സുസ്ഥിര വികസനവും
മിന്നൽ മാജിക്കും:
ഒരു വൈരുദ്ധ്യാത്മക വിശകലനം

2030-ഓടെ ലോകമെമ്പാടും നടപ്പിലാക്കാൻ ഐക്യരാഷ്ട്രസഭ സുസ്ഥിര വികസന ലക്ഷ്യങ്ങൾ (Sustainable Development Goals) വിഭാവനം ചെയ്തിട്ടുണ്ട്. മാനവരാശിയുടെ സമഗ്രമായ പുരോഗതിയാണ് ഈ 17 ലക്ഷ്യങ്ങൾ സാക്ഷാത്കരിക്കാൻ ശ്രമിക്കുന്നത്. അവയിലെ പ്രധാനപ്പെട്ട മൂന്നാമത്തെ ലക്ഷ്യം അഥവാ SDG 3 എല്ലാവർക്കും ആരോഗ്യകരമായ ജീവിതവും ക്ഷേമവും ഉറപ്പാക്കുക എന്നതാണ്. ഒരു വശത്ത് ഈ ലക്ഷ്യങ്ങൾ കൈവരിക്കാൻ ശ്രമിക്കുമ്പോൾ തന്നെ, മറുഭാഗത്ത് സർക്കാരിന്റെ പ്രധാന വരുമാന സ്രോതസ്സായി മദ്യവില്പന മാറുന്നത് വലിയൊരു പ്രതിസന്ധിയാണ് സൃഷ്ടിക്കുന്നത്.

കേരള സർക്കാരിന്റെ മേൽനോട്ടത്തിൽ പുറത്തിറങ്ങുന്ന ഏറ്റവും പുതിയ മദ്യ ബ്രാൻഡാണ് 'മിന്നൽ മാജിക്' (Minnal Magic). കുറഞ്ഞ ചെലവിൽ ഗുണമേന്മയുള്ള ഉൽപ്പന്നം ഉപഭോക്താക്കളിലെത്തിക്കുക എന്ന ലക്ഷ്യത്തോടെയാണ് സർക്കാർ ഈ പുതിയ ബ്രാൻഡ് അവതരിപ്പിക്കുന്നത്. പാലക്കാട് ചിറ്റൂരിലുള്ള മലബാർ ഡിസ്റ്റിലറീസിലാണ് (Malabar Distilleries) ഈ മദ്യം ഉൽപ്പാദിപ്പിക്കുന്നത്. തുടക്കത്തിൽ 'മലബാർ മിസ്റ്ററി' (Malabar Mystery) എന്ന പേരാണ് നിശ്ചയിച്ചിരുന്നതെങ്കിലും, പിന്നീട് കൂടുതൽ ആകർഷകമായ 'മിന്നൽ മാജിക്' എന്ന പേരിലേക്ക് മാറുകയായിരുന്നു.

സാധാരണക്കാർക്ക് താങ്ങാനാവുന്ന നിരക്കിൽ, അര ലിറ്റർ കുപ്പിക്ക് 400 രൂപ എന്ന നിലയിലാണ് ഇതിന്റെ വില ക്രമീകരിച്ചിരിക്കുന്നതത്രെ. കേരള സ്റ്റേറ്റ് ബിവറേജസ് കോർപ്പറേഷന്റെ (BEVCO) ഔട്ട്ലെറ്റുകൾ വഴി ഈ ബ്രാൻഡ് ലഭ്യമാകും. നിലവിൽ വിപണിയിൽ ജനപ്രിയമായ 'ജവാൻ റം'-ന് സമാനമായ രീതിയിൽ, കുറഞ്ഞ നിരക്കിൽ ലഭ്യമാകുന്ന മികച്ചൊരു ബ്രാൻഡായി ഇതിനെ മാറ്റാനാണ് സർക്കാർ ലക്ഷ്യമിടുന്നത്.

പുതിയ സമയക്രമം: സർക്കാർ മദ്യനയത്തിൽ മാറ്റങ്ങൾ വരുത്തിയിട്ടുണ്ട്. രാവിലെ 10 മണി മുതൽ രാത്രി 12 മണി വരെ പ്രവർത്തിക്കാം. 5 സ്റ്റാർ ഹോട്ടലുകൾ അധിക ഫീസ് കൊടുത്താൽ പുലർച്ചെ 3 മണി വരെ പ്രവർത്തിക്കാൻ അനുമതിയുണ്ട്.

