയതായും റിപ്പോർട്ടുകളുണ്ട്.

യുവാക്കളെയും ആഫ്രിക്കൻ-അമേരിക്കൻ വോട്ടർമാരെയും നഗരപ്രദേശങ്ങളിലെ ജനങ്ങളെയും രാഷ്ട്രീയ പ്രക്രിയയിൽ സജീവമായി പങ്കെടുപ്പിക്കുന്നതിൽ ഒബാമയുടെ വ്യക്തിത്വവും പ്രസംഗശൈലിയും പ്രധാന പങ്കുവഹിച്ചു. അദ്ദേഹത്തിന്റെ പ്രസംഗങ്ങളിലെ നർമ്മവും വിമർശനാത്മകമായ സമീപനവും ട്രംപിന്റെ രാഷ്ട്രീയശൈലിക്കെതിരെ വ്യത്യസ്തമായ ഒരു രാഷ്ട്രീയ ഭാഷ അവതരിപ്പിച്ചു.

ഒബാമയുടെ ഇടപെടലിന്റെ പ്രാധാന്യം റാലികളിൽ ജനക്കൂട്ടത്തെ ആകർഷിക്കുന്നതിൽ മാത്രം ഒതുങ്ങുന്നില്ല. പാർട്ടിയുടെ വിവിധ വിഭാഗങ്ങളെ ഒരുമിപ്പിക്കുക, തിരഞ്ഞെടുപ്പിനെക്കുറിച്ചുള്ള ദേശീയ രാഷ്ട്രീയ ചർച്ചയ്ക്ക് ദിശ നൽകുക, ജനങ്ങളുടെ അസംതൃപ്തിയെ വോട്ടുകളാക്കി മാറ്റുക എന്നിവയിലാണ് അദ്ദേഹത്തിന്റെ രാഷ്ട്രീയ സ്വാധീനം പ്രകടമാകുന്നത്.

2008-ലെ പ്രസിഡന്റ് തിരഞ്ഞെടുപ്പിൽ ഒബാമ ഉയർത്തിയ ‘Hope and Change’ എന്ന മുദ്രാവാക്യം അമേരിക്കൻ രാഷ്ട്രീയത്തിൽ പ്രതീക്ഷയുടെയും മാറ്റത്തിന്റെയും പ്രതീകമായി മാറിയിരുന്നു. 2026-ലെ തിരഞ്ഞെടുപ്പിലും ജനാധിപത്യം, സാമൂഹിക നീതി, രാഷ്ട്രീയ ഉത്തരവാദിത്വം, സാധാരണക്കാരുടെ ജീവിതപ്രശ്നങ്ങൾ എന്നിവയ്ക്ക് അദ്ദേഹം പ്രാധാന്യം നൽകി. ട്രംപ് ഭരണത്തോടുള്ള ജനങ്ങളുടെ പ്രതിഷേധം മാത്രം ഡെമോക്രാറ്റിക് വിജയത്തിന് കാരണമായെന്ന് പറയാനാവില്ല. സാമ്പത്തിക പ്രശ്നങ്ങൾ, പ്രാദേശിക രാഷ്ട്രീയ സാഹചര്യങ്ങൾ, സ്ഥാനാർഥികളുടെ വ്യക്തിപരമായ സ്വാധീനം, തിരഞ്ഞെടുപ്പ് സംഘടനകളുടെ പ്രവർത്തനം എന്നിവയും നിർണായകമായിരുന്നു. ഈ ഘടകങ്ങൾക്കൊപ്പം പ്രവർത്തിച്ച ശക്തമായ പ്രചാരണ ഘടകമായാണ് ഒബാമയുടെ ഇടപെടലിനെ വിലയിരുത്തേണ്ടത്.

