തിമിരം
ആ​ർക്കെല്ലാം വരാം,
എന്താണ് ചികിത്സ?

അന്ധതയുടെ ഗണ്യമായൊരു പങ്കിനും തിമിരമാണ് കാരണം. പ്രായാധിക്യവുമായി ബന്ധപ്പെട്ട തിമിരം പൂർണമായും തടയാൻ കഴിയുന്ന ഉറപ്പായ മാർഗമില്ല. എങ്കിലും ചില മുൻകരുതലുകൾ തിമിരം ഉണ്ടാകാനുള്ള സാധ്യത കുറയ്ക്കാനും അതിന്റെ വളർച്ച വൈകിക്കാനും സഹായിച്ചേക്കാം: ‘IMA നമ്മുടെ ആരോഗ്യം’ മാസികയിൽ ഡോ. അശോക വത്സല ടി.എ എഴുതിയ ലേഖനം.

ചികിത്സിച്ചു ഭേദമാക്കാവുന്ന കാഴ്ചക്കുറവിന്റെയും അന്ധതയുടെയും പ്രധാന കാരണങ്ങളിലൊന്നാണ് തിമിരം. ലോകമെമ്പാടുമുള്ള അന്ധതയുടെ ഗണ്യമായൊരു പങ്കിനും തിമിരമാണ് കാരണം.

എന്താണ് തിമിരം?

നമ്മുടെ കണ്ണിനകത്തെ സ്വാഭാവിക ലെൻസ് സുതാര്യമാണ്. പ്രകാശ രശ്മികളെ റെറ്റിനയിൽ കൃത്യമായി കേന്ദ്രീകരിച്ച് വസ്തുക്കളെ വ്യക്തമായി കാണാൻ ഈ ലെൻസ് സഹായിക്കുന്നു. പ്രായം കൂടുന്തോറും ലെൻസിലെ പ്രോട്ടീനുകൾക്ക് മാറ്റം സംഭവിക്കുകയും അവ കട്ടപിടിക്കുകയും ചെയ്യുന്നു. ഇതോടെ ലെൻസിന്റെ സുതാര്യത ക്രമേണ നഷ്ടപ്പെടുന്നു. ഈ അവസ്ഥയെയാണ് തിമിരം എന്നു വിളിക്കുന്നത്.

പ്രധാന ലക്ഷണങ്ങൾ

തുടക്കത്തിൽ കാര്യമായ ബുദ്ധിമുട്ടുകൾ അനുഭവപ്പെടണമെന്നില്ല. തിമിരം പുരോഗമിക്കുന്ന തോടെ താഴെപ്പറയുന്ന ലക്ഷണങ്ങൾ ഉണ്ടാകാം:

  • കാഴ്ച ക്രമേണ മങ്ങുക.

  • വായനയ്ക്കും വാഹനമോടിക്കലിനും ബുദ്ധിമുട്ട് അനുഭവപ്പെടുക.

  • കണ്ണട മാറ്റിയിട്ടും കാഴ്ച തൃപ്തികരമാകാതിരിക്കുക.

  • രാത്രിയിൽ വാഹനമോടിക്കുമ്പോൾ കൂടുതൽ ബുദ്ധിമുട്ട് അനുഭവപ്പെടുക.

  • വെളിച്ചത്തിനു ചുറ്റും വലയം കാണുക.

  • നിറങ്ങളുടെ തെളിച്ചം കുറഞ്ഞതായി തോന്നുക.

“എല്ലാം കാണുന്നുണ്ട്; പക്ഷേ മൂടൽമഞ്ഞിലൂടെ കാണുന്നതുപോലെ”-തിമിരബാധിതർ സാധാരണയായി വിവരിക്കുന്ന അനുഭവം ഇതാണ്.

തിമിരം പ്രായമായവരിൽ മാത്രം
ഉണ്ടാകുന്നതാണോ?

അല്ല. പ്രായമാണ് തിമിരത്തിന്റെ ഏറ്റവും സാധാരണമായ കാരണമെങ്കിലും മറ്റു പല ഘടകങ്ങളും തിമിരത്തിന്റെ വളർച്ചയ്ക്ക് കാരണമാകുകയോ അതിനെ ത്വരിതപ്പെടുത്തുകയോ ചെയ്യാം.