സാധാരണ ബാറുകൾ: രാവിലെ 10 മണി മുതൽ രാത്രി 9 മണി വരെ (പഴയ സമയം). പുരോഗമനം എന്ന് പുറമെ തോന്നുമെങ്കിലും ഇത് പൊതുജനാരോഗ്യത്തെ ക്ഷയിപ്പിക്കും എന്നതിൽ സംശയമില്ല. കുടുംബജീവിതത്തെ തകർക്കുകയും ഒരു ദേശത്തിന്റെ വിഭവങ്ങൾ സ്വാംശീകരിക്കുകയും ചെയ്യുന്ന നിശ്ശബ്ദ മഹാമാരിയുടെ വരവ് നിശ്ചയമായും ആശങ്കപ്പെടുത്തുന്നു.

കേരളത്തിലെ മദ്യ ഉപഭോഗത്തിലും അതുവഴി ലഭിക്കുന്ന വരുമാനത്തിലും വലിയ വർദ്ധനവാണ് പ്രതിവർഷം രേഖപ്പെടുത്തുന്നത്. 2026-ലെ കണക്കുകൾ പ്രകാരം കേരളത്തിലെ ഏകദേശ ജനസംഖ്യ 3.62 കോടിയായി (36.24 മില്യൺ) ഉയർന്നിട്ടുണ്ട്. ബെവ്കോയുടെ (BEVCO) റിപ്പോർട്ടുകൾ പ്രകാരം, 2025-26 സാമ്പത്തിക വർഷത്തിന്റെ ആദ്യ പത്തു മാസങ്ങളിൽ മാത്രം ഏകദേശം 15,717.88 കോടി രൂപയുടെ മദ്യവിൽപ്പന സംസ്ഥാനത്ത് നടന്നിട്ടുണ്ട്.

വിശേഷദിവസങ്ങളിൽ ഈ വരുമാനം കുത്തനെ ഉയരുന്നതായി കാണുന്നു: 2025-ലെ ഓണം സീസണിൽ 826.38 കോടി രൂപയുടെയും, 2026 പുതുവത്സര ദിനത്തിൽ മാത്രം 125.64 കോടി രൂപയുടെയും മദ്യം വിറ്റഴിക്കപ്പെട്ടു. കൊച്ചി കടവന്ത്ര, പാലാരിവട്ടം തുടങ്ങിയ ഔട്ട്ലെറ്റുകളാണ് വിൽപ്പനയിൽ മുൻപന്തിയിൽ നിൽക്കുന്നത്.

ഇന്ത്യയിൽ ഏറ്റവും കൂടുതൽ മദ്യ ഉപഭോഗം ചെയ്യുന്ന സംസ്ഥാനങ്ങളിൽ ഒന്നാണ് കേരളം. കേരള സ്റ്റേറ്റ് ബിവറേജസ് കോർപ്പറേഷൻ (ബിവ്കോ) പ്രതിവർഷം 14,000 - 15,000 കോടിയിൽ അധികം വരുമാനമുണ്ടാക്കുന്നു.

2030-ലെ സുസ്ഥിര വികസന അജണ്ടയുടെ ഏറ്റവും മഹത്തായതും മാനവിക പ്രതിബദ്ധത നിറഞ്ഞതുമായ ലക്ഷ്യങ്ങളിൽ ഒന്നാണ് SDG 3. അതായത് എല്ലാ പ്രായക്കാർക്കും ആരോഗ്യകരമായ ജീവിതം ഉറപ്പാക്കുകയും ക്ഷേമം പ്രോത്സാഹിപ്പിക്കുകയും ചെയ്യുക.