ഒബാമയും ജനാധിപത്യ സോഷ്യലിസ്റ്റുകളും: വ്യത്യാസങ്ങൾക്കിടയിലെ സഹകരണം

ഒബാമയുടെ രാഷ്ട്രീയത്തെ നേരിട്ട് ജനാധിപത്യ സോഷ്യലിസമായി വിശേഷിപ്പിക്കുന്നത് ശരിയായിരിക്കില്ല. അദ്ദേഹം പ്രധാനമായും പുരോഗമന ലിബറൽ രാഷ്ട്രീയത്തിന്റെ പ്രതിനിധിയാണ്. ബെർണി സാൻഡേഴ്സും DSA-യും മുന്നോട്ടുവയ്ക്കുന്ന ഘടനാപരമായ സാമ്പത്തിക പരിവർത്തനങ്ങളിൽനിന്ന് അദ്ദേഹത്തിന്റെ സമീപനം വ്യത്യസ്തമാണ്.

ഒബാമയുടെ രാഷ്ട്രീയം മുതലാളിത്ത വ്യവസ്ഥയ്ക്കുള്ളിൽ പരിഷ്കാരങ്ങളിലൂടെ സാമൂഹിക നീതിയും സാമ്പത്തിക സുരക്ഷയും മെച്ചപ്പെടുത്തുന്നതിലാണ് ഊന്നുന്നത്. അതേസമയം, ജനാധിപത്യ സോഷ്യലിസ്റ്റ് പ്രസ്ഥാനങ്ങൾ സാമ്പത്തിക അധികാരത്തിന്റെ കേന്ദ്രീകരണത്തെയും ഉൽപ്പാദനോപാധികളുടെ ഉടമസ്ഥതയെയും സംബന്ധിച്ച കൂടുതൽ അടിസ്ഥാനപരമായ മാറ്റങ്ങൾ മുന്നോട്ടുവയ്ക്കുന്നു. എന്നാൽ ഈ വ്യത്യാസങ്ങൾ രാഷ്ട്രീയ സഹകരണത്തിന് തടസ്സമാകണമെന്നില്ല. ട്രംപ് രാഷ്ട്രീയത്തിനെതിരായ വിശാലമായ ജനാധിപത്യ മുന്നണി രൂപപ്പെടുത്തുന്നതിൽ ഒബാമയുടെ പങ്ക്, പുരോഗമന പ്രസ്ഥാനങ്ങൾക്കും തിരഞ്ഞെടുപ്പ് രാഷ്ട്രീയത്തിൽ കൂടുതൽ ഇടപെടാനുള്ള അവസരങ്ങൾ സൃഷ്ടിക്കുന്നു.

മിഷിഗണിൽ അബ്ദുൽ എൽ-സയീദിനുവേണ്ടി ഒബാമ പ്രചാരണം നടത്തിയതും ഈ പശ്ചാത്തലത്തിൽ ശ്രദ്ധേയമാണ്. പാർട്ടിക്കുള്ളിലെ ആശയപരമായ വ്യത്യാസങ്ങൾ നിലനിൽക്കുമ്പോഴും വിശാലമായ ജനാധിപത്യ മുന്നണി രൂപപ്പെടുത്താനുള്ള സമീപനത്തിന്റെ ഉദാഹരണമായാണ് ഇതിനെ കാണാവുന്നത്. അമേരിക്കൻ രാഷ്ട്രീയത്തിൽ സാമൂഹിക നീതിയുടെയും സാമ്പത്തിക സമത്വത്തിന്റെയും ആശയങ്ങൾക്ക് കൂടുതൽ സ്വീകാര്യത നേടിക്കൊടുക്കുന്നതിൽ ഒബാമയുടെ സംഭാവന പ്രധാനമാണ്. അദ്ദേഹത്തിന്റെ പുരോഗമന രാഷ്ട്രീയവും ജനാധിപത്യ സോഷ്യലിസ്റ്റ് പ്രസ്ഥാനങ്ങളുടെ കൂടുതൽ സമൂലമായ ആശയങ്ങളും തമ്മിലുള്ള സംവാദവും സഹകരണവും ഭാവിയിൽ നിർണായകമാകും.

