നിങ്ങൾ ഈ ലേഖനം വായിച്ചുകൊണ്ടിരിക്കുമ്പോൾ, നട്ടെല്ലിന് അസ്വസ്ഥത അനുഭവപ്പെടാത്ത ഒരു പ്രത്യേക രീതിയിൽ ഇരിക്കാൻ ശ്രമിക്കുകയാണോ? എങ്കിൽ നിങ്ങൾ ഒറ്റയ്ക്കല്ല. ലോകജനസംഖ്യയുടെ 80 ശതമാനത്തോളം ആളുകൾ ജീവിതത്തിൽ എപ്പോഴെങ്കിലും കഠിനമായ നട്ടെല്ല് വേദന (Low Back Pain) അനുഭവിക്കുന്നവരാണ് എന്നാണ് കണക്കുകൾ സൂചിപ്പിക്കുന്നത്.
‘‘എനിക്ക് ശസ്ത്രക്രിയ വേണ്ടിവരുമോ?'' എന്ന ഭയത്തോടെയാണ് ഭൂരിഭാഗം രോഗികളും ഡോക്ടറുടെ അടുത്തെത്തുന്നത്. മിക്കവാറും സന്ദർഭങ്ങളിൽ അതിന്റെ ഉത്തരം ''വേണ്ട'' എന്നാണ്. നിങ്ങളുടെ നട്ടെല്ല് വേദനയുടെ യഥാർത്ഥ കാരണങ്ങൾ എന്താണെന്നും, എപ്പോൾ ഗൗരവമായി കാണണമെന്നും എപ്പോഴാണ് ശസ്ത്രക്രിയ വേണ്ടിവരികയെന്നും ശസ്ത്രക്രിയ കൂടാതെതന്നെ നമുക്ക് എങ്ങനെ ഇതിനെ പ്രതിരോധിക്കാമെന്നും വിശദീകരിക്കുവാനാണ് ശ്രമിക്കുന്നത്.
ഭാഗം 1: ശരീരത്തിലെ 'ഷോക്ക് അബ്സോർബർ' സംവിധാനം:
നട്ടെല്ലിന്റെ പ്രവർത്തനം മനസ്സിലാക്കാം.
നിങ്ങളുടെ നട്ടെല്ലിനെ വെറുമൊരു വടിയായല്ല, മറിച്ച് അത്യാധുനികമായ ഒരു സസ്പെൻഷൻ സിസ്റ്റമായി കാണുക. ഇതിൽ പ്രധാനമായും താഴെ പറയുന്നവ ഉൾപ്പെടുന്നു:
വെർട്ടിബ്രേ (Vertebrae): സുഷുമ്നാനാഡിയെ സംരക്ഷിക്കുന്ന ബലമുള്ള അസ്ഥികൾ.
ഡിസ്കുകൾ (Discs): അസ്ഥികൾക്കിടയിലുള്ള 'ഷോക്ക് അബ്സോർബറുകൾ'. ഉള്ളിൽ ജെല്ലി പോലെയുള്ള ദ്രാവകം അടങ്ങിയ ഇവയാണ് നിങ്ങളെ കുനിയാനും തിരിയാനും സഹായിക്കുന്നത്.
മസിലുകളും ലിഗമെന്റുകളും: നട്ടെല്ലിനെ നേരെ നിർത്താൻ സഹായിക്കുന്ന ശക്തമായ 'കേബിളുകൾ'.
എന്തുകൊണ്ടാണ്
വേദന തുടങ്ങുന്നത്?
