ശ്വാസകോശാര്‍ബുദം
എങ്ങനെ പ്രതിരോധിക്കാം?

ഈ വർഷത്തെ ലോക ശ്വാസകോശ അർബുദ ദിനത്തിന്റെ പ്രധാന പ്രമേയം "ശ്വാസകോശാർബുദത്തിനെതിരെ ഒന്നിക്കുക" എന്നതായിരുന്നു. ഓരോ രണ്ടു മിനിറ്റിലും ഒരു പുതിയ രോഗിക്ക് ശ്വാസകോശ അർബുദം ഉണ്ടെന്ന് കണ്ടെത്തപ്പെടുന്നു എന്നാണ് കണക്ക്. അതായത് ഒരു ദിവസം 643 പേർക്ക്.

ആഗോളതലത്തിൽ കാൻസർ മൂലമുണ്ടാകുന്ന മരണങ്ങളിൽ ഒന്നാമതാണ് ശ്വാസകോശാർബുദം. ഏതാണ്ട് 18 ലക്ഷം ആൾക്കാരാണ് കഴിഞ്ഞവർഷം മാത്രം ഈ രോഗം മൂലം മരിച്ചത്. മരണസംഖ്യയിൽ തൊട്ടുതാഴെയുള്ള കുടൽ അനുബന്ധ കാൻസറിന്റെ ഇരട്ടിയലധികമാണ് ശ്വാസകോശ കാൻസർ മൂലമുണ്ടാകുന്ന മരണങ്ങൾ എന്നതാണ് ഗൗരവകരമായ കാര്യം. അതിനാൽ ഈ രോഗത്തെപ്പറ്റിയും, അർബുദ സാധ്യതകൾ കുറയ്ക്കാനുള്ള പ്രതിരോധ മാർഗ്ഗങ്ങളെ പ്പറ്റിയുമുള്ള വ്യക്തമായ അവബോധം കാലഘട്ടത്തിന്റെ അനിവാര്യതയാണ്.

ശ്വാസകോശ കാൻസർ രണ്ടുതരം

അർബുദ കോശങ്ങളുടെ വ്യതിയാനമനുസരിച്ച് ശ്വാസകോശാർബുദം രണ്ടു പ്രധാന ഗ്രൂപ്പുകളായി തിരിച്ചിരിക്കുന്നു:

നോൺ സ്മാൾ സെൽ ലംഗ് കാൻസറും സ്മാൾ സെൽ ലംഗ് കാൻസറും. ഇവയിൽ മറ്റ് ഉപവിഭാഗങ്ങളുമുണ്ട്. അവ കുറച്ച് സങ്കീർണ്ണമായതിനാൽ ഇവിടെ വിവരിക്കുന്നില്ല. ശ്വാസകോശ കാൻസറുകളുടെ 85 ശതമാനത്തോളവും നോൺ സ്‌മാൾ സെൽ ലംഗ് കാൻസറുകളാണ്.

കാരണങ്ങൾ

പുകവലി:

പുകവലിയാണ് ശ്വാസകോശാർബുദത്തിലേക്ക് നയിക്കുന്ന പ്രധാന വില്ലൻ. സിഗരറ്റ് പുകയിൽ കാൻസറിനു കാരണമാകുന്ന 5000-ത്തോളം രാസവസ്‌തുക്കൾ (കാർസി നോജനുകൾ) അടങ്ങിയിരിക്കുന്നു. ഇവ സിഗരറ്റ് പുകയിലൂടെ ശ്വാസകോശത്തിനുള്ളിലെത്തുകയും, കാൻസർ പ്രതിരോധ ജീനുകളെ തകരാറിലാക്കുകയും ചെയ്യുന്നു. ഇപ്രകാരം തുടർച്ചയായുണ്ടാകുന്ന ജനിതക തകരാറുകൾ കോശങ്ങളുടെ അനിയന്ത്രിത വളർച്ചയ്ക്കു കാരണമാകുകയും, അതുവഴി അർബുദ കോശങ്ങളായും രൂപാന്തരപ്പെടുന്നു.

പുകവലിക്കുന്നയാൾ വലിച്ചുവിടുന്ന പുക ശ്വസിക്കുമ്പോഴും (Second hand smoke / Passive smoke) അർബുദത്തിലേക്ക് നയിക്കപ്പെടാനുള്ള സാധ്യതയുണ്ട്. അതായത് പുകവലിക്കുന്നയാൾക്കും, അടുത്തിടപഴകുന്നവർക്കും ഒരുപോലെ അപകടകരമായ സ്ഥിതി വിശേഷമാണിത്.

