എന്താണ് അലർജി?

ശരീരത്തിന്റെ പ്രതിരോധ പ്രവർത്തനത്തിന് സംഭവി ക്കുന്ന ചെറിയ വ്യതിയാനങ്ങളാണ് അലർജിക്ക് കാരണമാകുന്നത്. ഭൂരിഭാഗം ആളുകളിലും സാധാരണയായി നിരുപദ്രവകാരികളായ ചില പദാർത്ഥങ്ങളെ ആക്രമണകാരികളായി കണ്ട് അവർക്കെതിരെ ശരീരം അമിതമായി പ്രതികരിക്കുന്ന അവസ്​ഥയാണ് അലർജി.

എന്തൊക്കെയാണ്
അലർജി രോഗലക്ഷണങ്ങൾ?

നിർത്താതെയുള്ള മൂക്കൊലിപ്പ്, തുടർച്ചയായ തുമ്മൽ, കണ്ണിലും മൂക്കിലുമുള്ള ചൊറിച്ചിൽ, ചുമ, വലിവ്, തൊലിപ്പുറത്ത് ദീർഘകാലം നീണ്ടുനിൽക്കുന്ന ചൊറിച്ചിൽ ഇവയെല്ലാം അലർജിയുടെ ലക്ഷണങ്ങളാവാം. അലർജിയുണ്ടാ ക്കുന്ന വസ്​തുക്കളെ പൊതുവായി അലർജനുകൾ എന്നു പറയുന്നു.

ഏതൊക്കെ തരം
അലർജി രോഗങ്ങളാണ് നിലവിലുള്ളത്?

1. നാസിക അലർജി (Allergic Rhinitis), ആസ്തമ:

നാസിക അലർജിയുടെ ലക്ഷണങ്ങൾ: മൂക്കടയ്ക്കൽ, മൂക്കൊലിപ്പ്, തുടർച്ചയായ തുമ്മൽ, മൂക്കടപ്പ്, കണ്ണ് ചുവക്കൽ, കണ്ണിൽ ചൂട് തോന്നൽ എന്നിവ.

ആസ്തമയുടെ ലക്ഷണങ്ങൾ:

ശ്വാസം മുട്ടൽ, ദീർഘചുമ, നെഞ്ച് പിരിവ്, തുടങ്ങിയവ.
വീട്ടിലുള്ള പൊടി, പൊടിച്ചെള്ള്, പാറ്റ, പൂപ്പൽ, പൂച്ച, പട്ടി എന്നിവയുടെ രോമങ്ങൾ പൂമ്പൊടി, തുടങ്ങിയ അന്തരീക്ഷ അലർജനുകൾ കൊണ്ടുണ്ടാകുന്നവയാണിത്.

2. ത്വക്ക് അലർജി

തൊലിപ്പുറമേയുള്ള അലർജി മൂന്ന് തരത്തിൽ കാണുന്നു:

എക്സിമ: അഞ്ച് വയസ്സിന് താഴെയുള്ള കുട്ടികളിലാണ് ഇത് കൂടുതലായും കണ്ടുവരുന്നത്. ഇവരിൽ മുഖം, കൈകാലുകൾ എന്നിവിടങ്ങളിൽ തൊലി വരളുകയും ചൊറിഞ്ഞു പൊട്ടുകയും ചെയ്യുന്നു. പിൽക്കാലത്ത് ആസ്തമ വരാനുള്ള സാധ്യത ഇവരിൽ കൂടുതലാണ്.

കോൺടാക്ട് ഡെർമറ്റൈറ്റിസ്​: അലർജനുകളുമായി നേരിട്ടുള്ള സ്​പർശനമോ സാമീപ്യമോ മൂലമുാകുന്നത്.

അർട്ടിക്കേരിയ: തൊലിപ്പുറമേ ചൊറിച്ചിലോടു കൂടി പൊങ്ങിയ പാടുകളായി കാണപ്പെടുന്നവ.

