നമ്മുടെ ശരീരത്തിന്റെ എല്ലാ ചലനങ്ങളുടെയും പിന്നിൽ, നിശ്ശബ്ദമായി പ്രവർത്തിക്കുന്ന ഒരു സംവിധാനമുണ്ട്- മസ്തിഷ്കത്തിലെ നാഡീവ്യവസ്ഥ. നമ്മുടെ കൈ ഉയരുന്നതു മുതൽ ചിരി വരുന്നതു വരെ, നടക്കുന്നതു മുതൽ ഭക്ഷണം കഴിക്കുന്നതിൽ വരെ, ഈ നാഡീവ്യവസ്ഥ അത്ഭു തകരമായ കൃത്യതയോടെയാണ് പ്രവർത്തിക്കുന്നത്. എന്നാൽ ഒരിക്കൽ ഈ സംവിധാനത്തിൽ തകരാറുണ്ടാകുമ്പോൾ, ശരീരത്തിന്റെ ഈ പ്രകൃതിദത്തതാളം മന്ദമാവുകയും ജീവിതത്തിൽ പലതരത്തിലുള്ള വെല്ലുവിളികൾ ഉയരുകയും ചെയ്യും. അത്തരമൊരു അവസ്ഥയാണ് പാർക്കിൻസൺസ് രോഗം.
ഇത് പ്രധാനമായും മുതിർന്നവരിൽ കാണപ്പെടുന്ന രോഗമാണെങ്കിലും, ഇന്നത്തെ ജീവിതശൈലിയും പരിസ്ഥിതി ഘടകങ്ങളും കാരണം കുറഞ്ഞ പ്രായ ക്കാരിലും രോഗലക്ഷണങ്ങൾ കാണപ്പെടുന്നുണ്ട്. പക്ഷേ ആശ്വാസകരമായ കാര്യം, ഇത് ഭയപ്പെടുത്തുന്ന ഒരു രോഗമല്ല, അതിനെക്കുറിച്ചുള്ള ശരിയായ അറിവും സമഗ്ര ചികിത്സയും ലഭിച്ചാൽ രോഗിയ്ക്കും കുടുംബത്തിനും ആത്മവിശ്വാസത്തോടെ ജീവിതം മുന്നോട്ട് കൊണ്ടുപോകാൻ പറ്റുന്നു എന്നതാണ്.
എന്താണ് പാർക്കിൻസൺസ് രോഗം?
പാർക്കിൻസൺസ് രോഗം ഒരു ന്യൂറോ ഡിജെനറേറ്റീവ് ഡിസോർഡർ ആണ്. മസ്തിഷ്ക ത്തിൽ ഡോപ്പമിൻ എന്ന രാസവസ്തുവിനെ ചില പ്രത്യേക നാഡീകോശങ്ങൾ നിർമ്മിക്കുന്നു. ഈ ഡോപ്പമിൻ ശരീരത്തിന്റെ സുതാര്യമായ ചലനങ്ങൾക്കും നിയന്ത്രണങ്ങൾക്കും അടിസ്ഥാനമാണ്.
പാർക്കിൻസൺസ് രോഗത്തിൽ ഈ നാഡികോശങ്ങൾ ക്രമേണ നശിക്കുമ്പോൾ ഡോപ്പമിൻ കുറയുന്നു. അതിന്റെ ഫലമായി ചലനങ്ങൾ വൈകുകയും, ശരീരഭാരം ബാലൻസ് ചെയ്യാൻ ബുദ്ധിമുട്ടുകയും, കൈകാലുകളിൽ വിറയൽ (tremor) ഉണ്ടാകുകയും ചെയ്യും. ഇത് ഒരു പ്രോഗ്രസീവ് രോഗമാണ് - വർഷങ്ങൾ കൊണ്ട് രോഗം ഗുരുതരമാവുന്ന അവസ്ഥ.