അന്തരീക്ഷ മലിനീകരണം:

വർദ്ധിച്ചുവരുന്ന അന്തരീക്ഷ മലിനീകരണം (Outdoor & Indoor air pollution) കോശാർബുദത്തിന് കാരണമാകുന്നു.

വാഹനങ്ങളിൽ നിന്നും ഫാക്‌ടറികളിൽ നിന്നും നിർഗമിക്കുന്ന പുക, ഇന്ധനങ്ങൾ കത്തുമ്പോഴുണ്ടാകുന്ന പുകയും, പൊടിപടലങ്ങളും, പാർട്ടിക്കുലേറ്റ് മാറ്റർ (Particulate matter) എന്ന ചെറുകണികകളായി ശ്വാസകോശങ്ങളിലെത്തുകയും, മുൻപറഞ്ഞ പ്രകാരം ജനിതകവ്യതിയാനത്തിലേക്കും, അതുവഴി ശ്വാസകോശാർബുദം ഉണ്ടാകാനുമുള്ള സാധ്യതയുണ്ട്.

ജനിതക മാറ്റങ്ങൾ:

കുടുംബത്തിലോ, അടുത്ത ബന്ധുക്കൾക്കോ ശ്വാസകോശാർബുദമുണ്ടായിട്ടുണ്ടങ്കിൽ അത് ശ്വാസകോശ കാൻസറിന്റെ സാധ്യത വർദ്ധിപ്പിക്കും. ഡി.എൻ.എയിലൂടെ ഒരാൾക്ക് ലഭിക്കുന്ന ഘടകങ്ങൾ ചില പ്പോഴൊക്കെ ശ്വാസകോശങ്ങളിൽ ചില മാറ്റങ്ങൾക്ക് കാരണമാകും. ഈ വ്യതിയാനങ്ങൾ ചിലപ്പോൾ അർബുദകോശങ്ങളുടെ വളർച്ചയ്ക്കു കാരണമാകുകയും ചെയ്യും. അതുകൊണ്ടുതന്നെ മറ്റ് ചില അസുഖങ്ങളെപോലെ, ശ്വാസകോശകാൻസറും, ജനിതകപരമായി ലഭിക്കാനുള്ള സാധ്യതയുണ്ട്.

മറ്റു കാർസിനോജനുകൾ:

അർബുദകോശങ്ങളുടെ വളർച്ചയിലേക്ക് നയിക്കുന്ന പദാർത്ഥങ്ങളോ, രാസവസ്തുക്കളോ പ്രോട്ടീനുകളോ ആണ് കാർസിനോജനുകൾ. റാഡോൺ എന്ന ഒരു വാതകം, തൊഴിലിടങ്ങളിലേയും ഫാക്‌ടറികളിലേയും ചില കെമിക്കലുകളായ നിക്കൽ, ആഴ്സനിക്, ആസ്ബസ്റ്റോസ് എന്നിവ ശ്വാസകോശാർ ബുദമുണ്ടാക്കുന്ന ചില കാർസിനോജനുകളാണ്. അനിയന്ത്രിത അളവിലേൽക്കുന്ന റേഡിയേഷനുകളും കാർസിനോജനുകളായി വർത്തിക്കുന്നു.

ചിലയിനം ശ്വാസകോശ രോഗങ്ങൾ

ശ്വാസകോശം ചുരുങ്ങുന്ന പൾമണറി ഫൈബ്രോസിസ്, ശ്വാസകോശവീക്കം അഥവാ COPD എന്നീ രോഗാവസ്ഥകൾ ഉള്ളവരിൽ ശ്വാസകോശാർബുദസാധ്യത ഇതര ആളുകളേക്കാൾ കൂടുതലായി കണ്ടുവരുന്നു.

രോഗലക്ഷണങ്ങൾ:

പലപ്പോഴും നാം ശ്രദ്ധിക്കാതെ പോകുന്ന ചില ആദ്യകാല ലക്ഷണങ്ങളുണ്ട്. ചിലരിലെങ്കിലും പ്രാരംഭഘട്ടത്തിൽ തന്നെ രോഗം തിരിച്ചറിഞ്ഞു ചികിത്സയെടുക്കാൻ ഈ ലക്ഷണങ്ങൾ സഹായകരമാകും.

രോഗനിർണ്ണയം

മേൽപ്പറഞ്ഞ ലക്ഷണങ്ങളിലൂടെയോ, എക് സ്‌റേയിൽ കാണപ്പെട്ട സംശയാസ്പദമായ വ്യതിയാനങ്ങളുടെയോ അടിസ്ഥാനത്തിലാണ് തുടർ പരിശോധനകൾ നിർദ്ദേശിക്കുന്നത്.