മിക്ക നട്ടെല്ലുവേദനകളും പെട്ടെന്നുണ്ടാകുന്ന അപകടങ്ങൾകൊണ്ടല്ല സംഭവിക്കുന്നത്. വർഷങ്ങളായുള്ള തെറ്റായ ഇരിപ്പ് രീതി, അമിതഭാരം, അമിതമായ ആയാസം എന്നിവമൂലം ഡിസ്കുകളിലെ ജലാംശം നഷ്ടപ്പെടുകയും അവയുടെ ബലം കുറയുകയും ചെയ്യുന്നു (Degenerative Disc Disease). ഡിസ്കുകൾ തകരാറിലാകുമ്പോൾ അസ്ഥികൾ തമ്മിൽ അടുക്കുകയും വേദന ഉണ്ടാക്കുന്ന ഞരമ്പുകൾ ഉരസുകയും നട്ടെല്ലിനെ താങ്ങിനിർത്താൻ പേശികൾക്ക് അമിതമായി ജോലി ചെയ്യേണ്ടിവരികയും ചെയ്യുന്നു. സാധാരണ ഒരുഭാഗം ഉയർത്തുമ്പോൾ പെട്ടെന്ന് അനുഭവപ്പെടുന്ന വേദന യഥാർത്ഥത്തിൽ കാലങ്ങളായി ഉള്ളിൽ നടന്നുകൊണ്ടിരിക്കുന്ന ഈ തേയ്മാനത്തിന്റെ പ്രതിഫലനമാണ്.
ഭാഗം 2: ചുവപ്പ് സിഗ്നലുകൾ (Red Flags):
എപ്പോഴാണ് നട്ടെല്ല് വേദന ഗൗരവമായി കാണേണ്ടത്?
ഭൂരിഭാഗം നട്ടെല്ല് വേദനകളും പേശികളിലോ സന്ധികളിലോ ഉള്ള പ്രശ്നങ്ങൾ മാത്രമാണ്. ഇത് വിശ്രമം വഴിയും ലഘുവായ വ്യായാമം വഴിയും ഭേദമാകും. എന്നാൽ പുറത്തേക്ക് തള്ളിയ ഡിസ്ക്കുകൾ ഞരമ്പുകളെയോ, സുഷുമ്നയേയോ ഞെരുക്കുമ്പോൾ കാലുകളിലേക്ക് പടരുന്ന വേദന ഉണ്ടാവാം. ഞരമ്പുകളെ ബാധിക്കുന്ന ചില ലക്ഷണങ്ങളെ 'റെഡ് ഫ്ളാഗുകൾ' ആയി സർജന്മാർ കാണുന്നു.
താഴെ പറയുന്ന ലക്ഷണങ്ങൾ ഉണ്ടെങ്കിൽ ഉടൻ ചികിത്സ തേടുക.
1. നട്ടെല്ല് വേദന കാലുകളിലേക്ക് പടരുന്നത്.
2. കാലിലേക്ക് വരുന്ന തരിപ്പും മരവിപ്പും. സ്പർശനശേഷി ഇല്ലാതാവുന്നതും.
3.കാലുകൾക്കോ കാൽ വിരലുകൾക്കോ ബലക്കുറവ് അനുഭവപ്പെടുക. ചെരിപ്പ് കാലിൽനിന്ന് അഴിഞ്ഞുപോവുക, നടക്കുമ്പോൾ വേച്ചുപോവുക അല്ലെങ്കിൽ പാദം തൂങ്ങിപ്പോവുക (Foot drop).
4.അതികഠിനമായ വേദന: വേദനകാരണം ഉറക്കത്തിൽനിന്ന്എഴുന്നേല്ക്കേണ്ടി വരിക. വേദനയോടൊപ്പം പനി വരിക: ശരീരഭാരം പെട്ടെന്ന് കുറയുക. ഇത് അണുബാധയുടെ ലക്ഷണമാകാം.
5.മുൻപ് കാൻസർ വന്നിട്ടുള്ളവരിൽ വേദന ഉണ്ടാകുക.
അടിയന്തരമായി സർജറി ചെയ്യേണ്ട
ലക്ഷണങ്ങൾ
1. കാലുകളുടെ തളർച്ച: വേഗത്തിൽ വഷളാകുന്ന കാലുകളുടെ ബലക്കുറവ്.