പ്രായാധിക്യവുമായി ബന്ധപ്പെട്ട തിമിരം പൂർണമായും തടയാൻ കഴിയുന്ന ഉറപ്പായ മാർഗമില്ല. എങ്കിലും ചില മുൻകരുതലുകൾ തിമിരം ഉണ്ടാകാനുള്ള സാധ്യത കുറയ്ക്കാനും അതിന്റെ വളർച്ച വൈകിക്കാനും സഹായിച്ചേക്കാം.
പ്രായാധിക്യവുമായി ബന്ധപ്പെട്ട തിമിരം പൂർണമായും തടയാൻ കഴിയുന്ന ഉറപ്പായ മാർഗമില്ല. എങ്കിലും ചില മുൻകരുതലുകൾ തിമിരം ഉണ്ടാകാനുള്ള സാധ്യത കുറയ്ക്കാനും അതിന്റെ വളർച്ച വൈകിക്കാനും സഹായിച്ചേക്കാം.

പ്രമേഹം, പുകവലി, കണ്ണിനേൽക്കുന്ന പരിക്കുകൾ, സ്റ്റിറോയ്ഡ് മരുന്നുകളുടെ ദീർഘകാല ഉപയോഗം, അമിതമായ അൾട്രാവയലറ്റ് കിരണ സമ്പർക്കം, കണ്ണിനകത്തെ ചില രോഗങ്ങൾ, പാരമ്പര്യ–ജനിതക ഘടകങ്ങൾ എന്നിവ അവയിൽ പ്രധാനമാണ്.

ചികിത്സ വൈകിയാൽ കാഴ്ച കൂടുതൽ മങ്ങുകയും ചിലരിൽ ഗുരുതരമായ കാഴ്ചനഷ്ടത്തിലേക്ക് നയിക്കുകയും ചെയ്യാം. ജന്മനാ ഉണ്ടാകുന്ന തിമിരവും ബാല്യത്തിലുണ്ടാകുന്ന തിമിരവും കുട്ടികളിൽ കാണപ്പെടാം. കുട്ടികളിലെ തിമിരം നേരത്തേ കണ്ടെത്തി ചികിത്സിക്കേണ്ടത് കാഴ്ചയുടെ സ്വാഭാവിക വികാസത്തിന് ഏറെ പ്രധാനമാണ്.

എന്തെല്ലാമാണ്
മുൻകരുതലുകൾ?

പ്രായാധിക്യവുമായി ബന്ധപ്പെട്ട തിമിരം പൂർണമായും തടയാൻ കഴിയുന്ന ഉറപ്പായ മാർഗമില്ല. എങ്കിലും ചില മുൻകരുതലുകൾ തിമിരം ഉണ്ടാകാനുള്ള സാധ്യത കുറയ്ക്കാനും അതിന്റെ വളർച്ച വൈകിക്കാനും സഹായിച്ചേക്കാം.

  • ആരോഗ്യകരമായ ജീവിതശൈലി പിന്തുടരുക.

  • പ്രമേഹം നന്നായി നിയന്ത്രിക്കുക.

  • പുകവലി ഒഴിവാക്കുക.

  • മദ്യപാനം നിയന്ത്രിക്കുകയോ ഒഴിവാക്കുകയോ ചെയ്യുക.

  • അമിതമായ സൂര്യപ്രകാശത്തിൽ നിന്ന് കണ്ണുകളെ സംരക്ഷിക്കുക.

  • ആവശ്യമുള്ളപ്പോൾ അൾട്രാവയലറ്റ് സംരക്ഷണമുള്ള കണ്ണട ഉപയോഗിക്കുക.

  • നേത്രരോഗവിദഗ്ധന്റെ നിർദേശമില്ലാതെ സ്റ്റിറോയ്ഡ് മരുന്നുകൾ ദീർഘകാലം ഉപയോഗിക്കാതിരിക്കുക.

  • നിശ്ചിത ഇടവേളകളിൽ നേത്രപരിശോധന നടത്തുക.

തിമിരത്തിനുള്ള ചികിത്സ എന്താണ്?