3. ഭക്ഷണപദാർഥങ്ങളോടുള്ള അലർജി

പാൽ, മുട്ട, ചെമ്മീൻ, പൈനാപ്പിൾ, ഞണ്ട്, കടല, ഗോതമ്പ് എന്നിവയാണ് സാധാരണ അലർജി ഉണ്ടാക്കിയേക്കാവുന്ന ഭക്ഷണവസ്​തുക്കൾ. ശരീരം ചൊറിഞ്ഞ് തടിക്കുക, വായിലും നാവിലും ചൊറി ച്ചിൽ, ഛർദി, വയറുവേദന, വയറിളക്കം എന്നിവയാണ് പ്രധാന ലക്ഷണങ്ങൾ.

4. മരുന്നുകളോടുള്ള അലർജി

പെൻസിലിൻ, സൾഫാ, ചില വേദനസംഹാരികൾ തുടങ്ങിയവയാണ് സാധാരണയായി അലർജിയുണ്ടാക്കുന്നത്.

5. വിഷം അലർജി

കടന്നൽ, തേനീച്ച, ചില തരം ഉറുമ്പുകൾ, എന്നിവയുടെ വിഷം ചിലരിൽ ഗുരുതരമായ അലർജി ഉണ്ടാക്കാറുണ്ട്.

എന്തൊക്കെയാണ്
വിവിധതരം അലർജനുകൾ?

ലോകമെമ്പാടും അലർജി രോഗങ്ങൾക്ക് കാരണമാകുന്ന വസ്​തുക്കളാണ് വീട്ടുപൊടിയും, പൊടിയിൽ വളരുന്ന പൊടിച്ചെള്ളും. നമ്മുടെ തൊലിയിൽനിന്നും അടർന്നുവീഴുന്ന ശൽക്കങ്ങൾ, ഭക്ഷണാവശിഷ്ടങ്ങൾ, വളർത്തുമൃഗങ്ങളുടെ രോമങ്ങൾ തുടങ്ങിയവയുടെ മിശ്രിതമാണ് വീട്ടുപൊടി.

പൊടിയിൽ വളരുന്ന, നഗ്നനേത്രങ്ങൾകൊണ്ട് കാണാനാവാത്ത ചെറുജീവികളാണ് പൊടിച്ചെള്ള്. അന്തരീക്ഷത്തിലെ ഈർപ്പമാണ് ഈ പൊടിച്ചെള്ളുകളുടെ വളർച്ചയ്ക്ക് ഏറ്റവും അനു കൂലമായ ഘടകം.

തിരക്കുപിടിച്ച ഇന്നത്തെ ജീവിതത്തിൽ നമുക്ക് മാനസിക ഉല്ലാസം നൽകുന്നവയാണ് വളർത്തുമൃഗങ്ങൾ. പക്ഷേ അലർജി രോഗങ്ങളിൽ പൂച്ച, പട്ടി എന്നിവയുമായുള്ള അടുത്തിടപഴകൽ പ്രശ്നങ്ങൾ സൃഷ്ടിച്ചേക്കാം. ഇവയുടെ തൊലി പുറത്തുള്ള ശൽക്കങ്ങൾ, മൂത്രം, തുപ്പൽ എന്നിവയിൽ അലർജിയുണ്ടാക്കുന്ന ഘടകങ്ങൾ ധാരാളമുണ്ട്.