2.മരവിപ്പ്: ഗുഹ്യഭാഗത്തോ തുടകളുടെ ഉൾഭാഗത്തോ അനുഭവപ്പെടുന്ന മരവിപ്പ്.
3. നിയന്ത്രണം നഷ്ടപ്പെടുക: മലമൂത്രവിസർജ്ജനത്തിൽ പെട്ടെന്നുണ്ടാകുന്ന നിയന്ത്രണമില്ലായ്മ.
നിങ്ങളുടെ വേദന നട്ടെല്ലിന്റെ ഭാഗത്ത് മാത്രമാണെങ്കിൽ (കാലിലേക്ക് വേദന പോകുന്നില്ലെങ്കിൽ), അത് പേശികൾ സംബന്ധമായ പ്രശ്നമാകാനാണ് സാധ്യത. ഇതിന് ശസ്ത്രക്രിയ ആവശ്യമില്ല.
വേദനയുടെ ഘട്ടങ്ങൾ
നട്ടെല്ല് വേദന സാധാരണയായി മൂന്നു ഘട്ടങ്ങളിലൂടെയാണ് കടന്നുപോകുന്നത്.
അക്യൂട്ട് ഫേസ് (1 മുതൽ 4 ആഴ്ച വരെ):
പെട്ടെന്നുണ്ടാകുന്ന കഠിനമായ വേദന. നീർക്കെട്ടും പേശികൾ വലിയുന്നതും ഈ ഘട്ടത്തിലാണ്.
സബ് അക്യൂട്ട് ഫേസ് (4 മുതൽ 12 ആഴ്ച വരെ):
വേദന കുറഞ്ഞുതുടങ്ങുമെ ങ്കിലും ആ ഭാഗം സെൻസിറ്റീവ് ആയിരിക്കും. ഈ ഘട്ടത്തിൽ ഫിസിയോതെറാപ്പി ചെയ്യുന്നത് വേദന വിട്ടുമാറാത്ത അവസ്ഥയിലേക്ക് പോകുന്നത് തടയാൻ സഹായിക്കും.
ക്രോണിക് ഫേസ് (12 ആഴ്ചയ്ക്ക് മുകളിൽ):
വേദന 3 മാസത്തിലധികം നീണ്ടുനിൽക്കുകയാണെങ്കിൽ, അത് ഞരമ്പുകളുടെയും മസ്തിഷ്കത്തിന്റെ വേദന അറിയുന്ന ഭാഗത്തിന്റെയും പ്രവർത്തനത്തെ ബാധിക്കാം. പരിക്ക് ഭേദമായി തുടങ്ങിയാലും ഞരമ്പുകൾ വേദനയുടെ സൂചനകൾ നൽകിക്കൊണ്ടിരിക്കും.
ശസ്ത്രക്രിയ എപ്പോൾ വേണം? എപ്പോൾ വേണ്ട?
ശസ്ത്രക്രിയ എന്നത് നട്ടെല്ല് വേദനയ്ക്കുള്ള ഒരു മാന്ത്രിക പരിഹാരമാണെന്നത് ഒരു തെറ്റിദ്ധാരണയാണ്. സത്യത്തിൽ, കാലുകളിലേക്ക് പടരുന്ന വേദനയ്ക്ക് (Sciatica) ശസ്ത്രക്രിയ വളരെ ഫലപ്രദമാണ്, എന്നാൽ നട്ടെല്ല് വേദനയ്ക്ക് (Back pain)ഇത് എപ്പോഴും പരിഹാരമാകണമെന്നില്ല.
എപ്പോഴാണ് ശസ്ത്രക്രിയ നിർദ്ദേശിക്കുന്നത്?