മാതൃമരണനിരക്ക് കുറയ്ക്കൽ, പകർച്ചവ്യാധികൾ നിയന്ത്രിക്കൽ, മാനസികാരോഗ്യം ശക്തി പ്പെടുത്തൽ, അസംക്രമണ രോഗങ്ങൾ നേരിടൽ എന്നിവ ഉൾക്കൊള്ളുന്ന ഈ ലക്ഷ്യം ഭൂമിശാസ്ത്രം, ലിംഗഭേദം, സാമ്പത്തികനില എന്നിവ പരിഗണിക്കാതെ എല്ലാ വ്യക്തികൾക്കും ആരോഗ്യകരവും അന്തസ്സുള്ളതുമായ ജീവിതം കാംക്ഷിക്കുന്നു.

രാജ്യത്തെ ഏറ്റവും ഉയർന്ന സാക്ഷരത, ആയുർദൈർഘ്യം, മാനവവികസനസൂചിക എന്നിവ കൊണ്ട് ശ്രദ്ധേയമായ കേരളം SDG 3-ൽ ഗണ്യമായ മുന്നേറ്റം നടത്തിയതായി തോന്നാം. എന്നാൽ മാതൃകാസംസ്ഥാനം ഈ വിഷയത്തിൽ കാണിച്ച വൈരുദ്ധ്യമാണ് 'മിന്നൽ മാജിക്'.

ആൽക്കഹോൾ യൂസ് ഡിസോർഡർ (Alcohol Use Disorder - AUD) എന്നത് മദ്യപാനം നിയന്ത്രിക്കാൻ കഴിയാത്ത ഒരു അവസ്ഥയെ സൂചിപ്പിക്കുന്ന മെഡിക്കൽ രോഗനിർണ്ണയമാണ്. ഒരാൾക്ക് മദ്യപാനം മൂലം സാമൂഹികമോ, തൊഴിൽപരമോ, ആരോഗ്യപരമോ ആയ പ്രശ്നങ്ങൾ ഉണ്ടാകുന്നുണ്ടെങ്കിലും മദ്യപാനം തുടരുന്ന അവസ്ഥയാണിത്.

എ.യു.ഡിയുടെ പ്രധാന ലക്ഷണങ്ങൾ:

ദേശീയ ശരാശരിയേക്കാൾ വളരെ കൂടുതലായി കേരളത്തിൽ 'ആൽക്കഹോൾ യൂസ് ഡിസോർഡർ' കാണപ്പെടുന്നതായി പഠനങ്ങൾ സ്ഥിരീകരിക്കുന്നു. ദൈനംദിന മദ്യ ഉപയോഗം, കൂട്ടായി മദ്യപിക്കുക, സാമൂഹ്യ- മതപരമായ ചടങ്ങുകളിൽ മദ്യം സ്വാഭാവികമായി കണക്കാക്കുന്ന രീതി എന്നിവ ഇതിനു കാരണമാകുന്നു. മുൻകാലങ്ങളിൽ സ്ത്രീകളിലും യുവജനങ്ങളിലും വളരെ കുറവായി കണ്ടിരുന്ന ഈ പ്രശ്നം ഇപ്പോൾ ഈ വിഭാഗങ്ങളിലും വർദ്ധിച്ചുവരുന്നതായി കാണുന്നുണ്ട്.

സുസ്ഥിര വികസനലക്ഷ്യങ്ങളിലെ (SDG) മൂന്നാമത്തെ ലക്ഷ്യമായ 'ആരോഗ്യവും ക്ഷേമവും' (Good Health & Wellbeing) എന്നതിലെ വളരെ പ്രധാനപ്പെട്ട ഒരു ഉപലക്ഷ്യമാണ് Target 3.4. 2030-ഓടെ പകർച്ചവ്യാധിയല്ലാത്ത രോഗങ്ങൾ / അസംക്രമണ രോഗങ്ങൾ (Non Communicable Diseases) മൂലമുള്ള അകാലമരണങ്ങൾ കുറയ്ക്കുകയും മാനസികാരോഗ്യം മെച്ചപ്പെടുത്തുകയും ചെയ്യുക എന്നതാണ് ഇതിന്റെ പ്രധാന ലക്ഷ്യം. മദ്യ ഉപഭോഗം കൊണ്ടുണ്ടാകുന്ന പ്രധാന അസംക്രമണ രോഗങ്ങൾ- കരൾ സിറോസിസ് (Liver Cirrhosis), കരളിന്റെ അർബുദം (Liver Cancer), പാൻക്രിയാറ്റൈറ്റിസ് (Pancreatitis), ഉയർന്ന രക്തസമ്മർദ്ദം, ഹൃദ്രോഗം. കേരളത്തിലെ ആശുപത്രികളുടെ ഒരു വലിയ ഭാഗം ഈ രോഗങ്ങളാൽ ബാധിതരായ രോഗികളാണ്.