തിമിരം മാറ്റാൻ തുള്ളിമരുന്നുകളോ വിറ്റാമിൻ ഗുളികകളോ ഫലപ്രദമാണെന്നതിന് നിലവിൽ വിശ്വസനീയമായ ശാസ്ത്രീയ തെളിവുകളില്ല. തിമിരത്തിനുള്ള ഫലപ്രദമായ ചികിത്സ ശസ്ത്രക്രിയയാണ്.

ആധുനിക സാങ്കേതികവിദ്യയായ ഫാക്കോ ഇമൾസിഫിക്കേഷൻ രീതിയിൽ ഏകദേശം 2.2–2.8 മില്ലിമീറ്റർ വലുപ്പമുള്ള ചെറിയ മുറിവിലൂടെ അൾട്രാസൗണ്ട് തരംഗങ്ങൾ ഉപയോഗിച്ച് തിമിരം ബാധിച്ച ലെൻസ് ചെറുകണങ്ങളാക്കി നീക്കം ചെയ്യുന്നു. തുടർന്ന് അതേ സ്ഥാനത്ത് കൃത്രിമ ലെൻസ് അഥവാ ഇൻട്രാഒക്യുലർ ലെൻസ്—ഐ.ഒ.എൽ. (IOL) സ്ഥാപിക്കുന്നു.

സാധാരണയായി തുള്ളിമരുന്ന് ഉപയോഗിച്ചുള്ള പ്രാദേശിക അനസ്തീഷ്യയിൽ ശസ്ത്രക്രിയ നടത്താം. പലർക്കും കുത്തിവെപ്പോ തുന്നലോ ആവശ്യമായി വരില്ല. വേദന വളരെ കുറവായിരിക്കും; ദീർഘകാല വിശ്രമവും സാധാരണയായി വേണ്ടിവരാറില്ല. എന്നാൽ രോഗിയുടെ കണ്ണിന്റെ അവസ്ഥയനുസരിച്ച് ശസ്ത്രക്രിയാരീതിയിലും അനസ്തീഷ്യയിലും വ്യത്യാസങ്ങൾ ഉണ്ടായേക്കാം.

തിമിരം പൂർണമായി “പാകമാകുന്നതുവരെ” കാത്തിരിക്കണമെന്ന ധാരണ ശരിയല്ല. കാഴ്ചക്കുറവ് രോഗിയുടെ വായന, യാത്ര, വാഹനമോടിക്കൽ, ജോലി, സ്വയംപരിചരണം തുടങ്ങിയ ദൈനംദിന പ്രവർത്തനങ്ങളെ ബാധിക്കുന്ന ഘട്ടത്തിലാണ് ശസ്ത്രക്രിയ പരിഗണിക്കേണ്ടത്. ശസ്ത്രക്രിയ അനാവശ്യമായി നീട്ടിവെച്ചാൽ ചിലരിൽ കണ്ണിലെ മർദം കൂടുക, വേദന ഉണ്ടാകുക, ശസ്ത്രക്രിയ കൂടുതൽ സങ്കീർണമാകുക തുടങ്ങിയ പ്രശ്നങ്ങൾ സംഭവിക്കാം.

തിമിര ശസ്ത്രക്രിയ

കാഴ്ചയ്ക്കപ്പുറം രോഗിയുടെ ജീവിതശൈലി, തൊഴിൽ, വായനയുടെയും ദൂരക്കാഴ്ചയുടെയും ആവശ്യകത, കണ്ണിലെ മറ്റു രോഗങ്ങൾ എന്നിവ വിലയിരുത്തിയശേഷമാണ് അനുയോജ്യമായ ഐ.ഒ.എൽ. തിരഞ്ഞെടുക്കുന്നത്.

മോണോഫോക്കൽ, മൾട്ടിഫോക്കൽ, ടോറിക് തുടങ്ങിയ വിവിധതരം ലെൻസുകൾ ലഭ്യമാണ്. ഓരോ ലെൻ സിനും അതിന്റേതായ ഗുണങ്ങളും പരിമിതികളുമുള്ളതിനാൽ നേത്രരോഗവിദഗ്ധനുമായി വിശദമായി ചർച്ച ചെയ്തശേഷം തീരുമാനമെടുക്കണം.