സാധാരണയായി 60 വയസ്സിന് മുകളിലുള്ളവർക്ക് ഇതിന്റെ സാദ്ധ്യത കൂടുതലാണ്. എന്നാല് ചിലര്ക്ക് 40–50 വയസ്സിലും യുവ പ്രായത്തിൽ പോലും വരാം.
പുരുഷന്മാർക്ക് സ്ത്രീകളെക്കാൾ അല്പം കൂടുതലായി കണ്ടുവരുന്നു.
കുടുംബത്തിൽ നേരത്തെ ഇത്തരം രോഗമുള്ളവർക്ക് സാധ്യത കൂടുതലാണ്.
മുഖ്യ ലക്ഷണങ്ങൾ
പാർക്കിൻസൺസ് രോഗം ശരീരചലനത്തെ ബാധിക്കുന്ന ഒരു അവസ്ഥയാണ്. ലക്ഷണങ്ങൾ ആദ്യം ചെറിയതായിരിക്കും, പക്ഷേ കാലക്രമേണ വ്യക്തത വർദ്ധിക്കും.
വിറയൽ (നടുങ്ങൽ-Tremor):
വിശ്രമസമയത്ത് കയ്യിലോ വിരലുകളിലോ ചെറിയ വിറയൽ ഉണ്ടാകും.
ഉദാഹരണം: കൈ മടിയിൽ വെച്ചിരിക്കുമ്പോൾ ചെറുതായി കുലുങ്ങൽ.
അൽപം സമ്മർദ്ദമുള്ള അവസ്ഥകളിൽ വിറയൽ കൂടുതൽ പ്രത്യക്ഷമാകും.
ചലനങ്ങൾ മന്ദമാകുക (Bradykinesia):
മുമ്പ് അഞ്ചു സെക്കൻഡിൽ ചെയ്യാറുള്ള പ്രവർത്തനങ്ങൾക്ക് ഇപ്പോൾ 20–30 സെക്കൻഡ്.
ഉദാഹരണങ്ങൾ: ഷർട്ടിന്റെ ബട്ടണുകൾ ഇടാൻ സമയം വർദ്ധിക്കുക, നടക്കുമ്പോൾ വേഗത കുറയുക, എഴുത്ത് ചെറുതായി മാറുക, നാണയങ്ങൾ എടുക്കുന്നതുപോലെയുള്ള ചെറിയ പ്രവർത്തനങ്ങളിൽ ബുദ്ധിമുട്ട്.
വെറുങ്ങലിപ്പ് (Stiffness):
ശരീരം ‘ലൂസ്’ ആവാതെ, കൂട്ടിച്ചുരുങ്ങിയ മസിലുകൾ പോലെ വെറുങ്ങലിക്കുന്നു.
പ്രഭാതസമയത്ത് കൂടുതലായി ഇത് അനുഭവപ്പെടും.
ബാലൻസ് പ്രശ്നങ്ങൾ:
നടക്കുമ്പോൾ അല്പം മുന്നോട്ട് ചായുന്ന അവസ്ഥ, അസ്ഥിരത, വീഴ്ചകൾ വർദ്ധിക്കൽ എന്നിവ കൂടുതലായി കാണപ്പെടുന്നു.
പാർക്കിൻസൺസ് രോഗിയുടെ ഏറ്റവും വലിയ പ്രതിസന്ധി ചിലപ്പോഴെങ്കിലും ചലനവൈകല്യമല്ല മറിച്ച് അതിനേക്കാൾ ദൈനംദിന ജീവിതത്തെ ബാധിക്കുന്ന മറ്റു പ്രശ്നങ്ങൾ (non-motor symptoms) ആണ്. ഉറക്കമില്ലായ്മ, മലബന്ധം, വിഷാദം/ഉത്കണ്ഠ, അസാധാരണമായ വിയർപ്പ്, തല കറക്കം, ഓർമ്മശക്തി കുറയുക, വാസന തിരിച്ചറിയാനുള്ള കഴിവ് കുറയുക. ഈ പ്രശ്നങ്ങൾ രോഗി യെ മാത്രമല്ല, കുടുംബത്തെയും മാനസികമായി ബാധിക്കുന്നവയാണ്.