സി.ടി. ചെസ്റ്റ്: കോൺട്രാസ്റ്റ് മരുന്നു നൽകിയിട്ടുള്ള സി.ടി സ്‌കാൻ രോഗനിർണ്ണയത്തിൽ വളരെ പ്രധാനമാണ്.

ട്യൂമർ മാർക്കറുകൾ എന്ന ചിലയിനം രക്തപരിശോധനകൾ രോഗനിർണ്ണയത്തിനു സഹായകമാകാറുണ്ട്.

സി ഇ എ (കാർസിനോ എംബ്രിയോണിക് ആന്റിജൻ), ന്യൂറോൺ സ്പെസിഫിക് ഇനോലേസ്, Squamous cell carcinoma Antigen തുടങ്ങിയവയാണ് ശ്വാസകോശ കാൻസർ രോഗികളിൽ കാണപ്പെടാറുള്ള ട്യൂമർ മാർക്കറുകൾ.

കാൻസറിന്റെ വളർച്ച മറ്റിടങ്ങളിലേക്ക് വ്യാപിച്ചിട്ടുണ്ടോ എന്നറിയാൻ PET CT പരിശോധന ആവശ്യമായി വരാറുണ്ട്.

അർബുദ സമാനമായ വളർച്ച കണ്ടെത്തിയാൽ അതിന്റെ ബയോപ്‌സി പരിശോധനയിലൂടെയാണ് കാൻസർ സ്ഥിരീകരണം നടത്തുന്നത്.

ശ്വാസനാളികൾക്കുള്ളിലാണ് വളർച്ചയെങ്കിൽ ബ്രോങ്കോ സ്കോപ്പി വഴിയുള്ള സാമ്പിൾ ശേഖരിച്ചും (Broncho alveolar lavage) ബയോപ്‌സി പരിശോധനയിലൂടെയും (Endo bronchial/Trans bronchial) രോഗം നിർണ്ണയിക്കുന്നു.

ശ്വാസനാളികൾക്കിരുവശത്തുമുള്ള കഴലകൾ/ ലിംഫ് ഗ്രന്ഥികൾക്ക് വീക്കം കാൻസറിന്റെ ഭാഗമായി ഉണ്ടാകാറുണ്ട്. അതുകൊണ്ടുതന്നെ അവയിൽ നിന്നും സാമ്പിൾ എടുത്ത് പരിശോധിച്ചും രോഗം നിർണ്ണയിക്കാൻ കഴിയും. അതിനായി EBUS എന്ന നൂതന സാങ്കേതിക വിദ്യ ഉപയോഗപ്പെടുത്തുന്നുണ്ട്.

ശ്വാസകോശത്തിന്റെ ചുറ്റുമുള്ള ആവരണമായ പ്ലൂറൽ ക്യാവിറ്റിയിൽ നീർക്കെട്ട് ഉണ്ടാകുന്ന അവസ്ഥയും, കാൻസർ കുറച്ചു മൂർച്ഛിക്കുന്ന അവസ്ഥയിൽ കണ്ടുവരാറുണ്ട്. ആ ഫ്ളൂയിഡ് നീക്കം ചെയ്‌തുള്ള കോശ പരിശോധന (Cytology/Cytospin) ആവശ്യമായി വരാറുണ്ട്. അതോടൊപ്പം പ്ലൂറയുടെ ബയോപ്‌സി പരിശോധനയ്ക്കായി തൊറാക്കോസ്കോപ്പി എന്ന നൂതന സങ്കേതം ഉപയോഗപ്പെടുത്തുന്നു.

ശ്വാസകോശാർബുദം കുറച്ചു കൂടി മൂർച്ഛിച്ച ഘട്ടത്തിലാണെങ്കിൽ അർബുദകോശങ്ങൾ മറ്റ് ശരീരഭാഗങ്ങളിലേക്ക് വ്യാപിക്കാനുള്ള സാധ്യതയുണ്ട്; പ്രത്യേകിച്ച് കഴലകൾ അഥവാ ലിംഫ് ഗ്രന്ഥികളിലേക്ക്. അത്തരം സാഹചര്യങ്ങളിൽ കഴലകളുടെ ബയോപ്‌സി പരിശോധനയാണ് രോഗനിർണ്ണയം സാധ്യമാക്കുന്നത്.

ശ്വാസകോശാർബുദ പരിശോധന
(Lung cancer screening) ആർക്കൊക്കെ?