ആത്മഹത്യ, അപകടങ്ങൾ, ആരോഗ്യ ആഘാതം

ഇതര സംസ്ഥാനങ്ങളെ അപേക്ഷിച്ച് കേരളത്തിൽ ഉയർന്ന ആത്മഹത്യാനിരക്കാണുള്ളത്. മദ്യ ഉപയോഗം വിഷാദവും ഉത്കണ്ഠയും തീവ്രമാക്കുന്നതിനോടൊപ്പം ആത്മഹത്യക്കും കാരണമാകുന്നു. ബാറുകളുടെ സമയദൈർഘ്യം വർദ്ധിപ്പിക്കുന്നത് മദ്യ ഉപഭോഗകരുടെ എണ്ണം കൂട്ടും. കേരളത്തിൽ മദ്യപാനത്തിനും മയക്കുമരുന്നിനും അടിമപ്പെട്ടവരെ ചികിത്സിക്കുന്നതിനായി പ്രവർത്തിക്കുന്ന 'വിമുക്തി' കേന്ദ്രങ്ങളുണ്ടെങ്കിലും ഈ അമിതഭാരവും സൗകര്യങ്ങളുടെ ദൗർബല്യവും ഇപ്പോഴും അടിയന്തിരമായി പരിഹരിക്കേണ്ടിയിരിക്കുന്നു.

മദ്യപാനം മൂലം കേരളത്തിൽ റോഡപകടങ്ങൾ വർദ്ധിക്കുന്നു. റോഡുകളുടെ അപര്യാപ്തതയും ഉയർന്ന വാഹനസാന്ദ്രതയ്ക്കൊപ്പം മദ്യപാനവും പ്രതിരോധിക്കാവുന്ന മരണങ്ങളാണ് ഉണ്ടാകുന്നത്. നിയമനടപടികളും ബോധവൽക്കരണ പ്രചരണങ്ങ ളും മാത്രം പോരാ; 'ലഭ്യത' ഇത് നിർണ്ണയിക്കുന്ന പ്രധാന കാരണങ്ങളിലൊന്നാണ്.

കുടുംബം, സ്ത്രീകൾ, കുട്ടികൾ

മദ്യ ഉപഭോഗം കുടുംബങ്ങളിൽ വലിയ തോതിലുള്ള സാമ്പത്തിക പ്രതിസന്ധി സൃഷ്ടിക്കുന്നു. ഭക്ഷണം, വിദ്യാഭ്യാസം, പ്രതിരോധ ആരോഗ്യ സേവനങ്ങൾ എന്നിവയ്ക്കുള്ള പണം ഇതിനായി വിനിയോഗിക്കേണ്ടിവരുന്നു. ആവർത്തിച്ചുള്ള ആശുപത്രിവാസം, ദീർഘകാല ചികിത്സാചെലവ് എന്നിവ ദാരിദ്ര്യത്തിലേക്ക് തള്ളിവിടുന്നു. കുറഞ്ഞ വരുമാനമുള്ള കുടുംബങ്ങളുടെ ആദായത്തിന്റെ വലിയ പങ്ക് മദ്യ ഉപഭോഗത്തിനായി ആവശ്യമായി വരും- സുസ്ഥിര വികസന പദ്ധതിയുടെ ഉപലക്ഷ്യം 3.8-നെ ഇത് സാരമായി ബാധിക്കുന്നു.

മദ്യാശ്രിതരുടെ പങ്കാളികൾ

പ്രധാനമായും സ്ത്രീകൾ- ഗാർഹികപീഡനം, ലൈംഗികാതിക്രമം, മാനസിക സംഘർഷം എന്നിവ വളരെ കൂടുതലായി അനുഭവിക്കുന്നു. ഇത്തരം പ്രശ്നങ്ങൾക്ക് സാക്ഷ്യം വഹിക്കുന്ന കുട്ടികളിൽ പല തരം മാനസിക പ്രശ്നങ്ങളുണ്ടാകും. ഇത്തരം പ്രതിസന്ധികൾ ഭാവിയിൽ ഇവർക്കിടയിൽ ലഹരി ഉപഭോഗം വർദ്ധിക്കുന്നതിനും വിദ്യാഭ്യാസ പ്രതിസന്ധിക്കും കാരണമാകുന്നു.