രോഗകാരണം
ശാസ്ത്രലോകം ഇപ്പോഴും ഈ രോഗത്തിന്റെ കൃത്യമായ കാരണം കണ്ടെത്തിയിട്ടില്ല.
പ്രധാന സാധ്യതകൾ
വയസ്സാകുന്നതിന്റെ ഭാഗമായ സ്വാഭാവിക കോശനാശം, വംശപരമ്പരാഗത ജീനുകൾ, പരിസ്ഥിതി വിഷങ്ങൾ (കീടനാശിനികൾ, പുല്ല് നാശിനികൾ), തലക്കു പറ്റിയ വലിയ പരിക്കുകൾ, വ്യായാമക്കുറവ്.
രോഗം തിരിച്ചറിയുന്നത് എങ്ങനെ?
പാർക്കിൻസൺസ് കണ്ടെത്താൻ ഒരു പ്രത്യേക രക്തപരിശോധനയോ സ്കാനോ ഇല്ല. അതിനാൽ രോഗനിർണ്ണയം പ്രധാനമായും ന്യുറോളജിസ്റ്റിന്റെ ക്ലിനിക്കൽ പരിശോധനയെ ആശ്രയിച്ചാണ്.
പരിശോധന
ചലനത്തിന്റെ വേഗത, വിറയൽ സ്വഭാവം, മസിൽ വെറുങ്ങലിപ്പ്, നടത്തത്തിന്റെ പ്രത്യേകതകൾ, മരുന്നിനോടുള്ളള്ള പ്രതികരണം.
MRI/CT സ്കാനുകൾ മറ്റ് രോഗങ്ങൾ ഇല്ലെന്നുറപ്പിക്കാനാണ് ഉപയോഗിക്കുന്നത്.
ചികിത്സാമാർഗങ്ങൾ,
പ്രതീക്ഷ നൽകുന്ന ഇടപെടലുകൾ.
പാർക്കിൻസൺസിന് സ്ഥിരപരിഹാരമില്ലെങ്കിലും, അതിനെ വളരെ ഫലപ്രദമായി നിയന്ത്രിക്കാം. ഇന്ന് ലഭ്യമായ ചികിത്സകൾ രോഗികളുടെ ജീവിതനിലവാരം ഉയർത്തുന്നവയാണ്.
മരുന്നുകൾ:
പാർക്കിൻസൺസ് ചികിത്സയുടെ താങ്ങൂതൂൺ മരുന്നുകളാണ്.
- Levodopa / Carbidopa: ഏറ്റവും ഫലപ്രദമായ മരുന്ന്. ഡോപ്പമിന്റെ പ്രവർത്തനം പുനഃസ്ഥാപിക്കാനും ചലനങ്ങൾ മെച്ചപ്പെടുത്താനും സഹായിക്കുന്നു.
-Dopamine agonists Pramipexole, Ropinirole: ഡോപ്പമിനെ അനുകരിച്ചുകൊണ്ട് പ്രവർത്തനം നടത്തുന്നു.
-MAO-B inhibitors, Rasagiline, Selegiline: ഡോപ്പമിൻ നില ഉയർത്തുകയും നിലനിറുത്തുകയും ചെയ്യുന്നു.
മരുന്നുകളുടെ ഡോസും സമയക്രമവും രോഗിയുടെ ആവശ്യത്തിനനുസരിച്ച് മാറ്റണം. അതിനാൽ രോഗി സ്വയം മരുന്ന് മാറ്റരുത്, ഡോക്ടറുടെ നിർദ്ദേശം
നിർബന്ധമായും പാലിക്കണം.
വ്യായാമം: രോഗനിയന്ത്രണത്തിന്റെ
നിശ്ശബ്ദ ആയുധം.
ശാസ്ത്രപഠനങ്ങൾ വ്യക്തമാക്കുന്നത്: തുടർച്ചയായ വ്യായാമം പാർക്കിൻസൺസ് രോഗത്തിന്റെ പുരോഗതി മന്ദമാക്കുന്നു.