ശ്വാസകോശാർബുദം നേരത്തെ കണ്ടെത്താൻ എല്ലാവരും പതിവായി പരിശോധന നടത്തണമെന്നില്ല. രോഗസാധ്യത കൂടുതലുള്ള ചില വ്യക്തികളിലാണ് ഇത്തരം പരിശോധനകൾ കൂടുതൽ പ്രയോജനകരമാകുന്നത്.

പ്രത്യേകിച്ച് ദീർഘകാലമായി പുകവലിക്കുന്നവർക്കും, മുമ്പ് വർഷങ്ങളോളം പുകവലിച്ചിരുന്ന വർക്കും, ശ്വാസകോശാർബുദ സാധ്യത കൂടുതലാണ്. ഇവരിൽ രോഗലക്ഷണങ്ങൾ പ്രകടമാകുന്നതിന് മുമ്പുതന്നെ ശ്വാസകോശത്തിൽ ഉണ്ടാകുന്ന ചെറിയ മാറ്റങ്ങൾ കണ്ടെത്താൻ പ്രത്യേക തരം കുറഞ്ഞ വികിരണ അളവിലുള്ള നെഞ്ചിന്റെ കമ്പ്യൂട്ടർ ചിത്രീകരണ പരിശോധന (Low-dose CT) ഉപയോഗിക്കാറുണ്ട്. ഇത്തരം പരിശോധന അനുയോജ്യമാണോ എന്നത് പ്രായം, പുകവലിയുടെ ദൈർഘ്യം, ദിവസേന ഉപയോഗിച്ചിരുന്ന അളവ്, മറ്റ് ആരോഗ്യപ്രശ്നങ്ങൾ എന്നിവ വിലയിരുത്തിയ ശേഷമാണ് ഡോക്ടർ തീരുമാനിക്കുന്നത്.

അതിനാൽ, എല്ലാവർക്കും പരിശോധനയല്ല വേണ്ടത്; ശരിയായ വ്യക്തിക്ക്, ശരിയായ സമയത്ത്, ശരിയായ screening- അതാണ് പ്രധാനം. രോഗലക്ഷണങ്ങൾ ഇല്ലെങ്കിലും ഉയർന്ന അപകടസാധ്യതയുള്ളവർ ഇക്കാര്യം ഡോക്ടറുമായി ചർച്ച ചെയ്യുന്നത് രോഗം നേരത്തേ കണ്ടെത്താനും ചികിത്സാഫലം മെച്ചപ്പെടുത്താനും സഹായിക്കും.

ചികിത്സ

കാൻസർ കോശങ്ങളുടെ തരമനുസരിച്ചും, കാൻസറിന്റെ സ്റ്റേജനുസരിച്ചുമാണ് ചികിത്സ തീരുമാനിക്കുന്നത്.

ആരംഭദശയിലുള്ള ശ്വാസകോശ കാൻസറുകൾക്ക് സർജറിയാണ് പ്രധാന ചികിത്സാരീതി. വളർച്ചയുള്ള ഭാഗം നീക്കം ചെയ്യുന്നതിനോടൊപ്പം കീമോതെറാപ്പിയും റേഡിയേഷനും വേണ്ടി വരും. പക്ഷേ കാൻസർ കുറച്ചു മൂർച്ഛിക്കുന്ന ഘട്ടത്തിൽ പാലിയേറ്റീവ് ചികിത്സാരീതിയാണ് അവലംബിക്കുക.

ബയോ മാർക്കറുകൾ അടിസ്ഥാനമാക്കിയുള്ള ചികിത്സാരീതിയാണ് ഈ രംഗത്തെ നൂതന സങ്കേതം. കാൻസറുമായി ബന്ധപ്പെട്ട പ്രോട്ടീനുകൾ, ജീനുകൾ എന്നിവ കണ്ടെത്തുന്ന രീതിയാണ് ബയോമാർക്കർ പരിശോധന. കാൻസർ സാധ്യത കൂട്ടുന്ന ചിലയിനം മ്യൂട്ടേഷനുകൾ ഉണ്ടോ എന്ന് കണ്ടെത്താനും അതുവഴി മികച്ച കാൻസർ തെറാപ്പി ഓപ്ഷൻ നിർണ്ണയിക്കുന്നതിനും ഇതു സഹായകമാകും.