ആസ്തമ, നാസിക അലർജി തുടങ്ങിയ അസുഖ ങ്ങളിൽ പ്രധാനപ്പെട്ട ഒരു വില്ലനാണ് ചിലതരം പൂമ്പൊടികൾ. പൂമ്പൊടികൾ പ്രധാനമായും രണ്ടു തരമുണ്ട്. കാറ്റിലൂടെ സ്വയം പറന്ന് പരാഗണം സംഭവിക്കുന്നവയും, ചിത്രശലഭം, വണ്ടുകൾ തുടങ്ങിയവയാൽ പരാഗണം നടക്കുന്നവയും. ചില മരങ്ങൾ, പുല്ലുകൾ, കളകൾ, തുടങ്ങിയവയുടെ പൂമ്പൊടികൾ, കാറ്റിലൂടെ പറന്ന് പരാഗണം നടക്കുന്നവയാണ്. ഇത്തരം പൂമ്പൊടികൾ ഭാരം കുറഞ്ഞവയും, എണ്ണത്തിൽ വളരെ കൂടുതലുള്ളവയുമാണ്. ഇവയാണ് സാധാരണ അലർജി, ആസ്തമ രോഗങ്ങൾക്ക് കാരണമാകുന്നത്. അതേസമയം നമ്മുടെ പൂന്തോട്ടങ്ങളിൽ കാണുന്ന ആകർഷകമായ സൗരഭ്യം പരത്തുന്ന, ഭൂരിഭാഗം പൂക്കളും വലിയ തോതിൽ അലർജി- ആസ്തമ രോഗങ്ങൾക്ക് കാരണമാകുന്നില്ല എന്നതാണ് സത്യം. നമ്മുടെ നാട്ടിൽ കണ്ടുവരുന്ന കാറ്റാടിമരം, മഞ്ഞ വാക, കുങ്കുമപ്പൂമരം, ശീമക്കരിവേലം തുടങ്ങിയവ ആസ്തമ, നാസിക അലർജി എന്നിവയ്ക്ക് കാരണമായേക്കാം.

അന്തരീക്ഷത്തിലുള്ള മറ്റു മാലിന്യങ്ങളുടെയും പുകപടലങ്ങളുടെയും സാന്നിധ്യം പൂമ്പൊടി അലർജിയുടെ കാഠിന്യം വർദ്ധിപ്പിക്കും. നഗരങ്ങളിൽ പൂമ്പൊടികൾ സൃഷ്ടിക്കുന്ന പ്രശ്നങ്ങൾ വർദ്ധിക്കുന്നതിന്റെ കാരണം ഇതാണ്.

പാശ്ചാത്യ രാജ്യങ്ങളിൽ ഓരോ മാസവും അതാത് സ്​ഥലങ്ങളിലെ പൂമ്പൊടിയുടെ അളവുകൾ മാധ്യമങ്ങളിലൂടെ അറിയുവാനുള്ള സംവിധാനമുണ്ട്. പോളൻ കലണ്ടർ എന്നറിയപ്പെടുന്ന ഈ സംവിധാനം അലർജി രോഗങ്ങൾക്ക് മുൻകരുതലുകൾ എടുക്കാൻ സഹായകമാണ്.

അന്തരീക്ഷത്തിലുള്ള അലർജിക്ക് പുറമേ തൊലിപ്പുറത്തുണ്ടാകുന്ന കോൺടാക്ട് ഡെർമറ്റൈറ്റിസ്​ എന്ന രോഗമുണ്ടാക്കുന്ന പലയിനം ചെടികൾ നമ്മുടെ ചുറ്റുപാടുമുണ്ട്. അരളി, പൂച്ചെടി, മുള്ളിച്ചീര, ചൊറിയണം, എരുക്ക്, ചേര്, പാർത്തീനിയം തുടങ്ങിയ ചെടികൾ നേരിട്ട് ശരീരത്തിൽ തൊട്ടാൽ ചൊറിച്ചിൽ, തൊലി ചുവന്നു തടിക്കുക എന്നീ രോഗലക്ഷണങ്ങളുണ്ടാകാം.