ഞരമ്പുകളിൽ അമിതമായ സമ്മർദ്ദം അനുഭവപ്പെടുമ്പോഴാണ് (Mechanical Compression) ശസ്ത്രക്രിയ നിർദ്ദേശിക്കുന്നത്. ഉദാഹരണത്തിന്, ഒരു ഡിസ്ക് തെന്നിമാറുകയും (Herniated Disc) അത് ഞരമ്പിനെ അമർത്തുകയും ചെയ്യുമ്പോൾ ആ മർദ്ദം നീക്കം ചെയ്യേണ്ടത് അനിവാര്യമാണ്. കാലുകളിലെ വേദനയും മരവിപ്പും മാറ്റുന്നതിനും ഞരമ്പുകൾക്ക് സ്ഥിരമായ തകരാർ സംഭവിക്കുന്നത് തടയാനുമാണ് ഇത് ചെയ്യുന്നത്.
വേദനയ്ക്ക് കാരണം മറ്റു രോഗങ്ങൾ ആണെങ്കിൽ. ഉദാ: നട്ടെല്ല് സ്ഥാനം തെറ്റുക (Spondylolisthesis), നട്ടെല്ലിനോ ഡിസ്കിനോ അണുബാധ (Spondylodiscitis) സുഷുമ്നയ്ക്ക് ചുറ്റും നിന്ന് ഞെരുക്കം ഉണ്ടാകുക (Spinal Canal Stenosis), കാൻസർ എന്നീ അവസ്ഥകളിൽ ശസ്ത്രക്രിയ ആവശ്യമായി വരാം.
ആധുനിക ശസ്ത്രക്രിയാരീതികൾ (Minimally Invasive) വഴി ചെറിയ മുറിവുകളിലൂടെയും എൻഡോസ്കോപ്പുകളുടെ സഹായത്തോടെയും (Key hole) ഇത് ചെയ്യാൻ സാധിക്കും. എന്നാൽ ചില അസുഖങ്ങൾക്കെങ്കിലും തുറന്ന ശസ്ത്രക്രിയയും (Open surgery) വേണ്ടിവരാറുണ്ട്. പ്രായാധിക്യം മൂലമുള്ള സ്വാഭാവിക തേയ്മാനങ്ങൾ മാത്രമാണ് എംആർഐയിൽ കാണുന്നതെങ്കിൽ ശസ്ത്രക്രിയ സഹായകമാകില്ല.
പ്രതിരോധത്തിനുള്ള
സർജന്റെ നിർദ്ദേശങ്ങൾ
ഇന്നുമുതൽ നിങ്ങൾക്ക് തുടങ്ങാവുന്ന കാര്യങ്ങൾ:
1. ശരീരത്തിന്റെ 'ബെൽറ്റ്' സിസ്റ്റം ബലപ്പെടുത്തുക (Core Strength): സിക്സ് പാക്ക് ഉണ്ടാക്കുന്നതിലല്ല, മറിച്ച് നട്ടെല്ലിന് താങ്ങായി നിൽക്കുന്ന ആന്തരികപേശികൾക്ക് (Transverse Abdominis) ബലം നൽകുന്നതിലാണ് കാര്യം. പ്ലാങ്ക് (Plank) പോലുള്ള വ്യായാമങ്ങൾ ശീലിക്കുക.
2. 30 മിനിറ്റ് നിയമം തുടർച്ചയായ ഇരിപ്പ് നട്ടെല്ലിന് ഹാനികരമാണ്. ഇരിക്കുമ്പോൾ ഡിസ്കുകളിൽ അനുഭവപ്പെടുന്ന സമ്മർദ്ദം നിൽക്കുന്നതിനേക്കാൾ 40 ശതമാനം കൂടുതലാണ്. കൂടാതെ നട്ടെല്ല് അനങ്ങുമ്പോഴാണ് രക്തത്തിൽ നിന്ന് പോഷകങ്ങൾ ഡിസ്ക്കുകളിലേക്ക് എത്തുന്നത്. അതിനാൽ ഓരോ 30 മിനിറ്റിലും എഴുന്നേറ്റ് നിൽക്കുകയും ലഘുവായി സ്ട്രെച്ച് ചെയ്യുകയും ചെയ്യുക.