വ്യായാമത്തിന്റെ പ്രധാന ഗുണങ്ങൾ:
ചലനങ്ങൾ മെച്ചപ്പെടുത്തുന്നു.
സ്റ്റിഫ്നസ് കുറയുന്നു.
ബാലൻസ് മെച്ചപ്പെടുത്തുന്നു.
വീഴ്ചകൾ കുറയുന്നു.
മനസ്സിന് ഉന്മേഷം നൽകുന്നു.
ഏതൊക്കെ വ്യായാമമാണ് നല്ലത്?
30–40 മിനിറ്റ് നടത്തം, സ്ട്രെച്ചിങ്, ഫിസിയോതെറാപ്പി, ബാലൻസ് ട്രെയിനിംഗ്.
സ്പീച്ച് തെറാപ്പി
സംസാരം ശബ്ദം കുറഞ്ഞു പോകുന്നവർക്കും, ഭക്ഷണം വിഴുങ്ങാനായുള്ള ബുദ്ധിമുട്ടുള്ള വർക്കും വളരെ ഗുണം ചെയ്യും
ഡീപ്പ് ബ്രെയിന് സ്റ്റിമുലേഷന്
(Deep Brain Stimulation- DBS)
മരുന്നുകൾ കൊണ്ടു നിയന്ത്രിക്കാൻ സാധിക്കാത്തപ്പോൾ DBS ശസ്ത്രക്രിയ വലിയ ആശ്വാസം നൽകുന്നു.
മസ്തിഷ്കത്തിലെ നിർദ്ദിഷ്ട ഭാഗങ്ങളിൽ സൂക്ഷ്മ ഇലക്ട്രോഡുകൾ സ്ഥാപിച്ച് ചലനങ്ങളെ സ്ഥിരതയോടെ നിയന്ത്രിക്കുന്ന രീതിയാണിത്. ലോകമെമ്പാടും ആയിരക്കണക്കിന് രോഗികൾക്ക് ഇതിലൂടെ മികച്ച ഫലം ലഭിച്ചിട്ടുണ്ട്.
ജീവിതശൈലിയിൽ ചെറിയ മാറ്റങ്ങൾ വലിയ ഫലങ്ങൾ സൃഷ്ടിക്കും.
ഭക്ഷണം:
ഫൈബർ സമൃദ്ധമായ ഭക്ഷണം, മതിയായ വെള്ളം, മലബന്ധം ഒഴിവാക്കാൻ പഴങ്ങൾ, പച്ചക്കറികൾ.
വീട്ടിലെ സുരക്ഷ:
വഴിയിലുള്ള ചെറുവസ്തുക്കൾ നീക്കംചെയ്യുക, ബാത്ത്റൂമിൽ വഴുക്കൽ (slip) വിരുദ്ധ മാറ്റുകൾ, സപ്പോർട്ട് റെയിൽ (Support rail) ആവശ്യാനുസരണം സ്ഥാപിക്കൽ, നല്ല ലൈറ്റിംഗ് (തെളിച്ചമുള്ള വെളിച്ചം).
മാനസികാരോഗ്യം:
പാർക്കിൻസൺസ് രോഗികൾക്ക് വിഷാദം, ഭയം എന്നിവ സാധാരണമാണ്. കുടുംബത്തി ന്റെ പിന്തുണ, സഹകരണം—ഇവയാണ് ഏറ്റവും വലിയ മരുന്ന്.
കുടുംബവും സമൂഹവും ചെയ്യേണ്ടത്
പാർക്കിൻസൺസ് രോഗമുള്ളവർക്ക് “പരിധിയുള്ളവർ” ആണ് അവർ എന്നു തോന്നിക്കരുത്. അവർക്ക് കുറച്ചു കൂടുതൽ സമയം, കുറച്ചു കൂടുതൽ സഹിഷ്ണുത മാത്രമാണ് വേണ്ടത്.