ഇതിനൊക്കെ പുറമേ സിഗരറ്റു പുക, വാഹന പുക, സാമ്പ്രാണിത്തിരി കത്തിക്കുമ്പോഴുാകുന്ന പുക, കൊതുകുതിരി / കൊതുക് മാറ്റ്, സുഗന്ധലേപനങ്ങൾ തുടങ്ങി പല വിധം വസ്​തുക്കളും അലർജി- ആസ്തമ രോഗങ്ങൾ മൂർച്ഛിക്കാൻ കാരണമാകുന്നു.

അലർജി രോഗനിർണ്ണയം എങ്ങനെയാണ് നടത്തുന്നത്?

തൊലിപ്പുറമെയുള്ള അലർജി ടെസ്റ്റിംഗ്
(Allergy Skin testing):

സംശയിക്കുന്ന അലർജനുകൾ വളരെ ചെറിയ അളവിൽ തൊലിപ്പുറമേ കുത്തിവയ്ക്കുകയും അതിനോടുള്ള റിയാക്ഷൻ നോക്കി രോഗനിർണയം നടത്തുകയും ചെയ്യുന്നു. ഒരു നിശ്ചിത അളവിനേക്കാൾ കൂടുതൽ തൊലിയിൽ ചുവന്നുതടിച്ച് പാടുണ്ടാകുന്നുണ്ടെങ്കിൽ ആ വസ്​തുവിനോട് അലർജിയുണ്ടെന്ന് സംശയിക്കാം.

സ്​പെസിഫിക് ഐ.ജി.ഇ ടെസ്റ്റിംഗ്
(Specific IgE Testing):

അലർജനുകൾക്കെതിരെ രക്തത്തിലുണ്ടാകുന്ന IgE വിഭാഗം ആൻറിബോഡികളുടെ അളവ് നിർണ്ണയിക്കുന്ന ടെസ്റ്റ്. ഇതിന് താരതമ്യേന ചെലവ് വളരെ കൂടുതലാണ്.

ഫുഡ് ചാലഞ്ച് ടെസ്റ്റ്
(Food Challenge Test):

അലർജി ഉണ്ടാക്കുന്നതായി സംശയിക്കുന്ന ഭക്ഷ്യവസ്​തു ചെറിയ അളവിൽ തുടങ്ങി ഒരു നിശ്ചിത അളവുവരെ കൊടുത്ത് രോഗലക്ഷണങ്ങൾ ഉണ്ടാകുന്നുണ്ടോ എന്ന് പരിശോധിക്കുന്നു. അവശ്യ ജീവൻരക്ഷാസൗകര്യമുള്ള ആശുപത്രികളിൽ ഡോക്ടറുടെ സാന്നിധ്യത്തിൽ മാത്രമേ ഈ ടെസ്റ്റ് ചെയ്യാൻ പാടുള്ളൂ.

കംപോണൻ്റ് റിസോൾവ്ഡ് ഡയഗ്നോസ്റ്റിക്സ്​ (Component Resolved Diagnostics):

Component Resolved Diagnosis (CRD) എന്നത് അലർജികൾ കൂടുതൽ കൃത്യമായി കണ്ടെത്താൻ ഉപയോഗിക്കുന്ന ഒരു മെച്ചപ്പെട്ട രക്തപരിശോധനാ രീതിയാണ്. പാരമ്പര്യ പരിശോധനകളിൽ മുഴുവൻ അലർജനോടുള്ള പ്രതികരണം പരിശോധിക്കുന്നതിനു പകരം, CRD അതിനുള്ളിലെ പ്രത്യേക പ്രോട്ടീനുകളെ മാത്രമായി കണ്ടെത്തുന്നു. ഇത് പരീക്ഷണത്തെ കൂടുതൽ കൃത്യതയുള്ളതാക്കുന്നു.