പ്രായമായവരിലെ കാഴ്ചക്കുറവ് അവരുടെ ആത്മവിശ്വാസത്തെയും സ്വാതന്ത്രത്തെയും ജീവിതനിലവാരത്തെയും ബാധിച്ചേക്കാം. പടികളും വഴിയിലെ തടസ്സങ്ങളും വ്യക്തമായി കാണാനാകാത്തത് വീഴ്ചയ്ക്കും പരിക്കുകൾക്കും സാധ്യത വർധിപ്പിക്കുന്നു. വിജയകരമായ തിമിരശസ്ത്രക്രിയ കാഴ്ച മെച്ചപ്പെടുത്തുന്നതിനൊപ്പം വ്യക്തിയുടെ സ്വാശ്രയത്വവും സാമൂഹികജീവിതവും മെച്ചപ്പെടുത്താൻ സഹായിക്കും.

തിമിരം നീക്കിയശേഷവും പ്രതീക്ഷിച്ചത്ര കാഴ്ച ലഭിക്കാത്ത ചില സാഹചര്യങ്ങളുണ്ട്. ഗ്ലോക്കോമ, ഡയബറ്റിക് റെറ്റിനോപ്പതി, പ്രായാധിക്യവുമായി ബന്ധപ്പെട്ട മാക്യുലാർ ഡിജനറേഷൻ, കോർണിയയിലോ ഒപ്റ്റിക് നാഡിയിലോ ഉള്ള രോഗങ്ങൾ തുടങ്ങിയവ കാഴ്ചയെ ബാധി ക്കാം. അതിനാൽ ശസ്ത്രക്രിയയ്ക്കുമുമ്പ് സമഗ്രമായ നേത്രപരിശോധന ആവശ്യമാണ്.

ഫെംറ്റോസെക്കൻഡ് ലേസർ അസിസ്റ്റഡ് കാറ്ററാക്ട് സർജറി, റോബോട്ടിക് സഹായത്തോടെയുള്ള തിമിരശസ്ത്രക്രിയ തുടങ്ങിയ നൂതന സാങ്കേതികവിദ്യകളിൽ ഗവേഷണവും വികസനവും നടന്നുകൊണ്ടിരിക്കുന്നു.

എന്നാൽ രോഗിയുടെ കണ്ണിന്റെ അവസ്ഥയും ശസ്ത്രക്രിയയുടെ ആവശ്യകതയും പരിഗണിച്ചാണ് ഏറ്റവും അനുയോജ്യമായ രീതി തിരഞ്ഞെടുക്കേണ്ടത്. തിമിരം കണ്ണിലെ ലെൻസിനെ മങ്ങിയതാക്കിയേക്കാം; ജീവിതത്തെ മങ്ങാൻ അനുവദിക്കരുത്.

READ: കുട്ടികളിലെ
മലബന്ധം

ശസ്ത്രക്രിയയുടെ കഥ:
ശിലായുഗം മുതൽ ഇന്നു വരെ

യൂറോ ഓങ്കോളജി:
കൃത്യമായ രോഗനിർണയവും
ആധുനിക ചികിത്സയും

മഞ്ഞപ്പിത്തം:
കാരണങ്ങളും
ചികിത്സയും

വെള്ളനിറം പൂശിയ നാവ്

ഗർഭകാലത്തെ
മാനസികാരോഗ്യ
പ്രശ്‌നങ്ങൾ

പ്രസവസമയത്തെ സങ്കീർണതകളും
മുൻകരുതലുകളും

സിസേറിയൻ:
അറിയേണ്ടതെല്ലാം

ഗര്‍ഭകാലത്ത്
ശ്രദ്ധിക്കേണ്ട
രോഗങ്ങള്‍

മാതൃമരണം
എന്തുകൊണ്ട്?

ഗർഭകാല പരിശോധനകളും
അവയുടെ പ്രാധാന്യവും

അമ്മയ്ക്ക്
സുഖമാണോ?

ഗോൾഡൻ അവർ പ്രോജക്ട്

കൗമാരത്തിനപ്പുറത്തെ
പ്രതിരോധം

ആരോഗ്യരാഗങ്ങൾ

‘IMA നമ്മുടെ ആരോഗ്യം’
പത്രാധിപർ സംസാരിക്കുന്നു

▮

‘ IMA നമ്മുടെ ആരോഗ്യം’ മാസികയുടെ വരിക്കാരാകാം

Comments