2028-ലേക്കുള്ള വഴികൾ

2026-ലെ തിരഞ്ഞെടുപ്പ് മുന്നേറ്റത്തിന്റെ ഏറ്റവും വലിയ രാഷ്ട്രീയ പ്രാധാന്യം 2028-ലെ പ്രസിഡന്റ് തിരഞ്ഞെടുപ്പുമായി ബന്ധപ്പെട്ടതാണ്. ട്രംപ് രാഷ്ട്രീയത്തെ നേരിടാൻ കഴിയുന്ന വിശാലമായ ജനാധിപത്യ മുന്നണി രൂപപ്പെടുത്താൻ ഡെമോക്രാറ്റിക് പാർട്ടിക്ക് സാധിക്കുമോ? പുരോഗമന സോഷ്യലിസ്റ്റ് ആശയങ്ങൾ ഉയർത്തുന്ന വിഭാഗങ്ങളെയും മിതവാദികളെയും ഒരുമിച്ച് കൊണ്ടുപോകാൻ കഴിയുമോ? തൊഴിലാളികൾ, യുവാക്കൾ, ന്യൂനപക്ഷങ്ങൾ, മധ്യവർഗം എന്നിവരുടെ രാഷ്ട്രീയ പ്രതീക്ഷകളെ ഏകോപിപ്പിക്കാൻ കഴിയുമോ?

ഈ ചോദ്യങ്ങൾക്കുള്ള ഉത്തരങ്ങൾ കണ്ടെത്തുന്നതിൽ ഒബാമയുടെ രാഷ്ട്രീയ അനുഭവവും DSA-യുടെ വളർച്ചയും പ്രധാനമാണ്. ഒബാമ പ്രതിനിധീകരിക്കുന്ന വിശാലമായ ജനാധിപത്യ മുന്നണിയും DSA മുന്നോട്ടുവയ്ക്കുന്ന സാമൂഹിക-സാമ്പത്തിക പരിഷ്കാരങ്ങളും തമ്മിലുള്ള ബന്ധം അമേരിക്കൻ രാഷ്ട്രീയത്തിന്റെ ഭാവിയെ നിർണയിക്കുന്ന ഘടകങ്ങളിലൊന്നായിരിക്കും.

എന്നാൽ തിരഞ്ഞെടുപ്പിലെ വിജയം മാത്രം ദീർഘകാല രാഷ്ട്രീയ മാറ്റത്തിന് മതിയാകില്ല. ആരോഗ്യപരിരക്ഷ, ഭവനം, വിദ്യാഭ്യാസം, തൊഴിലാളികളുടെ അവകാശങ്ങൾ, സാമ്പത്തിക അസമത്വം തുടങ്ങിയ വിഷയങ്ങളിൽ വ്യക്തമായ നയപരമായ മാറ്റങ്ങൾ നടപ്പാക്കേണ്ടതുണ്ട്. ജനങ്ങളുടെ പ്രതീക്ഷകൾ ഭരണപരമായ നേട്ടങ്ങളായി മാറുന്നുണ്ടോ എന്നതാണ് ഡെമോക്രാറ്റിക് പാർട്ടിയുടെ ഭാവി വിശ്വാസ്യതയെ നിർണയിക്കുക.

പ്രതിഷേധത്തിൽനിന്ന്
രാഷ്ട്രീയ പരിവർത്തനത്തിലേക്ക്

2026-ലെ അമേരിക്കൻ തിരഞ്ഞെടുപ്പ് ട്രംപ് രാഷ്ട്രീയത്തിനെതിരായ ജനങ്ങളുടെ പ്രതിഷേധത്തിന്റെ പ്രകടനം മാത്രമല്ല. അമേരിക്കൻ രാഷ്ട്രീയത്തിൽ ദീർഘകാലമായി നിലനിന്നിരുന്ന മുതലാളിത്ത അനുകൂല രാഷ്ട്രീയ സംസ്കാരത്തിനുള്ളിൽ സാമൂഹിക നീതി, സാമ്പത്തിക സമത്വം, ജനാധിപത്യ സോഷ്യലിസം തുടങ്ങിയ ആശയങ്ങൾക്ക് ലഭിക്കുന്ന വർധിച്ച സ്വീകാര്യതയുടെ സൂചന കൂടിയാണ്.