കേരളത്തിൽ മദ്യാസക്തി, SDG 5 (ലിംഗസമത്വം), SDG 10 (അസമത്വം കുറയ്ക്കൽ) എന്നിവയെ സാര മായി ബാധിക്കുന്നത് മുഖ്യധാരാ നയചർച്ചകളിൽ പലപ്പോഴും ശ്രദ്ധിക്കപ്പെടാതെ പോകുന്നു.

ധാർമ്മികതയും നയവും

സർക്കാരിന്റെ പൊതുജനാരോഗ്യ ലക്ഷ്യങ്ങൾ കൈവരിക്കുവാൻ 14,000 കോടിയിലധികം ലഭിക്കുന്ന മദ്യ നികുതി ഉപയോഗിക്കുന്നത് ചർച്ച ചെയ്യേണ്ടിയിരിക്കുന്നു. ദീർഘകാലത്തെ പൊതുജനാരോഗ്യത്തിന് ഹ്രസ്വകാല വരുമാന മാർഗ്ഗമായി മദ്യക്കച്ചവടം സ്വീകരിക്കുന്നത് ധാർമ്മിക പോരായ്മ മാത്രമാണ്. ദുർബലരെ ചൂഷണം ചെയ്യുക എന്നത് നീതിയല്ല.

ഒരു ഭരണകൂടത്തിന്റെ ഖജനാവ് മദ്യ വില്പനയുമായി അഭേദ്യമായി ബന്ധപ്പെട്ടിരിക്കുന്നത് ഒരു വലിയ വെല്ലുവിളിയുടെ മാറ്റൊലി കൂടിയാണ്. SDG 3-ന്റെ ലക്ഷ്യങ്ങൾ കൈവരിക്കണമെങ്കിൽ മദ്യലഭ്യത വർദ്ധിപ്പിക്കുന്ന നയങ്ങൾ പുനഃപരിശോധിക്കു കയും ജനാരോഗ്യകേന്ദ്രീകൃതമായ ഭരണസമ്പ്രദായം ഉറപ്പുവരുത്തുകയും ചെയ്യേണ്ടത് അനിവാര്യമാണ്.

READ: വേണം, നമുക്കൊരു
ആരോഗ്യകരമായ വാർദ്ധക്യം

കാലാവസ്ഥാമാറ്റങ്ങളുടെ ആരോഗ്യ പ്രത്യാഘാതങ്ങൾ

മാനസികാരോഗ്യത്തിലെ
ചികിത്സാവൈമുഖ്യം:
ഗൗരവശ്രദ്ധ പതിയേണ്ട മേഖല

ലിംഗനീതിയും പൊതുജനാരോഗ്യവും:
ജൈവമായ വൈവിധ്യങ്ങൾക്കപ്പുറം

പുത്തൻ പകർച്ചവ്യാധികൾ
ആരോഗ്യമേഖലയെ കണ്ണുരുട്ടുമ്പോൾ

പൊതുജനാരോഗ്യം
എങ്ങനെ ആസൂത്രണം ചെയ്യാം?

ഏകലോകം
ഏകാരോഗ്യം

പൊതുജനാരോഗ്യം: കേരളത്തിലെ വികാസവും ചരിത്രപശ്ചാത്തലവും

രക്തദാനവും സുരക്ഷയും: അറിഞ്ഞിരിക്കേണ്ട കാര്യങ്ങൾ

സ്റ്റെതസ്കോപ്പിൽ
ചരിത്രത്തിന്റെ
ഹൃദയതാളം

ലൈംഗികതയുടെ
സാമൂഹികവശം:
ഇന്ത്യയിൽ പുതുതായി
എന്താണ് സംഭവിക്കുന്നത്?

▮

‘ IMA നമ്മുടെ ആരോഗ്യം’ മാസികയുടെ വരിക്കാരാകാം