3. പുകവലി ഉപേക്ഷിക്കുക: പുകവലി നട്ടെല്ലിനെ ബാധിക്കുമെന്ന് കേൾക്കുമ്പോൾ പലരും അത്ഭുതപ്പെടാറുണ്ട്. നിക്കോട്ടിൻ ഡിസ്കുകളിലേക്കുള്ള രക്തയോട്ടം കുറയ്ക്കുകയും അവ വേഗത്തിൽ നശിക്കാൻ കാരണമാവുകയും ചെയ്യുന്നു.
4. അമിതഭാരം കുറയ്ക്കുക: വയറിലെ അമിതഭാരം ശരീരത്തിന്റെ സന്തുലിതാവസ്ഥയെ ബാധിക്കുകയും നട്ടെല്ലിന് അമിത സമ്മർദ്ദം നൽകുകയും ചെയ്യുന്നു. 3–4 കിലോ ഭാരം കുറയ്ക്കുന്നതുപോലും നട്ടെല്ലിന് വലിയ ആശ്വാസം നൽകും.
മനുഷ്യന്റെ നട്ടെല്ല് അവിശ്വസനീയമാംവിധം കരുത്തുള്ളതാണ്. ആയുഷ്ക്കാലം മുഴുവൻ ചലിക്കാനും ഭാരം വഹിക്കാനുമാണ് അത് രൂപകല്പന ചെയ്തിരിക്കുന്നത്. പ്രത്യേക ഞരമ്പുപ്രശ്നങ്ങൾക്ക് ശസ്ത്രക്രിയ ആവശ്യമാണെങ്കിലും, ഭൂരിഭാഗം നട്ടെല്ല് വേദനകൾക്കും ശരിയായ ചലനം, കൃത്യമായ ഇരിപ്പ് രീതി, വ്യായാമം, ക്ഷമ എന്നിവയാണ് യഥാർത്ഥ മരുന്ന്.
വേദന സഹിക്കവയ്യാതെ വരുന്നതുവരെ കാത്തുനിൽക്കാതെ, ഇന്നുതന്നെ നിങ്ങളുടെ നട്ടെല്ലിനെ പരിരക്ഷിക്കാൻ തുടങ്ങുക. എഴുന്നേറ്റ് നിൽക്കൂ, സ്ട്രെച്ച് ചെയ്യൂ. നിങ്ങളുടെ നട്ടെല്ലിന് അർഹമായ കരുതൽ നൽകൂ.
Read
ബിരുദാനന്തര മെഡി. സീറ്റ്:
കട്ട് -ഓഫ് മാർക്കും
വാദപ്രതിവാദങ്ങളും
പ്രതിരോധിക്കാം,
ജപ്പാൻ മസ്തിഷ്കജ്വരം
സോഷ്യൽ മീഡിയ
ദുരുപയോഗം
മരണത്തിലേക്ക്
നയിക്കുമ്പോൾ
ശ്രദ്ധയിൽ പെടാതെ
പോവുന്ന ചില ഗർഭകാല
പൾമണോളജി
വിശേഷങ്ങൾ
ശ്വാസകോശ
അർബുദത്തിന്റെ
നൂതന ചികിത്സകൾ
വായുമലിനീകരണം
ഒരു ശ്വാസകോശവിഷയം
കൂടിയാണ്
ചുമ വരാൻ
കാത്തിരിക്കുന്ന
കുടുംബം
തൊഴിലിടങ്ങളും
ശ്വാസകോശ രോഗങ്ങളും;
അറിയാം, തടയാം
രക്തം തുപ്പുമ്പോൾ; അവഗണിക്കരുത്
ഈ ലക്ഷണം
ശ്വാസകോശ ചികിത്സയ്ക്ക്
പുതു ശ്വാസമേകുന്ന
Interventional
Pulmonology
പൾമണോളജി
ഇന്നലെ, ഇന്ന്, നാളെ
വെളിച്ചം
തെളിയിക്കുന്ന
കൈകൾ
▮
‘ IMA നമ്മുടെ ആരോഗ്യം’ മാസികയുടെ വരിക്കാരാകാം