കുടുംബം ചെയ്യേണ്ടത്:
ചെയ്യാനാവുന്ന കാര്യങ്ങൾ അവർക്ക് ചെയ്യാൻ അവസരം നൽകുക.
ദിനചര്യ ക്രമീകരണത്തിന് സഹായിക്കുക.
മരുന്ന്, സമയത്ത് നൽകുന്ന കാര്യത്തിൽ ശ്രദ്ധ.
സൗഹൃദപരമായ അന്തരീക്ഷം സൃഷ്ടിക്കുക.
സമൂഹം മനസ്സിലാക്കേണ്ടത്:
പാർക്കിൻസൺസ് ഒരു രോഗമാണ്, അതിനാൽ രോഗികൾക്ക് മനസ്സിലാക്കലും സഹാനുഭൂതിയും ആവശ്യമുണ്ട്.
പാർക്കിൻസൺസ് രോഗം ഒരു ദീർഘകാല അവസ്ഥയാണ്. എന്നാൽ അത് ജീവിതത്തെ പൂർണ്ണമായി തകർക്കുന്ന രോഗമല്ല. ശരിയായ ചികിത്സ, ജീവിതശൈലി മാറ്റങ്ങൾ, വ്യായാമം, കുടുംബപിന്തുണ ഇവയിലൂടെ രോഗിയായ ഒരാൾക്ക് ജീവിതത്തിന്റെ താളം തിരിച്ചുപിടിക്കാനാവും.
ഒരു പാർക്കിൻസൺസ് രോഗിയുടെ ജീവിത യാത്രയിൽ കുടുംബത്തിന്റെ സ്നേഹം, സമൂഹത്തിന്റെ പിന്തുണ, ആരോഗ്യപ്രവർത്തകരുടെ നിരീക്ഷണം എന്നിവ വളരെ പ്രാധാന്യമേറി യവയാണ്.
വായിക്കാം: കൗമാരക്കാരിലെ
പൊണ്ണത്തടിയും
പരിഹാരവും
ന്യൂറോസർജറിയിലെ
ആധുനിക സങ്കേതങ്ങൾ
ചികിത്സാച്ചെലവ്,
അനാവശ്യ ചികിത്സ, രോഗാതുരത:
കേരളത്തിന്റെ ആരോഗ്യ അതിജീവന വെല്ലുവിളികൾ
അനസ്തീഷ്യയുടെ
പഴയ മുഖം,
പുതിയ മുഖം
പനിബാധിതരുടെ
രോഗനിർണയം,
ഒരു ഡോക്ടറുടെ അനുഭവം
മറക്കാനാകാത്ത രോഗി:
ഐൻ, പ്രിയപ്പെട്ട ഐൻ
ക്ലിനിക്കൽ എസ്റ്റാബ്ലിഷ്മെന്റ് ബില്ലും
കോർപറേറ്റ് അധിനിവേശവും;
ചില അശുഭചിന്തകൾ
‘മാക്കോ റോബോട്ടിക്’:
കാൽമുട്ട്, ഇടുപ്പ്
മാറ്റിവെക്കലിന്
നൂതന ശസ്ത്രക്രിയ
നട്ടെല്ലിന്റെ
അസ്വാഭാവിക വളവ്,
എന്താണ് ചികിത്സ?
കാൽമുട്ട് മാറ്റിവയ്ക്കേണ്ടത് എപ്പോൾ?
നാം അവഗണിക്കുന്നുണ്ടോ കൈകാലുകളുടെ വൈകല്യങ്ങളെ?
അസ്ഥികളുടെ ബലക്ഷയം
എന്ന നിശ്ശബ്ദ ഭീകരൻ
കുട്ടികളിൽ
ജന്മനാ ഉണ്ടാകുന്ന അസ്ഥിവൈകല്യങ്ങൾ
നടക്കാതെ പോകുന്ന
പുതുവത്സര പ്രതിജ്ഞകളും
ചില ജൈവശാസ്ത്ര വസ്തുതകളും
▮
‘ IMA നമ്മുടെ ആരോഗ്യം’ മാസികയുടെ വരിക്കാരാകാം