സ്​പൈറോമെട്രി:

ഇത് ശ്വാസകോശങ്ങളുടെ പ്രവർത്തനം പരിശോധിക്കുന്ന ലളിതവും സുരക്ഷിതവുമായ പരിശോധനയാണ്. ഈ പരിശോധനയിൽ, ഒരാൾ ഒരു കുഴലിലൂടെ ആഴത്തിൽ ശ്വസിച്ച് പുറത്തുവിടുമ്പോൾ, വായുവിന്റെ അളവും അതിന്റെ ഒഴുക്കിന്റെ വേഗതയും സ്​പെഷ്യൽ ഉപകരണത്തി ലൂടെ രേഖപ്പെടുത്തുന്നു. ശ്വാസകോശങ്ങൾ ശരിയായി പ്രവർത്തിക്കുന്നുണ്ടോ എന്ന തിനെക്കുറിച്ച് വ്യകതമാക്കാൻ ഈ പരിശോധന വലിയ സഹായമാണ്. ആസ്തമ രോഗ നിർണ്ണയത്തിൽ ഇത് പ്രധാന പങ്ക് വഹിക്കുന്നു

അലർജി ടെസ്റ്റുകൾ
ദുരുപയോഗിക്കുന്നുവോ?

ഇന്ന് നിലവിലുള്ള അലർജി ടെസ്റ്റുകളെല്ലാം ഒരു രോഗിക്ക് ഏതെങ്കിലും പ്രത്യേക വസ്​തുവിനോട് അലർജിയുണ്ടാകാനുള്ള സാധ്യത പ്രവചിക്കുക മാത്രമാണ് ചെയ്യുന്നത്. ഇവയെല്ലാം സ്​ക്രീനിംഗ് ടെസ്റ്റുകളാണ്. അതായത് ടെസ്റ്റ് നടത്തി അലർജിയുണ്ടെന്ന് നിർണ്ണയിക്കുന്ന എല്ലാ വസ്​തുക്കളോടും രോഗിയുടെ ശരീരം അലർജി ലക്ഷണങ്ങൾ പ്രകടിപ്പിക്കണമെന്നില്ല. രോഗിയിൽ നിന്നു ലഭിക്കുന്ന വിശദമായ വിവരങ്ങളും, രോഗിയെ നേരിട്ട് പരിശോധിക്കുമ്പോൾ കിട്ടുന്ന വിവരങ്ങളും എല്ലാം ഈ ടെസ്റ്റ് റിസൾട്ടിനോടൊപ്പം ചേർത്ത് വിശകലനം ചെയ്താൽ മാത്രമേ കൃത്യമായ രോഗനിർണയം സാധ്യമാവുകയുള്ളൂ.

അലർജി സംബന്ധമായ എല്ലാ പ്രശ്നങ്ങൾക്കും ഒറ്റമൂലി എന്ന രീതിയിൽ തെറ്റിദ്ധാരണാജനകമായ പരസ്യങ്ങൾ നൽകി പൊതുജനങ്ങളെ കബളിപ്പി ക്കുന്ന പ്രവണത അടുത്തിടെയായി വർദ്ധിച്ചു വരുന്നു. എല്ലാ രോഗികൾക്കും, ഡോക്ടറുടെ നിർദേശമോ മറ്റു മാനദണ്ഡങ്ങളോ പാലിക്കാതെ അലർജനുകളുടെ വലിയ പട്ടിക പ്രകാരം ടെസ്റ്റ് ചെയ്യുന്നത് ഒരു വിധത്തിലും സഹായകമാവില്ല. അനാവശ്യമായി ചികിത്സാചെലവ് കൂട്ടാൻ ഇത് കാരണമാകുന്നു. ഓരോ രോഗിക്കും അലർജിയുണ്ടാകാനുള്ള കാരണം വ്യത്യസ്​തമാവാം. രോഗി നൽകുന്ന വിവരങ്ങൾ, രോഗിയുടെ ചുറ്റുപാട്, ജോലി തുടങ്ങി നിരവധി ഘടകങ്ങൾ ക്കനുസൃതമായി നിശ്ചിത വസ്​തുക്കൾ മാത്രം ടെസ്റ്റ് ചെയ്യുന്നതാണ് അഭികാമ്യം. എല്ലാ അന്താരാഷ്ട്ര പഠനങ്ങളും ഇതാണ് സൂചിപ്പിക്കുന്നത്.