ടാർഗറ്റെഡ് തെറാപ്പികൾ, ഇമ്മ്യൂണോ തെറാപ്പികൾ എന്നിങ്ങനെയുള്ള നൂതന ചികിത്സാരീതികൾ ഇപ്രകാരമുള്ള ബയോ മാർക്കർ പരിശോധനയുടെ അടിസ്ഥാനത്തിൽ നിശ്ചയിക്കുന്നവയാണ്. അതുവഴി രോഗം കുറച്ചു തീവ്രമായ ഘട്ടത്തിൽ പോലും, ടാർഗറ്റെഡ് തെറാപ്പി നൽകുന്ന രോഗികൾക്ക് നിലവിലുള്ള സ്റ്റാൻഡേർഡ് തെറാപ്പിയിലുള്ള രോഗികളേക്കാൾ അതിജീവനശേഷിയും, താരതമ്യേന കുറഞ്ഞ പാർശ്വഫലങ്ങളും കണ്ടുവരുന്നു.

പ്രതിരോധ മാർഗ്ഗങ്ങൾ

ശ്വാസകോശാർബുദം ഇന്ന് ചികിത്സിക്കാൻ കഴിയുന്ന രോഗങ്ങളിൽ ഒന്നാണ്. എന്നാൽ ചികിത്സയുടെ വിജയവും രോഗിയുടെ അതിജീവനസാധ്യതയും രോഗം ഏത് ഘട്ടത്തിലാണ് കണ്ടെത്തുന്നത് എന്നതിനെ ആശ്രയിച്ചിരിക്കുന്നു. അതുകൊണ്ടുതന്നെ രോഗലക്ഷണങ്ങൾ അവഗണിക്കാതിരിക്കുക, ആവശ്യമായപ്പോൾ വൈദ്യോപദേശം തേടുക, അപകടസാധ്യതയുള്ളവർക്ക് സമയോചിതമായ പരിശോധന നടത്തുക എന്നിവ അത്യന്താപേക്ഷിതമാണ്.

ചുരുക്കത്തിൽ, ആരംഭദശയിലുള്ള കൃത്യമായ രോഗനിർണ്ണയമാണ് കാൻസർ ചികിത്സയുടെ ആണിക്കല്ല്. നൂതന ചികിത്സാ സംവിധാനങ്ങളുടെ ഫലപ്രാപ്‌തി നേരത്തേയുള്ള രോഗനിർണ്ണയത്തെ ആശ്രയിച്ചിരിക്കുന്നു.

ലോക ശ്വാസകോശാർബുദ ദിനവുമായി ബന്ധപ്പെട്ട് നമുക്ക് ഒരു പ്രതിജ്ഞയെടുക്കാം: ശ്വാസകോശാരോഗ്യത്തെ സംരക്ഷിക്കാം, ശ്വാസകോശാർബുദത്തെക്കുറിച്ചുള്ള ശരിയായ അറിവ് മറ്റുള്ളവരിലേക്കും എത്തിക്കാം, രോഗലക്ഷണങ്ങൾ അവഗണിക്കാതെ സമയബന്ധിതമായി ചികിത്സ തേടാം.

READ: പാമ്പുകടിയും
സി.പി.ആറും

ദുഃഖകരമായ
ഒരു ഓര്‍മ്മ

എലിപ്പനി:
ഒളിച്ചിരിക്കുന്ന
വെല്ലുവിളികള്‍

കൊതുക്, ചെള്ള് രോഗങ്ങള്‍

കോവിഡ്:
പഠിച്ച പാഠങ്ങളും
ഭാവിയിലേക്കുള്ള
തയ്യാറെടുപ്പും

നിപ്പ കേരളത്തിൽ:
അറിഞ്ഞതും
അറിയാത്തതുമായ കാര്യങ്ങൾ

മഴക്കാലവും
ശ്വാസകോശ
അണുബാധകളും:
കേരളം അറിയേണ്ടതും
കരുതേണ്ടതും

ജലജന്യ രോഗങ്ങൾ

ട്രോപ്പിക്കൽ പനികൾ:
കേരളം നേരിടുന്ന വെല്ലുവിളികളും
പ്രതിരോധ മാർഗങ്ങളും

മാറുന്ന കാലാവസ്ഥയും
പുതിയ രോഗാണുബാധകളും:
നാം എത്രത്തോളം തയ്യാറാണ്?

ഓർത്തില്ലെങ്കിലും...

പൊതുജനാരോഗ്യ നിയമം: മുട്ടയിട്ടാൽ മൊട്ട!

മനസ്സുകൊണ്ട് നാട്ടിലെത്തുമ്പോൾ;
പ്രവാസികളുടെ
ഓണാഘോഷം

ഓണാഘോഷത്തിന്റെ
മാനസികതലങ്ങൾ

‘IMA നമ്മുടെ ആരോഗ്യം’
പത്രാധിപർ സംസാരിക്കുന്നു

▮

‘ IMA നമ്മുടെ ആരോഗ്യം’ മാസികയുടെ വരിക്കാരാകാം