DSA-യുടെ മുന്നേറ്റം അമേരിക്കൻ രാഷ്ട്രീയത്തിൽ കൂടുതൽ ആഴത്തിലുള്ള സാമൂഹിക-സാമ്പത്തിക മാറ്റങ്ങൾക്കായുള്ള ജനകീയ ആവശ്യം പ്രകടമാക്കുമ്പോൾ ഒബാമയുടെ പ്രചാരണ ഇടപെടൽ ജനാധിപത്യ മുന്നണിയെ ശക്തിപ്പെടുത്തുന്ന നേതൃത്വത്തിന്റെ പ്രാധാന്യം വ്യക്തമാക്കുന്നു.  അബ്ദുൽ എൽ-സയീദിന്റെയും ആദം ഹമാവിയുടെയും വിജയങ്ങൾ ആരോഗ്യപരിരക്ഷയും സാമൂഹിക നീതിയും രാഷ്ട്രീയത്തിന്റെ കേന്ദ്രവിഷയങ്ങളാകുന്ന പുതിയ പ്രവണതയുടെ ഭാഗമാണ്.

ഈ തിരഞ്ഞെടുപ്പ് നൽകുന്ന പ്രധാന പാഠം ഇതാണ്: ജനങ്ങളുടെ അസംതൃപ്തി മാത്രം രാഷ്ട്രീയ വിജയം ഉറപ്പാക്കില്ല. അതിനെ പ്രതീക്ഷയിലേക്കും സംഘടിതമായ രാഷ്ട്രീയ പ്രവർത്തനത്തിലേക്കും മാറ്റാനുള്ള നേതൃത്വവും വ്യക്തമായ രാഷ്ട്രീയ ദർശനവും ജനകീയ പ്രസ്ഥാനങ്ങളും ആവശ്യമാണ്.  ജനാധിപത്യ സോഷ്യലിസ്റ്റ് പ്രസ്ഥാനങ്ങളുടെ വളർച്ച അമേരിക്കൻ രാഷ്ട്രീയത്തിൽ കൂടുതൽ സമത്വപരവും സാമൂഹിക നീതിയിലൂന്നിയതുമായ ഒരു ഭാവിക്കായുള്ള അന്വേഷണത്തിന് പുതിയ ഊർജം നൽകുന്നു അതേസമയം,, ജനങ്ങളുടെ പ്രതിഷേധത്തെ സംഘടിതമായ രാഷ്ട്രീയ മുന്നേറ്റമാക്കി മാറ്റാൻ വ്യക്തമായ ദർശനവും ജനകീയ നേതൃത്വവും എത്രത്തോളം നിർണായകമാണെന്ന് ബറാക് ഒബാമയുടെ തിരഞ്ഞെടുപ്പ് ഇടപെടൽ വ്യക്തമാക്കുന്നു.

അമേരിക്കൻ ഇടതുപക്ഷത്തിന്റെ മുന്നിലുള്ള വെല്ലുവിളി ഈ രണ്ടു പ്രവണതകളെയും പരസ്പരം ശക്തിപ്പെടുത്തുന്ന രാഷ്ട്രീയ ബന്ധത്തിലേക്ക് കൊണ്ടുവരിക എന്നതാണ്. അതിന്റെ വിജയപരാജയങ്ങൾ അമേരിക്കയുടെ ഭാവിയെ മാത്രമല്ല, ലോകമെമ്പാടുമുള്ള ജനാധിപത്യ-പുരോഗമന രാഷ്ട്രീയപ്രസ്ഥാനങ്ങളുടെ സാധ്യതകളെയും സ്വാധീനിച്ചേക്കാം.