എന്തൊക്കെയാണ്
നമുക്ക് ചെയ്യാൻ സാധിക്കുന്ന
പ്രതിവിധികൾ?

ഏതുതരം അലർജിയുടെയും ചികിത്സയുടെ ആദ്യ പടി അലർജനുകൾ ഒഴിവാക്കുക എന്നുള്ളതാണ്. കുട്ടികളിൽ ഇത് അത്ര പ്രായോഗികമല്ല. എങ്കിലും അലർജി രോഗങ്ങളിൽ ഒരു പ്രധാന വില്ലനായ വീട്ടു പൊടിയെയും ചെള്ളിനേയും നേരിടുന്നതിന് നിരവധി കാര്യങ്ങൾ ചെയ്യേതായുണ്ട്.

എന്തൊക്കെയാണ് കുട്ടികളിലെ അലർജിചികിത്സയിലെ വെല്ലുവിളികൾ?

മണ്ണിലും പൊടിയിലും കളിക്കുകയും, പുതിയ ഭക്ഷണങ്ങൾ പരീക്ഷിക്കുകയും ചെയ്യുന്ന പ്രായമായതിനാൽ, അലർജൻ നിയന്ത്രണം താരതമ്യേന ബുദ്ധിമുട്ടാണ്.

സ്വന്തം രോഗലക്ഷണങ്ങൾ കൃത്യമായി പറയുക എന്നത് ചെറിയ കുട്ടികളിൽ സാധ്യമായെന്നു വരില്ല. അതിനാൽ രോഗനിർണയവും തുടർചികിത്സയും ദുർഘടമാകുന്നു. ഇൻഹേലർ, മൂക്കിലടിക്കുന്ന സ്പ്രേ എന്നിവയെക്കുറിച്ചുള്ള തെറ്റിദ്ധാരണകൾ മൂലം യഥാസമയത്തു കൃത്യമായ ചികിത്സ കിട്ടാതെ പോകുന്നു. കുട്ടികളിലെ അലർജിയിൽ തുടക്കത്തിലേയുള്ള രോഗനിർണ്ണയവും, ചികിത്സയും ഏറെ പ്രധാനമാണ്. അനാവശ്യമായ നിഷ്കർഷകളും നിബന്ധനകളും ഇതിനാവശ്യമില്ല. ഒരു ഡോക്ടറുടെ നിർദ്ദേശപ്രകാരം മാത്രം ഇതു ചെയ്യുക. പ്രകൃതിയിലെ നിറങ്ങളും മണങ്ങളും രുചി കളും എല്ലാ കുട്ടികളുടെയും അവകാശമാണ്. ബാല്യകാലത്തിന്റെ നിറം മങ്ങാതിരിക്കാൻ എറ്റവും മെച്ചപ്പെട്ട ചികിത്സ എറ്റവും നേരത്തെ നൽകണം.

READ: ഡോ. കെ. മഹാദേവൻ പിള്ള (1908- 1985)

നിറവ്യത്യാസം വന്ന്
കുട്ടികളുടെ പല്ല്
പൊടിഞ്ഞുപോകുമ്പോൾ

കുട്ടികളി​ലെ വിരബാധ
ചില്ലറക്കാര്യമല്ല

കുഞ്ഞിന്
പനിക്കുന്നു

പഠിക്കുന്ന കുട്ടിയും
പഠിക്കാത്ത കുട്ടിയും

കോവിഡ് കാലത്തെ
ഗൂഢാലോചനകൾ

എന്റെ ഡോക്ടർമാർ,
നിങ്ങളുടെയും…

▮

‘ IMA നമ്മുടെ ആരോഗ്യം’ മാസികയുടെ വരിക്കാരാകാം: